Mánudagurinn 19. ágúst

Áfengi og pólitík, Gaza, stjórnsýslan og þátttaka í lýðræðinu

Jódís Skúladóttir þingmaður VG varpar sprengju í umræðuna og upplýsir að hún hafi gert athugasemd innan forsætisnefndar Alþingis vegna drykkju þingmanna við þinglok í vor. Magga Stína segir fréttir af Gaza og Þorvaldur Ingi Jónsson, þrautreyndur ríkisstarfsmaður segir mikla sóun eiga sér stað í stjórnsýslunni og að spara mætti stórfé með betri vinnubrögðum. Ole Anton Bieltvedt kaupsýslumaður og dýraverndarsinni skrifar oft greinar um samfélagsmál. Hann kemur til okkar og segir hvers vegna.

Sunnudagurinn 18. ágúst:

Synir Egils: Óvinsæl ríkisstjórn veikra flokka, verðbólga og okurvextir

Bræðurnir Sigurjón Magnús og Gunnar Smári Egilssynir taka á móti gestum og ræða við þá um helstu fréttir og pólitíkina. Að þessi sinni koma þau Drífa Snædal, talskona Stígamóta, Katrín Júlíusdóttir, fyrrverandi ráðherra og Þórður Snær Júlíusson, fyrrum ritstjóri Heimildarinnar og ræða veika stöðu stjórnarflokkanna og forystukreppu innan þeirra, helstu verkefni stjórnmálanna í vetur, harðnandi tón í kjaramálum lækna, kennara og annarra menntaðra stétta, viðvarandi verðbólgu og háa vexti. Á eftir taka þeir bræður stöðuna á pólitíkinni.

Laugardagurinn 17. ágúst

Helgi-spjall: Erpur

Erpur Eyvindarson kemur í helgi-spjall við Rauða borðið og segir okkar frá því hvernig hann varð sá sem hann er; frá ætt sinni og uppruna, fjölskyldu og vinum, kynslóð og Kópavogi og þeim þráðum sem mynda þann sem hann er í dag.

Föstudagurinn 16. ágúst

Vikuskammtur: Vika 33

Í Vikuskammt við Rauða borðið koma í dag þau Almar Blær Sigurjónsson leikari, Esther Bíbí Ásgeirsdóttir bassaleikari og safnvörður, Þorbjörn Rúnarsson tenór og kennari og Þorgerður María Þorbjarnardóttir formaður Landverndar og ræða fréttir vikunnar sem einkenndust af því að sumarleyfin eru að klárast og daglegt líf að finna venjubundnari takt og átökin um grundvallarmál samfélagsins að brjótast fram.

Rauða borðið: Ungt fólk, Gaza, vanlíðan, vindmyllur og fyndni

Í Rauða borði kvöldsins ræðir Björn Þorláksson við Gunnhildi Fríðu Hallgrímsdóttur varaþingmann og Harvard-nema í hagfræði sem útilokar ekki að íslensk efnahagsstjórn kunni að vera sú versta í heimi.

Magga Stína segir okkur fréttir frá Gaza og Grímur Atlason framkvæmdastjóri Geðhjálpar mætir til skrafs við Björn og Steinunni Ólínu um geðheilbrigði ungmenna sem er framhald af umræðu Samstöðvarinnar sem hófst í vikunni um stöðu og líðan ungs fólks í landinu. Halla Hrund Logadóttir orkumálastjóri kemur síðan til okkar og ræðir kosti og galla vindorkugarða á Íslandi. Hún er sammála Landvernd um að klára þurfi stefnumótun og að tímaröð framkvæmda þeirra sem fyrirhugaðar eru kunni að vera röng. Að lokum ræðir Gunnar Smári við sagnfræðinginn og rithöfundinn Þórunni Valdimarsdóttur en á dögunum komu út eftir hana ljóðabók og önnur merk bók um það kostulega en rannsóknarverða fyrirbæri, íslenska fyndni.

