Víðsjá

Víðsjá heimsækir Gerðarsafn í Kópavogi í þætti dagsins þar sem myndlistartvíeykið Bryndís Snæbjörnsdóttir og Mark Wilson sýna verk sín þessa dagana. Þau Bryndís rýna í samspil manns og náttúru, ekki síst á Norðurslóðum en verk þeirra verður hægt að skoða bæði í Gerðarsafni og í Listsafninu á Akureyri frá og með 25. september.

Margrét Bjarnadóttir, listamaður, kemur í heimsókn í Víðsjá en nú á dögunum birti hún greinina Ein mínúta í lífinu í greinasafninu Erindi; Póetík í Reykjavík sem kom út hjá Benedikt bókaútgáfu. Þar rekur hún nokkuð óhefðbundinn ritferil sem hverfist um dagbókaskrif, anagröm og fundin augnablik.

Sigurlín Bjarney fjallar um grát og tár í pistlum sínum um þessar mundir og núna beinir hún sjónum að tilfinningatárum og ólíkum gráti kynjanna.

Víðsjá minnist einnig Álfrúnar Gunnlaugsdóttur, rithöfunds, sem nú er fallinn frá, en hún var margoft gestur hér í þættinum á árum áður. Í þætti dagsins grípum við niður í gamla upptöku af spjalli Álfrúnar og Eiríks Guðmundssonar.

Umsjón: Tómas Ævar Ólafsson og Guðni Tómasson

Víðsjá stingur í dag inn nefi í Mutt gallerí við Laugaveg en þar opnaði myndlistamaðurinn Tinna Royal sýninguna Wild About You um síðustu helgi. Á veggjum sýningarrýmisins hanga málverk í popplistarstíl. Í verkunum skapar Tinna myndasögupersónum frá 5. áratug síðustu aldar nýtt samhengi sem afhjúpar vandræðaleg samskipti, úreltar staðalímyndir og gamalkunnar aksjónhetjur.

Slegið verður á þráðinn til Ólafs Kjartans Sigurðarssonar óperusöngvara sem hefur í nógu að snúast þessa dagana á óperusviðum Þýskalands en í Óperukvöldi Útvarpsins á annað kvöld verður á dagskrá Rásar 1 hljóðritun af óperunni Tannhäuser eftir Richard Wagner þar sem Ólafur Kjartan fer með eitt aðalhlutverkanna.

Breski kórstjórinn Graham Ross verður einnig tekin tali í þætti dagsins en hann stjórnar kór Clare College háskólans frá Cambridge á tónleikum í Hallgrímskirkju á laugardag.

Og að endingu segir Snæbjörn Brynjarsson, leiklistarrýnir Víðsjár, hlustendum skoðun sína á grínleiknum Bíddu bara í Gaflaraleikhúsinu.

Umsjón: Tómas Ævar Ólafsson og Guðni Tómasson.

Í Víðsjá dagsins verður rætt við Jóhann Hauksson um Rannsóknir í heimsspeki, fræga bók austurríska heimspekingsins Ludwigs Wittgenstein sem Jóhann hefur þýtt og Háskólaútgáfan gefur út. Í tónlistarhorninu Heyrandi nær setur Arnljótur Sigurðsson tónlist og skák í brennidepli að þessu sinni, en við fáum að gægjast í parísaróperuna og auk þess heyra tónlist hirðtónskálds Lúðvíks fimmtánda sem kunni ýmislegt fyrir sér á skákborðinu. Slegið verður á þráðinn til listmálarans Steingríms Gauta sem nú sýnir í glænýju galleríi í Mýrinni í Paris.

Umsjón: Guðni Tómasson

Í þætti dagsins fáum við tónlistarmenn í heimsókn. Pan Thorarensen og Þorkell Atlason gáfu nú á dögunum út plötuna Tunglleysa en hún er tilraunakennt sveimverk sem þeir hafa unnið með góðum gestum á borð við Katrínu Mogensen, Claudio Puntin og Mari Kalkun.

Sagt verður frá tyrkneska rithöfundinum Eilif Shafak en hún fékk um helgina bókmenntaverðlaun Halldórs Laxness sem afhent voru í tengslum við Bókmenntahátíð í Reykjavík. Hlustendur heyra brot úr viðtali við Shafak sem Jórunn Sigurðardóttir tók við hana við það tilefni.

