Í gær voru verðlaun breska tónlistartímaritsins BBC Music Magazine veitt við hátíðlega athöfn í London. Víkingur Heiðar Ólafsson píanóleikari hlaut tvenn verðlaun, fyrir bestu hljóðfæra útgáfu ársins og jafnframt aðalverðlaun kvöldsins fyrir upptöku ársins. Um ræðir útgáfu hans á smáverkum Johanns Sebastians Bach sem kom út í fyrra. Að því tilefni verður leikin tónlist af plötunni í Viðsjá dagsins og gripið niður í viðtal sem tekið var við Víking í tilefni útgáfunnar síðasta haust. 

 

Í tilefni af alþjóðlega plötubúðadeginum sem haldinn verður hátíðlegur um helgina ætlum við að kíkja í heimsókn í Reykjavík Record Store á Klapparstíg og ræða við Reynir Berg Þorvaldsson um mikilvægi plötubúða í streymisvæddum samtíma.

Á mánudaginn tilkynnti sænska leikhúsið Dramaten frá brottrekstri leikhústjórans, Eriks Stubø. Meðal þess sem varð til þess var heimildamynd sem sýnd var í sænska ríkissjónvarpinu í lok síðasta mánðar. Halla Þórlaug Óskarsdóttir fer yfir söguna.

Hlustendur heyra einnig brot úr viðtali við þýska fiðluleikarann Isabelle Faust en hún leikur einleik með Sinfóníuhljómsveit Íslands í kvöld, á tónleikum sem verða í beinni útsendingu á Rás 1. Útsending úr Hörpu hefst kl. 19:30 en hlustendum verður veitt innsýn í efnisskránna frá kl. 19. 

Umsjón: Guðni Tómasson og Kristján Guðjónsson

Í Víðsjá í dag verður rætt um barnamenningu og barnamenningarpólitík þegar gestir þáttarins verða Elfa Lilja Gísladóttir píanókennari og umsjónarmaður verkefnisins List fyrir alla, og Kolbrún Halldórsdóttir formaður stjórnar nýsstofnaðs Barnamenningarsjóðs. Tilefnið er Barnamenningarhátíð sem sett var í gær.

Kristín Geirsdóttir, bókasafns- og upplýsingafræðingur, segir hlustendum frá uppáhalds listaverkinu sínu og Gauti Kristmannsson fjallar í bókmenntarýni um nýja bók Mazeen Marouf, Brandarar handa byssumönnum.

Einnig verður rætt við myndlistarmanninn Fritz Hendrik um sýningu hans Týnd lykilorð í Ásmundarsal.

Umsjón: Guðni Tómasson og Kristján Guðjónsson.

Í Víðsjá dagsins verður rætt við þýsku blaðakonuna Söruh Schug en hún hefur skrifað bók um Eyju listarinnar (Isle of Art) sem er ferðalag í gegnum íslenska samtímamyndlist með viðtölum við marga þá sem að henni starfa.

Bók vikunnar er skáldsagan Blá eftir norska rithöfundinn Maju Lunde, bók sem skoðar afleiðingar lofstlagsbreytinga í nálægri framtíð. Ingunn Ásdísardóttir, þýðandi, segir frá bókinni í Víðsjá í dag.

Hlustendur verða leiddir inn í kraftmikinn heim fiðlunar í myndlistarverki sem var til vitnis um mikla framúrstefnu á sínum tíma og nú er til sýnis í Listasafni Íslands.

Einnig verða skoðaðir í þættinum íslamskir munir sem rötuðu til norrænna manna á víkingaöld. Þórir Jónsson Hraundal, lektor í Miðausturlandafræði við Háskóla Íslands, er gestur þáttarins.

Umsjón: Guðni Tómasson og Kristján Guðjónsson.

