On Tottaama Konngol

Hannde altine, ñannde 29, 7ɓuru, en kaalan ko yowiti e coftal ɓalli, ɗum ko fi ɗii fijooji Olempik wonuɗi e waɗude Pari gila ñannde 26 lewru ndu wonuɗen e mun nduu. Fijooɓe leyɗeele Afrik ko timmi leyɗe 54 hino, nootii e ngal dawal 33ɓal  fijindaruuji olempik , ngam foolotirde e banŋeeji ɗuuɗuɗi walla calɗi ko timmi 43, kala e baŋŋe mun walla disipliin mun. Ɗin Calɗi ko wano fuku-koyngal, fuku-jonngo e fampagol ndagaaje, doggudu, fuɓɓagol diwugol walla jidugol jippiro, e wano non.Ko holno taskorɗon darnde afriknaaɓe e ɗii fijooji Olempik? E ko yowitii e arsike ɓee nootiiɓe e innde leyɗe Afrik? Ko holɗum e ngartam nduu fijindaaru Olempik addanta leyɗeele Afrik?

Hannde e aljuma, ñannde 26 lewru 7ɓuru ka Taskaram On Tottaama Konngol en yewti ko yowitii e darnde rewɓe ngam haɓude mbayligu weeyo e nder leyɗeele ɗen. Darnde rewɓe e nder reenugol taariindi ndin hannde. Nde tawi mbayliigu weeyo ko e rewɓe ɓen ɓurata battinnde, hiɓe haani kamɓe rewɓe ɓen daraade darnde timmude e nder haɓugol oo alhaali.  E nder adunaaru nduu fof rewɓe ɓen no jogii lowre janɗunde ko faatii e reenugol taariindi ndin. Kono darnde maɓɓe ndee timmii woo si tawii ɓe tawnoraama e nder haɓugol oo bone

Ko holno rewɓe ɓen haani darorde ngam haɓude mbayliigu weeyo e nder leyɗeele maɓɓe?

Hannde e alkamisa 25, 7ɓuru taskaram men on Tottaama Konngol no nawra en Niijeer. Ko janngo 26 7ɓuru timmata hitaande gila konunkooɓe ɓen ciwlii laamu Mohammed Bazum. E nder hitaande nden, Jeneral Abduramaan Ciyani hooreejo laamu faddewu Niijeer sosii kawtital leyɗe Sahel wonndude e konunkooɓe ardiiɓe Mali e Burkina Faso. Ɗum ko ngam haɓude kuliyanku e nder leyɗeele ɗee tati. Ngal pellital makko sellinii yaltugol Niijeer e nder Dental Leyɗe Hirnaange Afrik CEDEAO. Caggal mum o dartini kadi huuwondiral walla gollidal to baŋŋe konunkaangal hakkunde leydi makko e Faransi e Amerik. Mohammed Bazum, hooreejo kiɗɗo leydi ndii hinoo jaggaa haa jooni to huɓeere laamu. Ko holno ñaawirɗon laamu ɓee konunkooɓe Niijeer?

Ko honno taskorɗon pellite ɗe Jeneral Abduramaan Ciyani ƴetti gila o ardii Niijeer?

Ko holno yiiruɗon alhaali Niijeer oo, hitaande caggal nde laamu Mohammed Baɗum liɓaa?

Hannde e talaata, ñannde 24, 7ɓuru, yewtere men no nawri en Gine, kaalen ko faati e cukkagol hooreeɓe FNDC, fedde renndo daraniinde demokarasi e nder Gine. Timmii jonnte ɗiɗi gila Umaar Silla, lollirɗo  Foninke Mennge e Mammadu Billo Bah, nannga kadi . Ngal nanngal ɓee katanteeɓe ginenaaɓe ɗiɗo no aanini sanne sabu haa nii ko laaɓi heɓaaki tawo e nanguɗo ɓe, ko woni sabu ɓe nanngaa e nokku ka ɓe jaggaa.

Ko holno ñaawirɗon ngol mutugol ɓee lumndiyankooɓe ɗiɗo gila ñannde 9 nduu lewru?

E miijo mon ko honɗun saabii ɓee hooreeɓe FNDC hino cukkaa?

Hannde e talaata, ñannde 23, 7ɓuru, en kaali hannde ko faati e joɓdi ley-leyri ndi laamuuji ɗii happani gollooɓe ɓen e nder leydi ndii, no wi’e SMIC. Taw si golloowo no waawi wuurirgol joɓdi  mun ley-leyri pet? Ngal lamndal no fewti leyɗe adunaaru ndun fof. Hannde gollooɓe ɗuuɗuɓe no jogii caɗeele no feƴƴinira ngurdam mum. Najeriya, caggal nde ɓiɓɓe leydi ndin holli mette maɓɓe e ɓeydagol coggeeli ndin, hooreejo leydi ndin Bola Tinubu, fellitii e alkamisa yawtunde ɓeydugol joɓdi SMIC gollaaɓe laamu ngun.  Ndi sowaama laaɓi ɗiɗi. Ko ɗum woni joɓdi ley-leyri gollooɓe ndi laamu ngun happunoo ujune 30 nayra, happaama jooni ujune 70 nayra ɗum ko kaalisi ero 40, ɗin hawran ujunaaje 5 e teemeɗɗe ɗiɗi kaalisi cfa.

Ko holno ñaawirɗon ngal pellital hooreejo Najeriya sowugol joɓdi gollooɓe?

Hara ngol ɓeydugol joɓdi gollooɓe waawan

wonude sabu hoynugol nguurdam Najerinaaɓe

Hiɗon waawi wuurdude e joɓdi mon ley-leyri pet?

