Wëllkomm zréck an der Poterkëscht! Haut schwätze mir iwwer Hausdéieren. Fir d'éischt héiere mir, wéi zwou Persounen doriwwer schwätzen, en Hond z'adoptéieren. Duerno héiere mir eng Annonce um Radio, an där zwee Déiere vermësst ginn.

Vill Spaass beim Nolauschteren!

-

Transkript:

En Hond adoptéieren

A: So, ech iwwerleeë schonn eng Zäit, fir en Hond z’adoptéieren. Elo hunn ech endlech genuch Zäit a Plaz, mee ech weess net, ob ech léiwer en Hond aus dem Déierenasyl oder aus engem Déiereschutz am Ausland adoptéiere soll. Wat mengs du? Du hues jo schonn e bëssen Erfarung mat Hënn. 

B: Ech fannen et immens, datt s du léiwer en Hond adoptéiere wëlls wéi een ze kafen! Mee jo, de Choix tëscht dem Déierenasyl an engem Hond aus dem Ausland ass net evident. Béid Optioune si gutt, mee se hu Vir- an Nodeeler. Weess du schon, wat fir en Hond s de sichs? 

A: Am léifsten een, dee roueg an net  ze grouss ass. Et wier och gutt, wann e scho propper wier. 

B: Hmm, dann ass en Hond aus dem Déierenasyl vläicht besser. D’Personal kennt d’Déieren a se kënnen dir soen, wéi se sech verhalen, ob se zum Beispill eleng bleiwe kënnen, wéi se sech mat aneren Hënn verhalen, an esou wieder.  

A: Dat ass wouer. Mee mir dinn déi Hënn, déi op de Stroossen a Länner wéi Rumänien a Spuenie liewen, och immens leed. Deene wëll ee jo och hëllefen. 

B: Kloer, dat verstinn ech. Déi Déiere liewen oft a grausame Bedéngungen. Mee dofir si se och oft ängschtlech. Déi meescht kennen d’Liewen am Haus net, a sinn och keng Léngt gewinnt. Dat heescht, datt ee méi Gedold an Training brauch.  

A: Also mengs du, en Hond aus dem Asyl wier méi einfach? 

B: Net onbedéngt, mee et ass oft méi einfach anzeschätzen. Ausserdeem kanns du e virdrun e puer Mol besiche goen an zum Beispill mat ëm spadséiere goen a kucken, ob e bei dech passt. Bei engem Hond aus dem Ausland hues du just e puer Biller oder Videoen. 

A: Ech verstinn. Mee et ginn et net och Organisatiounen, déi d’Hënn hei zu Lëtzebuerg fir d’éischt an eng Fleegefamill bréngen? 

B: Dach, dat gëtt et och. Dat ass e gudde Mëttelwee. Da wunne se schonn an enger Famill a se kënne sech schonn e bëssen un d’Liewen am Haus gewinnnen, an d’Leit kënnen dir soen, wéi den Hond esou ass. 

A: Dat kléngt gutt. Hmm… wéi hues du et da gemaach ? 

B : Mir hunn eisen Hond hei am Déierenasyl adoptéiert. Mir hate Chance, de Lucky huet eis direkt gefall an hien huet sech och mat eis wuelgefillt. Ech denken, et wier eng Iddi, einfach emol an d’Déierenasyl kucken ze goen. 

A: Merci! Dat hëlleft mir scho weider. Ech mengen, ech ginn de Weekend emol kucken. 

B: Gutt Iddi! Huel dir awer Zäit – sech en Hond zouleeën, ass eng grouss Entscheedung.  

Komme mir elo bei d’Déiererubrik vum Donneschdeg, den 19. Juni: 

Zanter gëschter Nomëtteg gëtt um Kierchbierg de Metti, e brongen Dackel vermësst. Hien huet véier Joer an huet e rout Halsband mat engem sëlweren Unhänger mat sengem Numm un. Hien ass zoutraulech, mee warscheinlech fäert en e bëssen. 

Wann dir de Metti gesinn hutt oder wësst, wou hien ass,  da mellt iech wgl bei der Madamm Hoffmann op der Nummer 631 809 265 oder schreift eis eng WhatsApp Noriicht op d’Nummer 671 27 72 44.  

An nach eng Kéier: de Metti, e brongen Dackel, gëtt um Kierchbierg vermësst. 

De Beetebuerger Zoo mellt, dass e Papagei aus hirem Park fortgeflunn ass. Et handelt sech ëm en Hyazinth-Ara an en ass ongeféier ee Meter grouss an e weit 1,4 Kilo. Seng Fierderen si blo a ronderëm d’Aen an de Schniewel ass hie giel. D’Personal aus dem Zoo deelt nach mat, dass hien ëmmer säin Numm rifft. Hie lauschtert op den Numm Rocky. 

