On Tottaama Konngol

Altine 13 lewru 7ɓuru hiɗen yeewta hannde kadi fii ngoo foolotiro winndere fuku koyngal joofayngal e alat aroowo ñannde 19. Pottite 2ɗaɓal timmoode fuɗɗoto janngo talaata hakkunde Faransi e Espagne. Pottital ɗiɗaɓal daawal ngal ko e alarba hakkunde Angleterre e Argentine, diɗɗal ngal Suisse tammpini e daawal 4ɓal timmoode nde tawi ko ka prolongation walla nde silmaaji pottital ngal ɓeyɗaa ɓe pi’i ɓee tiindondiraaɓe maɓɓe tawi ɓen ustoraama fijoowo maɓɓe gooto joɗɗiniraaɗo boɗewal.

Ko honɗum woni ji’anɗe mon e kawrite nayaɓal timmode, no diɗɗe ɗen darori e loggi naadaaɗi? Ko honno taskorɗon ngal diɗɗal Espagne e ngoo foolotiro? Tawu si ngal jeyaa e diɗɗe ɓurɗe jihude hikka? Mbele Angleterre no jogii darnde pihugol argentine ka ɗiɗaɓal timmoode? Taw si Argentine waaway dañude hikka kadi deesewal ngal wano ɓe dañiri ngal e hitaande 2022 caggal nde ɓe fooli Faransi e late jaalorɗe 4-2? E miijo mon ko diɗɗe honɗe hawrata ka timmal?

On Tottaama Konngol, hannde ko aljuma, e no kala aljuma. Ko yeewtere udditiinde. Hiɗon njogii ndimaagu naayoraade ɗo mbelaɗon e no mbiliraɗon e nder toɓɓe ɗe njeewtɗon e nder jeewte On Tottaama Konngol.

Alkamisa ñannde 9, 7ɓuru en yewtay ko faati e kawge ( kawrite) 4ɓal timmooɗe foolotiro fukku-koyngal adunaaru fuɗɗotooɗe hannde. Ɗiɗɗe 8 fijooɗe e ngal daawal anndaama caggal nde 8taɓal timmoode nden joofi e talaata. Hino jeyaa e majje diɗaal gootal Afrik Marok, ngal tiindondiral hakkunde mum e Faransi fadaa sanne kiikiiɗe  hannde. 

Ko e diɗɗal honngal fawuɗon yaakaare e mum hakkunde Maroc e Faransi?

Taw si Maroc yottoto hannde piggal ngal Faransi piiyi ɓe e ɗiɗaɓal timmoode foolotiro winndere hitaande 2022?

Ko kippu hombo dañata polgu hikka? 

Ko honɗum hiitiɗon e kawrite heddiiɗe hakkunde Belgique – Espagne e aljuma, walla hakkunde Angleterre – Norvege e asewe kañum e tiindondiral hakkunde Suisse – Argentine e alat?

E miijo mon ko diɗɗe honnɗe fottata e ɗiɗaɓal timmoode ?

Alarba ñannde 8, 7ɓuru, en yewtay hannde ko faati e alhaali ndiyam siiwaaɗan no wi’ ee "eau minérale" e ɗemngal faransiire, yareteeɗam hannde e nder yoga e leyɗeele men. Mbele ɗee ndi'e siiwaaɗe wonaaɗe e yareede fow hino laaɓi? Wano Senegal wittiyankooɓe gollooɓe e duɗal jaaɓi haattirde Cheikh Anta Diop mo Dakar waɗuɓe witto e dow ndiyam siiwaaɗam wonaaɗam e yeeyeede ton e nder mbuusuuji,  anndinii wonnde 82 e nder teemederewel ɗee di'e laaɓaa, ɗam haanaaka yareede nde tawi ɗam heewi kulloy walla mikrobji. Hay batte soɓe yi’aama e goɗɗi e ɗii nbuusuuji ndiyam. Ndee tefoore waɗii jeertino e laamu Senegal. Jaagorɗo halfinaaɗo ngeygu anndinii e nder winndande pellital maɓɓe ɓamude pehe ngam haɓugol oo bone. Ko holno alhaali on fewndori e nder leyɗe mon? Holko saabii ɗee di'e siiwaaɗe yeeyeteeɗe ɗee no wonndi e tuundi, ko honto tuundi ndii woni e immorde?

Hannde e talaata ñannde 7, 7ɓuru, yewtere men hiɗen hewta Gine, nokku ka hakke neɗɗanke yaaɓaa, alhaali siforanɗo ciwle keewɗe e nannge wonndude e waarngooji taskaaɗi e nder leydi ndii. Huunde maapinnde hannde sanne fedde « Tournons la page ». Ardiiɓe kawtal ngal lollinii e asewe yawtuɗo cimtol ngol ɓe anndini e nder mun wonnde ko timmi yimɓe 35 ciwlaama walla mutinaama Gine gila Jeneral Mamadi Doumbouya hewti ka laamu. Ndee winndannde no anndini kadi fii yimɓe 12ɗo nanngaaɓe tawa ko nannge ɗe ɗoftaaki sariya hakkunde kitaale 2022 e 2026. Hiɓe holli kadi wonnde ko hooreeɓe Guinée woni e mutinnde ɓee yimɓe lunndiiɓe laamu. E bi’ol maɓɓe oo alhaali no anndintina caɗeele ɗe ginenaaɓe wuuri fewndo laamu Sekou Toure.

Ko holno taskorɗon oo alhaali ? Holko saabi hakkeeji  neɗɗo teddinaaka Gine ?

