On Tottaama Konngol

Hannde e talaata, ñannde 15, 10ɓuru, taskaram men no nawra en Senegaal kaalen ko faati e kaydiri ɗowordi laamu ndi Basiiru Jomaay FAAY feññini hanki e altine, ɓe noddiri ndi “Senegaal 2050”. Ardiiɓe leydi ndii anndinii wonnde ɓe waɗan Senegaal leydi jeyndi hoore mun, leydi to nunɗal e ɓamtaare jaalii. Ngam laatinnde ɗum, ɓe waɗi eɓɓooje ɗuuɗuɗe  ɗe ɓe jogii gollude e nder duuɓi 25 arooji ɗii ko ɗum ko haa e hitaande 2050. No jeyaa e ɗen ustugal baasal e nder Senegaal, heyɗintinngol faggudu e darnugol laamu jogiingu doole.

Ko holno yiiruɗon ɗee eɓɓooje ɗe ardiiɓe Senegaal weyni ngam ɓamtude leydi ndii?

E miijo mon ndee eɓɓoore ko faale yawtunde keerol wano woɓɓe holliri walla ko waawunde laataade?

Ko holno ɓe waawata ɓamtirde denndaangal jippirooji teeriiɗi ɓe?

Hannde e altine, ñannde 14, 10ɓuru, yewtere men no yowiti e alhaali waameeji taskaaɗi hikka e nder leyɗee Afrik. Ilameeji saabiiɗi bonondaaji mawɗi e nder yoga e leyɗe Afrik. Yimɓe ɗuuɗuɓe maayii e mder mun, cuuɗi buy yanii, ndiyam naatii e goɗɗi bonnii kala ko woni nder ton, laabi taƴii, yoga e gese bonii. Toɓooli bonni sanne, tenntini e nder leyɗe Sahel: Caad, Niijeer, Mali....

E miijo mon ko holno oo alhaali waawa toppitoreeede? Ko piinanɗe holɗe haanuɗen heɓude e oo alhaali ɗoo hikka?

Ka taskaram men On Tottaama Konngol hannde e aljuma ñannde 11, lewru 10ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗoɗee jeewte waɗaaɗe ɗee.

Hannde e alarba, ñannde 9, 10ɓuru 2024 ka taskaram On Tottaama Konngol, en kaali ko faatii e haɓugol tuuɗe poore e nder leyɗeele Afrik.Fii kala leyɗe Afrik ɗuuɗuɗe no hetti sariya toŋŋuɗo ɗuncitorgol saaku poore, sabu battane mum e taariindi ndin, kono ɗum haɗaali oo poore no golletireede haa jooni.Ko holɗum dumcitorgol booto poore waawi battiinde e taariindi ndin? Ko honno oo alhaali haɓirtee?Tawu si ngol haɗugol duncitorgol booto maa biini poore no waawi wonude feere fii haɓugol walla ustugol tuuɗe weeyo

Hannde e talaata, ñannde 8, 10ɓuru, en kalan hannde ko faati alhaali dawro Senegaal wonndude e suɓngooji sarɗiyankooji happaaɗi ñannde 17, lewru 11ɓuru hitaande nde wonuɗen e mun.

 Suudu halfinaandu  wooteeji  Senegaal yaltinii hanki doggol taweteeɓe e ɗii suɓngooji Senegaal. E nder  doggi 49 ɗi suudu ndun hewtinaa , ko doggi  41 woni ko jaɓanaa. E ɗin hino tawaa doggol ngol hooreejo kiɗɗo Senegaal Makki SALL wowi hoore mum. Ɗum ko caggal nde Dental “Takku Wallu Senegaal” renndinngal pelle dawro APR, Rewmi e pelle goɗɗe suɓii mo ardagol doggol maɓɓe e ɗee woote. Nde tawi hooreejo jaagorɓe Usmaan Sonko kadi ko hoore doggol PASTEF e wonndiiɓe mum, ko holno taskorɗon tiindondiral hakkunde ɓee hooreeɓe ɗiɗo e ɗee woote sarɗiynkooɓe?

