On Tottaama Konngol

Altine ñannde 23, 6ɓuru, en kaalan hannde fii pelle dawro e nder leyɗeele men, ko yowitii no ɗee pelle politik dañirta kaalisi ko ɗe laatinirta golleeji majje. E leyɗeele keewɗe laamu ngun no happi adadu kaalisi mo ngu wallitorta pelle dawro ɗen hitaande kala. Ɗum ko wano Mali, nokku to pelle dawro ɗen yamiraama andinnde no ɗe huutori kaalisi mo laamu ngun wallitori ɗe, fi kala ɓurɗe ɗen no fusa gila lewru 3ɓuru faltiindu.

Suudu ñaawirdu leydi ndii hollii wonndema ko haa ñannde 30 lewru ndu wonuɗen e mun ɗoo, pelle ɗen okkaa ngam sifaade no ɗe huutori balle ɗe laamu ngun totti ɗe duuɓi 25 sakkitiiɗi, gila e hitaande 2000 ɓeɓi hannde.

E hitaande 2018 lanndaaji politik Mali wallitorano miliyaar 2 piccal 6 kaalisi seefa, ɗum no ɓaɗii miliyon 4 kaalisi Ero.Enee, ko holno taskorɗon ngal pellital ardiiɓe Mali yamirgal pelle dawro leydi ndin anndinde no ɗe huutori kaalisi mo laamu ngun wallitori ɗe?

Ko honno pelle dawro leyɗeele mon woni e dañirde kaalisi ko ɗe huutorta e banŋe golleeji majje?

Ngam okkugol miijo mon e ɗow lefol ngol on nadday ka tongoode woowunde. Ka 00221766441280

Virgule

Koɗo on ka yewtere ko Mamadou SY Albert, hertorɗo alhaali dawro immorde Senegaal

Taskaram men On Tottaama Konngol hannde e aljuma ñannde 13 lewru 6ɓuru 2025, e nder ndee yeewtere udditiinde, on kaali ko faati e alhaali kabaaruuji jawtuɗi e ndee yontere. On ngaddii ji’anɗe mon e toɓɓe ɗe njiɗɗon heɓde fensitande e majje. Keɗoɗee jeewte baɗaaɗe ɗee.

Hannde e alkamisa ñannde 19, 6ɓuru, en yewtan ko faatii e kuulal sariya jukkooje huutorteengal e ñaawoore kala neɗɗo tuumaaɗo hoynogol hooreejo leydi. Woni ko rewruɗo e binndol, maa e konngol walla e mbodooji fii hoynogol hooreejo leydi. 

To Senegaal Moustapha Diakhate, jaagorɗo kiɗɗo Makki SALL no tuuma hoynugol hooreejo leydi ndin Basiru Jomaay FAY. Ɗum ko caggal nde o ñiŋi protocol no laamu ngun woni e yaarude.  E biol tuumande ndee konngol ngol o huutori fii ñiñugol hooreejo leydi ndii no jogii firooji buy ɗi goɗɗi e majji haanaaka wowlaneede hooreejo leydi. Ko ɗum holli ñaawoowo on tippude e kuulal 254 sariya jukkoje Senegal. Pelle renndo e fedde adunaaru Amnesti International no holli wonndema oo sariya yewtuɗo ko faati e huynugol hooreejo leydi no haanaa ƴewteede walla yurniteede sabu himo yaaji, huunde ko laaɓi alaa e makko.

Ngol tuumugol yimɓe hoynugol hooreejo leydi nannga ɓe, ñaawaɓe, jukkaɓe, ko ko taskaa e nder yoga e leyɗe ɗen

