On Tottaama Konngol

Ka taskaram men On Tottaama Konngol hannde e aljuma ñannde 8, lewru 11ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗoɗee jeewte waɗaaɗe ɗee.

Hannde e alkamisa ñannde 7, 11ɓuru, en jokkitoto fayin yewtere ko faati e alhaali dawro Dawlaaji Ndentuɗi Amerik. Duuɓi 4 ɓawto nde Donal Tromp faɗi suɓgoojiɗii hooreyaaku Amerik e hitande 2020, ɗun ko nde o tiindondirno e Jo Bayden, hay gooto sikkaano o artay hannde kadi e laamu. Ngol laatagol hannde oo hooreejo fedde Repibliken’en hooreejo 47ɓo Amerik, caggal nde o fooli Kamala Harris e soɓngooji ɗii no juhi ɗuuɗuɓe. Nde Donal Tromp non ɗaɓɓata daaɗe ɓiɓɓe Amerik, o foduno piiƴi ɗuuɗuɗi.

E miijo mon, ko holɗum ngol artugol Donal Tromp e laamu waawata waylude e alhaali leydi ndii ? Ko mbayliigu honngu Ameriknaaɓe waawi habbaade ?

Ko holɗum ngartol makko battinnta e adunaaru nduu ?

Hannde e alarba, ñannde 6, 11ɓuru, yewtere men On Tottaama Konngol no nawra en Dawlaaji Ndentuɗi Amerik. Donal Trump laatike hannde hooreejo 47ɓo Amerik. Ɗum ko caggal nde o fooli Kamala Harris kanndidaajo demokraat‘en e suɓngooji hooreyaaku yuɓɓinaaɗi hanki e talaata. Fedde Repibliken’en heɓtii Suudu Sena on kadi. Ɗum ko sabu  poolgu ngu ɓe heɓi e diiwe Virginiya e Ohio, Donald Trump waawan fewjude e hoore Kongere on e ndee hitaande aroore.

Taw si ardagol Donald Trump Amerik laawol ɗiɗaɓol  juhi on?

E miijo mon, ko holɗum haɗi Kamala Harris foolude e ɗii suɓngooji hooreyaaku wano ɗuuɗuɓe habbornoo non?

Hannde e talaata ñannde 5, 11ɓuru, yewtere men no nawra en Caad. Ardiiɓe leydi ndii holli faale yaltugol e dental koneeli leyɗe 5 noddirteengal e ɗemngal faransiire “Force Multinationale Mixte (FMM). Dental ngal Benen, Niijeer, Najeriya, Kamerun e Caad hawtiti sosi ngam wallindirde haɓugol pelle kuliyankooɓe no jeyaa e ɗen Boko Haram, taweteeɗe e sera falnde Weendu Caad. Ɓee hooreeɓe Caad anndinii anniye maɓɓe sortagol e ngal dental, ɓawto nde konunkooɓe maɓɓe ko ɓuri cappanɗe nayo waraa yontere faltiinde ndee e nder hawannde nde guɓal Boko Haram waɗi. Ɓee konunkooɓe ardiiɓe Caad no ɓeydi hollude wonnde ɓe weltora golle koneeli dental leyɗe ɗee to baŋŋe wallondiral fii haɓude pelle kuliyankooɓe .Ko holno taskordon oo faale Caad yaltugol e dental koneeli leyɗee ɗee jowi?

Ko honɗum yaltugol Caad e ngal dental waawi battinannde leyɗeele heddiiɗe ɗee?

E miijo mon holko saabii si Afrik alaa e waawude jonnidirde juuɗe ngam haɓude kuliyankaaku?

Hannde e altine, ñannde 4, 11ɓuru, en yewtan hannde ko yowiti e alhaali dawro Dawlaaji Ndentuɗi Amerik. Ameriknaaɓe suɓoto janngo e talaata ñannde 5, hooreejo leydi maɓɓe 47ɗaɓo, hakkunde Donal Tromp hooreejo kiɗɗo republiknaajo e Kamala Harris mo lannda democrat ‘en. Ɗum ko caggal nde ɓee kanndidaaɓe ɗiɗo hombi hanki jemma orngal woote ɗen. Ɓee hooreeɓe ɗiɗo hollii jewte ɗuuɗuɗe, ɓe feññinii eɓɓooje e fodooje keewɗe ɗe ɓe jogori laatinannde Ameriknaaɓe si ɓe arii laamaade.

Ko holno yiiruɗon no ngal orngal suɓngooji hooreyaaku Dawlaaji Ndentuɗi Amerik feyyiri?

Ko holno jaɓɓorɗon jewte ɗe ɓee kanndidaaɓe ɗiɗo Kamala Harris e Donal Tromp holli nde ɓe yiilotoo ngam ɗaɓɓude daaɗe ɓiɓɓe Amerik?

Ka taskaram men On Tottaama Konngol hannde e aljuma ñannde 1, lewru 11ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗoɗee jeewte waɗaaɗe ɗee.