Hannde e altine, ñannde 22, 7ɓuru, en kaalan ko faati e suɓngooji hooreyaaku Amerik happaaɗi lewru sappo e go’aɓuru hitaande nde wonuɗen e mun. Joo Bayden, hooreejo leydi ndii, fellitii waasude tawtoreede e woote arooje. O feññinii ngal pellital makko hannki e alat e nder hello mejaare renndo X. Joo bayden haanunooɗo tiindodirde e Donal Tromp hooreejo kiɗɗo Dawlaaji Ndentuɗi Amerik e ngoo suɓngo, anndinii wonnde himo wonani cukko makko Kamala Haris ƴamude lefol laamu Amerik.Ko holno taskorɗon ngal pellital Joe Bayden haanunooɗo wonude kandida Lannde Demokrat ‘en waasude tawtoreede e suɓngooji happaaɗi ñannde 5 lewru sappo e go’aɓuru ndee hitaande? Hara ngal pellital Joo Bayden hino juhi on? Ko holno yiiruɗon arsikeeji Kamala Haris wonuɗe kandida democrat’en ?

Ka taskaram men On Tottaama Konngol hannde e aljuma ñannde 19, lewru 7 ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗoɗee jeewte waɗaaɗe ɗee.

Hannde e alkamisa ñannde 18, 7ɓuru, ka taskaram on Tottaama Konngol, en yewtan ko faati e alhaali musiibaaji (aksidanji) waɗooji e dow laawi e nder Afrik. E bi’ol cimtol ngol Dental Adunaaru toppitiinde Cellal (OMS) lollini ndee yontere ko faati e oo alhaali, limoore maayɓe e nder aksidanji waɗooji e dow laawi Afrik, ɓeydike sanne e nder ɗii duuɓi sakkitiiɗi. E hitaande 2021 pet, ko timmi yimɓe ujune 250 maayii e aksidanji laawi e nder duunde Afrik, e saayi mo tawata ka duunde Erop kan, limoore nden no ustii sanne.

Ko woni wonnde sabu ɗii aksidanji no ɗuuɗi no one, hino tawaa e majji anngal ɗoftagol sariiyaaji dogingol e ɗii laawi. Ɗun ko wano dogugol ɓuri ko haani kon, rondgol yimɓe maa dolle ko feƴƴiti, waasude haɓɓude duhol kisal e nder oto e anngal ɓornagol kaaskje moto, sabu ko waasuɓe pittaali mum e aksidanji moto ɓuri ɓeydude limoore maayɓe e aksidanji ɗii duuɓi sakkitiiɗi.

Ko holno taskornɗon ndee limoore ko faati e maayɓe ɗii duuɓi sakkitiiɗi e nder aksidanji nde OMS anndini e nder cimtol?

Ko holɗum saabii ɗii aksidanji hino ɓeydii e dow laawi duunde Afrik ustii e duuɗe heddiiɗe ɗee?

Ko haawi wonue darnde guwernemaaji ɗin e mo kala e senngo mun  fii ustugol ɗii aksidanji?

Hannde e alarba ñannde 17, 7ɓuru en kaalan ko faati e alhaali ciwle e noone nanngugol yimɓe kesol jaliingol hannde e nder leyɗe goɗɗe, tenntini ɗee hikkorɗe hirnaange Afrik. Wano Burkinaa Faso, yimɓe tato, ofisiyeeɓe ɗiɗo e jaayndeyankoojo ciwlaama e asewe yawtunde ndee. Siftinde ñannde nogay e nayi lewru ƴaɓɓiindu nduu, jaayndeyankoojo wi’etooɗo Serje Olon kadi mutuno. Haa hannde huunde humpitaaka ko faati e nanngal makko kanko kadi, mutinɓe mo e ko saabii o mutinaa anndaaka.

Ko holno ñaawirɗon oo alhaali?

Holko saabii oo alhaali ciwle e mutinngol yimɓe no ɓeydii e nder leyɗe goɗɗe?

Ko ɗate honɗe haanaa reweede hannde ngam oo alhaali ustoo walla acca  nder leyɗe ɗee?

Hannde e Talaata, ñannde 16, 7ɓuru, en kaalan ko faati Mali. Hooreeɓe ɓen ittii pellital ngal ɓe ƴettunoo fii e haɗugol golle pelle dawro e sosiyete siwil e nder leydi ndii. Ngal kuulal ngal ɓee konunkooɓe ardiiɓe Mali ƴetti gila lebbi tati, wonii sabu ardiiɓe politik ɗuuɗuɓe yaltii leydi ndii, ko timmi sappo e go’o  hino sakaa gila ñannde 20 lewru faltiindu. Caggal nde ɓee hooreeɓe newnani dawroyankooɓe e yimɓe jeyaaɓe e pelle sosiyete siwil fuɗɗitaade golle maɓɓe, suudu halfinaadu yuɓɓinngol woote ɗen noddii pelle politik leydi ndii e tumnbondiral fii ƴeewude no suɓngooji ɗin haaanaa yuɓɓinireede. Kono fedde renndiinde pelle dawro waɗunooɓe siifannde ñannde 31 lewru 3ɓuru hitaande yawtunde jaɓaali tawtoreede e tumnbondiral ngal. Hiɓe lamndii yo yimɓe maɓɓe nanngaaɓe ɓen accite.

Ko holno ñaawirɗon pellital hooreeɓe Mali newnanngal dawroyankooɓe e yimɓe jeyaaɓe e pelle sosiyete siwil jokkude golleeji maɓɓe ɓawto nde ɓe haɗaa gollugol gila lebbi tati?