Falls dir e gesitt, preparéiert en Teller mat Nëss oder enger Wuerzel. Domat ass hien immens frou. Rufft dann och beim Déiereschutz ënnert der Nummer 48 93 95 un oder kontaktéiert de Beetebuerger Zoo op der Nummer 51 10 48 1. 

 Merci fir Är Hëllef! 

Moien an häerzlech wëllkomm an der Poterkëscht. Wa mir d’Noriichten um Radio lauschteren, dann héiere mir meeschtens schlecht Noriichten: Krisen, Accidenter, Sträit – a just heiansdo positiv Noriichten. Haut maache mir dat anescht. An dësem Episod erziele mir iech just gutt Noriichte vun de leschte Méint bis haut. 
Mir hoffen, datt mir iech den Dag esou e bësse méi schéi maache kënnen: 

 
Gesondheet 

Eng nei Kënschtlech Intelligenz kann unhand vun engem Elektrokardiogramm potenziell déidlech Häerzproblemer a Stéierunge vum Häerzrythmus bei Risikopatiente scho 14 Deeg virdrun erkennen. De Projet ass nach an der Testphas, mee esou kéinten an Zukunft vill Leit gewarnt ginn a Mënscheliewe gerett ginn. 

Musek 

Musek mécht bekanntlech glécklech, dat huet eng Etüd aus Finnland elo wëssenschaftlech bewisen. Wa mir Musek lauschteren, schëtt eist Gehier Gléckshormoner, wéi zum Beispill Dopamin aus. Virun allem bei eise Liblingslidder gëtt de Belounungssystem an eisem Gehier aktiviéiert, esou wéi mir dat kennen, wa mir eppes Schéines erliewen oder e gutt Stéck Schockela iessen. Musek ka Stress reduzéieren, eis Stëmmung verbesseren a souguer hëllefen, manner Péng ze spieren. Also... lauschtert är Playlist mat äre Liblingslidder a scho gëtt ären Dag e bësse besser! 

 
Natur 

Am Amazonas schützen d’Regierung an d’Mënschen de Reebësch besser: et gi manner Beem ëmgehaen. Den Taux ass déi éischt Kéier zanter aacht Joer méi niddereg wéi déi lescht Joren. Ee Grond dofir ass och, dass vill Länner sech fir d’Erhale vum Reebësch Amazonas engagéieren. 

 
Déieren an Aartevilfalt 

Vill Länner hunn hir Schutzgebidder fir Déieren um Land an am Mier am Joer 2025 erweidert. Besonnesch am Mier gëtt et elo Schutzgebidder, fir d’Korallen, d’Fësch an aner Mieresbewunner ze schützen. 

Gesellschaft a Solidaritéit 

Ëmmer méi Leit engagéiere sech benevol fir sozial Projeten. D’EU-Kommissioun annoncéiert, datt d’Zuel vu Benevollen 2025 sou héich wéi nach ni ass. Besonnesch jonk Persoune setze sech fir de Klimaschutz a fir Leit, deenen et net esou gutt geet, an.  

Kultur 

Kannerbicher sollen hëllefen, fir datt indigen a bedrot Sproochen net ausstierwen: 
Op der ganzer Welt gëtt et ongeféier 7000 Sproochen. Wann eng Sprooch ausstierft, da verléiere mer och d’Kultur, déi zu der Sprooch gehéiert. E weltwäite Projet vun enger Organisatioun vun de Vereenten Natiounen zesumme mat enger Organisatioun, déi Kanner- a Jugendliteratur fërdert, wëll eng Sammlung mat Bicher fir Kanner a Jugendlecher, och Comicken a Sachbicher, kreéieren. 

Wëllkomm zréck an der Poterkëscht!

Haut héiere mir, wéi eng Persoun enger Frëndin en Audio-Message mat enger Akafslëscht schéckt. Duerno héiere mir, wéi d'Frëndin am Supermarché ass an d'Produkter keeft.

Vill Spaass beim Nolauschteren!

-

Transkript:

Akafslëscht  (Audio-Message)

D: Hallo Martine, ech si schonn am Auto a kann elo net méi schreiwen. Ech schécken dir e klengen Audiomessage mat der Akafslëscht fir haut den Owend. Du gees jo an deen neie Supermarché am Quartier. Ech hoffen du fënns alles. Also... Mir brauchen en hallwe Kilo Tomaten fir d’Entrée. Fir de Schockelaskuch brauche mir och nach e Pak Miel. Dat ass alles. Merci! A nee... Pardon. Kaf och nach eng Fläsch Olivenueleg. Mir hu kee méi doheem. A kaf och nach e Liter Mandelmëllech, du weess jo, d’Sabrina ass laktosintolerant an hatt däerf keng Mëllech drénken.  Elo ass et awer alles... Merci! Äddi! 

