Samstöðin

Laugardagur 14. nóvember

Helgi-spjall: Ómar Stefáns

Ómar Stefánsson myndlistarmaður, satanisti, galdramaður og guðspekingur segir frá lífi sínu og list, dauða sínum og öðru dundi.

Föstudagur 13. nóvember

Vikuskammtur: Vika 46

Þau koma að Rauða borðinu, Rósa Líf Darradóttir læknir og dýravinur, Grace Achieng stofnandi og framkvæmdastjóri House of Grace, Kjartan Orri Þórsson Miðausturlandafræðingur og Riitta Anne Maarit Kaipainen, viðskiptafræðingur og stjórnarkona hjá VG og VGR og ræða við Gunnar Smára um fréttir vikunnar sem einkenndust af framhjáhaldi, njósnum, illri meðferð og snjókomu.

Fimmtudagur 12. nóvember

Uppljóstrari, Grindavík, reynsluboltar, fyrirgefningin og kommúnulíf

Einar Logi Pétursson dýra-aðgerðasinni segir Gunnari Smára frá því hvers vegna hann braust inn í svínabúið Stjörnugrís, hvað hann sá og hverju hann vill áorka með uppljóstrun sinni. Hvað segja Grindvíkingar þremur árum eftir hamfarirnar þegar uppkaupatilboð á húsnæði hafa verið kynnt? Björn Þorláks ræðir við Pál Val Björnsson. Sigurjón Magnússon fær til sín í fréttaspjall Steingerði Steinarsdóttur, Guðmund Þ. Ragnarsson og Sigga Storm í þættinum Reynsluboltar. Séra Vigfús Bjarni ræðir fyrirgefninguna, Ásdís Olsen ræðir við hann. Ásdís Olsen kynnir sér kommúnulífsstíl á Suðurlandi.

Fimmtudagur 12. nóvember

Sjávarútvegsspjallið - 96. þáttur: Landssamband smábátaeigenda

Kjartan Sveinsson, formaður Landssambands smábátaeigenda, segir Grétari Mar frá því sem efst var á baugi á nýafstöðnum aðalfundi samtakanna.

Miðvikudagur 11. nóvember

Hjólhýsasamfélag, útlendingar, gervigreind, geðvernd, heimsmálin og Samstöðin

Hvers vegna er litið niður á fólk sem kýs að lifa öðruvísi? Bergþóra Pálsdóttir, talskona Samtaka hjólabúa, segir mikla fordóma og ranghugmyndir ríkja um hjólabúa og gagnrýnir harðlega framkomu Reykjavíkurborgar, ekki síst Einars Þorsteinssonar. Ásdís Olsen ræðir við hana. Margt er líkt með viðhorfum Íslendinga til útlendinga í dag og fyrir ríflega 30 árum. Stefán Jón Hafstein rýnir í eigin þáttagerð á Stöð 2 í beinni útsendingu árið 1995, 31 árs gamla heimild þegar margir Íslendingar höfðu áhyggjur af örfáum útlendingum. Hanna Kristín Skaftadóttir, dósent og fagstjóri forystu og gervigreindar á Háskólanum á Bifröst, og Þorsteinn Siglaugsson heimspekingur og hagfræðingur ræða við Gunnar Smára um hvaða áhrif gervigreindin hefur þegar haft og mun hafa. Ólafur Þór Ævarsson geðlæknir snýr aftur í umræðu með Birni Þorláks eftir nokkurt hlé. Hann ræðir nýjar rannsóknir um hvernig heilinn starfar og hvernig ný vísindaleg sannindi breyta viðhorfum og meðferð. Vaxandi veikindi opinberra starfsmanna verða einnig til umfjöllunar. Hilmar Þór Hilmarsson prófessor á Akureyri ræðir við Gunnar Smára um heimsmálin, Úkraínu- og Íranstríðin og afleiðingar þeirra á valdahlutföll í heiminum. Gunnar Smári ræðir við nokkra þáttastjórnendur á Samstöðinni utan Rauða borðsins. Þau María Hjálmtýsdóttir í Bókaborðinu, Kári Jónsson í Sjávarútvegsspjallinu, Kristín Helga Gunnarsdóttir við Græna borðið og Sigurður Jóhannesson í Manngildi ræða við hann og Valur Gunnarsson segir frá þætti sem hefur göngu sína innan tíðar, Hvernig í ósköpunum enduðum við hér?

Miðvikudagur 11. nóvember

Græna borðið - 28. þáttur: Vindorkuvæðingu Íslands

"Sú orka sem þarf til að hrekja kjaftæði er margfalt meiri en orkan sem þarf til að búa það til," segir lögmál Bardólinis. En það er einmitt inntakið í samtalinu um vindorkuvæðingu Íslands við Græna borðið hjá Kristínu Helgu Gunnarsdóttur og Andrési Skúlasyni. Gestir þeirra eru Thelma Harðardóttir, bóndi í Norðurárdal og fyrrum sveitarstjórnarfulltrúi í Borgarbyggð og Elvar Árni Lund, sviðsstjóri skipulags og umhverfis í Norðurþing. Elvar Árni sagði af sér í liðinni viku vegna andstöðu við risavaxin vindorkuáform á Melrakkasléttu. Íbúar í fámennum byggðalögum þurfa nú að slást við vindorkurisana í boði stjórnvalda. Byggðaráð Borgarbyggðar hafnar nú vindorkuveri á Grjóthálsi og vill hálsinn í vernd eftir margra ára baráttu íbúa. Sveitarstjórnar Norðurþing vill vindorkuver á Melrakkasléttu en andstaða þar fer ört vaxandi.

