Þriðjudagur 13. janúar

Múslimar, leikskólar, Andalúsía, tónlistarnám

Árni Þór Þórsson prestur innflytjenda ræðir við Gunnar Smára um andúð gegn innflytjendum, kristin gildi og reynslu hans sem prest innflytjenda og áður prest í Vík í Mýrdal, sem er sú sókn í landinu sem hefur hlutfallslega flesta innflytjendur. Svava Björg Mörk, dósent á Menntavísindasviði HÍ, ræðir við Sigurjón Magnús um mikinn skort á leikskólakennurum og þörf á menntuðu fólki til að vinna í mennta- og heilbrigðiskerfinu. Þórir Jónsson Hraundal lektor segir Gunnar Smára frá Al Andalus, múslimsku ríki á Íberíuskaganum, menningu þess og áhrif. Freyja Gunnlaugsdóttir, skólameistari Menntaskóla í tónlist, ræðir við Björn Þorláks um tímamót fram undan, öll starfsemi skólans færist í Skipholtið á árinu í stað þess að vera margskipt. Framlög einstaklinga til uppbyggingar tónlistarstarfs vega þungt.

Mánudagur 12. janúar

Fjölmiðlar, Svíþjóð, drykkja, klassík og skólamál

Logi Einarsson ráðherra ræðir fjölmiðla og fjölmiðlastyrki. Hvernig bregst hann við ásökunum um að styrkjafyrirkomulagið þjóni einkum auðugum eigendum fjölmiðla en litlir miðlar í almannaeigu eins og Samstöðin séu skildir eftir. Gunnar Smári Egilsson og Björn Þorláksson ræða við ráðherrann. Steingrímur Jónsson sveitarstjórnarmaður Vinstri flokksins í Lundi í Svíþjóð ræðir við Gunnar Smára um sænsk stjórnmál en kosið verður þar í haust til þings, lands- og sveitarstjórna. Valgerður Rúnarsdóttir yfirlæknir SÁÁ ræðir meðferðarúrræði fyrir börn með fíknisjúkdóma, aðgengi að áfengi og átak fram undan í samtali við Björn Þorláks. Geirþrúður Guðmundsdóttir selló og Rannveig Marta Sarc fiðla koma í heimsókn að Rauða borðinu og ræða við Gunnar Smára, Sól Björnsdóttur og Sóleyju Lóu Smáradóttur um það sem þær ætla að spila á tónleikum Kammermúsíkklúbbsins á sunnudaginn. Davíð Ólafsson sagnfræðingur ræðir við Gunnar Smára um sögu Myndlistar- og handíðaskólans sem hann ritaði ásamt Arndísi S. Árnadóttur.

Sunnudagurinn 11. janúar

Synir Egils: Oddvitar, hótanir, Evrópa, Grænland og Trump

Bræðurnir Sigurjón Magnús og Gunnar Smári Egilssynir taka á móti gestum og ræða við þá um helstu fréttir og stöðuna í stjórnmálum. Að þessu sinni koma þau Viðar Halldórsson prófessor í félagsfræði, Vigdís Häsler lögfræðingur og Þóra Arnórsdóttir forstöðumaður Samskipta og upplýsingamiðlunar hjá Landsvirkjun og ræðir fréttir vikunnar og ástand mála í samfélagi og pólitík. Síðan ræðum við heimsmálin á tímum Donald Trump, hvort heimsmynd sé að líða undir lok og hvernig sú verður sem kemur í staðinn. Sóley Kaldal áhættuöryggisverkfræðingur, Kristinn Hrafnsson blaðamaður og ritstjóri Wikileaks og Dagbjört Hákonardóttir þingkona Samfylkingarinnar og fulltrúi í utanríkismálanefnd ræða breyttan heim. Í lokin fara þeir bræður yfir pólitíkina með sínu nefi.

Laugardagur 10. janúar

Helgi-spjall: Arnar Gunnlaugsson

Arnar Gunnlaugsson, landsþjálfari karla í knattspyrnu, er gestur Sigurjóns Magnúsar í Helgispjalli að þessu sinni. Arnar átti glæstan feril sem atvinnumaður. Sem þjálfari hefur hann látið mikið til sín taka. Undir hans stjórn vann Víkingur glæsta sigra. Í þættinum er talað um knattspyrnumanninn Arnar sem og þjálfarann Arnar. Arnar hefur oft þurft að hafna leikmönnum um að spila, sem oft kemur illa við þá sem þurfa að sitja hjá. Auk knattspyrnunnar er talað um gjaldþrot eftir þátttöku í atvinnulífinu og sitthvað fleira. Arnar er hreinskilinn maður og skemmtilegur til viðtals.

Föstudagur 9. janúar

Vikuskammtur: Vika 2

Í Vikuskammti við Rauða borðið sitja í dag þau Arna Magnea Danks leikkona, Atli Bollason myndlistarmaður, Ingunn Fjóla Brynjólfsdóttir efnishönnuður og Margrét Helga Erlingsdóttir fréttakona og ræða fréttir vikunnar sem einkenndust af landvinningum og mannránum, ráðherrakapal og oddvitaslag, fínum veislum, verðbólgu og okri.