Taw si ngol suɓagol Makki Sall ko ardoo doggol lumndo Senegaal no waawi battinnde e ngoo suɓungo?

Hannde e altine, ñannde 7, 10ɓuru, en kaalan ko faatii e hare hakkunde Hamas e Israyel. Ko hannde timmi hitaande gila ɗee hare fuɗɗitii hakkunde Palestiin e Israyel caggal nde salndu Hamas jogiindu kaɓirɗe fampike rokeetje cappanɗe gila Gaza faade e Israyel, Konu Israyel fuɗɗii kañum kadi fiyanɗe weeyo liddu Gaza. Ɗum woni sabu dartingol aadodal jam teddinanoongal gila 5 lewru 5ɓuru hitaande 2023. Fitinaaji ɗii tiiɗi e nder Gaza.
 

E bi’ol jaagorgal halfinaangal cellal Hamas e nder Gaza ko ɓuri yimɓe ujune 42waraama e nder ɗee hare e nder hitaande. Yoga e ardiiɓe Hamas waraama e nder hare ɗen. Hare wonuɗe e jaalaade hannde e Liban, Iran e Yemen. 

Ko holno taskorɗon ɗee hare proche Orien?

E miijo mon ko haa honte hare hakkunde Israyel e Liban waawi yaade?

Ka taskaram men On Tottaama Konngol hannde e aljuma ñannde 4, lewru 10ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗoɗee jeewte waɗaaɗe ɗee.

Hannde e alkamisa, ñannde 3, 10ɓuru en kaalan hannde ko faati e timmugol golle Aliiwu Siise e eltude diɗɗal fukku-koyngal Senegaal. Gila hanki e alarbe Aliiwu Siise ardotaako hankadi diɗɗal Senegaal, Fedde tammbiinde fijo balon noddirteende (FSF) anndinii hanki wonde gollidal maɓɓe e oo eltoowo joofi, ɗum ko caggal nde jaagorgal halfinaanagl coftal-ɓalli Senegaal pelliti heyɗintintaa kontara makko timmuɗo gila ñannde 31 lewu 8ɓuru, hitaande nde wonuɗen e mum nden. E bi’ol maɓɓe diɗɗal ngal yaari caggal tippude e hiisa mo FIFA waɗi e ndee hitaande, e kadi yoga e Senegalnaaɓe yiɗaa jooni Aliiwu Siise.

Ko honno taskorɗon timmugol golle Aliiwu Siise e eltugol diɗɗal Senegaal?

Taw si ɗii hujjaaji hollaaɗi no yoni haa ka hooreeɓe ɓen ronka heyɗintinde kontara makko on?

Hannde e alarba, ñannde 2, 10ɓuru, yewtere men On Tottaama Konngol no nawri en Burkina Faso, kaalen ko faati e cimtol ngol fedde adunaaru daraniindu hakkeeji neɗɗo yaltini ndee yontere. Cimtol yewtungol fii hakkeeji neɗɗanke e nder Burkina Faso e nder ɗii duuɓi ɗiɗi laamu Kapiteen Ibrahiima Trawore. E bi’ol fedde FIDH, teddingol hakkeeji neɗɗo yaari caggal e nder leydi ndii e baŋŋeeji ɗin fof. Ndimaaku konngol e ndimaaku jaayndeeji huunde alaa ko teddinaa ton hannde. Gila e siwil, ari e hooreeɓe pelle dawro haa e pelle sosiyete siwil no nanngeede ñannde kala, woɓɓe no nawreede doole ngam walloyde konu leydi ndii huɓude kuliyankooɓe. Huunde nde yaada e sariya.
 

Ko holno taskorɗon onon kadi alhaali hakkeeji neɗɗanke e nder ɗii duuɓi ɗiɗi laamu Kapiteen Ibrahiima Tarawore Burkina Faso?

E miijo mon ko saabii si hakkeeji neɗɗanke no yaari caggal wano taskori fedde adunayankoore FIDH?