Víðsjá - 4.4.2018

Víðsjá í dag óvænt símtal norðan úr landi en á línunni er Magnús Ólafsson á Blöndósi sem oftast er kenndur við Sveinsstaði. Magnús segir hlustendum söguna af því þegar faðir hans og afi tóku þátt í að grafa upp bein Agnesar Magnúsdóttur og Friðriks Sigurðssonar 104 árum eftir að þau voru líflátin í síðustu aftökunni sem fór fram á Íslandi, en þeir atburðir eru til umfjöllunar í bókinni Náðarstund eftir Hönnuh Kent, sem er bók vikunnar að þessu sinni.

Halla Þórlaug Óskarsdóttir sendir hlustendum pistil frá Svíþjóð um ástarsamband okkar við jörðina, breytingar og tilganginn með lífinu og minnst verður maskínur sem verið er að setja upp í höfuðstað Bretaveldis sem dæla út úr sér smásögum fyrir þreytta borgarbúa.

Vorblót Tjarnarbíós og Reykjavík Dance Festival fer fram um helgina. Að því tilefni verður rætt við Steinunni Ketilsdóttur, danshöfund, en hún frumsýnir nýtt verk á danslistahátíðinni á föstudag. Verkið, Verk nr. 1.5, sprettur upp úr nokkurra ára rannsóknarverkefni Steinunnar þar sem hún hefur velt fyrir sér og unnið með væntingar í dansheiminum.

Umsjón: Guðni Tómasson og Kristján Guðjónsson.

Í Víðsjá í dag verður rætt við Sigríði Þorgeirsdóttur, prófessor í heimspeki, um líkamlega gagnrýna hugsun. Sigríður er í forsvari fyrir merkilegt rannsóknarverkefni þar sem meðal annars er unnið að því að þróa nýjar aðferðir til að kenna og stunda gagnrýna hugsun, aðferðir sem taka inn í myndina nýlegar kenningar og rannsóknir sem varða líkamleika og reynsluhugsun - órjúfanleg tengsl líkama og huga.

Hildigunnur Birgisdóttir myndlistarkona segir hlustendum frá uppáhalds listaverkinu sínu og Inga Björk Margrétar Bjarnadóttir, myndlistarrýnir Víðsjár, segir frá upplifun sinni af heimsókn á sýninguna Non plus ultra þar sem Steinunn Önnudóttir sýnir verk sín í D-sal Hafnarhúss Listasafns Reykjavíkur.

Víðsjá forvitnast líka um nýja útgáfu með upptökum á söng Elísabetar Erlingsdóttur sópransöngkonu, þegar rætt verður við dóttur henna Önnu Rún Atladóttur og gripið niður í gamlan þátt úr safni Ríkisútvarpsins þar sem Elísabet var kvöldgestur Jónasar Jónassonar.

Sindri Leifsson og Vala Sigþrúðar Jónsdóttir notast við óvenjulegan efnivið, meðal annars þvottavélakusk og sítrónur, í verkum á sýningu sinni Re-fresh í Harbinger-galleríinu. Í Víðsjá í dag verður rætt við Sindra og Völu um kusk, sítrónur og ferskleika.

Bók vikunnar er Náðarstund (e. Burial Rites) eftir Hönnuh Kent. Þessi vinsæla skáldsaga er byggð á sannsögulegum atburðum, sögu Agnesar Magnúsdóttur og Friðriks Sigurðssonar, sem voru tekin af lífi árið 1830 fyrir tvö morð. Í Víðsjá í dag heyrum í höfundinum, hinni áströlsku Hönnuh Kent, og lesum brot úr bókinni.

Sagt verður frá ný útkominni "týndri plötu" bandaríska tónlistarmannsins Marvins Gaye en í dag er þess minnst að 80 ár eru liðin frá fæðingu hans.

Loks verður farið í heimsókn í Hverfisgallerí þar sem myndlistarmaðurinn Steingrímur Eyfjörð verður tekinn tali um nýjustu sýningu hans Megi þá helvítis byltingin lifa sem var opnuð þar um síðustu helgi.

Í Víðsjá í dag fögnum við opnunardegi hönnunarhátíðarinnar Hönnunarmars með umfjöllun um íslenska textílhönnun. Rætt verður við Rögnu Fróða, formann textílfélagsins, en sýning félagsins Líf eftir líf stendur ný yfir í Veröld - húsi Vigdísar.