Snæbjörn Brynjarsson leiklistargagnrýnandi Víðsjár fjallar um söngleikinn Hlið við hlið sem sýndur er um þessar undir í Gamla bíói.

Og loks verður Friðrika Benónýsdóttir tekin tali en á dögunum var endurútgefin ævisaga Friðriku um Ástu Sigurðardóttur rithöfund og myndlistarkonu, en hún kom út árið 1992 og heitir Minn hlátur er sorg.

Umsjón: Guðni Tómasson og Tómas Ævar Ólafsson

Víðsjá hugar áfram að Bókmenntahátíð í Reykjavík í þætti dagsins. Rithöfundurinn Alexander Dan kemur í heimsókn en hann kemur fram á bókmenntahátíð á tveimur pallborðsumræðum. Fyrst núna í kvöld á viðburði sem nefnist Ótrúlegt en satt í Iðnó, en líka pallborðinu Sagnfræði, sálfræði, Sci-fi sem fram fer í Norræna húsinu klukkan 12 á föstudag.

Skáldið Eydís Blöndal er að gefa út ljóðabókina Ég brotna 100% niður. Eydís hefur áður gefið út ljóðabækurnar Tíst og Bast og Án tillits við mikið lof. Við ræðum nýju ljóðabókina, hamfarahlýnun, móðurhlutverkið og innsta eðli manneskjunnar við Eydísi í þætti dagsins.

Ólöf Gerður Sigfúsdóttir kíkti á haustsýningu Hafnarborgar nú á dögunum sýninguna Samfélag skynjandi vera. En sú sýning er hugarfóstur sýningarstjóranna Wiolu Ujazdowsku og Huberts Gromny og er henni ætlað skapa vettvang þar sem margar raddir mætast og ólíkir möguleikar tjáningar og skynjunar eru skoðaðir. Ólöf Gerður segir okkur frá þessari forvitnilegu Hafnarfjarðarsýningu í þætti dagsins.

Umsjón: Tómas Ævar Ólafsson og Guðni Tómasson

Víðsjá 8. sept 2021

Í Víðsjá dagsins mætir íslensk-norska Storm dúóið í þáttinn en það skipa harmonikkuleikararnir Ásta Soffía Þorgeirsdóttir og Kristina Farstad Bjørdal, en þær stöllur eru að leggja upp í tónleikaferð um landið á næstu dögum. Þær Ásta og Kristina mæta auðvitað með nikkurnar sínar fallegu og taka fyrir okkur lagið.

Bókmenntahátíð í Reykjavík hefst í dag og af því tilefni hugum við sérstaklega að bókum í þætti dagsins. Rithöfundurinn Mao Alheimsdóttir lítur við en hún verður hluti af pallborðsumræðunni Heima Heiman sem veltir fyrir sér merkingu hugtaksins Heima. Einnig verður hún hluti af pallborðinu Sjálfsmynd Íslendinga í bókmenntum og annað sjónarhorn. Hún ræðir þessi þemu í þætti dagsins.

En á bókmenntahátíð fara einnig fram viðburðir handan dagskrár eða off-venue. Einn slíkur viðburður er útgáfa frá Tunglinu - forlagi en á Tunglkvöldi sem er í kvöld verða bækur Ástu Fanneyjar Siguðrardóttur, Gluggi - Draumskrá, og Páls Ivans frá Eiðum, Pulsur náttúrunnar (og önnur vonbrigði), til sölu og það aðeins í kvöld. Þær bækur sem ekki seljast verða brenndar.

Umsjón: Guðni Tómasson og Tómas Ævar Ólafsson.

Í Víðsjá dagsins segir Snæbjörn Brynjarsson, leikhúsgagnrýnandi þáttar, okkur frá frægustu ástarsögu allra tíma, leikritinu Rómeó og Júlíu sem sýnt er í Þjóðleikhúsinu um þessar mundir í leikstjórn Þorleifs Arnars Arnarssonar. Handritið í sýningunni hefur vakið nokkra athygli fyrir aðgengileika sinn, þýðingin er ný og talmálsleg. Það eru þau Jón Magnús Arnarsson og Harpa Rún Kristjánsdóttir sem þýða.

