On Tottaama Konngol

Hannde altine ñannde 29 lewru 6ɓuru hiɗen yeewta kadi e foolotiro winndere fuku koyngal 2026. Kawrite 16ɓal timmoode fuɗɗike hanki e alat. Hikka diɗɗe 9 leyɗe Afrik yawtii daawal ɗiɗaɓal ngam tawtoreede e tiindondire 16ɓal timmoode. Ko goo on nii e nder taariika fuku-koyngal winndere, yo wano ɗee diɗɗe Afrik ɗoo fow waawu yottaade e ngal daawal ɗoo.

Wano RD.Congo wayrii tawtoreede e ngoo foolotiro gila e hitaande 1974, hitaande nde ɓe yiltaa e tiindondire daawal aranal, si ɓe waawi tawtoreede hikka.  Cap Vert kañum, ko goo on nii to leydi ndin tawe ka coupe du monde. Koddiwaar kamɓe, waɗii duuɓi 16 gila ɓe wayri tawtoreede e ɗee pottite, ɗum ko e hitaande 2010.

Nde tawi Afrik du Sud pi’aama hanki e kawrite 16ɓal ko e diɗɗe wonɗe leyɗe Afrik e 8 heddiɗe ɗee fawuɗo yaakaare e dow mun  aran woɗɗaade e ngoo foolotiro?

Hannde e aljuma, ñannde 26 lewru 6ɓuru 2026 ka Taskaram On Tottaama Konngol on hollii men ji’anɗe mon ko faati e alhaali dewlugol (jombugol) sukaaɓe rewɓe ɓen tawa duuɓi maɓɓe ɗin hewtaali jombeede (ɓe hellifaaka).

Ko holno ñaawirɗon ngol resugol sukaaɓe rewɓe tawa duuɓi maɓɓe ɗin no famɗi ?

Ko holɗum waɗi si yoga faaleeji e sukaaɓe rewɓe alaaka e teddineede ko faati e dewgal ?

Ko holɗum woni battane tiggegol curbaajo mo duuɓi mum timmanaali desal ?

Hannde e alkamisa ñannde 25 lewru 6ɓuru en taskoto kawrite diɗɗe Afriknaaje e daawal ɗiɗaɓal foolotiro deesewal fuku-koyngal adunaaru 2026. Barooɗe Senegal no e nder alhaali sattuɗo nde tawi ɓe piyaama e pottite maɓɓe ɗen ɗiɗi.

Tawu si oo kippu waaway yawtude ka daawal tataɓal ngam tawtoreede e tiinondire 16ɓal timmoode ɗii fijooji no wi’e “16ème de finales”? Ko diɗɗe honɗe ɓuri on juhude e ɗee pottite daawal ɗiɗaɓal? ko holno tawruɗon pottite diɗɗe ɗe fawuɗon ɗen yaakaare e dow mun? Ko holno habborɗon kawrite arooje ɗee diɗɗe Afriknaaje?

Hannde Alarba 26 lewru 6ɓuru, en yeewtay ko yowiti e nanondire hakkunde pelle kuliyankooɓe e ardiiɓe leyɗe ngam heɓude jam e nder leyɗe maɓɓe. Wano Mauritanie, gila e hitaande 2007 ardiiɓe wonndude e mawɓe diina no siifidi e ngoomuuji jogiiɓe kaɓorɗe nanondire jam. Ndee yontere, ardiiɓe leydi ndin yaafike seɓɓitiiɓe 9. woɓɓe e maɓɓe ko fawanooɓe kaso kaaddi nguurdam.

si tawi ko eeyo, holko saabi laamuuji leyɗe goɗɗe yeru Mali waawaali huutorde wano ndee feere? Ɗee balɗe, hoɗiyankooɓe gure jeyaaɗe Bankass, e nder diiwal Mopti dogunooɓe fitinaaji fedde kuliyankoore JNIM arti ka maɓɓe bawto duuɓe jeeɗiɗi ko ɓe yalti ɓe fattii e gure goɗɗe. Ngol ruttagol ɓee yimɓe e gure maɓɓe laatike caggal nde hooreeɓe gure maɓɓe wonndude e mawɓe diiwal ngal njaɓi siifude nanondiral hakkunde maɓɓe e kuliyankooɓe JNIM. Ko holno yiiruɗon ngal nanondiral ?

Mauritanie, hooreeɓe leydi ndin yaafike kasooɓe seɓɓitiiɓe e diina 9. Ɓeen, ko sokanooɓe sabu kuliyankaaku. Woɓɓe e maɓɓe ko fawanooɓe kaso kattudi nguurndam. E nder hollitol, hooreeɓe Mauritanie, nantinii wonnde ɓee yimɓe accitaaɓe, holli nimse boneeji maɓɓe, ɓe torike yaafuye.

Ɗum ko caggal, kaaldal ngal mawɓe diina waɗdi e maɓɓe ko fawi e duuɓi sappo. Thierno Boune Oumar LY no tawaa e ɓeen mawɓe diina. E bi’ol neɗɗo seɓɓitorɗo diina, ko diina tan waawi mo artirgol e laawol. Ko kanko Thierno Boune Oumar LY woni koɗo men hannde. E faandu haala Ibrahima Timbi Bah, o arti no ngal kaaldal yaari. Heɗoɗen

Alarba ñannde 23 lewru 6ɓuru, en yeewtay hannde ko faati e maccangaaku waɗaangu e hoore ɓiɓɓe Afrik e no ɓe hettirta hakkeeji maɓɓe. Ko ɗum woni darnde hooreejo Ghana mo leydi mun jaɓɓi yontere yawtunde nde tummbondiral adunayankoowal aranal hooreeɓe Afrik e Caraïbes  e dow eɓɓoore no Afrik jonnirtee njoɓnaari walla ndaamordi sabu ko ɓiɓɓe afrik maccinaa, woɓɓe waraa, woɓɓe ndiifta naɓa ngollina e gese, jawle Afrik iriiɗe jatta naɓa leyɗe porto.