Gauti Kristmannsson rýnir í ljóðabók rússnesk-bandaríska ljóðskáldsins Ilya Kaminsky, Dansað í Odessa, en þýðing bókarinnar er síðasta verkið sem Sigurður Pálsson vann að áður en hann lést.

Sýningin Allt fínt eftir Örnu Óttarsdóttir opnaði fyrr í mánuðinum í Nýlistasafninu. Starkaður Sigurðarson, myndlistargagnrýnandi Víðsjár, fjallar um sýninguna í þætti dagsins.

Og við fáum pistil frá Gautaborg. Halla Þórlaug Óskarsdóttir fjallar í dag um börn og foreldra, nýju fötin keisarans og hina ungu sænsku baráttukonu gegn loftslagsbreytingum, Gretu Thunberg.

Umsjón: Guðni Tómasson og Kristján Guðjónsson

Í Víðsjá í dag veltum við fyrir okkur eldfimu sambandi auðmagns og menningarstofnana, en að undanförnu hafa listasöfn verið gagnrýnd fyrir að þiggja háar fjárhæðir frá eigendum eins umdeildasta lyfjafyrirtækis heims, Sackler-fjölskyldunni. Sigurjón Baldur Hafsteinsson, prófessor í safnafræði, heimsækir þáttinn og ræðir tengsl peninga og listar.

Tyrfingur Tyrfingsson, leikskáld, flytur ávarp í tilefni að alþjóðlega leiklistardeginum sem er haldinn hátíðlegur í dag.

Birgir Sigurðsson, rafvirki og myndlistarmaður, segir frá uppáhaldslistaverkinu sínu.

Og rætt verður við Sigurð Gylfa Magnússon og Önnu Heiðu Baldursdóttur, um öndvegisverkefnið Heimsins hnoss, þar sem efnismenning fyrri alda er rannsökuð.

Umsjón: Guðni Tómasson og Kristján Guðjónsson

Í Víðsjá í dag verður rætt við Braga Þór Jósefsson, ljósmyndara,i um ljósmyndasýninguna Krummaskuð sem nú stendur yfir í ljósmyndagalleríinu Ramskram.

Rætt verður við Vilhelm Vilhelmsson, sagnfræðing, um rannsóknir hans á sáttanefndum og lausnum deilmála á 19. öld. En í dag flytur hann fyrirlestur á vegum Sagnfræðingafélags Íslands um efnið.

Þá segir Árni Óskarsson, þýðandi, frá skáldsögunni Hnotskurn eftir Ian McEwan, en hún er bók vikunnar á Rás 1 þessa vikuna.

Þorvaldur Sigurbjörn Helgason, leiklistargagnrýnandi Víðsjár, rýnir í nýtt íslenskt leikrit í Þjóðleikhúsinu, Súper eftir Jón Gnarr.

Sigríður Valdimarsdóttir verður tekin tali um meistaraverkefni sitt sem snéri að vinnuaðstöðu íslenskra myndlistarkvenna en hún er ein þeirra fræðimanna sem taka til máls um stöðu listkvenna í íslenskri listasögu á Kjarvalsstöðum á laugardag.

 

Víðsjá fer líka í huganum aftur til ársins 1990 þegar leikin verður upptaka af ljóðakvöldi Smekkleysu í Norðurkjallara Menntaskólans við Hamrahlíð en í dag er dagur ljóðsins haldinn hátíðlegur með ýmsum hætti.

 

Ragnhildur Hólmgeirsdóttir, sagnfræðingur, flytur pistil um Ódysseifskviðu.

 

Að lokum verðurrætt við Svanlaugu Jóhannsdóttur, söngkonu og markþjálfa, sem hefur að undanförnu sankað að sér skóm kvenna sem hún lítur sérstaklega upp til. Í nýrri sýningu Í hennar sporum sem frumsýnd verður í Tjarnarbíói á morgun mun hún rekja sögur þessara kvenna í skóm og söng.