Þriðjudagur 10. nóvember

Trumptíminn, neytendur, hagspá, fæðingarorlof, ljóð og elsti bílstjórinn

Kristján Guy Burgess alþjóðastjórnmálafræðingur, Þorsteinn Þorgeirsson hagfræðingur og Margrét Valdimarsdóttir afbrotafræðingur ræða við Gunnar Smára um sögulegar kosningar í Bandaríkjunum og stöðu Trump eftir þær. Breki Karlsson formaður Neytendasamtakana ræðir við Björn Þorláks um hvers vegna vöruverð í búðum ætti að hafa lækkað í mörgum tilvikum þegar jafnvel hækkanir hafa orðið ofan á. Róbert Farestveit sviðstjóri hagsviðs Alþýðusambandsins og Ágúst Arnórsson hagfræðingur ræða við Gunnar Smára um horfur í efnahagslífinu en ASÍ sendi nýverið frá sér hagspá. Er íslenska fæðingarorlofskerfið hugsað út frá vinnumarkaði eða þörfum barna? spyr Ásdís Olsen í viðtali við Rögnu Sigurðardóttur, þingmann Samfylkingarinnar og Ásdísi Arnalds, doktor í félagsráðgjöf. Jovana Pavlović og Miriam Petra Ómarsdóttir Awad voru að senda frá sér ljóðabækur og ræða við Gunnar Smára um ljóðið, íslenskuna, pólitík og ástina. Hilmar Mýrkjartansson, 98 gamall, fyrrum atvinnubílstjóri, hóf akstur strætó árið 1948 og ekur enn. Hann segir Birni Þorláks sögur við Rauða borðið.

Þriðjudagur 10. nóvember

Bókaborðið - 9. þáttur: Félag um barnabókasafn

Félag um barnabókasafn segir farir sínar ekki sléttar. Hver er draumurinn, hvernig hefur vegferðin verið og af hverju í ósköpunum var stofnað félag? Saga félagsins er ævintýri líkust en við vitum ekki hvort þetta ævintýri endar vel eða illa. Sigrún Klara Hannesdóttir og Helga Halldórsdóttir ræða málið með Maríu Hjálmtýsdóttur.

Mánudagur 9. nóvember

Kynlífsglæpir, undanþágur, mistök, hraðakstur og afneitun

Drífa Snædal, talskona Stígamóta, segir okkur frá ótrúlegum staðreyndum um glæpi sem koma á borð Stígamóta. Því miður er ekkert lát á. Konur sem leiðast út í vændi gera það oft til þess að eiga fyrir mat, fyrir sig og börnin. Sigurjón Magnús ræðir við Drífu. Ill meðferð dýra á svínabúi hefur valdið undrun og fordæmingu. Andrés Ingi Jónsson, stjórnarformaður í samtökum um dýravelferð, segir að undanþágur stýri eftirliti. Grísir hjá Stjörnugrís fara að hans sögn óttaslegnir inn í dauðann. Björn Þorláks ræðir við Andrés. Stytting framhaldsskólans í þrjú ár var mistök að mati þriggja nemenda í tómstunda- og félagsmálafræði við HÍ, sem láta sig dreyma um að stjórnvöld vindi ofan af skaðanum. Björn Þorláks ræðir við Margréti Norðfjörð, Óliver Elvarsson og Silja Kolbrún Skúladóttir. ,,Þau halda að þau séu ódauðleg og séu í tölvuleikjum,” segir Páll Halldór Halldórsson sem er þekktur sem Rally Palli en hefur rannsakað hræðilega banaslysið sem varð á Krísuvíkurvegi nýlega þar sem 3 ungmenni létust. Ásdís Olsen ræðir við Pál. Jean-Remí Chareyre, sjálfstætt starfandi blaðamaður, gefur lítið fyrir nýlega umfjöllun í Kastljósi um loftslagsmál. Hann ræðir umhverfismál og fjölmiðlun í samtali við Björn Þorláks.

Laugardagur 7. nóvember

Helgi-spjall: Sigga Kling

Hver er konan á bak við litríku spákonuímyndina? Sigga Kling er engri lík – skrautleg, skemmtileg, skapandi og óhrædd við að fara sínar eigin leiðir. Hún segir frá ástarsorg sem olli straumhvörfum í lífi hennar, móður sinni sem vildi ekki lifa og æskuárunum á Snæfellsnesi hjá ömmu sinni sem þjónaði Thorsurunum og málaði allt húsið blátt til heiðurs Sjálfstæðisflokknum. Sigga deilir líka ljóðmælum, óvæntri innsýn og lífssýn sinni af einstakri hreinskilni. Í einlægu og fjörugu spjalli kynnumst við nýrri hlið á Siggu Kling í viðtali við Ásdísi Olsen.