Miðvikudagurinn 14. ágúst:

Pólitík, fjárlög, kaldur blettur, íþróttir og saksóknari

Synir Egils, Sigurjón og Gunnar Smári Egilssynir, spjalla um pólitíkina. Síðan ræðir Sigurjón við tvo fulltrúa í fjárlaganefnd, Ásthildur Lóa Þórsdóttir í Flokki fólksins og Ágúst Bjarni Garðarsson frá Framsókn ræða komandi fjárlög. Halldór Björnsson, veðurfræðingur á Veðurstofunni, kemur og ræðir vendipunkta í veðri, umhverfi og afkomu og Viðar Halldórsson prófessor í félagsfræði svarar því hvers vegna Íslendingar vinna svona fáar medalíur á ólympíuleikunum. í lokin sláum við á þráðinn til Hauks Arnþórssonar stjórnsýslufræðings sem segir að pólitíkin kunni að blandast inn í mál Helga Magnússonar varasaksóknara.

Þriðjudagurinn 13. ágúst

Vindmyllur, málfrelsi, rafbækur og risamálheildin

Björg Eva Erlendsdóttir hjá Landvernd kemur og ræðir fyrsta vindorkuverið á Íslandi. Svala Magnea Ásdísardóttir formaður Málfrelsis ræðir þöggun og stýringu umræðunnar. Barbara Helga Guðnadóttir borgarbókavörður ræðir um skort á rafbókum í rafbókasafninu. Hermann Stefánsson rithöfundur fjallar um risamálheildina. og hættunni sem að henni steðjar.

Mánudagur, 12. ágúst

Ungt fólk, Gaza, einmanaleiki, og Ríkisútvarpið.

Ungir hafa orðið, kalla Steinunn Ólína Þorsteinsdóttir og Björn Þorláks, umræðu með Sóleyju Lóa Smáradóttir, 17 ára, Karli Héðini Kristjánssyni og Gunnari Ásgrímssyni, 24 ára. Þau ræða hlutskipti ungra Íslendinga á tímum óvissu og hraðra breytinga. Þá kemur Magga Stína og segir okkur fréttir af Gaza. Aðalbjörg Stefanía Helgadóttir hjúkrunarfræðingur og fræðikona segir okkur frá því hvernig einmanaleikinn getur drepið fólk og svipt okkur lífsgæðum. Og hvernig við getum varist honum. Í lokin kemur Guðni Tómasson menningarritstjóri Ríkisútvarpsins og ræðir stöðu stofnunarinnar.

Föstudagur, 9. ágúst

Vikuskammtur: Vika 32

Þau Steinunn Ólína Þorsteinsdóttir og Björn Þorláks ræða fréttir líðandi stundar með Atla Þór Fanndal og þeim Ólöfu Skaftadóttur og Kristínu Gunnarsdóttur sem stýra heitasta podcasti landsins; Komið Gott. Stálu Vestmannaeyingar þjóðhátíðinni? Nýr forseti, sálgreining á Elon Musk, versta sumarveður síðan 1984, afhverju virðist tískusveifla í þá átt að konur snúi aftur til heimilisstarfa? Dægurmenning og hörmungarhyggja. Mun ríkisstjórnin eyða sér sjálf í haust? Þetta og fleira verður til umræðu í Vikuskammtinum á Samstöðinni í dag.

Fimmtudagurinn 8. ágúst

Megas, óeirðir í Bretlandi, James Baldwin og heimsmálin

Þáttur kvöldsins í er í umsjón Gunnars Smára og Steinunnar Ólínu. Þau fá Spessa ljósmyndara í heimsókn og ræða við hann um heimildarmynd hans um Megas. Björn Þorláks slær á þráðinn til Michael Jóns Clark sem segir honum frá rasisma í Bretlandi, rót óeirðanna þar. Við spyrjum hvers vegna Elon Musk kallaði Kamölu Harris kommúnista. Þorvaldur Kristinsson segir okkur frá James Baldwin, baráttumanni, rithöfundi og homma. Í lokin kemur Hilmar Þór Hilmarsson prófessor og fjallar um ófriðarhorfur í heiminum.