E ndee jonnde leyɗeele Afrik togii wonnde tooñaŋŋe fawaande e dow Afrik yo momte haa laaɓa, tooñuɓe ɓen njaɓa wonnde geɗe maccungaaku waɗanoongu e dow afriknaaɓe ko bone ɓurɗo mawnude faade e neɗɗo. Ɗum jannginee e duɗe ɗen sukaaɓe ɓen annda, hino tonngaa kadi darnugol cuuɗi fina tawaa maandinooji maccungaaku, martabaaji Afrik wujjanooɗi e on sahaa artiree watee e ɗin cuuɗi.

Ko holno njoɓdi walla ndaamordi ndi ɓe tottetee ndin haani siforde?

E altine 22, lewru 6 ɓuru, yeewtere men no nawra en hannde Gine nokku ɗo hooreejo leydi Jeneral Mamadi Doumbouya haɗi yaltingol kaŋŋe mo tafaaka leydi ndin. O ƴetii ngal pellital ɓawto tummbondiral hakkunde makko e jooma sosiyeteeji asayɗi kaŋŋe wonndude e soodooɓe ɗum. E bi’ol laamu Gine, jooni ko yo kaŋŋe o yoosine walla tafe haa gasa si mo yaltinee, naɓee caggal leydi.

Suudu tafirndu kaŋŋe waɗaama Gine, ndu fuɗɗoto gollude balɗe garooje. Faandaare nden ko wallitagol no ɓiɓɓe Gine dañira golle. Hooreejo leydi ndin no teeŋtini wonndema alaa huunde ko ittintinta ɓe ndee eɓɓoore. Gine no jeyaa hannde e leyɗe Afrik ɓurɗe jogaaɗe ngaluuji, kono leydi ndin alaa e heɓuɗe nafoore e jawle mun nder leydi, sabu ko ɗe naɓetee ko e leyɗe janane tafe si artiree.

Taw si Gine waaway tafude kaŋŋe mun si yaltina wano fellitiri hooreejo leydi Mamadi Dumbouya?

Hara waylugol kaŋŋe o Gine jibibanay ɓiɓɓe leydi ndin nafoore, ɓamta faggudu Gine wano holliri laamu Gine?

On Tottaama Konngol aljuma hannde 19 lewru 6ɓuru, e no aadoriɗen e aljuma kala, ko yeewtere udditiinde. Oɗon njogii wellitaare artude e kala toɓɓe ɗe njiɗɗon kadi e yuurnitaade toɓɓe ɗe njeewtuɗen e nder yontere ndee

Hannde e alkamiisa ñannde 18 lewru 6 ɓuru en kaalan ko faati e foolotiro 23ɓiiwo fuku koyngal winndere 2026. Diɗɗe Afrinaaje 10 jeyaaɗe e ngoo foolotiro fijii kawrital mum en aranal. Hara ko holno taskorɗon tiindondire ɗee diɗɗe leyɗe Afrik? Ko holno yiiruɗon njaltudi ɗee pottite yawtuɗe?

Hiɗen anndi ko Afrik du Sud udditi foolotiro ngon. Hakkunde maɓɓe e Mexique, ɓe pi’aa loggi ɗiɗi. Hakkunde Bresil e Maroc ɓe waɗi loggol e loggol, Koddiwar kañun pi’i Equateur loggol, Tunisie waɗaa loggi 5, Egypte e Belgique waɗi loggol mo kala, Senegal loggaa tati, Cap-Vert dartii Espagne gooto piyaali, ko wano noon hakkunde Portugal e RDC, kala e maɓɓe waɗi loggol. Ghana kañun, fooliri diɗɗal Panama loggol.

ko honɗum ɓuri on juhude e ɗee kawrite walla ko diɗɗal hongal ɓuri on juhude ?

E altine ñannde 15, 6ɓuru, yewtere men no nawra en Afrik du sud nokku to ardiiɓe ɓen holli wonnde yaltinii e nder leydi maɓɓe ko ɓaɗii ujune 3.000 ɓiɓɓe leyɗe janane jooɗiɓe Afrik du Sud. Ko holno yiiruɗon nguu ngayngu wonaangu e faweede e dow hoɓɓe wuurɓe Afrik du Sud? Ɓiɓɓe leyɗe janane no riiweede yaltinee ton. Yoga e maɓɓe no ɓittii hannde sabu fitinaaji wonaaɗi e faweede e dow maɓɓe. Leyɗe buy wano Ghana no ɓamude pehe artirgol yimɓe maɓɓe jooɗiiɓe Afrik du Sud. Najeriya kañun artirii e alkamisa yawtuɗo ko fawi 250wo yimɓe maɓɓe jooɗiiɓe Afrik du Sud. Ko ɓuri heewude e womre aranere adiinde hewtude Nigeria, ko rewɓe e sukaaɓe. E bi’ol jaagorɗo Najeria halfinaaɗo fiyakuuji nder leydi, ko timmi najeriɓaaɓe 800to wonuɓe Afrik du Sud no ñaagii leydi maɓɓe wallitaade ɓe ngam ɓe hewtita ka maɓɓe Najeriya. Ko holno taskorɗo ɗee caɗeele ɗe ɓiɓɓe leyɗe janane wuuri hannde Afrik du Sud?