Am Supermarché

A : Entschëllegt, kënnt Dir mir hëllefen, wannechgelift? 

B: Jo, natierlech. Wat sicht Dir? 

A: Ech brauch Tomaten. Wou fannen ech déi? 

B: D’Tomate sinn do hannen am Rayon vum Geméis. 

A: A, merci! A wou ass d’Miel? 

B: D’Miel ass am drëtte Rayon, beim Zocker. 

A: Ok. An den Olivenueleg, wou fannen ech deen? 

B: Den Olivenueleg ass och am Rayon vum Miel. 

A: Tipptopp! Villmools merci fir Är Hëllef. Nach eng lescht Fro: Hutt Dir och Mandelmëllech? 
B: Nee, mir hu leider keng Mandelmëllech méi. Iwwermuer kënnt eng nei Liwwerung. Als Alternativ hu mir Soja- oder Huewermëllech. Déi schmaachen och gutt. 
A: Merci. Dat ass fein.  

C: Gudden Owend. Hutt Dir alles fonnt? 

A: Jo, merci. 
C: Hutt dir schonn eng Clientskaart? 
A: Nee, nach net. Ech huelen de Formulaire mat heem. 

C: An der Rei. Dat mécht dann 23 Euro 75. Braucht Dir eng Tut ? 

A : Jo, wannechgelift. 

C: Dat kascht 10 Cent extra. 

A: Dat ass an der Rei. Merci! 

C: Bezuelt Dir boer oder mat der Kaart? 

A: Ech bezuele mat der Kaart, wannechgelift. 

C: Braucht Dir den Ticket? 

A: Nee merci.  

C: Dann nach e schéinen Dag. 

A: Merci gläichfalls. 

Wëllkomm zréck an der Poterkëscht!

Am Episod vun haut schwätze mir iwwer kleng Accidenter. Fir d'éischt héiere mir, wéi eng Persoun sech an de Fanger geschnidden huet. Duerno héiere mir, wéi eng Persoun enger Frëndin erzielt, datt si de Réck wéi huet.

Vill Spaass beim Nolauschteren!

-

Transkript:

E klengen Accident 

A: Au! 

B: Wat ass? 

A: Ech hu mech an de Fanger geschnidden! 

B: Hal en ënner kaalt Waasser! 

A: Dat maachen ech grad! 

B: Gutt! 

A: An elo? 

B: Wéckel Kichepabeier ronderëm an dréck fest op d’Wonn. 

A: Ok. 

eventuell kleng Paus 

A: Gutt, et huet opgehalen ze bludden. 

B: Ech desinfitzéieren d’Wonn nach. Looss dat e bëssen dréchnen, ech ginn eng Plooschter sichen. 

A: Merci! 

B: Voilà. Ass d’Plooschter net ze fest? 

A: Nee. 

B: Deet et wéi? 

A: Nee, et pickt just e bëssen. Merci fir deng Hëllef! Kanns du mer just wannechgelift e puer Tranchë Brout schneiden? Mee, pass op, dass de dech net och an de Fanger schneits! 

B: Ech probéieren! 

En Hexeschoss 

A: Allô? 

B: Hallo! Hei ass d’Lisa. 

A: O! Du kléngs awer net gutt! 

B: Ma Nee! Ech hunn e Problem!  

A: Wat ass lass?! 

B: Ech hu mech virdru gebéckt, fir mäi Schong ze strécken a wéi ech mech nees gestreckt hunn, hat ech op eemol schrecklech de Réck wéi. Ech hu mech geluecht, mee lo leien ech hei an et gëtt net besser. Ech ka mech kaum beweegen a kommen net méi op! 

A: Aua! Dat ass definitiv en Hexeschoss! 

B: Jo? Ech hat dat nach ni! 

A: Dach, ech hat dat schonn! Da kann ee kaum nach opstoen! Ech konnt, zum Beispill meng Box net méi undoen an d’Schong net méi strécken, asw. 

B: O, nee! Ech muss awer schaffe goen! 

A: Nee...du kanns bestëmmt och net an den Auto eraklammen oder aus dem Auto erausklammen! Dat gëtt näischt! Hues de schonn eng Ibuprofen ageholl? 

B: Jo. 

A: Wäermt hëlleft! Hues de e Kiischtekärkëssen oder eng Bull doheem? 

B: Jo, ech hunn eng Bull. 

A: Gutt! Da fëll déi mat kache Waasser a lee dech drop. Oder lee dech direkt an d’Bidden...! 

B: Ha ha, da kommen ech ni méi do raus. 

A: Jo, ok! 

B: Mengs de, ech muss an d’Urgence? 