Hljómsveitin Sparks skýtur einnig upp kollinum í þætti dagsins. Bræðurnir Ron og Russel Meal hafa í ár skrifað og samið tónlistina fyrir kvikmyndina Annette sem frumsýnd var á kvikmyndahátíðinni í Cannes í sumar en einnig er að koma út heimildarmynd um bræðurnar. Einnig vekur það athygli að í ár 2021 eru komin 50 ár frá útgáfu fyrstu plötu þeirra og því ætlum við í Víðsjá að gefnu tilefni að velta okkur aðeins uppúr þessari skemmtilegu hljómsveit í þætti dagsins.

Arnljótur Sigurðsson verður með okkar að vana með tónlistarhornið Heyrandi nær. Í dag minnist hann hins geggjaða snillings Lee Perry. Við fáum að liggja á hleri í heimastúdíói hans Svörtu Örkinni, þar sem hann framleiddi margar grundvallarplötur reggítónlistarinnar og þróaði áfram hina byltingarkenndu döbb tónlist.

Umsjón: Tómas Ævar Ólafsson og Guðni Tómasson

Víðsjá 6. september 2021,

Þátturinn er í dag helgaður píanóleikaranum Víkingi Heiðari Ólafssyni. Víkingur er tekinn tali um nýjustu plötu sína sem kom út á föstudag og hefur að geyma verk Mozarts og samtímamanna hans. Það er Guðni Tómasson sem ræðir við Víking.

Tónlistin í þættinum er öll af nýjustu plötu Víkings Mozart and Contemporaries

Í Víðsjá í dag verður rætt við rithöfundinn Ingólf Eiríksson um glænýja skáldsögu sem kemur úr í dag þann annan september og nefnist Stóra bókin um sjálfsvorkunn. Ingólfur hlaut Nýræktarstyrk Miðstöðvar íslenskra bókmennta árið 2021 fyrir bókina. En áður hefur hann gefið út ljóðsöguna KLÓN hjá Máli og menningu og ljóðabókina Línuleg dagskrá í seríu Meðgönguljóða hjá Partus Press.

Svo ætlar Sigurlín Bjarney Gísladóttir að byrja að rekja hlustendum hugleiðingar sínar um grát og tár í pistli sínum en Sigurlín Bjarney mun fjalla um þetta efni í Víðsjá á fimmtudögum aðra hverja viku næstu vikurnar. Í fyrsta pistli veltir hún fyrir sér þessu fyrirbæri sem geta runnið og jafnvel spýst úr augnkirtlum okkar.

Guðmundur Jónsson, prófessor við Háskóla Íslands, verður tekinn tali um afmælissýningu Sagnfræðistofnunar sem opnuð verður í dag í anddyri Þjóðarbókhlöðunnar en stofnunin heldur upp á 50 ára afmæli sitt þessa dagana.

Og að endingu verður farið í heimsókn í Hof á Akureyri þar sem söngleikurinn Fimm ár eftir Jason Robert Brown verður sýndur í kvöld en kemur síðan til sýninga í Tjarnarbíói á næstu dögum. Við heyrum í Viktoríu Sigurðardóttur Stefaníudóttur og Rúnari Kristni Rúnarssyni sem leika og syngja í þeirri sýningu.

Víðsjá miðvikudaginn 1. sept 2021

Í Víðsjá í dag verður hugað að hljóðvappinu Flanerí en það eru hljóðgöngur um sögu og samtíma í hlaðvarpsformi sem Aðalbjörg Árnadóttir og Snorri Rafn Hallsson standa að, ásamt fleirum.

Einnig verður Erling Jóhannesson forseti Bandalags íslenskra listamanna gestur þáttarins en bandalagið hefur á undanförnum dögum sett fram hugmyndir sínar um bætta og markvissari stjórnsýslu lista og menningar í íslensku stjórnkerfi.

Þá verður Andrea Elín Vilhjálmsdóttir tekin tali um sviðslistahátíðina Plöntutíð sem fram fer núna um helgina en á henni er hægt að fara í hljóðgönguna BRUM í Heiðmörk þar sem þáttakendur hlusta sig inn í skóginn.

Umsjón: Tómas Ævar Ólafsson og Guðni Tómasson