Enee ko holno taskorɗon oo alhaali tumbondiral laatinte

E alarba, ñannde 18, 6ɓuru, en taskoto hannde cimtol ngol “Caminando Fronteras” mojobere Espaañ daraniinde hakkeeji ɗanniyankooɓe lollini hannki e talaata e daw alhaali ɗannotooɓe maayooɓe e maaje hakkunde Afrik e Orop. E bi’ol Caminando Fronteras, ɗanniyankooɓe ko timmi 1865 waasii pittaali mun e ɗii laawi ndiyam e nder lebbi jowi arani hitaande nde wonuɗen e mun.Gila lewru 1ɓuru haa ñannde 30 lewru 5ɓuru. Hino tawa e nden limoore maayɓe e nder maaɓe anndinaande, rewɓe 121e sukaaɓe fayɓe 342. Cimtol ngol no holli kadi wonndema hino tawaa e alhaaliiji wonuɗi e saaɓaade ngol heddagol ɗanniyankooɓe e maaje, angal moƴƴugol laaɗe lumbinooje, leetugol kippuuji faabotooɓe nde laaɗe ɗen fokkiti yoolagol, anngal huutorgol alaaji walla pehe wooduɗe ɗen e wano non.

Enee nde tawi hannde ɗannotooɓe ɓen no immortooɓe leyɗe ɓaleeje ɗuuɗuɗe Senegaal, Gammbiya, Mauritani, Gine Koddiwaar e miijo mon ko holno ɗee maayeele ɗanniyankooɓe accirta e nder maaje to keeri hakkunde Afrik e Erop?

Ko pehe holɗe haanaa ɓamaade e dow oo alhaali?

Hannde e talaata ñannde 17, 6ɓuru en hewtan Gine. Suudu heyru toppitotoondu yuɓɓingol suɓngooji leydi ndii no wi’e DGE sincaama ton yontere yawtunde. DGE suudu heyru lomntiniraandu CENI, ko e ley konngol jaagorgal halfinaangal aggitere geɗe leydi gollata. Ko DGE on yuɓɓinta jooni suɓngooji ɗin fow Gine.

Ngal pellital hooreejo laamu faddewu Jeneral Maamadi Dumbuya, ngal ɓe holliri faale yuɓɓinngol suɓngooji leydi ndii, ƴettaama e saayi nde lumndo ngon wonndude e yoga e Ginenaaɓe jibii e faale laamu ngun yuɓɓinngol suɓngooji laaɓuɗi.

Ngol momtugol suudu CENI, joɗɗina DGE, jibinii haalullaaji ɗuuɗuɗi. Hay si tawii hino woodi weltoriiɓe nguu mbayliigu waɗaangu to baŋŋe suudu halfinaandu geɗe woote Gine , yoga no sikkitii si tawii nduu suudu heyru nunɗay, walla ndu bammbataa kandidaajo laamu ngun.

Ko holno taskorɗon onon ngal pellital Jeneral Mamadi Doumbouya sincungal suudu heyru toppitotoondu yuɓɓingol suɓngooji Gine?

Altine ñannde 16, 6ɓuru, yewtere men no nawra hannde "Prohe Orient". Kaalen ko faatii e hawre hakkunde Israyel e Iran caggal nde Israyel waɗii piyanɗe mawɗe e alkamisa ɗe ɓe huulani e mun daakorɗe konu Iran e nokkuuje moƴƴinirɗe "Nucléaire" huunde nde Jaagorɗo Iran halfinaaɗo jokkondiral hakkunde leydi makko e leyɗe janane sifori aggitannde hare. O fodii wonnde makko Iran waɗan yottannde muusunde. Gila nden ñannde piyanɗe no jokki hakkunde maɓɓe.
 

Hannde e ngal ñallal nayaɓal hare hakkunde Iran e Israyel, Teheran no jokki weerlaade droneje e dow ca’e goɗɗe Israyel . ko ɓuri yimɓe 200ɗo maayi banŋe Iran e nder ndee hawre, ko ɓaɗii maayɓe 30 limaama senngo Israyel .

Hara ndee liggitere hare Israyel fewde Iran no juhi on ? 

Holko ndee hawre Iran  Israyel battinnde e deeƴere "Moyen Orient" walla ɗeeƴere aduna on.

Taskaram men On Tottaama Konngol hannde e aljuma ñannde 13 lewru 6ɓuru 2025, e nder ndee yeewtere udditiinde, on kaali ko faati e alhaali kabaaruuji jawtuɗi e ndee yontere. On ngaddii ji’anɗe mon e toɓɓe ɗe njiɗɗon heɓde fensitande e majje. Keɗoɗee jeewte baɗaaɗe ɗee.

