On Tottaama Konngol

Hannde e alkamisa ñannde 13, 3ɓuru, en yewtii ko yowiti  e toɗɗagol hooreejo fedde toppitiinde fukku koyngal Afrik e  suɓagol yimɓe jeyaaɓe e ngoomu yiilooru CAF.  Patrice Motsepe suɓitaama e hooreyaaku fedde ndee. Oo ɓii Sid-Afriknaajo  ardiiɗo CAF e lewru 3ɓuru hitaande 2021 haa e 3ɓuru 2025, waɗay mannda ɗiɗaɓo mo duuɓi nayi kadi, ngam jokkitagol golle fii ɓamtugol fuku-koyngal Afrik.

Ko holno taskorɗon golle Patice Motsepe en nder duuɓi nayi ɗi o ardii CAF walla manda makko arano ?

Ko holno alhaali fuku-koyngal fewndori e nder leyɗeele mon ?

Ko mbaadi honndi haccorɗon njuɓɓundi toppitiindi fuku-koyngal leydi mon ?

Hiɗon miiji wonnde ngol toɗɗagol Samiyel Etoo e nguumu yiilooru CAF no wi’e ComEX,  waawan nawrude yeeso golle fedde toppitiinde fukku koyngal Afrik.

Hannde e alarba, ñannde 12, 3ɓuru yewtere men no nawra en Koddiwaar. Pelle lumndiiyankooje leydi ndii no heɓindaade ɗoo e suɓngooji hooreyaaku happaaɗi e nder lebbi jeeɗiɗi. Ko timmi pelle dawro 25 hawtitii waɗii kawtital ngal ɓe inniri “CAP-CI”, ɗum no firti e fulfulde kawtital fii lomtondiral laamu e hoore ɓuttu.  Ndee feere nde ɗee pelle ƴetti, ko ngam semmbinnde doole majje e no ɗe battinira e suɓngooji ɗii. Hino jeyaa e ngal kawtital sincaangal, fedde PDCI nde Tijjaan CAAM, Cojep nde Sharl Ble Gude, FPI fedde dawro Paskal Afi NGESAN kaŋum e MGS fedde politik Simon GBAGBO ardii.

Ko holno njiiruɗon ko ɗee pelle dawro jonnindiri juuɗe waɗi kawtital gootal?

Taw si ɗee pelle waawan fottude e kandidaajo gooto?

E miijo mon ko feere honnde lumndiyankooɓe Koddiwaar haani ƴettude ngam lomntondiral laamu waawa laataade e nder leydi ndii?

E talaata ñannde 11, 3ɓuru en taskoto njillu hooreejo Ghana e nder leyɗe AES. E nguu njillu ngu balɗe tati ngu John Dramani Mahama hommbi hanki e altine Wagadugu, ɓawto nde o yiidi e yerondiraaɓe makko ɓe Mali e Niijeer, oo hooreejo keso Ghana yewtiɗii e hooreeɓe ɓee tato ko faati e alhaali semmbingol jokkodiral hakkunde Ghana e leyɗe ɗee tati to baŋŋe diplomasi, faggudu e ndeenaagu. John Dramani kaaldaali e hooreejo hay e gooto e ɓee hooreeɓe tato leyɗe AES, ko yowitii e yaltugol walla heddagol Mali, Burkina Faso e Niijeer e nder Dental leyɗe Hirnaange Afrik CEDEAO wano yoga habornoo. Ko o yewti ko fewti Dental CEDEAO, ko hollitude wonnde CEDEAO no haani annditude walla jaɓude Dawlaaji Leyɗe Sahel (AES).

Ko holno faamirɗon nguu njillu John Dramami Mahama e nder Leyɗe Dental AES?

Ko holɗum e ngartam ɗum waawi jibinande Ghana e Dawlaaji Leyɗe Sahel (AES)?

