On Tottaama Konngol

Taskaram men On Tottaama Konngol hannde e aljuma ñannde 16 lewru 5ɓuru 2025, e nder ndee yeewtere udditiinde, on kaali ko faati e alhaali kabaaruuji jawtuɗi e ndee yontere. On ngaddii ji’anɗe mon e toɓɓe ɗe njiɗɗon heɓde fensitande e majje. Keɗoɗee jeewte baɗaaɗe ɗee.

Hannde e alkamisa ñannde 22, 5ɓuru, en hewtan Gine, nokku to jonnde nde balɗe tati ngam yewtugol ko faati e janngo jaayndeyankooɓe e nder Gine yuɓɓinaa. Suudu ƴewndotoondu golle jaaynirɗe no noddiree HAC, tumnbondirii e jayndeyankooɓe wondude e ardiiɓe laamu faddewu ngun e saayi nde jaayndeeji sokaa heɓii hitaande. Toɓɓe ɗuuɗuɗe ko faati e caɗeele jaayndeyankooɓe e nder Gine taskano yeru jaayndeeji sokaaɗi, teddinngol ndimaaku jaaynde, reenugol jaandeyankooɓe wondude e wallitagol ɓe e nder golle maɓɓe. Hay si tawii e ngal kaaldal pehe waɗaama ko faati e toɓɓe buy kono ko faati e  udditugol FIM FM, Djoma e Espace jaayndeeji sokaaɗi gila hitaande, oo hooreejo HAC hollaali huunde ko yowitii e ɗum. Sabu e bi’ol makko hooreeɓe ɗin jaayndeeji wullitike to suudu ñaawirdu. Jooni alhaali on ko e juuɗe maɓɓe woni, ɗum ko hakkunde hooreeɓe jaayndeeji e sariya on.

Ko holno faamirɗon ngal tumnbondiral? E miijo mon ɗee pellite ƴettaaɗe e  ngal tumbondiral laatinte ?

Alarba ñannde 21, 5ɓuru yewtere men no nawra en Tchad. Kaalen fii oo kabaaru jibinɗo haalullaaji ɗuuɗuɗi e nder leydi ndii. Succe Masra, hooreejo jaagorɓe kiɗɗo Tchad, ardiiɗo fedde dawro "Le transformateur", no nanngaa gila e aljuma yawtunde. Ardiiɓe leydi ndii no tuumi mo yawtingol e dow mejaaji renndo hito walla konnguɗi haasindaaku ɗi o noddi e mun ɓiɓɓe leydi e dartagol walla haɓugol. E bi’ol, prokirer on, ɗii konnguɗi saabike fitinaaji mawɗi e nder worgo fudnaange leydi ndii.

Hare waɗunde yontere faltiinde hakkunde remooɓe e aynooɓe saabike maayde ko ɓuri yimɓe 42. Kono awookaaɓe oo lunndiyankoojo no ñiñi ngol jaggugol Succes Masra, hollude wonnde ma ko alhaali politik tan. Sabu hito walla odio mo nanngaa fii mun on ko ɓooyuɗo mo tuumanoo waɗugol e hitaande 2023.

Ko holno taskorɗon oo alhaali?

Ko holɗum ɗum waawi battinnde e alhaali politik CAAD?

Hannde talaata, yewtere men no nawra en "Proche Orient". Kaalen ko faatii e hare ɓooyuɗe hakkunde Israel e Palestine. Konu Israel fuɗɗitike waɗugol piyanɗe njordi e weeyo muusuɗe e nder diiwal Gaza. Ɗum jibinanii hannde palestinaaɓe caɗeele ɗuuɗuɗe. Heewɓe maayii, rafi nguure taskaama e nder nokkuure ndee, Israel salii yottagol balle neɗɗiyankooje wonaaɗe e addeede Gaza. E bi’ol konu Israel faale maɓɓe ko ngam fawude junngo e diiwal ngal fof.

Enee e miijo mon hara nanondiral no waawaa heɓeede e nder ɗii njannguuji Israel feewde Gaza?

Ko Dr Abdu BAH, hertorɗo dawro immorde Senegaal woni koɗo men ngam jaabaade lamnde mon heɗiyankooɓe

Ngam okkugol miijo mon e dow lefol ngol on nodday ka tongoode

Altine ñannde 19 lewru 5ɓuru, en yahay hannde ko faatii e pooɗondire taskaaɗe hakkunde ardiiɓe yoga e leyɗe Afrik e sositeteeji oogirɗi jawle iriiɗe  gollayɗe e nder leyɗe ɗee. Wano Gine, ardiiɓe laamu faddewu ngun teettii walla jaɓiti kayitaaji ko timmi sosiyeteeji 150 gollooji e asugol kaŋŋe, bauxite Jaaman e wano non. Hino hollaa non wonndema ko ɓuri sositeteeji oogirɗi jawle iriiɗe 800 no Gine hannde kono ɓurɗe heewde e majje ɗoftaaki sariya oogirɗe ɗen walla teddinaa aadondiral ngal ɗi ciifdi e ardiiɓe leydi ndii. Ko wano noon kadi, ina tawee Mali, yeru pooɗondiral hakkunde sosiyete Canada Barrick Gold e ardiiɓe laamu faddewu Mali. Maa hakkunde ORANO, sosiyete France gasoowo "uranuim" e hooreeɓe Niijeer kadi .

