RTL - Carte Blanche

Wann e Joer op en Enn geet, kënnt een net derlaanscht op déi vergaangen 12 Méint zeréckzekucken, ob een dat elo selwer an engem rouege Moment mécht oder ob een drop gestouss gëtt duerch déi vill verschidde Réckblécker, déi een an der Press begéint. Dat kënne schéi Momenter sinn, awer dacks och traureger, Christiane Kremer.

Nodeems ech den Koalitiounsvertrag eng éischte Kéier gelies hat, sinn mer spontan mol dräi Wieder agefall : Kontinuitéit, Optimismus, an mir loossen et ons eppes kaschten. Kontinuitéit , natierlech, well déi selwecht Parteien jo an d’Regierung ginn, an et och logesch ass dass Si déi Politik weiderféieren déi se an den leschten Joren gemaach hunn. Optimismus well en Gefill kréit, dass mer an allen Domainen an den nächsten Joren déi Bescht vun der Welt ginn. Mir moderniséieren ons duerch Digitaliséierung, mir ginn 100 % ökologesch , mir schaffen et dass jiddereen Zäit kritt vir d’Famill duerch méi Flexibilitéit, mir maachen en Sprong no vir am Beräich vun der Sozialer Gerechtegkeet, an mir schaffen et souguer nach d’Kompetitivitéit vun onsen Betriber ze verbesseren. Och den Logement an d’Mobilitéit kréien mer an den Grëff. Alles dat erreechen mer duerch massiv Investmenter an duerch nei Strukturen déi mer schafen. Ech brauch mer keng Suergen ze maachen vir d’Zukunft vun menge Kanner : Aarbecht gëtt et es genuch an den nächsten Joren zu Lëtzebuerg.
Gutt, en Koalitiounsofkommes ass nach lang keng real ëmgesate Politik, mee éischter eng Wonschlëscht , wat jo gutt an dës Zäit zwëschen Kleeserchers- an Chrëschtdag passt.
Beim Ëmsetzen vun dësen ambitiéisen Zieler, gesinn ech dann awer dass dat wahrscheinlech guer net sou einfach gëtt. Ech erklären mech.
Dës Woch ass jo an Polen d’ Uno Klimakonferenz ugaangen, an mir wëssen alleguerten wei dringend dës Fro ass, wann mer net als Mënschheet an eng onberechenbar Katastroph rutschen wëllen . Am Koalitiounsofkommes gëtt dëser Fro en ganz groussen Stellewäert zougerechent. D’Nohaltegkeetsziler aus dem Agenda 2030 , genau sou wei den Klimaaccord vun Paräis, ginn als grouss Leitlinnen vun der Entwécklung vir Lëtzebuerg zitéiert. Wann mer dat eescht mengen, huet dat natierlech enorm Konsequenzen op all aner Beräicher, an als éischt natierlech op ons Wirtschaft an op ons Consommatioun vun Ressourcen. Et wär naïf ze gleewen dass mer einfach duerch den techneschen Fortschrëtt, duerch d’Optimisatioun vun onsem Energieverbrauch oder eng nei Zirkularwirtschaft dat Ziel vun der Limitt vun Äerderwiermung vun maximal 1,5 Grad géifen erreechen. Mir sinn ons jo all bewosst dass mer zu Lëtzebuerg onsen Liewensstil mussen änneren; dat huet mat sou einfachen Saachen ze dinn : wei net méi mam Fliger fléien, ganz wéineg Fleesch iessen, manner mam Auto fueren , méi kleng Wunnengen ze bauen, keen Swimmingpool am Gaart ze hunn, manner Wueren ze kafen, an och net eng Milliard Youtube Filmercher op Serveren ze stockéieren.
Den Klimaschutz ass eng global Fro, keng déi sech just duerch Elektroautoen léist.
Dofir feelt et mir an dësem Koalitiounsprogramm un enger globaler an kritescher Visioun wei ons Gesellschaft soll an 5 oder 10 Joer ausgesinn. Do mussen déi Zieler vun deenen groussen Beräicher, Klima, Soziales an Wirtschaft iergendwéi zesummen bruecht ginn, an an hirem komplexen Zesummespill analyséiert ginn. Den Risiko ass grouss dass d’Realpolitik dozou feiert, dass dann awer d’Fro vun der Nohaltegkeet ëmmer verléiert wann Wirtschaftsintressen am Spill sinn. Wei eng Politiker hunn schonns den Courage vir der Wirtschaft ze erklären dass d’Zäiten vun der bëlleger Energie eriwwer sinn, oder dem Vollek ze verkafen dass den Bifdeck 50 % méi deier gëtt wann en aus enger nohalteger Produktioun kennt. Heiansdo hunn ech d’Gefill dass mer ons alleguerten gären selwer beléien.  Am Noutfall probéieren mer dann nach déi kriddeleg Decisioun  an d’Zukunft ze verleeën, dann muss einfach déi nächst Regierung drun gleewen.
Mee ech well awer net ze pessimistesch sinn, an hoffen dann staark, dass déi vill nei Zieler, an besonnesch déi vun der Nohaltegkeet, déi mer onsen Kanner schëllegen, och wierklech vun der neier Regierung an ugrëffeg geholl ginn, an dass mer an 5 Joer zu Lëtzebuerger an engem Land liewen dat ökologesch an sozial zu den progressiivsten Länner vun der Welt gehéiert.