Altine ñannde 6, lewru 7ɓuru hiɗen yeewta hannde kadi fii ngoo foolotiro winndere fuku koyngal. Ko hannde pottite 8ɓal timmoode ɗee njoofata. Diɗɗal Egypte tiindondiray e Argentine kiikiiɗe. Tawu si ngal diɗɗal Afrik waaway lummbude ngal daawal ngam tawtude Marok wonuɓe heblanaade pottital 4ɓal timmoode caggal nde ɓe piyi Canada loggi 3 – 0 Ko holno yiiruɗon arsike Maroc e Egypte, diɗɗe Afriknaaje ɗiɗi heddiiɗe ka foolotiro, waawude woɗɗaade haa yottoo e ɗiɗaɓal timmoode walla timmoode?

Maroc fottay e Faransi e nayaɓal timmoode, caggal nde ɓe fotti heɓi duuɓi 4, gila e hitaande 2022 e ɗiɗaɓal timmoode foolotiro winndere fuku koyngal Qatar. Ko holno habborɗon tiindondiral hakkunde maɓɓe?

On Tottaama Konngol, hannde ko aljuma, e no kala aljuma. Ko yeewtere udditiinde. Hiɗon njogii ndimaagu naayoraade ɗo mbelaɗon e no mbiliraɗon e nder toɓɓe ɗe njeewtɗon e nder jeewte On Tottaama Konngol.

Hannde alkamisa ñannde 2, 7ɓuru en taskike alhaali dawro Senegal caggal nde sarɗinkooɓe wooti e keewal eɓɓoore ngam heyɗintinngol dosngal leydi ndii. Si ɗii sariyaaji ɗi PASTEF eɓɓi lawɗinaama, Ɗum jibinay mbayliigu mawngu e banŋe ardiigu Senegal. Sabu ko sariyaali ngam sembinngol darnde parlemen on wonndude e hooreejo jaagorɓe.  Kono ko ustayɗo doole walla sembe hooreejo leydi ndin, nde tawi ko nde wootere tun e nder manda makko on fow hooreejo leydi waawi fusude suudu depiteeɓe ɓen. E kadi o waawa ardaade fedde dawro fanni himo laamii. Huunde nde kawtital Diomaye President e yoga pelle lumdiyankooje e sosieye siwil Senegal liddii. Hiɓe holli wonndema ko sariyaaji waɗanaaɗi hooreejo Parlemen Ousmane Sonko. Hooreejo leydi Bassirou Diomaye FAYE anndinii wonnde o lawɗinta oo sariya, hara o waɗaali referendum, Senegalnaaɓe woota eyo walla ala. Kono Ousmane Sonko kaŋun yiɗaa nanunde innde woote referendum, ko maa hooreejo Senegal lawɗina oo sariya.

Ko holno taskorɗon ngal pooɗondiral aafiingal hakkunde hooreejo Senegal Bassirou Diomaye FAYE e Ousmane Sonko hooreejo parleman Senegal?

E alarba ñannde 1, 7ɓuru, yewtere men no nawra en hannde Afrik du Sud ngam kaalde ko faati e alhaali ɓiɓɓe leyɗe janane jooɗiiɓe ton. Ko holno yiiruɗon fitinaaji walla ngayngu wonaangu e faweede e dow woɓɓe wuurɓe Afrik du Sud? Ɓiɓɓe leyɗe janane no riiweede yaltinee ton. Yoga e maɓɓe no ɓittii hannde sabu fitinaaji wonaaɗi e faweede e dow maɓɓe. Hanki talaata ujuje ujune ɓiɓɓe Sud Afrik yuɓɓinno seppo liddu woɓɓe ɓen e nder ca’e leydi ndin wano Johannesburg, Pretoria e Durban. Hiɓe haɓɓitii yo woɓɓe ɓe gonal mun ton ɗoftaaki sariya yaltu Afrik du Sud. Ko timmi ujune noogay e jowi ɓiɓɓe Afrik yaltii ton jonnte yawtuɗe. Ghana, Nigeria e Malawi, no jokki artirde yimɓe maɓɓe.

Ko holno taskorɗo ɗee caɗeele ɗe ɓiɓɓe leyɗe janane wuuri hannde Afrik du Sud ?

Ko holno yiiruuɗon ngol ɓeydagol ngaygu liddu woɓɓe ɓen Afrik du Sud ?

Ko pehe holɗe ardiiɓe Afrik du Sud haani bamude ngam huɓindaade alhaali oo ?

Hannde e talaata ñannde 30, 6ɓuru, hiɗen hewta Burkina Faso, nokku to ardiiɓe leydi ndin ɓami pellital faade e janngooɓe. Jooni kala janngoowo yiɗuɗo janngoyde caggal leydi, ko maa daña yamiroore immorde e laamu ngun. Faandaare oo sariya keso fewtuɗo janngooɓe, sariya mo jaagorɗo halfinaaɗo needi jannde anndini yontere yawtunde, ko fii yo ardiiɓe Burkina Faso waawu rewindaade jannde ɓiɓɓe leydi ndin, tawa ko ɓe janngoyta kon caggal leydi no yaadi e ko Burkina Faso ɓuri hatonjinnde e mum kon. Ndee feere heyre ɓee ardiiɓe, ko janngooɓe yahayɓe jokkitagol jannde mum caggal leydi ɓen fow fewti. Woni janngooɓe dañuɓe buursuuji, woni ko ɓe jinnaaɓe (mawɓe) mum woni e yoɓande ɓe fii janngoygol leydi jananiri, ko maa laamu Burkina newnana ngol yaltugol.

Ko holno faamirɗon ndee feere ardiiɓe Burkina Faso fewtunde ɓiɓɓe leydi yiɗuɓe jokkitagol jannde maɓɓe caggal leydi ?

Ko holɗum ngal pellital arata battinnde needi leydi ndin?

Mbele ngal pellital ɓeydan ustude yaltugol sukaaɓe ngam janngoyde caggal leydi?