On Tottaama Konngol

Keɗoɗen jooni ñoggannde jeewte waɗaaɗe ka taskaram On Tottaama Konngol e nder nde yontere. Ko Faatumata SI SAAWAANE waɗani en.

Hannde e alkamisa ñannde 6, 6ɓuru, ka taskaram on Tottaama Konngol, en yewtan ko faatii e jonnde waɗunde e ndee yontere hakkunde Koore di Siid e Afrik. Ko ndee ɗoo woni jonnde aranere hakkunde ndii leydi e leyɗe Afrik. Hooreeɓe leyɗe e imminaaɓe ko timmi 40yo nootino e ngal diisondiral yuɓɓinaangal Sewul e talaata e hanki alarba. Toɓɓe ɗuuɗuɗe yowitiiɗe e noone jokkondiral hakkunde maɓɓe yewtaama. Hino tawaa e majje alhaali oogirɗe Afrik, huunde nde Koore di Siid ɓuri himmannde hannde e nder ngal huuwondiral maɓɓe e leyɗeele Afrik. Fodooje ɗuuɗuɓe immorde Afrik di Siid waɗaama e ngal tumnbondiral. Hooreejo Koore di Siid hollii wonnde ɓe walliran Afrik dolaar miliyaarji sappo kaalisi Ero e nder duuɓi 6 arooji ɗii. Ɗum ko ngam wallitagol leyɗe ɗee to baŋŋe ɓamtaare majje. Ko holno taskorɗon ngal jokkondiral hakkunde Koore di Siid e Leyɗeele Afrik? Ko holɗum ngal jokkondiral hakkunde Koore di Siid e Afrik jibinanta leyɗe Afriknaaje?

Hannde e alarba ñannde 5, 6ɓuru en kaalan ko faati e Kiliyan Mbappe, oo fiju-yeesoojo  (hawoowo) faransnaajo fijaynooɗo PSG. O laatinii fonndo makko ɓooyuɗo e altine yawtunde ndee. Ɗum ko nduu yaadu makko Reyal Madrid. Kiliyan Mbappe siifidii e hooreeɓe teekodal ngal aadodal fijangol Reyal Madrid haa e hitaande 2029. Ɗum ko Kontra mo duuɓi 5.Ko holno ñaawirɗon ngol iwugol Kilian Mbappe PSG caggal nde o fijani teekodal ngal duuɓi 7? Ko holɗum yaadu Kiliyan Mbappe Reyal Madrid waawi addande teekodal ngal?  Ko ngartam holɗam o dañata kanko Kiliyan Mbappe e nder duuɓi jowi ɗi o fijanta Reyal Madrid?

Hannde e talaata, ñannde 4, 6ɓuru, en kaalan ko faati e pehe ɗe ardiiɓe jannde e needi haani ɓamude hannde ngam haɗugol nguyka e ɗee ndartinooje walla egsamenji e nder leyɗe Afrik. Wano Gine, hino tawaa e pehe ɓamaaɗe gila rowani fii haɗugol lekkolɓe ɓen wujjugol ka foolotirooji, waɗugol e nokkuure weddiinde hooreeɓe toppitiiɓe needi haanuɓe suɓaade ko janngooɓe ɓen ndartinirtee kon, lamnde ɗen, no wi’ee “sujets” e ɗemngal faransiire. Hino tawti e ɗum, jaɓugol telefonji maɓɓe ɗin fof hara ɓe waawaa humpondirde hay gooto haa egsamenji ɗin gasa. Feere wonnde wonnde kadi no yowitii e waɗugol kameraaji hiwirɗi foolotirooɓe ɓen (janngooɓe ɓen) e nokkuuje ɗo egsamenji ɗin waɗetee ɗon.

Ko holno ñaawirɗon ɗee pehe ɓamaaɗe senngo Gine?

Ko pehe holɗe hooreeɓe leyɗeele mon ɓami hikka fii haɓugol?

Hannde e altine, ñannde 3, 6ɓuru, en yewtan ko faatii e alhaali dawro Afrik di Siid. ANC, fedde laamuyankoore nden waasi keewal mun to suudu sarɗinkooru e laawol aranol suɓngooji yuɓɓinaaɗi e alarba faltiiɗo oo. Ko daaɗe 40, 7 e nder teemederewel fedde nde Cyril Ramafosa woni e hoore mun ndee heɓi. Ndee fedde foolaama e ngol ɗoo laawol caggal duuɓi cappanɗe tati gila nde jogii hooreyaaku Afrik di Siid. Jooni non, ɓe waawa hannde kadi joɗɗintinnde hooreejo leydi ndii Cyril Ramafosa ka laamu.

Ɗum waawi laataade woo si ɓe waawi jokkondirde walla haɓɓondirde e pelle goɗɗe ngam waɗude laamu hawtaangu.E miijo mon holko saabi ANC waasi keewal timmugol e ngoo suɓngo depite’en? Hara ko fedde honnde maa mi wi’a pelle honɗe ANC waawata haɓɓondirde / jokkondirde e mun?