Lo steet se jo ons nei Regierung. No laange Woche vu Verhandlungen hunn déi dräi Parteien ee Kompromëss fonnt fir e gemeinsamen Regierungsprogramm. Dozou eng Carte Blanche vum Paul Estgen, Soziolog am Centre Jean 23.

Lo steet se jo ons nei Regierung. No laange Woche vu Verhandlungen hunn déi dräi Parteien ee Kompromëss fonnt fir e gemeinsamen Regierungsprogramm. Dozou eng Carte Blanche vum Paul Estgen, Soziolog am Centre Jean 23.

D'Confirmatioun vun der blo-rout-grénger Allianz war zwar Millimeter-Saach, ma trotz ultra-knapper Majoritéit huet d'Dräier-Koalitioun de Wand am Réck, anescht ewéi nach 2013. D'Oppositioun kéint et déi nächst 5 Joer jiddefalls schwéier kréien, mengt de Pit Everling.

« D’Investitiounen vun haut, sinn d’Recetten vu muer »: Mengt eise Premierminister exklusiv d’Steierrecetten oder awer och d’Liewesqualitéit? « Wann et dem Land gut geet, soll et de Léit besser goen »: Sinn domat nëmmen déi aktuell Wieler gemengt oder awer och déi nächst Generatiounen ? Hei, aus der Sicht vun der Schoul an der Jugend, e puer weider Froen a Gedanken zur “Koalitioun vun der Gerechtegkeet, der Innovatioun an der Wäitsiicht”:
Stéchwierder DIGITALISATIOUN an INVESTITIOUN
Ginn d’Lycéen raum- a personalméisseg esou opgestallt, datt Klasseneffectiffen vun 30 Schüler a méi evitéiert ginn? Kritt erem all Klass hiren eegenen, festen Klassesall, den d’Schüler dekoréieren dierfen? An dem si sech tëscht de Schoulstonnen erblosen kennen, statt mat Saak&Paak duerch d’ Gebaier hetzen ze mussen?      
Ginn all bestehend Schoulgebaier fir den digitalen Zäitalter ausgerüst? Mat konsequenten Investitiounen an d’Infrastrukturen, wéi modern an eenheetlech equipéiert Klassesäll, mat Multi-Media-Equipement a leschtungsfähegem w-lan Internet? Ginn duerfir zousätzlech, kompetent a motivéiert, Informatiker engagéiert déi dest Material funktiounsfäeg halen? Ginn d’ Enseignant konsequent fir e pädagogeschen Asaz vun dësem digitalen Material forméiert?
E puer tablet-Klassen iwert d’Lycéen verdeelt an e puer medienwirksam ageweiten an top-équipéiert Lycée-Neibauten gin do net duer. Och all aale Schoulsall muss prett sinn fir e modernen Unterrecht an der digitaler Welt.
Stëchwieder INNOVATIOUN a WEITSICHT