Hannde e alkamisa ñannde 31, 10ɓuru, e kaa taskaram On Tottaama Konngol e yahray Senegaal, kalen ko faati e orngal suɓngooji sarɗinooɓe fampaangal e alat yawtunɗo. Gila ngal orngal fuɗɗii, ɓee kanndidaaɓe kawtite e pelle politik 41 no yiilaade e nder leydi ndii ngam ɗaɓɓude daaɗe senegalnaaɓe e ɗee woote depiteeɓe saatiiɗe ñannde 17darotoondu. Yogaaɓe non no ŋiñi no orngal ngal woni e waɗirɗe, sabu fitinaaji wanaa ɗi e taskeede e nder nokkeeli to kanndidaaɓe walla bambuɓe kanndidaaɓe woni e fottuude. E bi’ol heɗiyankooɓe buy, ɗoo yo kanndidaaɓe woɓɓe humpitude ɓiɓɓe Senegaal golle ɗe ɓe anninii laatinnde si ɓe wootanaama, Ko ɓe jokki ko ŋiñindirde.

Ko holno yiiruɗon no ngal orngal suɓngooji sarɗinkooɓe Senegaal woni e feƴƴirde nii?

Ko holno jaɓɓorɗon jeewte ɗe kanndidaaɓe ɓen woni e hollude ko faatii e anndinngol eɓɓooje?

Hannde e alarba, ñannde 30, 10ɓuru, yewtere men On Tottaama Konngol no nawra en Gine.  Ardiiɓe laamu faddewu nguu fellitii fusude pelle dawro 53, wenngugol walla dartinngol golle pelle politik 54 e aynugol golle e nder lebbi tati pelle 67. Hino tawaa e ɗee pelle dawroyankeeje ayneteeɗe, UFDG nde Sellu Dalen JALLO e RPG Arc-en- Ciel nde hooreejo kiɗɗo leydi ndii Alfa KONDE sinci, pelle ɗiɗi ɓurɗe e mawnude Gine.

E bi’ol jaagorɗo halfinaaɗo fiyaakuuji leydi ndii, ɓe ƴettii ngal pellital liddu pelle ɗee, caggal nde ɓe yiili ƴewndagol e winnditugol pelle politik leydi ndii fii anndugol si taawii hiɗe ɗoftii sariya. Kono ngal pellital hooreeɓe laamu ƴanngal Gine fusugol, dartinngol golle e aynude ɗee pelle politik teemedere e ko fawi sabu anngal ɗoftaade sariya, jibinii haalullaaji ɗuuɗuɗi. Yoga no holli wonnde ko faale Jeneral Mamadi Dummbuya ƴamugol lefol laamu, ɓe ƴettiri ngal pellital, ko fii wota woodu pelle waawooje lumndaade mo.   Ko holno taskorɗon onon alhaali oo?

Hannde e talaata, ñannde 29 10ɓuru, en jokkitoto yewtere men ndeen hanki ko faati e mbuuñaari ndi Faransi “Foot” okkata hitaande kala, fijooɓe balon ɓurɗo e battinnde e fuku-koyngal e nder duunde Erop e deesewal fuku-koyngal Winndere. Mbuuñaari balonre kaŋŋe, noddirteende "balon door". Sikke alaa hannde kadi ko Rodri Ernandes jeyaaɗo Espaañ fijanoowo teekodal “Manchester City” dañi ndee balonre kaŋŋe 2024. Ko kanko lomtii Liyonel Messi, ƴettunooɗo ndii mbuuñaari rowani. Ko Vinicius Jinior ƴeyaaɗo Brasilia e oo angleejo Jiide Bellingham fijanooɓe Real Madrid hikkii e makko e ngoo rewro hanndinndinaaɓe e ndee balonre kanŋe. Kono ngoo suɓngo waɗaango jibinii haalullaaji ɗuuɗuɗi, Fijooɓe Real Madrid ɓen jaɓaali taweede e mooɓondiral ngal hanki Paris ngam tottugol mbuuñaari balonre kaŋŋe 68taɓere.

Ko holno yiiruɗon ngol suɓagol Rodrigo Ernandes?

Hiɗon tawti ngol suɓagol Rodrigo Ernandes hikka okka mo fukuure kaŋŋe yeeso Vinicius Jinior?

Hannde e altine, ñannde 28, 10ɓuru, en kaalan ko faati e mbuuñaari ndi Farans Fuut hokkata hitaande kala, latoowo balon ɓurɗo e battinnde e fuku koyngal e adunaaru ndun. Ndii buuñaari balonre kaŋŋe 2024, anndiraande "balon door" totteete hannde kiikiiɗe to Paris. Fijooɓe 30 toɗɗaaɓe waawude dañude ndee ballonre kanŋe. Hara ko hombo e maɓɓe wonata fijoowo ɓurɗo e battinnde e hitaande nden no wi’e “saison”ngam lomtaade Liyonel Messi, yeɗanooɗo ndii mbuuñaari rowani?

Yaakaare no fawaa fota e Vinisius Jinior ɓii Bresil fijanoowo teekodal Real Madrid. Innde makko no lilli sanne wonndude e Jude Bellingham mo Angleteer e Rodri Españoljo ɓe o wonndi e teekodal gootal.

E miijo mon ko fijoowo balon hombo ɓuri e battinnde e fuku koyngal e adunaaru ndun hikka?