Hannde, alkamisa 12 lewru  6ɓuru,  yeewtere men no nawra Gine.Winnditugol ɓiɓɓe leydi ndii ngam anndude adadu Ginenaama e waawude moƴƴinde doggol woote ngol fuɗɗano ko gila e lewru 4ɓuru. Golle ɗen no haanunoo timmude ñannde 30 lewru 5ɓuru faltiindu, kono dirtinaama haa ñannde 20 lewru ndu wonuɗen e mun. Kono no alhaali oo woni e yaarude nii, no holli wonnde hooreeɓe ɓen aran ɓeydude kadi balɗe goɗɗe nde tawi caɗeele taskaaɗe ɗen fof ka golle waawaaka ñawdeede e nder ɗee jonnte tati arane ɓeyɗaaɗe. Caɗeele yowitiiɗe e kaydi jibinannde, aalaaji gollirɗi wonndude e leeltugol golle ɗen caggal nde winnditooɓe ɓee woppi golle sabu anngal njoɓdi e caɗeele goɗɗe .

Ko holno taskorɗon ngol winnditugol ɓiɓɓe leydi ndii?

Tawu si beydugol kadi balɗe goɗɗe e saayi happanooɗo on fii hommbugol golle winnditugol ɓiɓɓe leydi ndii battintaa e happu mo hooreeɓe anndini fii yuɓɓinngol suɓngooji Gine ?

Hannde e alarba, ñannde 11, 6ɓuru, yewtere men no nawra en Nice nder leydi Faransi, kaalen fii ndee jonnde 3taɓere dental adunaaru ONU yowitiinde e hiwugol maaje ɗen.  Hiɗen anndi ndiyam ɗam walla maaje no mofti 70 e nder teemederewel wertaango kawkabiire leydi ndii, maaje ɗen no jogii nafa mawɗo e nder kilima on, e ka banŋe ngurɗam neɗɗanke, ko ɗum saabii si maaje ɗee no haanaa dankeede walla hiweede sanne. Jewte waɗeteeɗe e ngal tumbondiral dental adunaaru ONU waɗayngal haa e aljuma, ngal leyɗe ɓurɗe ɗen nootii e mun. Hannde leyɗe ɓurɗe ɗen no jogii caɗeele immorɗe e tuuninngol maaje ɗee. Yoga e kulle maaje yeru liƴƴi ɗin mulii walla maayii. Satteende wonnde kadi ko ɗee tuuɗe poore e bone majje e ngurdam liƴƴi ɗii wonndude e noonanteeri taariindi ndin.

Ko holɗum habborɗon ndee jonnde 3taɓere Dental Adunaaru ONU e dow jewte hiwugol maaje ɗen?

Ko holno tuuninngol maaje ɗen woni e battinirde e nder leyɗeele mon?

Hol pehe haanaa ɓameede ngam hiwude maaje ɗen?

Hannde e talaata ñannde 10, 6 ɓuru en kaalan fii pellital Donal Trump ko faati e naatugol ɓiɓɓe leyɗeele goɗɗe e nder Dawlaaji Ndentuɗi Amerik. Gila hanki e altine ɓiɓɓe leyɗe 12 ɗe leyɗe afiknaaje 7 tawaa e mun haɗaama naatude Amerik. Ɗen leyɗe ko Afghanistan, Birmanie, Tchad, Congo-Brazzaville, Guinee équatoriale, Erythree, Haïti, Iran, Libye, Somalie, Soudan e Yemen. E bi’ol oo hooreejo Amerik ko o ƴettiri oo dekere feewde ɗee leyɗe 12 ko ngam hiwude Amerik e Kuliyankaaku e sembinnde kisal e ndeenagu ɓiɓɓe leydi makko. Ngal pellital non acciraali caggal leyɗeele goɗɗe e dente adunayakooje. Yoga hollii mette mun e alhaali oo. Wano Dental Leyɗe Adunaaru ONU, Amnesty International e Dental Leyɗe Afrik UA.

Ko holno taskorɗon ngal pellital Donal Tromp haɗugal leyɗe 12 naatude Amerik?