A: Nee!!! Wann, da gees de fir d’éischt bei däin Hausdokter oder deng Hausdocktesch. Wann et der muer net besser geet, dann hëls de e Rendez-vous. Da kann een der e Muskelrelaxans oder Kiné verschreiwen. 

B: Ok. Ech hunn och nach eng Sallef heiheem. Ech maachen déi nach drop. 

A: Perfekt! A maach keng séier Beweegungen! Soll ech laanschtkommen, fir der ze hëllefen? 

B: Nee, nee! Ech ruffe meng Schwëster nach un. Hat ass net op den Telefon gaang. Ech hunn dir ugeruff, well s du dech jo mat Réckeproblemer auskenns. Merci fir deng Rotschléi an deng Hëllef! 

A: Gär geschitt! Versuerg dech gutt! Gutt Besserung a so Bescheed, wann s de eppes brauchs! 

B: Merci! Maachen ech! Äddi! 

A: Äddi! 

Wëllkomm zréck an der Poterkëscht!

Haut héiere mir, wéi eng Persoun hirem Patron vun hiren Aktivitéiten op der Aarbecht erzielt. Am zweeten Deel erzielt eng Persoun hirer Frëndin, wat si an hirer leschter Vakanz gemaach huet.

Transkript:

Aktivitéiten op der Aarbecht

Patronne: Moien Här Welter! Wéi geet et Iech haut? 

Aarbechter: Bonjour! Et geet mir gutt, merci. An Iech? 

Patronne: Och ganz gutt, merci. Kënnt Dir mir soen, wéi Är Aarbechtszäite muer sinn? Ech muss dat an de System androen. 

Aarbechter: Jo, natierlech. Ech kommen um 6:50 an d’Fabrick, ech badge mech an an ech fänken um 7:00 Auer mat schaffen un. 

Patronne: A sou a wat maacht Dir als éischt? 

Aarbechter: Vun 7:00 bis 9:00 maachen ech d’Maschinnen un a kontrolléieren d’Material. 

Patronne: An dono? 

Aarbechter: Vun 9:00 bis 10:30 paken ech d’Produkter an d’Këschten. 

Patronne: An der Rei. Maacht Dir och eng Kaffispaus? 

Aarbechter: Jo, déi maachen ech vun 10:30 bis 10:45. 

Patronne: Gutt. A wéini maacht Dir Är Mëttespaus? 

Aarbechter: Meng Mëttespaus ass vun 12:00 bis 12:30.  

Patronne: Dir maacht nëmmen eng hallef Stonn Paus?  

Aarbechter: Jo, ech iessen nëmmen eng Schmier an drénken en Téi. 

Patronne: Ok. A wéi geet et dono weider? 

Aarbechter: Vun 12:30 bis 15:30 lueden ech d’Päck an de Camion a kontaktéieren d’Clienten.  

Patronne: A wéini sidd Dir fäerdeg mat schaffen? 

Aarbechter: Ech sinn um 16:00 fäerdeg an ech gi géint 16:10 heem. 

Patronne: Dir sidd ganz gutt organiséiert. Merci Här Welter! 

Aarbechter: Gär geschitt!  

Meng lescht Vakanz

A: Salut Caroline! Wéi geet et dir? 

B: Moie Lara! Et geet mir gutt, ech si ganz entspaant. Ech war grad an der Vakanz. 

A: A, flott! Wou waars de dann? 

B: Ech war eng Woch eleng a Spuenien, zu San Sebastián. Dat ass eng schéi Stad am Norde vum Land. Do gëtt et Bierger a Plagen. 

A: Ganz eleng? War et net langweileg fir dech? 

B: Am Ufank hat ech e bësse Bedenken, mee et war guer net langweileg. Ech konnt maachen, wat ech wollt a mengem eegenen Tempo an ech hat Zäit fir mech selwer. Dat huet mir wierklech guttgedoen. 

A: Dat kann ech gutt verstoen! Wat hues du dann alles gemaach? 

B: Villes! Nomëttes war ech meeschtens op der Plage. D’Waasser war frësch, mee agreabel. Ech hu gelies, war schwammen an hu mech gesonnt. Moies hunn ech Yoga um Strand gemaach – dat war wierklech flott, mat de Geräischer an dem Geroch vum Mier. 

A: Dat kléngt no enger relaxer Vakanz. Mee du hues gesot, du hues och Sport gemaach? 

B: Jo, ech war och aktiv! Ech si Mountainbike an de Bierger gefuer. Do gëtt et vill Weeër an der Natur. Een Dag sinn ech bal véier Stonne gefuer. Ech war och zweemol wanderen. 

A: Wow! Hues de och eppes Neies probéiert? 

