On Tottaama Konngol

Toɓɓere yewtere men e taskaram On Tottaama Konngol, wonnoo ko fii yollagol “ukkitagol” fijooɓe balon Faransinaaɓe e alhaali dawro. Yoga e maɓɓe kollii mijooji maɓɓe e ɗee woote sarɗiyankooɓe saatiiɗi waɗude e jonnte paaɗe ɗee. E nder ɗum yoga e maɓɓe eriima nde ɓiɓɓe Faransi mbasata wotannde fedde “RN” nde “Marine Le Pen” ardii. Ko holno ñawirɗon ndee darnde ɓee fijooɓe balon e ndee toɓɓere?

Hannde e taskaram mon On Tottaama Konngol, on holli mijooji mon ko faati e haɓugol mbayliigu weeyo no jeyaa e battane mum, kokke, yooro, layugol jeerende e ustagol noonanteeri tagu Afrik. E bi’ol hertiyankoɓe,  45 % leyɗeele Afrik nattii moƴƴande demal. Ko holno ñawirɗon oo alhaali?

Hannde e taskarama mon On Tottaama Konngol, on holli mijooji mon ko faati e yoɓugol lampo mo laamu nguu nantini faade e cuuɗi jaayndeyankooji Senegaal. E nder jonte paltiiɗe ɗe, laamu ngu nanntiniino wonnde, ɓe no ndewe kalisiiji keewɗi ɗi njoɓaaka. Ko holno ñawirɗon oo alhaali ? Mbele entreprisaaji mejaaji ɗii no kaani yoɓude lampo hono no heddiiɓe ɓe ni?

Keɗoɗen ɗoo ñoggannde jeewte waɗaaɗe ka taskaram On Tottaama Konngol e nder nde yontere. Ko Faatumata SI SAAWAANE waɗani en. Heɗiaynkooɓe ɓen  neldii ji'anɗe maɓɓe e toɓɓe ɗe ɓe yiɗi artude e mum.

Ka taskaram men On Tottaama Konngol hannde e aljuma ñannde 14, lewru 6 ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitoɗee jeewte waɗaaɗe ɗee.

Hannde e alkamisa, ñannde 13, 6ɓuru, en kaalan ko faati e juldeere donkin woɓɓe wi’a ɗum taske e nder leyɗeele men. Hikka kadi caɗeele ɗuuɗuɗe hino taskaa tentinii e baŋŋe dañugol layya. Coggu baali ɗin no saɗti sanne. No tawti ɗum caɗeele e baŋŋe jeere. E bi’ol woɓɓe e heɗiyankooɓe, gila e comci haa e paɗe fof coggu mum no ɓeydii ka luumooji, hay huunde weɓaa heɓude hikka. Hay leyɗe ɓurnooɗe lollirde ngeyngu baali e nder Afrik nde juldeere Donkin hewti no jogii caɗeele e nga’al.  Saɗteende wonnde taskaade kadi no yowitii e ɓeydagol coggu waɗɗeteeɗi. Yoga e woowuɓe yaade ka gure walla ca’e  ngam juuludude e kooreeji maɓɓe waawaali laatinnde sabu anngal newaagol coggu waɗɗeteeɗi.

Ko honno wonɗon e hebloraade fii ndee juldeere Taske hikka ngam feƴƴinde nde no newori?

Ko holno alhaali on fewndori e nder leyɗeele mon?

Hannde e alarba ñannde 12, 6ɓuru en kaalan fo yowitii e alhaali jawle iriiɗe wano petrol, kaŋŋe, boksiit … taweteeɗe e nder yoga e leyɗeele Afrik. Hino taskaa hannde leyɗe Afrik ɗuuɗuɗe wano Najeriya, Niijeer e leyɗe goɗɗe no yaltinnde petrol majje naɓa e leyɗe janane. Senegaal tawtii leyɗeele kuutortooɗe jawle iriiɗe, ɗum ko caggal nde leydi ndin yaltini e altine yawtunde ndee baril petrol mayri arano.

Ko holno taskorɗon no leyɗe Afrik kuutorta oogirɗe majje?

Ko holɗum yaltingol ɗee jawle waawi battinde e faggudu leyɗe Afrik?

Hannde e talaata, ñannde 11, 6ɓuru, en kaalan ko faati e alhaali wullitannɗe waɗeteeɗe e hoore yoga ardiiɓe hiɓɓe Afrik nde ɓe iwi e laamu, wullitanɗe ɗe lorriiɓe heewaa heɓude googa e muuɗum. Wano Senegaal, yontere yawtunde ndee, kawtital lorriiɓe e seppooji waɗuɗi e duuɓi tati sakkitiiɗi e nder leydi ndii no torii yo mannda nanngal fampe liddu Makki Sall, o artiree o ñaawee.

Ɗoggol mojobe lorriiɓe wonɓe e etaade fii hakkeeji maɓɓe no ɗuuɗi hannde Afrik, Gambiya lorriiɓe e fitinaaji waɗuɗi fewndo laamu Yaaya Jame, Gine loriiɓe fewndo laamu Alfa Konnde, ɓee fof no habbii haa hannde yo ñaawoore waɗe ngam ɓe jonnitee hakkeeji maɓɓe.

Ko holno ñaawirɗon oo alhaali? E miijo mon holko saabii ɓee hooreeɓe leyɗee Afrik  noddataake yeeso cuuɗi ñaawirɗi ko yowitii e bonandeeji ɗi ɓe waɗi fewndo laamu maɓɓe?

Hannde altine, ñannde 10, 6ɓuru, en kaalan ko faatii e suɓngo dental keyɗe Erop (UE).  Ko timmi leyɗe noogay dental ngal no suɓaade gila ñannde 6 lewru ndu wonuɗen e mun sarɗinkooɓe maɓɓe taweteeɓe ka parleman Erop. To senngo Faransi njaltudi araniri lollinaandi ɓawto woote yuɓɓinaɗe e nder leydi ndii e alat no holli wonnde ko fedde dawro RN, Rassemblement National" Jordan Bardela e Mari Le Pen nden fooli. RN dañii hitooji 31.5% e nder teemederewel. Fedde laamuyankoore nden kayre ko daaɗe 15, 2% e nder teemederewel tan dañi. Ko taskaa e njaltudi ɗii suɓngooji, ko woñorɓe senngo ñaamo ɓen fooli e nder leyɗeele ɓurɗe ɗen. Wano Faransi, Almaañ, Itali, Belgik e leyɗe goɗɗe, ko kamɓe woni hoore. Caggal poolgu fedde dawro RN, hooreejo Fransi Emaniyel Makron fellitii hanki fusugol suudu sarnɗinkooru Faransi.Ko holno taskorɗon poolgu fedde woñorɓe senngo ñaamo e ɗii suɓngooji sarɗinkooɓe Parleman Erop yuɓɓinaaɗi Faransi?

Ka taskaram men On Tottaama Konngol hannde e aljuma ñannde 7, lewru 6 ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitoɗee jeewte waɗaaɗe ɗee.