Fimmtudagur 8. janúar

Reynsluboltar, vonda ESB, Tourette og sönglög

Oddný Harðardóttir fyrrum þingmaður og ráðherra, Halldór Guðmundsson menningarfrömuður og Steingerður Steinarsdóttir blaðamaður taka púlsinn á fréttum líðandi stundar og tíðaranda. Alþjóðamálin, ESB, staða íslenskunnar, bókajólin að baki og prófkjör verða til umræðu. Björn Þorláks stýrir umræðunni. Ögmundur Jónasson fyrrverandi þingmaður, ráðherra og formaður BRSB segir Gunnar Smára hvers vegna hann vill ekki að Ísland gangi í Evrópusambandið. Elva Dögg Hafberg Gunnarsdóttir, uppistandari, segir Ragnheiði Davíðsdóttur frá lífinu með Tourette og hvernig hún sér og túlkar heiminn í gegnum húmor. Þorvaldur Gylfason tónskáld og Hrönn Þráinsdóttir píanóleikari ræða tónlistina og tónleika fram undan í Hörpu, sem verða kvikmyndaðir í bak og fyrir. Vængjasláttur fugla kemur við sögu. Björn Þorláks ræðir við þau.

Miðvikudagur 7. janúar

Trump, fasteignir, innflytjendur og vandræðaskáld

Sveinn Máni Jóhannesson doktor í sagnfræði, Friðjón R. Friðjónsson borgarfulltrúi, Guðmundur Hálfdanarson prófessor í sagnfræði koma í Trumptímann og ræða við Gunnar Smára um Donald Trump og áhrif hans á heiminn og hugmyndir okkar. Hækkun fasteignaverðs hefur verið lygileg síðustu ár en árið í fyrra var þó undantekning. Árið 2026 gæti verð lækkað. Páll Pálsson ræðir við Björn Þorláks um stöðuna og horfurnar og hvernig fasteignakaup hafa breyst undanfarið. Jasmina Vajzovic ráðgjafi ræðir aukna útlendingaandúð og fyrirhugaðar breytingar sem henni eru ekki að skapi svo sem brottfararbúðir svokallaðar. Björn Þorláks ræðir við hana. Uppgjör vandræðaskáldanna á árinu 2025 hefur notið gríðarlegra vinsælda. Vilhjálmur Bragason húmoristi frá Akureyri ræðir við Björn Þorláks um kímnina, listina og lífið.

Þriðjudagur 6. janúar

Ógnin af Trump, sveitarstjórnarpólitík, skuggar í nýjum húsum og vistarbönd

Baldur Þórhallsson prófessor ræðir stöðu Íslands eftir aðgerðir Trumstjórnarinnar í Venesúela við Gunnar Smára. Hvað merkir það fyrir Ísland að vera á skilgreindu áhrifasvæði Bandaríkjanna. Sara Björg Sigurðardóttir, Samfylkingunni og Vilhjálmur Árnason, Sjálfstæðisflokki, takast á um stjórnmál í upptakti sveitarstjórnarkosninga í maí. Björn Þorláks stýrir umræðunni. Ásta Logadóttir, verkfræðingur og lýsingasérfræðingur, segir að hér ríki stefnuleysi hvað varðar byggingu húsa, sem mörg hver eru þannig úr garði gerð að þar njóti fólk lítillar birtu, sem er fólki óhollt. Sigurjón Magnús ræðir við Ástu. Vilhelm Vilhelmsson segir Gunnar Smára frá vistarböndunum, hvernig líf það var fyrir vinnuhjúin, frá réttindabaráttu þeirra og stöðu.

Mánudagur 5. janúar

Enginn fréttatími, Venesúela, maður ársins, Íran og Kína

Við byrjum á að ræða aðgerðir menntamálaráðherra sem hafa kippt fótunum undan fréttatíma Samstöðvarinnar. Helen Ólafsdóttir öryggissérfræðingur fer yfir aðgerðir Bandaríkjanna í Venesúela í samtali við Gunnar Smára, hverjar verða afleiðingarnar fyrir fólk í Venesúela. Eða á Grænlandi og okkur hér upp á Íslandi? Guðmundur Fylkisson er ekki bara maður ársins vegna lögreglustarfa og linnulausar leitar hans að týndum börnum. Hann er líka manneskja af holdi og blóði. Í samtali við Björn Þorláks ræðir Guðmundur hvað knýr hann áfram, úrræði og úrræðaleysi en haldið er fram að andvaraleysi gegn bágu andlegu ástandi margra íslenskra barna sé þjóðarskömm. Enn á ný eru Íranir komnir út á götu til að mótmæla stjórnvöldum. Gunnar Smári ræðir við Kjartan Orri Þórsson mið-austurlandafræðing um ástandi, forsögu þess og um hvort sú saga geti endað vel. Brynhildur Magnúsdóttir jarðfræðingur ættleiddi son frá Kína og vildi læra kínversku. Það ná vatt upp á sig og Brynhildur fór í skiptinám til Kína, bjó þar í eitt ár. Gunnar Smári ræðir við hana um daglegt líf í Kína.

Synir Egils 4. jan: Árásir, kjarakrísa, pólitík og menning

Bræðurnir Sigurjón Magnús og Gunnar Smári Egilssynir taka á móti gestum og ræða við þá um helstu fréttir og stöðuna í stjórnmálum. Að þessu sinni koma þau Ásgeir Brynjar Torfason ritstjóri Vísbendingar, Sonja Ýr Þorbergsdóttir formaður BSRB og Guðmundur Hálfdanarson prófessor í sagnfræði og ræða stríð og friður í upphafi árs, lífskjör, efnahagsmál og pólitíkina hér heima og erlendis. Síðan ræðum við íslenska menningu á viðsjárverðum tímum. Gréta Kristín Ómarsdóttir leikstjóri, Auður Jónsdóttir rithöfundur, Kristín Gunnlaugsdóttir málari og Þorleifur Örn Arnarsson leikstjóri ræða áhrif tímanna á menninguna og áhrif menningarinnar á tímann. Í lokin fara þeir bræður yfir pólitíkina með sínu nefi.