B: Jo! Ech war an enger Surfschoul. Déi éischt Stonne sinn ech dauernd vum Briet gefall, mee mat der Zäit gouf et besser. Et war ganz witzeg! 

A: Dat kléngt wierklech cool! Wéi laang waars de eigentlech fort? 

B: Ech war zéng Deeg fort. Dat war genau richteg. Ech hu vill erlieft, mee hat och Zäit fir ze raschten. 

A: Ech kréie richteg Loscht och esou eng Vakanz ze maachen. 

B: Jo, ech kann et wierklech recommandéieren. San Sebastián ass eng super Plaz – et ass net ze grouss, mee et gëtt vill ze gesinn an ze maachen.  

Wëllkomm zréck an der Poterkëscht!

Am Episod vun haut héiere mir, wéi zwou Persounen en Ausfluch plangen. Duerno héiere mir, wéi zwou Frëndinnen iwwer Aktivitéiten am Alter schwätzen.

Vill Spaass beim Nolauschteren!

-

Transkript:

En Ausfluch buchem

A: Hänks de rëm um Handy? 

B: Jo, pardon, ech buche grad eng Rees fir meng Mamm a mech. ‘t ass mäi Gebuertsdagskaddo fir meng Mamm. 

A: Kee Problem. Schéin! Wouhi geet et? 

B: Majo, dës Agence organiséiert Dagesreesen. Den 23. Juni fuere se op Stroossbuerg. Vu datt bei eis Nationalfeierdag ass an a Frankräich kee Feierdag ass, fannen ech et flott, deen Dag eng Stad ze besichen. Dann ass et net esou voll wéi de Weekend. 

A: Flott! Dat stëmmt! Wéi ass dann de Programm? 

B: Mir fueren um 7 Auer moies um Park & Ride Bouillon fort an- 

A: O, dat ass fréi! 

B: Jo, mee dann huet een eppes vum Dag. Um 10.15 komme mer zu Stroossbuerg un. Um hallwer 7 owes fiert de Bus nees zeréck op Lëtzebuerg. 

A: Hm... 

B: Et kann ee jo am Bus fir dohin e bësse schlofen. 

A: An engem Bus kréien ech keen A zou. 

B: Vläicht bass de manner midd wéi s de mengs! Mir maachen dat reegelméisseg. Et ass wierklech praktesch, well ee sech ëm näischt brauch ze këmmeren. Et muss een net selwer fueren, et muss ee keng Parkplaz sichen an no engem laangen Dag ass een och frou, wann een net nach heemfuere muss. Ech hunn nom Entdecken a Shoppe keng Energie méi, fir mam Auto heemzefueren. Dat hei ass wierklech praktesch! 

A: A wéi vill kascht dat? 

B: Dësen Tripp kascht 80 € pro Persoun. 

A: Ok. 

B: Op hirem Site kanns de kucken, wat fir Trippen a Reesen et nach gëtt. Vläicht fënns de eppes, dat der gefält. 

A: Jo, ech kucke mol. Merci fir den Tipp! 

-

Aktivitéiten am Alter 
 

A: Hallo! Wéi geet et dir? 

B : Gutt an dir? 

A: Och gutt! Ech war de Mëtteg bei menger Bomi. Mir hunn zesumme gekacht a giess. 

B: Schéin! Wéi geet et hir? 

A: Et geet hir gesondheetlech gutt, mee se fillt sech immens aleng. Se kuckt vill Tëlee a liest vill, mee et ass all Dag dat selwecht.  

B: Dat deet mer leed fir si. Meng Bomi ass jo och eleng, mee si huet wierklech Chance mat hirer Gemeng. D’Gemeng organiséiert vill Aktivitéite fir eeler Leit. Eemol de Mount geet si an e Sproochecafé, fir mat de Leit, déi Lëtzebuergesch léieren, ze schwätzen. Si huet do och d’kenne geléiert, eng Tuneesierin. Si treffe sech reegelméisseg, fir zesummen ze poteren an ze kachen. 
Eemol d’Woch geet si an de “Fit am Alter”. Do turne si am Sëtzen a wann d’Wieder gutt ass, gi se an e Park spadséieren. 

A: Wéi flott!  

B: Gëtt et an hirer Gemeng keng esou Offeren? 

A: Ech muss kucken, ech hunn emol net doru geduecht. 

B: Stréckt si gär? 

A: Jo, ganz gär. Si heekelt och gär. 

B: Ma dat passt gutt! Meng Bomi trëfft sech zwee bis dräi Mol de Mount mat Leit vun all Alter, wou si dann zesumme strécken an heekelen, mee virun allem zesumme poteren. Et sinn esouguer Teenageren derbäi! Ech ginn dir mol menger Bomi hir Telefonsnummer. Wann deng Bomi Loscht huet, da ka se menger Bomi uruffen. 