Altine, ñannde 10, 3ɓuru, en yewtan hannde ko faati e hare hakkunde Ukreen e Riisi, jaalagol majje, wonndude e luural taskaangal hakkunde Erop e Dawlaaji Ndentuɗi Amerik. Oo hooreejo keso Amerik foduno lannugol hare hakkunde Ukreen e Riisi, kono peehe ɗe o ɓami ngam lannude ndee hare ɓooyunde hakkunde leyɗe ɗee ɗiɗi waalanaaki Ukreen e leyɗe Erop. Ɗum saabike hannde Dawlaaji ndenntuɗi Amerik dartinii balle mun feewde e Ukreen.

Leyɗe Erop wonɗe e wallitaade Ukreen ɓeydii balle mun to banŋe konunkaangaal e kaalisi faade leydi ndii.

Ko holno njiiruɗon darnde ɗee leyɗeele alduɗe e ndee hare?

Ko holno taskorɗon luural hakkunde Erop e Dawlaaji Ndentuɗi Amerik, sabu hooreeɓe Leyɗe Erop fellitii moƴƴinde kaɓirɗe dannditorɗe.  Donal Tromp anndi wonnde leydi makko yaltay e nder OTAN, si tawi Erop ɓeydaali kaalisiiji ɗi ɓe wallinta ɗin e nder fedde ndee.

Ko holno yiiruɗon janngo jam e nder adunaaru nduu?

Taskaram men On Tottaama Konngol hannde e aljuma ñannde 7 lewru 3ɓuru 2025, e nder ndee yeewtere udditiinde, on kaali ko faati e alhaali kabaaruuji jawtuɗi e ndee yontere. On ngaddii ji’anɗe mon e toɓɓe ɗe njiɗɗon heɓde fensitande e majje. Keɗoɗee jeewte baɗaaɗe ɗee.

Alkamisa ñannde 6,3ɓuru, en yewtan hannde ko faatii e alhaali dawro Gine Bisawo. Umaro Sisoko Embalo tawete e ƴamooɓe lefol laamu e suɓngooji hooreeyaaku happaaɗi ñannde 30 lewru 11ɓuru hitaande nde wonuɗen e mun. Oo hooreejo Gine Bisawo ƴettii ngal pellital caggal nde o holli e lewru 9ɓuru hitaande faltiinde wonndema o waɗata mannda ɗiɗaɓo, fii kala dosngal leydi ndii no newnani mo ƴamugol lefol laamu laawo gonngol.

Kono pelle lumndiiɗe laamu Bisawo no liɗɗii ngal pellital mako waɗugol mannda ɗiɗaɓo.

E bi’ol maɓɓe happu laamu makko feƴƴiti gila e timmoode lewru 2ɓuru faltiindu, laamu Umaro Sisoko Embalo dagaaki hannde kadi. E kadi, suudu sarɗinkooru alaa Bisawo gila wonoondu ndun ton fusaa e lewru 12ɓuru hitaande 2023.Ko holno 

yiiruɗon ngol luutondirgol pellite hooreejo leydi Gine Bisawo ko faati e waɗugol makko manda 2ɓo?

Enee e miijo mon ko hombo waawata ñippude ɗee caɗeele politik wonuɗe Gine Bisawo ɓawto nde hooreejo leydi ndii mettinani imminaaɓe dental leyɗe hirnaage Afrik CEDEAO, yahunooɓe ngam ñippude lurral pilotik taskaangal e nder leydi ndii

Alarba ñannde 5, 3ɓuru, en kaalan hannde ko faati e alhaali dawro Gabon. Jibi liɓi woo alaa jooni e dow alhaali jaɓude tawtooreede walla oo’o, hooreejo laamu faddewu nguu e ƴamooɓe lefol laamu Gabon. Laaɓii poy Jeneral Kloteer Biriis Oligi Ngema liɓuɗo laamu Ali Bongo Odimba tawete e suɓngooji hooreyaaku happaaɗi ñannde 12 lewru 4ɓuru arooru. O anndinii ngal pellital makko ndee yontere.

