Mattiu Defuns da Trun è musicist, chantadur, chantautur rumantsch e cumponist. Il mument lavura el vid ses proxim album che sa numna «Aura». Quel vegn edì il favrer 2026 e fin lura cumparan adina puspè singles che vegnan ad esser sin quest album, in process ch’ha cuzzà dus onns.

Mattiu Defuns di da sasez ch’el saja artist da vita. El manegia cun quai ch’el vegn da finanziar sia vita cun chaussas ch’el fa gugent. Ma el saja en emprima lingia schon musicist. Sia vusch descriva Mattiu Defuns sco «rauca, loma, chauda». Ses stil da musica descriva Mattiu Defuns sco chantautur, dentant en ina direcziun sferica cun tuns lungs, cumbinà cun registraziuns audiovisualas da la natira, maschadà cun in zic indi. Pia ina maschaida da singer-songwriter-sferic-indi.