On Tottaama Konngol

Hannde e altine, ñannde 27, 5ɓuru, yewtere men no nawra en Burkina Faso, kaalen ko faatii e jonnde genndiire nde laamu faddewu nguu yuɓɓini yontere faltiinde ndee Wagadugu. No jeyaa e toɓɓe ɗe jonnde ndee jibini, juutnugol happu laamu kapiteen Ibrahiim TARAWORE, ɓeydira ngu lebbi 60. Ɗum no holli wonde o heddoto e laamu duuɓi jowi. E kadi kanko Ibrahiim Tarawore natti wonude hooreejo laamu faddewu, laamu makko daginaama o wonii hooreejo Burkina Faso. T

oɓɓere wonnde kadi haldaade e ndee jonnde no newnani hooreejo leydi ndii wonugol kanndidaa walla tawtoreede e ƴamooɓe lefol laamu Burkina, wondude e hooreejo jaagorɓe e hooreejo suudu sarɗinkooru Burkina Faso. Ko holno taskorɗon toɓɓe ɗe ngal kaaldal ngenndi Burkina Faso jibini hay si tawii hino woodi pelle darwo ɗe tawakooka ka tummbondiral? Ko holɗum ɗee toɓee haldaaɗe e ndee jonnde genndiire Burkina waawi battinnde e alhaali dawro e renndo leydi ndii?

Ka taskaram men On Tottaama Konngol hannde e aljuma ñannde 24, lewru 5 ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitoɗee jeewte waɗaaɗe ɗee.

Hannde e alkamisa, ñannde 23, 5ɓuru, en yewtan ko yowiti e alhaali dawro Caad. Hooreejo leydi ndii Jeneral Mahammat Idriis Debi, waɗii hannde woondoore makko ardagol leydi ndii e nder duuɓi arooji. Ɗum ko caggal nde o fooli e suɓngooji hooreyaaku yuɓɓinaaɗi ñannde 6 lewru ndu wonuɗen e mum nduu. Jooni laamu ngun waylike, laamu faɗɗewu Caad ɓooyungu duuɓi tati timmii jooni ko laamu demokarasi woni ton, nde tawi ko ɓiɓɓe leydi ndii suɓii hooreejo oo.

Ko holno njiiruɗon laamu Mahammat Idriis Debi e nder duuɓi jowi arooji caggal nde o anndini balɗe no feƴƴi wonde o waɗataa guwerneman mo laamu hawtaangu?

Ko holɗe e golle teerii Mahammat Idriis Debi, oo hooreejo lamminaaɗo Caad?

Hiɗo miiji wonde mbayliigu taskete e nder ɗii duuɓi jowi ɗi Mahammat Idriis Debi ardotoo Caad?

Hannde alaarba 22 lewru 5ɓuru hitaande 2024 ka taskaram men On Tottaama Konngol, paaɗen ko Moritani. Suudu tammbiindu doosgal leydi ndii lollinii doggol inɗe kandidaaɓe njeeɗiɗo jogoorɓe tawtoreeɗe e suɓngo hooreyaaku leydi ndii ñannde 29 lewru 6ɓuru 2024 warooru nduu.

Teskaama wonnde, hooreejo leydi kiɗɗo on, Mohammed Wuldu Abdel Aziz tawaaka e ɓen njeeɗiɗo, fay so tawii o nelduno kanndidaagal makko.

Holno njiiruɗon waasugol taweede mo e ɗii suɓngooji ? Mbele oɗon njeydi yi'anɗe e ɓee wiiɓe wonnde ko hooreejo leydi hanndeejo  oo, Mohammed Wuldu Gazuwaani sakkii woɓɓe ɓe newnanaaka tawtoreede?  Mbele demokarasi leydi ndi ina tiiɗi ?

Hannde e talaata, ñannde 21, 5ɓuru, en kaalan fii ndee yamiroore Suudu Ñaawirdu Haku-leydiiru “CPI”, ko faati e nanngugol hooreejo jaagorɓe Israayel Benyamen Netanyahu e jaagorɗo makko kalfinaaɗo konu no wi’ee Yoav Gallant kaŋum e woɓɓe e hooreeɓe  Hamas.  Ɓee hino tuumaa e alhaaliiji rufo ƴiiƴam e war-neɗɗanke wonuɗi e waɗude Gaza

Ko holno ñaawirɗon ngal pellital Suudu Ñaawirdu CPI nanngugol Benyamen Netanyahu?

Taw si ngal pellital CPI waawan battinde e ɗee hare ɗe Israaye woni e waɗude e nder Gaza?

Holko  wonata konngol ɓee tuumaaɓe?