A: O, wéi léif. Dat ass eng super Iddi! Ech froe se mol, mee si ass bestëmmt motivéiert! Villmools Merci! 

B: Ganz gär geschitt! Mir kënnen eis jo heiansdo zu véier treffen! Ech wëll och emol strécke léieren. 

A: Dat maache mer! 

Wëllkomm zréck an der Poterkëscht!

Am Episod vun haut héiere mir, wéi zwou Persounen iwwer de Marathon an der Stad Lëtzebuerg schwätzen.

Vill Spaass beim Nolauschteren!

-

Transkript:

De Marathon zu Lëtzebuerg 

A: Salut Vinz, hues du e Samschdeg den Owend schonn eppes vir ? 

B : Nee, nach net. Firwat ? 

A : Ech lafe mat e puer Frënn beim ING Night Marathon mat – awer just de Semi, also den hallwe Marathon. 

B: Wow, seriö? Dee war ech nach ni kucken. 

A: Da gëtt et Zäit! Et ass e risegt Lafevenement hei zu Lëtzebuerg, dat gréisst aus dem Land. Et komme Leit aus der ganzer Welt fir matzelafen, an natierlech lafen och vill ambitionnéiert Hobbyleefer vu Lëtzebuerg mat. D’Ambiance an der Stad ass einfach super! 

B: Kléngt cool! Also ass et net just e Sportsevenement, mee éischter eng grouss Party? 

A: Jo, dat kann ee scho soen. D’Stad ass voll mat Leit, déi déi verschidde Leefer ufeieren. De Laf fänkt um Kierchbierg un a geet dann op de Lampertsbierg an duerch d’Stad. De Marathon geet och iwwer Märel an op d’Gare, mee herno kënnt jiddereen erëm um Kierchbierg un. 

B: Dat ass awer keng einfach Streck! 

A: Nee, virun allem de Schluss geet zimmlech biergop. Ech hoffen, ech packen dat, mee ech hu gutt trainéiert. 

B: Firwat deet ee sech dann esou eppes un? 

A: Ech sinn d’lescht Joer fir d’éischt mat e puer Frënn an d’Stad kucke komm an ech hunn déi Atmosphär einfach immens fonnt. E puer Méint duerno, hunn ech mech du fir eng éischt Course ugemellt, bei där ech 10 Kilometer gelaf sinn an dat ass awer relativ gutt gaangen. 

B: Wéi laang trainéiers du dann elo fir de Semi-Marathon? 

A: Ech hu mech am Ufank vum Joer ugemellt a lafen elo zënter zwee Méint méi konsequent, dat heescht 3 Mol d’Woch. An all Woch e puer Kilometer méi. Ech hoffen, dass ech et an zwou Stonne packen! 

B: Bestëmmt! Vläicht kann ech dech jo och ufeiere kommen. Wéi kommen ech dann e Samschdeg am beschten an d’Stad? Fueren d’Busser? 

A: Hmm, du muss e bëssen oppassen. Vill Stroosse si wéinst dem Laf gespaart an e puer Busser fueren en anere Wee. Kuck am beschten um Internet, do fënns du bestëmmt all d’Informatiounen.  

B: An der Rei. Villäicht kommen ech einfach mam Vëlo. Gitt dir dann duerno och nach eraus? 

A: Kloer! Et ginn iwwerall After-Partyen: an der Uewerstad, am Gronn, an esouguer um Glacis. Ech wäert zwar midd sinn, mee fir ee Béier misst et nach duergoen. 

B: Haha, dat wëll ech gesinn. Gutt, ech sinn dobäi: fir iech unzefeieren, a fir d’After-Party duerno. 

A: Flott, dat freet mech! Villäicht kanns du jo och e Schëld mat engem coole Sproch maachen. 

B: Jo, dat ass eng Iddi. Vläicht fält mir jo eppes Kreatives an. Ech iwwerleeë mir mol eppes!  

Wëllkomm zréck an der Poterkëscht!

Am Episod vun haut schwätze mir mat iech iwwer d'Theema Upcycling. Vill Spaass beim Nolauschteren!

-

Transkript:

Upcycling  

A: So, d’Kanner léieren de Moment, wéi ee richteg recycléiert, mee ech wëll hinnen och gär weisen, wat een nach alles mat Offall maache kann. Du hues mer d’lescht Joer vun dengem Upcycling-Projet erzielt, oder? 

B: Genee! Dat war fir mäi Stage an der Spillschoul. 

A: Kanns du mer e puer Iddie ginn? Ech weess, um Internet fënnt een alles, mee hues du Beispiller, déi gutt mat de Kanner fonctionéiert hunn? 