Gin d’Lycéesdirektiounen administrativ entlaascht, duerch méi Personal a manner Bürokratie, fir datt si Zäit fannen d’Autonomie vun hirem Lycée an innovativ, differenzéiert an zukunftsfäeg pädagagesch Projet’en ëmzesetzen, statt um Schreifdësch an EXCEL-sheet’en a Formalitéiten ënnerzegoen?
Gin d’Horaires&Programmes mat Weitsicht komplett iwwerschafft, entlaascht an d’Inhalter fächeriwergreifend ofgestëmmt a vernetzt? Ginn d’Schüler drop préparéiert, sech an hir Ëmwelt ëmmer nees, voller Selbstbewosstsin an Zouversiicht, nei ze erfannen an enger Welt wou de stännege Wiessel dat eenzegt Bestännegt as? Gëtt endlech déi reng Wëssensvermëttlung a Wessenreproduktioun reduzéiert fir Zeit a Platz ze schafen fir wichteg Zukunftskompetenzen wéi Kreativitéit, Kooperatioun, Kommunikatioun, Ethik, Wëssensuwendung an kritescht a vernetzt Denken? Des menscheneegen Kompetenzen sinn am Zäitalter vun der Kënschtler Intelligenz schwéier digitaliséierbar an duerfir zäitlose. Doriwwer brauch eist Land e breeden Debat a politeschen Konsens.
Stéchwierder WÄITSIICHT A GERECHTEGKEET
Gëtt eise Pensiounssystem méi onofhängeg gemaacht vum staarken Wirtschafts- an Demographiewuesstem an esou zukunftsfäeg opgestallt? D’Kanner vun haut dierfen an hirem Berufsliewen vu muer net ennert enger iwwerhéije Cotisatiouns- a Steierlascht leiden fir dann selwer herno vun hirer eegener Pensioun nëmmen schlecht liewen ze kennen! De Pensiounssystem zur Zeit upassen heescht:  Wäitsiicht a Generatiounengerechtegkeet, statt Generatiounskonflikt!
Léiwe Kleeschen, schenk eise Politiker muer e geschäerft Wäitbléck op d’Besoins vun eiser Schoul a Jugend, statt op hir eegen Politikercarrière, well de Poker em d’Ministèren an de Splitting vum Vize-Premier-Posten hätten eigentlech Rutten verdéngt.  

Wäitsiicht an Investitiou, Schoul a Jugend, eng Carte Blanche vum Ekonomist Marc Müller.

Wäitsiicht an Investitiou, Schoul a Jugend, eng Carte Blanche vum Ekonomist Marc Müller.

6 Ministeren stellt d’LSAP an der neier Regierung. Sie deele sech 13 Ressorten op.
Eenzelner dovu waren esou ze erwaarden, anerer éischter manner. Derbäi kënnt en zolitten Duercherneen an der Partei. Dozou e Commentaire vum Joël Detaille.