Hannde e altine, ñannde 20, 5ɓuru, en yewtan ko faatii e alhaali liɓal maa mi wi’a ciwle laamuuji  jaaliiɗe hannde e nder leyɗeele men Afrik. E aset jemma hino weetude e alat, etannde ciwlere laamu taskaama e nder RD.Konngo. Hooreeɓe Konu leydi ndii nantinii wonde ɓe sakkiike saamineere laamu Kinshasa caggal nde jogiiɓe kaɓirɗe yanani daakorde cukko hooreejo jaagorɓe Konngo, Vital Kamerhe si fewnire to suudu laamuyankooru. E bi’ol konu leydi ndii boniyankooɓe ɓen nanngaama hino tawaa e maɓɓe hooreejo maɓɓe Christian Malanga konunko kiɗɗo RD.Konngo. Ko honno taskorɗon oo alhaali? Holko saaɓi ciwle laamuuji hino jaalii hannde e nder leyɗeele Afrik? Ko pehe holɗe haana ɓamaade hannde ngan ustude haa re’a liɓal laamu e nder Afrik?

Hannde e alkamisa ñannde 16, 5ɓuru, ka taskaram on Tottaama Konngol, en kaalii ko faatii e alhaali mejaaji renndo e noone no sukaaɓe ɓen wonii e huutorde ɗi hannde. Hino taskaa ka sukaaɓe yoga e maɓɓe no duumii hannde e huutorgol mejaaji renndo ɗii, tawa ko ɗi ɓurata battinangol ɓe ko bonondaaji mawɗi. Sabu ɓe alaa e huutorde ɗi no ɗi nafira. Ɗii mejaaji renndo wonani ɗuuɗuɓe dorogu sabu ɓe waawa wonde e ɓaawo facebook, tiktok, twitter, instagram… haɗa ɓe golle, jannde e wano non.

Ko holno yiiruɗon noone no sukaaɓe ɓen wonii e huutorde ɗii mejaaji renndo?

Ko holno sukaaɓe ɓen haani huutorde ɗii mejaaji renndo ngam ɓe daña nafoore e majji?

Ko holɗum ɗii mejaaji renndo waawi battinnde e ngurdam sukaaɓa ɓen?

Ka taskaram men On Tottaama Konngol hannde e aljuma ñannde 17, lewru 5 ɓuru 2024, e nder ndee yeewtere udditiinde, on kaali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitoɗee jeewte waɗaaɗe ɗee.

Hannde e alarba ñannde  ñannde 15, 5ɓuru en kaalan fo yowiti e lurral aafiingal hakkunde Niijeer e Benen e ɗee balɗe sakkitiiɗe. Ɗum ko caggal nde ardiiɓe laamu faddewu Niijeer salii udditude keerol hakkunde maɓɓe e Kotonu. E bi’ol maɓɓe hiɓe tuumi Benen wonude saabu rafi kisal waɗa e nder Niijeer. Hiɓe ɓeydi anndinde wonde hiɓe jogii dalillaaji laaɓuɗi holluɗi Benen hino jaɓi gonal konunkooɓe Faransi ka maɓɓe, yiɗuɓe addude rafi kisal e nder Niijeer.

Benen kadi e senngo mun salike Niijeer rewna walla lunnbinira ka port maɓɓe petrol mun yahayɗo on Siin. Ko holno taskorɗon ngal pooɗondiral hakkunde leyɗeele ɗee ɗiɗi Ko haa honte ngal lurral yaata si tawii ngal dartinaaka? Ko holɗum waawi ñippude ngal lurral hakkunde Niijeer e Benen?

Hannde e talaata, ñannde 14, 5ɓuru, yewtere men no nawra  en Mali. Hooreejo laamu faddewu nguu Asimi Goyta henndike hanki e altine fiɓannde diisondiral ɓiɓɓe leydi ndii. Ɗum ko caggal nde daawal tataɓal ngal timmi e aljuma faltiinde ndee. Ndee joonde Malinaaɓe jibinii ko timmi toɓɓe 300.

Hino tawaa e toɓɓe ɗee ɓeydugol junndi laamu faddewu nguu gila duuɓi ɗiɗi haa duuɓi jowi, newnangol kolonel Asimi Goyta tawtoreede e woote hooreyaaku saatiiɗi, Kaaldude e pelle jogiiɗe kaɓirɗe Mali e ɓeydugol darnde kolonelɓe woɓɓe waɗaɓe jenerooɓe. Ko holno taskorɗon toɓɓe ɗe ngal kaaldal ngenndi Mali Jibini? Ko wano ndee fiɓannde ɗoo abborɗon ngal kaaldal  Malinaaɓe?