On Tottaama Konngol

Alkamisa 26 lewru 3ɓuru, yewtere men no nawra en hannde to baŋŋe coftal ɓalli. Mohamed SALAH, sellinii hecci hanki iwugol makko Liverpool e timmoode oo saison 2025-2026, e 6ɓuru hitaande nde wonuɗen e mun. Oo yeesoojo walla atakanjon Liverpool fellitii waynondirgol e ngal teekodal ɓawto duuɓi 9 ɗi o woni e maggal.

E nder wideo lollinaaɗo e dow mejaaji renndo, oo fijoowo Egyptnaajo mo duuɓi 33, no anndini wonnde saayi on hewti ka o iwa Liverpool. Gila Mohamed SALAH hewtii e ngal teekoɗal e hitaande 2017, o naadii loggi 255, e nder kawrite 435 fijaaɗe. Salah dañii kadi Premier League e kitaale 2020, 2025 wonndude e ligue des Champions e hitaande 2019

Ko holɗum iwugol makko Liverpool waawi battinnde ?

Alarba 24 lewru 3ɓuru, yewtere men no nawra en Gine, nokku to ardiiɓe ɓen holliti wonnde ɓe fawii junngo e yimɓe 14yo tuumaaɓe jeyeede e wallondirooɓe e pelle kuliyankooje JNIM wonuɗe Mali e Burkina Faso. Hino jeyaa e nanngaaɓe ɓee ginenaajo e ɓiɓɓe leyɗe goɗɗe wonndude e keerɗuɗe e maɓɓe.

Ɓee nanngaa ko e ca’e Kankan Siguiri e Mandiana fuɗnaange leydi ndin, gila rowani. Ɗum non laatike ɓawto tefoore nde ardiiɓe Gine udditi gila e nayaɓuru hitaande faltiinde, nde ɓe humpitii e nder mun kadi fii ngoomuuji 3 humpitooji waɗaaɗi e dow whatsapp, ɗi yimɓe ko ɓuri teemeɗɗe njowo winndi.

Ko holno taskorɗon oo alhaali?

Hannde e talaata 24 lewru 3ɓuru, yewtere men no nawra en hannde Mali. Taw si ardiɓe leydi ndii siifidii aadodal e pelle kuliyankooje Mali? Ngal ko lamndal ngal yoga habbii jaabawol mun. Ɗum ko caggal nde laamu Mali accitii kuliyankooɓe ɗuuɗuɓe yontere faltiinde, kuliyankooɓe timmuɓe 200ɗo jagganooɓe.

Tippude e kumpite, wano immorɗe e jaaynde AFP, ɓee konunkooɓe ardiiɓe Mali woppitii ɓee kuliyankooɓe ngam dartinde uddere nde kuliyankooɓe JNIM waɗi e hoore Mali lebbi yawtuɗi. uddere saabiinde ŋakkere kuɓɓam e nder leydi ndii. Kono ɓee ardiiɓe Mali hollaani huunde ko faatii e alhaali accitugol ɓee kuliyankooɓe.

Ko holno taskorɗon ngol accitugol ɓee kuliyankooɓe?

Holko saabi konunkooɓe ardiiɓe Mali yoppitii ɓee kuliyankooɓe?

Tawu si accitugol ɓee kuliyankooɓe waaway ñawndude caɗeele ɓiɓɓe Mali?

E altine 23 lewru tataɓuru, hiɗen yewta hannde ko faati e alhaali ndiyam laaɓuɗam e nder duunde Afrik, ɗum ko tippude e ñallal adunayankowal heertinanaangal ndiyam. wuuniteteengal ñannde 22 lewru 3ɓuru hitaande kala.

Ŋakkere maa mi wi’a caɗeele dañugol ndiyam laaɓuɗam no taskaa e nder yoga e leyɗe Afrik. Ko fawi 30 e nder teemedere ɓiɓɓe Afrik alaa e dañude ndiyam laaɓuɗam, yareteeɗam. E Ɓi’ol Dental Adunaaru daraniindu cellal OMS, yimɓe miliyon 300 e nder adunaaru nduu seppay itti silmaaji 30 haa yamnde wootere, fii heɓugol ndiyam laaɓuɗam. Dental Afrik, UA no holli wonnde miliyonji miliyonji yimɓe alaa e heɓude ndiyam yareteeɗam. Ɗee ko caɗeeele taskaaɗe hitaande kala hay e saayi ndunngu. Ko caɗeele goote ɗen yoga e ɓiɓɓe Afrik wuuri gila duuɓi

Enee e Miijo mon, ko holno leyɗeele ɗen seertirta e ɗee Caɗeele walla ŋakkere ndiyam? 

Ko holno yiiruɗon darnde ardiiɓe leyɗeele mon e haɓugol ŋakkere ndiyam laaɓuɗam nde ɓiɓɓe Afrik wuuri.

Alkamisa 19 lewru 3ɓuru, hiɗen yewta hannde ko faati e alhaali keeri hakkunde leyɗe. Ko honno taskorɗon pooɗondire walla lurre keeri waɗooje hakkunde yoga e leyɗe Afrik? Alhaali on taskaama ko ɓooyaali hakkunde Gine e Sarlon, hakkunde Gine e Liberia ko faati e maayo Makona, keerol hakkunde leyɗe ɗee ɗiɗe.

Jonte yawtuɗe, ɗee lurre keeri hakkunde ɗee leyɗe kawtirɗe, jibinii haa hooreeɓe tato Gine, Sarlon e Liberia tummbondiri Conakry ñannde 16 lewru ndu wonuɗen e mun, ngam tabitinde jam e kisal to keerol hakkunde leyɗe maɓɓe.