Ko holno taskorɗon oo alhaali ?

askaram men On Tottaama Konngol hannde e aljuma ñannde 16 lewru 5ɓuru 2025, e nder ndee yeewtere udditiinde, on kaali ko faati e alhaali kabaaruuji jawtuɗi e ndee yontere. On ngaddii ji’anɗe mon e toɓɓe ɗe njiɗɗon heɓde fensitande e majje. Keɗoɗee jeewte baɗaaɗe ɗee.

Alkamisa ñannde 15, 5ɓuru, yewtere men no nawra hannde Mali, nokku ka pellital ardiiɓe laamu faddewu ko faati e fusugol pelle dawro leydi ndii laatike. Jeneral Assimi Goita siifii e talaata decret haytuɗo sarɗiwol pelle dawro e nder Mali. Ɗum saaɓike pelle politik ko timmi 300 fusaama. Gila e yontere faltiinde, hari konunkooɓe ardiiɓe Mali, yamirii pelle dawro ɗen dartinngol golle majje.
 

Ko holno taskorɗon ngal pellital hooreeɓe laamu ƴanngal Mali, ngal yoga e lumndiyankooɓe ŋiñi, hollude wonndema ɗum fof ko ngam tabintinnde laamu njaggu.

Ko holno yiiruɗon no Jeneral Assimi Goita laamori Mali?

Alarba ñannde 14, 5ɓuru, yewtere men no nawra en hannde Gine. Suɓngooji haanuɗi timminde laamu ƴanngal Gine hara laatoto ɗoo e maayde ndee hitaande nde wonuɗen e mun? Ko ɗum Jeneral Maamadi Dumbuya fodi ginenaaɓe e nder yewtere nde o wadunoo ka fuɗɗoonde hitaande heyre. O holluno wonndema hitaande 2025, ko hitaande suɓngooji. Gila nden ñannde, hino annda wonnde referandom on, ko ñannde 21, 9ɓuru yuɓɓintee.

Ko faatii e suɓngooji heddiiɗi, hooreyaajku e sarɗinkooji, jeneral Mamadi Dumbuya siifaali tawo decret woo anndinayɗo saayi nde ɗi yuɓɓintee.  Kono e altine e nder yewtere nde hooreejo jaagorbe Gine BA Wuuri, wadi Abijan nde o tawaa e tumnbondiral fagguduyankowal noddirteengal “Africa CEO Forum” o holli wonde woote ɗen Gine yuɓɓinte e lewru 12 hitaande nde wonuɗen e mun, kono o jonnaali ñalaaɗe woo.

E miijo mon, hara hooreeɓe Gine waaway yuɓɓinnde ɗii suɓngooji e saayi mo ɓe happi on?

 Taw si Gine waway yuɓɓinde suɓngooji tati, referendum, sarɗinjooji e hooreeyaaku e nder lebbi jeego?

Hannde e talaata ñannde 13, 5ɓuru, en kaalan ko faati e alhaali dawro Koddiwaar. Tijjaan Caam, kanndida kummaloojo ɓurɗo e nantuɗe innde e lumndiyankooɓe ɓen, ɓortike e alat  hooreeyaaku fedde makko PDCI RDA. Oo lumndiyankoojo ƴettii ngal pellital jonnte seeɗe ɓawto nde suudu ñaawirdu ndun ittimo/yaltinimo e doggol woote ngol. Sabu e bi’ol ñaawooɓe ɓee fewndo nde Tijjaan CAAM winnditii e ngol doggol  hari o  hayrii e ɓii-leydaaku makko Koddiwaar. Janngo e alarba ndee fedde makko PDCI RDA tummbondiray ngam suɓagol hooreejo keso. Hino gasa ka Tijjaan Caam artana jullere nde o jonniti nden, nde tawi o hettii ɓii leydaaku makko Koddiwaar gila e lewru tataɓuru yawtundu.

Ko holno taskorɗon ndee feere Tijjaan CAAM?

Hiɗon miiji wonndema Tijjaan CAAM laatoto kanndida fedde PDCI RDA?

Taw si artugol makko e hooreyaaku PDCI RDA wawan wonude sabu o wattee e doggol woote hooreyaaku Koddiwaar happaaɗe e lewru 10ɓuru aroodu ?

Holnde e feere PDCI RDA jogii hannde ngam kanndidaaku Tijjaan Caam e suɓngooji Koddiwaar laatoo?

Altine ñannde 12, 5ɓuru, yewtere men no nawra hannde Mali. Kaalen ko faatii e Ciwle wonndude e etannde ciwle yimɓe dawro e jeyaaɓe e pelle renndo taskaaɗe e nder Bamako ɗii lebbi sakkitiiɗi. Yontere yawtunde, e alkamisa kañum e aljuma ko timmi yimɓe ɗiɗo ciwlaama. Ɗiɗo woɓɓe kadi etaama difteede kono ɓee arnooɓe nangugol ɓe ronki waawudu naɓugol ɓe.  Ko holno njiiruɗon oo alhaali ciwlagol yimɓe politi jaaliiɗo e nder Mali?
Holko haawa waɗeede ngam oo alhaali acca e nder Mali ?