Um spéiden Ufank vum 21. Joerhonnert si mer mat dräi grousse Froe konfrontéiert: (1) mat enger sozialer Fro vun wuessender Ongläichheet, (2) mat der ökologescher Iwwerliewensfro am Kontext vum Klimawandel an ëmmer méi knappe Ressourcen, a (3) mat enger kultureller Fro, déi eis verschidden Identitéiten an eist demokratescht Zesummeliewe betrëfft. Déi dräi Froen sinn enk matenee verbonnen. D’Léisung vun deene Problemer verlaangt eigentlech no engem déifgreifende Paradigmewiessel an der Politik. Et schéngt awer ëmmer méi schwéier, fir radikal Léisungen ze fannen, déi di Problemer och bei der Wuerzel paken. Amplaz, gewannen nationalistesch an autoritär Populisten ëmmer méi Unhänger an Europa, déi simplistesch Äntwerten op komplex Froen ginn.
De Soziolog Wilhelm Heitmeyer nennt als Ursaachen, firwat demokratesch Léisungen, och a Westeuropa, ëmmer méi schwiereg ginn: e globaliséierten Finanzkapitalismus mat oligarcheschen Tendenzen, donieft Angscht viru sozialer Desintegratioun, wéi och de Vertrauensverloscht vis-à-vis vum demokratesche Prozess. Esou erkläert sech zum Beispill de Brexit-Votte net eleng aus “Fake news”, Murdoch a Cambridge Analytica. Eng grouss sozial Ongläichheet a kulturell Veronsécherung huet dozou bäigedroen. „Déi Déck profitéieren, déi Kleng musse bludden“, denke vill Verléierer vun der Globaliséierung. Déi selwecht Veronsécherung a Roserei fënnt ee beim Mouvement vun de „gilets jaunes“. E Brexit léist natierlech kee Problem, mee schaaft just dausend neier. Ausser fir d’Ustiwweler, wéi de Jacob Rees-Mogg an de Boris Johnson - deen een huet seng déck Fongen schonn an Irland verluet, deen anere verdéngt grouss Zommen mat Rieden an Artikelen.
D‘Onsecherheet - op et den eegene Kanner eng Kéier besser geet – wäert net vun haut op muer verschwannen. Wéinst de Konsequenzen vum Klimawandel wäerten d’Reaktiounen mat der Zäit nach méi hefteg ginn. Lëtzebuerg schéngt momentan nach gréisstendeels dovu verschount. „Solange der Schornstein raucht“, wéi de Brecht seet. Awer Lëtzebuerg ass keng Insel an och bei eis geet d’Schéier tëscht Aarm a Räich ëmmer méi wäit auserneen, wéi e rezente Rapport vum Statec weist. Dat ënner anerem och wéinst den héije Käschten vum Logement. Och wann eng relativ gesond Mëttelschicht haut nach frou ass Proprietär ze sinn, sou gëtt dat dann awer fir hir Kanner ëmmer méi schwéier. Den Immobiliëmarché gëtt vu Luxuswunnengen iwwerschwemmt, déi di meescht Leit sech net méi leeschte kënnen. D’Spekulanten an di international Investisseuren awer schonn.
Wien hält an Europa dogéint? Den Opschwong vum nationale Populismus an Europa fält mam Ofschwong vun der Sozialdemokratie zesummen. Firwat si grad elo, virun allem di sozialdemokratesch Parteien an Europa an esou grousse Schwieregkeeten? Dofir ginn et natierlech vill verschidden Ursaachen, awer grondsätzlech kann ee soen, dass si am Virfeld an och no der Finanzkris vun 2008 net méi d’Impressioun ginn hunn, hiren historeschen Optrag ze erfëllen - also konsequent ze probéieren sozial an ekonomesch Gerechtegkeet fir all Schichten vun eise Gesellschaften duerchzesetzen.
Wat kënne mer als Bierger maachen? An enger parlamentarescher Demokratie muss den éierlechen, politeschen Engagement - och an enger Partei - erëm méi héich geschat ginn. Awer eng Demokratie fënnt net just all 5 Joer bei Wale statt. Et ass wichteg, dass Bierger sech selwer engagéieren. Sech net just sënnlos ëm hire Konsum um Black Friday oder fir Chrëschtdag këmmeren, mee an der Zivilgesellschaft aktiv ginn, Zeitungen liesen, Gewerkschaften ënnerstëtzen, an den Theater ginn, Froe stellen, Äntwerte sichen a Meenungen artikuléieren. Eng nei Opklärung. Als Bierger an als Konsument. Eng nei Iwwerleeung iwwert d‘Konkordanz tëscht souwuel gudder Aarbechts- wéi och nohalteger Produktqualitéit. Den Asaz fir Gerechtegkeet, d’Suerg em eis Ëmwelt an eng demokratesch Kultur gehéieren zesummen. Jiddereen ass gefuerdert.