Ko holɗum haana waɗeede ngam tabintingol keeri hakkunde leyɗe Afrik?

Yewtere men hannde faati ko e Coftal-ɓalli. Ko ko meeɗa waɗude e taariika foolotiro fuku koyngal CAN taskaa hanki. Suudu ñaawitirndu CAF ƴettii, hanki, pellital ittude e juuɗe Senegal deesewal CAN hitaande 2025 totta ngal Maroc. Ɗum ko caggal nde Maroc waɗi wullitannde ɗiɗiɓere to Fedde Afrik toppitiinde fuku koyngal, wullitannde yowitiinde e poolgu diɗɗal Senegal e ngal timmal CAN, loggol gootol ka saayi ɓeydaaɗo kawrital no wi’e “prolongation”.

CAF no holli wonnde ngal pellital maɓɓe jonnugol Maroc hoodere ɗiɗaɓere Senegal nden, ko tippude e kuule 82 e 84 sariya foolotito CAN.

Ko holno taskorɗon ngal pellital CAF jaɓugol ngal deesewal CAN e juuɗe Senegal, okka ngal Maroc?

Hiɗon miijii wonnde wullitande Senegal ko faati e ngal pellital CAF aran battinnde?

Hannde e talaata17 lewru 3ɓuru, hiɗen yewta hannde fii alhaali bammbunooɓe sappo e njeetato diɗɗal Senegal jaggaaɓe Maroc gila ñannde timmal foolotiro fuku koyngal CAN hakkunde Maroc e Senegal. Ɓee no tuumaa waɗugol fitinaaji wonndude e geɗe goɗɗe. Wullitannde ñaawoore maɓɓe haanunoonde waɗude hanki e alati dirtinaama haa ñannde 30lewru ndu wonuɗen e mun.

Ɗum non-ko ɓawto nde suudu ñaawirdu Maroc fawi ɓe jukkooje itti lebbi tati e hitaande wonndude e yoɓugol alamaani e ñaawoore maɓɓe aranere yuɓɓinaande ñannde 19 lewru faltiindu. Ɗee jukkooje ɗe ɓee yimɓe 18to bammbunooɓe diɗɗal Senegal fawaa jibinii haalullaaji ɗuuɗuɗi. Nde ɓe njaggaa tun hooreejo jaagorɓe Senegal Ousmane Sonko jooɗiduno e yerondiraaɗo makko mo Maroc Aziz Aknoush e dow alhaali on.

Ko holno taskorɗon jukkooje ɗe ɓe fawaa e ñaawoore aranere ñannde 19 lewru faltiindu, jukkooɓe ɗe awookaaɓe Maroc holli wonnde no famɗi ?

E altine 16 lewru 3ɓuru, hiɗen yewta ko faati e battane hare Iran hakkunde maɓɓe e Israel wonndude e Dawlaaji Ndentuɗi Amerik e nder adunaaru nduu teeŋtinii e leyɗe Afik. Ɗee hare Moyen orient waɗuɗe hannde balɗe 17 gila ɗe fuɗɗii, jibinii caɗeele ɗuuɗuɗe e nder leyɗeele ko faati e ñakkere nguure, e kuɓɓam walla Petrol. Ɗum ko gila lummbirɗe Ormuz nden uddaa.

Wano Keniya Ethiopie, Tanzanie, Ghana, Sénégal Rwanda, Najeriya e leyɗe goɗɗe, coggu kuɓɓam beydike ɗee balɗe sabu hare ɗen Iran. leyɗeele goɗɗe kadi no ndaarude walla ƴettude pehe ngam falaade ɗee caɗeele. Hino jeyaa e majje RD Congo, Mauritanie e Senegal.

Ko holno alhaali on fewndori e nder leyɗeele mon

Hannde e nder yeewtere udditiinde, on holli miijooji mon e toɓɓe ceertuɗe ɗe njiɗuɗon artude e muuɗum

Hannde e alkamisa 12 lewru 3ɓuru yewtere men no nawra en hannde Benin. Hooreejo kiɗɗo leydi Boni Yayi, fellitii ɓortagol ardiingu fedde les Democrates, fedde ɓurnde mawnude e pelle lunndiiɗe laamu Benin. Ko ñannde 3 lewru ndu wonuɗen e mun o sellini ndee fiɓnde makko woppugol Politik, e nder winndannde nde o hewtini e yiilirde ndee fedde nde o ardii gila 10ɓuru hitaande 2023.

Thomas Bony Yayi hollii wonnde o fellitii foftaade to banŋe dawro, ngam o waawa toppitaade cellal makko. Kono ɗum hawrondirii e saayi mo fedde nden woni e caɗeele. Sabu nde waawaano heɓude hay jullere wootere to suudu sarɗinkooru, e woote yuɓɓinaaɗe ñannde 11 lewru, 1ɓuru. Nde tawtortaake kadi e suɓngooji hooreyaaku yuɓɓinteeɗi ñannde 12 lewru 4 ɓuru arooru. Yoga e jeyaaɓe e fedde Les Democrates, no ñiŋi ɗuuɓi tati Boni Yayi e hooreyaaku fedde nden.

Ko holno faamirɗon daliilu mo o holli oo wi’ude wondema ko sabu cellal makko o ɓoortori nguu ardiigu?

Ko holno yiiruɗon janngo ndee fedde dawro Les Democrate?