Hannde e aljuma, ñannde 31 lewru 5ɓuru ka taskaram On Tottaama Konngol en yewtii ko yowitii e alhaali rewɓe gollooɓe e nder cuuɗi. Hannde yoga e rewɓe, woni ko jooɗiiɓe e ca’e mawɗe woni ko iwuɓe e gure tokoose ari ka saare ngam ɗaɓɓude golle, ko golle nder suudu ɓe fuɗɗorta ngam ɓe heɓa no ɓe feyyinira haajuuji maɓɓe. Hino ɗuuɗi hannde rewɓe waɗooɓe ɗee golle nder suudu, fii kala feccere e maɓɓe ƴettiraa wano mecce sabu anngal faamu, e ko tawi kon e nder leyɗe ɗuuɗuɗe, golle nder suuɗu fonnaaka e mecce heddiiɗe ɗen.

Ko honno ngal meccal sifori e nder leyɗeele mon ka baŋŋe huuwondiral walla nanondiral hakkunde gollooɓe nder cuuɗi e gollanteeɓe?

 Ko caɗeele honnɗe ɓee rewɓe gollooɓe e nder cuuɗi fottata e muuɗum?

Ko holɗum haana waɗeede hannde ngam hakkeeji rewɓe gollooɓe e nder cuuɗi teɗɗinee  ?

Keɗoɗen jooni ñoggannde jeewte waɗaaɗe ka taskaram On Tottaama Konngol e nder ndee  yontere. Ko Faatumata SI SAAWAANE waɗani en.

Alkamisa ñannde 30, 5ɓuru, hannde en kaalan ko faati e ngal luural taskaangal ndee yontere hakkunde FECAFOOT, njoɓɓudi tammbitiindi fuku-koyngal e nder Kamerun e jaagorgal halfinaangal coftal-ɓalli. Ngal pooɗondiral hakkunde ɓee hooreeɓe jonnte ɗiɗi ado tiindondire saatiiɗe hakkunde diɗɗal Kamerun e diɗɗe Kapweer e Angola. Fedde tamnbitiinde fuku-koyngal Kamerun no tuumi Mark Briis oo eltoowo toɗɗaaɗo gila ñannde 2 lewru faltiindu, dartagol Samiyel Eto’o hooreejo Fecafoot, ronkude tawtoreede e tummbondiral ngal ɓe noddi. Hino ɓeydii e ngol tuumol salagol kanko Mark Briis fewjodeede ko yowitii e lollingol doggol inɗe fijooɓe ɓen e ɗee kawrite ɗiɗi saatiiɗe. Ko ɗum saabii Samiyel Eto’o toɗɗaade kañum kadi “Martin Ndtoungou Mpile” ko elta diɗɗal Kamerun ngal.

Ko holno ñaawirɗon ngal lurral hakkunde ɓee hooreeɓe coftal-balli, saabiingal hannde woodeede eltooɓe ɗiɗo fii diɗɗal Kamerun?

Ko holɗum ngal lurral waawi battinande ɗiɗɗal Kamerun?

Ko holno yiiruɗon janngo fukku-koyngal Kamerun?

Yewtere men hannde e alarba ñannde 29, 5ɓuru no nawra en Koddiwar, taskoɗen ko faati e alhaali dawro leydi ndii. Taw si Alasaan Waatara townan honndu fii happu laamu nayaɓu? Ko lamngal ngal ɗuuɗuɓe habbii jaabawol mum hannde tentinii gila feddeeɓe RHDP, (fedde dawro  makko) feññini e altine feƴƴunde faale maɓɓe yo oo hooreejo Koddiwaar tawtore e ƴamooɓe lefol laamu e suɓungo saatiingo e hitaande 2025. E bi’ol ƴettoowo konngol e innde RHDP fedde laamuyankoore, ko Alasaan Waatara ɓe suɓii ko wona kanndida maɓɓe. O wi’i wonnde Waatara gollii sanne e nder laamu makko, o ɓamtii leydi ndii. Kono haa hannde hooreejo leydi ndii anndinaali si o jaɓan ngal ƴaamal. Siftinnde wonnde Alasaan Waatara holluno e hitaande 2020 wonde o accanan darnde makko nden sukaaɓe ɓen ko lomtoo mo.

Ko holno taskorɗon ngal pellital RHDP ?

Taw si Alasaan Wattara mo duuɓi 82, jaɓan townude honndu e suɓngo hooreyaaku saatiingo?

Ko holɗum tawtoreede Alasaan Waatara e ƴamooɓe lefol laamu battinnta e alhaali dawro e renndo Koddiwaar?

Hannde e talaata, ñannde 28, 5ɓuru, en kalan hannde fii Gine, caggal nde hooreeɓe laamu faddewu leydi ndin ƴetti yontere faltiinde, pellital jaɓitugol “agremanji“ ko ɗum ko kaydiiji newnanɗi ɗii rajooji tati Espace Fm, FIM Fm e Jooma Fm e teleeji majji woodeede e gollude e nder Gine. E bi’ol guwerneman on ko anngal teddinngol ɗii mejaaje sariyaaji jaayndeyankaagal addi ɓe sokude ɗi. Kono gooto e hooreeɓe ɗee mejaaje sokaaɗi hollii wonde huunde ɓe anndinaa ko saabii jaagorgal Gine halfinaagal kumpite ƴettude ngal pellital liddu maɓɓe.

Ko honno ñaawirɗon ngal pellital hooreeɓe laamu ƴanngal Gine uddugol ɗee mejaaje?

Ko holɗum ngol jaɓitugol kaydiiji newnanɗi ɗee mejaaje ɓuraaɗe e heɗeede Gine waawi batiinde e alhaali leydi ndii ?