B: Jo, natierlech! Eppes, wat séier geet, ass en Tic-tac-toe aus Fläschendeckelen. Du mools d’Spill op e Stéck Kartrong vun enger aler Këscht a si kënnen d’Deckele umolen, entweeder mat zwou verschidde Faarwen oder se mole Symboler drop: en X, e Krees, eng Sonn, en Häerz oder eppes Aneres. 

A: A, dat ass flott! Da fänken ech mol un, Deckelen ze sammelen. Mir benotzen net méi sou vill plastiks Fläschen… 

B: Jo, ok! Eng aner Iddi ass, kleng Blummendëppen aus alen Dousen ze bastelen. Déi hunn ech och doheem, fir meng Kraider an der Kichen. Fir d’éischt muss de d’Béchsen natierlech spullen an de schaarfe Rand vun all Béchs mam Hummer platt schloen. Duerno muss de mam Hummer a mat engem Nol e puer Lächer an de Buedem schloen an da kënnt der d’Béchs mat Acryl-Faarf umolen. Waart, ech weisen der eng Foto vu mengen... 

A: O, super! Wéi schéin! Déi Iddi gefält mer immens gutt! 

B: Merci! Aus ale Këschten aus Holz oder Kartrong kann een och flott Saache maachen: eng Etagère, e Poppenhaus oder direkt eng kleng Stad mat Gebaier aus Müsli- a Cornflakeskëschten. Kuck, d’Stad, déi d’Kanner opgeriicht hunn ass bal sou grouss wéi eise Klassesall.  

A: Mega! Do si jo och kleng Figuren! 

B: Genee, d’Persounen an d’Déiere sinn aus alen Toilettërulloen an och ganz einfach ze maachen. 

A: Super! Domat sinn d’Kanner och laang beschäftegt a kënne kreativ sinn. 

B: Genee! A wéi all Léierin oder Schoulmeeschter muss de lo ufänken, Toilettërulloen ze sammelen. 

A: Haha! Allerdéngs! 

B: Wéi gefält der meng Posch? Déi hunn ech aus enger aler Jeansbox gebitzt! 

A: Cool! 

B: Gesäis de, du kanns och eleng upcycelen a kreativ sinn. 

A: O, ech fäerten, ech si leider net sou douéiert wéi s du! 

Wëllkomm zréck an der Poterkëscht!

Haut héiere mir, wéi dräi Persounen iwwer Aktivitéiten, déi ee mat de Kanner zu Lëtzebuerg maache kann, schwätzen.

Vill Spaass beim Nolauschteren!

-

Transkript:

Aktivitéite fir d’Kanner 

Luc: Salut Anna, salut Samira! Wéi geet et iech haut? 

Anna: Salut Luc! Ganz gutt, merci. Ech kucke grad, wat ech de Weekend mat de Kanner maache soll. Wéi geet et dir Samira? 

Samira: Mir geet et och gutt, mee ech sinn e bësse midd, ech hu mech dës Woch vill ëm mäi Bouf gekëmmert. Hien ass immens aktiv! 

Luc: Haha, jo, dat kennen ech. Meng Duechter war dës Woch och voller Energie. Ech sichen och nach no enger Aktivitéit fir de Weekend. 

Anna: Meng Kanner wollten nees an de Parc Merveilleux goen. Mir waren d’lescht Woch do a si hunn et einfach super fonnt. 

Samira: Jo, de Beetebuerger Park ass wierklech flott. Et gëtt esou vill Spiller an Déieren. Et kritt ee souguer speziellt Fudder fir d’Déieren ze fidderen. Dat hunn d’Kanner besonnesch gär. 

Luc: Ech war nach ni do, mee ech hu schonn dovun héieren. Kënnt een einfach dohin?

Anna: Jo, ganz einfach. Si hunn och e Parking a souguer Navetten. 

Samira: Wësst der wat och flott ass? De Päiperleksgaart zu Gréiwemaacher! Mir waren virun zwou Wochen do. Et war immens schéin. 

Luc: Kann een do Päiperleke kucken? 

Samira: Jo, do gëtt et bis zu 40 verschidden Zorte vu Päiperleken, mee och Villercher, Beien an tropesch Planzen. Déi vill verschidde Faarwen hu mengem Bouf virun allem gefall. Et ass awer zimmlech waarm a fiicht dobannen. 

Anna: Dat kléngt interessant! Do kënnen d’Kanner mol eppes Neies gesinn a léieren. 

Luc: A propos léieren – mir ware viru Kuerzem am Naturmusée an der Stad. Meng Duechter interesséiert sech fir Fossilien an Dinosaurier. Hatt war faszinéiert! 

Samira: O, do war ech nach net mat mengem Bouf. Ass dat och fir kleng Kanner? 

Luc: Et hänkt vun der Ausstellung of, mee ech mengen ab 6 Joer misst dat awer an der Rei sinn. Ech weess, dass vill Primärschoulen dohinner ginn. De Musée ass immens interaktiv. 