Kanko oo ardiiɗo ngoomu laamu faddewu e artirgol tugaale laamu, nde hewti ka laamu e lewru 8ɓuru hitaande 2023, o holluno wonndema ko lebbi 18 pet o ardotoo, o yuɓɓina suɓngo, o waɗta laamu e juuɗe fooluɗo oo.Ko holno jaɓɓorɗon ngal pellital Jeneral Biriis Oligi Ngema taweede e ƴamooɓe lefol laamu Gabon?

Ko holno taskorɗon arsike Jeneral Biriis Oligi Ngema foolugol e ɗii suɓngooji?

Talaata nannde 4, 2ɓuru, yewtere men On Tottaama Konngol no nawra en Gine. Kaalen ko yowitii e golle laatinaaɗe hooreejo jaagorɓe BAH Wuuri, caggal nde timmi hitaande gila o toɗɗaa hoore guwerneman Gine. Ko ñannde 27, 2ɓuru hooreejo laamu faddewu Jeneral Maamadi Dummbuya suɓii BAH Wuuri mo lanminal mun jubinnoo haalullaaji ɗuuɗuɗi e on saayi immorɗi e pelle dawro, pelle sosiyete siwil e wano non.

Hakkunde hollunooɓe wonndema     Aamadu wuuri BAH waawata gollude, wabu o wonata fewjoowo, e wi’uɓe kaŋum oo hooreejo guwerneman waɗay wallitere mawnde,  hunnay aadi ndi o yettani ɓiɓɓe leydi ndii .

Hannde yoga e hooreeɓe pelle dawro no ñiŋi golle makko. E bi’ol maɓɓe huunde o gollaali e nder ndee hitaande.

Enee Ko holno taskorɗon onon ɗii lebbi sappo e ɗiɗi BAH Wuuri e hoore jaagorɓe Gine?

Altine ñannde 3, 3ɓuru, en yewtan hannde ko faati e no jogguuli nguure/ñamri fewndorii e nduu lewru korka e nder leyɗeele mon. Nde tawi suumaaye ko lewru  battinayndu sanne e faggudu ɓesnguuji ɗii. Ardiiɓe leyɗeele goɗɗe wano Gine, Caad Senegaal, ….  ɓamii pehe ngam coggu nguuree ustee e nduu lewru.

E miijo mon hara ɗum no yoni ko usta cogguuli ñaameteeji ɗin ka jeere?

No cogguuli nguureeji sifori e oo waayi e leyɗe mon?

Ko holno wonɗon e feƴƴinirde nduu lewru korka ?

Ngam okkugol miijo mon e ɗow lefol ngol on nadday ka tongoode woowunde kowal kawal 221 76-644-12-80    

Hannde e aljuma ñannde 28 lewru 2ɓuru ka Taskaram On Tottaama Konngol en yewtii ko yowiti e alhaali caɗeele ɗe rewɓe ndañata ka gollirɗe. Ɗen caɗeele, ko ɓitteende hakkille wonndude e jokkireede balndi. Oo bone no jaali hannde ka gollirɗe no ɗe sifori kala, woni ka gollirɗe laamu, woni ka ɗe ngonaa laamuynakooje.

A yiyay hannde debbo no daña golle kono ɗun ɓooyata walla golle ɗen juutata, tawa wonaa sabu rafi ganndal maa anngal waawude golle ɗen, hara ko ko tawi kon himo joggiraa giɗgol ka golle immorde ko ɓuri kon e hooreeɓe ɓen ka suudu golliirndu. Sabu non ko tawi kon ko hooreejo, rewɓe woɓɓe suusataa feñnnide fii mun, ɓe wowlata, hara ɓe wuli wota ɗun ɓonnanɓe golle maɓɓe ɗen, tawa ko yoɓe jaɓu. Kono noon woɓɓe saloto, ɓe sakkitora accitugol golle ɗen.

Holno taskorɗon oo alhaali?  Noo fewndori e nder leyɗe mon? 

Holko saabii jokkirgol rewɓe giɗgol, ɓittinaɓe, sonjaɓe no jaalii ka gollirɗe?

Holno oo bone wonaa haɓireede e nder leyɗe mon?