Anna: Dat fannen ech esou wichteg! Mir waren d’lescht Joer am Luxembourg Science Center zu Déifferdeng. Meng Kanner hu mat Roboteren a mat engem risege Magnéit gespillt. Et war wéi eng Spillplaz mat Wëssenschaft. 

Samira: Wow! A wat kascht dee Spaass? 

Anna: Fir Erwuessener sinn et 15 Euro a fir d’Kanner 9 Euro mengen ech, mee et ass wierklech der Wäert. 

Luc: Mir kënne jo eng Kéier all zesumme mat de Kanner dohinner goen. 

Samira: Vläicht kënne mir jo all Kéier op eng aner Plaz goen, da gesi mir alles Méigleches. Dëse Weekend kéinte mir vläicht an den Escher Déierepark goen, se hu gutt Wieder gemellt an et ass gratis. 

Anna: Jo, cool Iddi! D’Kanner kënnen do ronderëm lafen, Déiere gesinn, fidderen an heemelen. 

Luc: Topp! Mir fält och grad an, dass et den Train 1900 gëtt? Do fiert ee mam Dampzuch vum Fond-de-Gras bis op Péiteng an erëm zeréck.

Samira: Wierklech?! Dat hunn ech net kannt, mäi Bouf ass e grousse Fan vun Zich! 

Anna: Da maache mer dat déi zweet Kéier, wa mir eis gesinn a falls et net reent. 

Luc: Jo! Dat ware lo vill Informatiounen. Loosst mech dat opschreiwen. Also: Parc Merveilleux zu Beetebuerg, de Päiperleksgaart zu Gréiwemaacher, den Naturmusée an der Stad, de Luxembourg Science Center zu Déifferdeng, den Déierepark zu Esch an den Train 1900 am Fonds-de-Gras.

Wëllkomm zréck an der Poterkëscht!

Am Episod vun haut héiere mir, wéi zwou Persounen iwwer administrativ Prozeduren wann een nei zu Lëtzebuerg am Land ass schwätzen.

Vill Spaass beim Nolauschteren!

-

Transkript

Zu Lëtzebuerg ukommen  

Elena: Moie Stéphanie! Ech si lo zënter enger Woch hei zu Lëtzebuerg, mee ech hunn d’Gefill, et gëtt sou vill ze reegelen! Ech weess net, wou ech ufänke soll. 

Stéphanie: Hallo Elena! Jo, effektiv. Et ass am Ufank e bësse vill, mee ech hëllefen dir gären. Hues de dech scho bei der Gemeng ugemellt? 

Elena: Nee, nach net. Firwat ass dat wichteg? 

Stéphanie: Du muss dech umellen, well s du dann e Certificat de résidence da kriss. Dee brauchs du fir vill administrativ Prozeduren, wéi zum Beispill d’Krankekeess oder fir e Bankkonto opzemaachen. 

Elena: A, ech verstinn! An, wéi ass et mat der Krankekeess? 

Stéphanie: Du muss dech bei der Caisse Nationale de Santé (oder: CNS) umellen. Wann’s de schaffe gees, mécht däi Patron dat fir dech. Wann s du nach keng Aarbecht hues, da muss du dech selwer bei der CNS umellen. 

Elena: Ok... A wéi eng Pabeiere brauch ech dofir? 

Stéphanie: Normalerweis brauchs du deng Identitéitskaart, de Certificat de résidence an eventuell en Aarbechtskontrakt. 

Elena: A wann ech e Bankkonto wëll opmaachen? 

Stéphanie: Do brauchs de och deng Identitéitskaart an e Certificat de résidence. E puer Banke froen och en Aarbechtskontrakt. 

Elena: Wow. Merci! Nach eng lescht Fro, wéi ass et mat der Steiernummer? Kréien ech déi automatesch? 

Stéphanie: Jo, normalerweis kriss du se automatesch, mee ech géif an denger Plaz eng Kéier bei der Administration des contributions directes uruffen, wann s du méi konkreet Froen hues. Vill Informatiounen stinn awer och op Guichet.lu an do kanns du alles noliesen. 

Elena: Ui! Ech hunn nach vill ze maachen! Wat ass da genau Guichet.lu? 

Stéphanie: Guichet.lu ass eng offiziell Regierungssäit, wou s de all administrativ Informatioune fënns, déi s de zu Lëtzebuerg brauchs. Et ass wéi e Guide fir d’Steieren, d’Sozialversécherung, Wunnen, d’Aarbecht an nach Villes méi. 

Elena: Ok, ech verstinn. Villmools merci fir all déi Informatiounen an deng Hëllef! 

Stéphanie: ‘t ass gär geschitt.