Víðsjá

Í Víðsjá í dag verður rætt við Högna Egilsson tónlistarmann um sköpun kvikmyndatónlistar en tónlist Högna spilar stóra rullu í þáttaröðinni Kötlu sem Baltasar Kormákur leikstýrir og frumsýnd verður á streymisveitunni Netflix á morgun, 17. Júní.

Í bíó er hið sjónræna yfirleitt sett í aðalhlutverk en á viðburðinum HljóðMyndum er boðið upp á nokkuð óvenjulega upplifun í bíósal þar sem slökkt er á myndvarpanum og hljóðlistin fær að njóta sín. Í Víðsjá í dag heyrum við í Þórönnu Dögg Björnsdóttur og Curver Thoroddssen, listrænum stjórnendum þessa viðburðar.

Og Kristín Eiríksdóttir rithöfundur heldur áfram að velta fyrir sér margskonar skrifum í pistlum sínum í Viðsjá og í dag er hún með hugann við sjálfið.

Umsjón: Guðni Tómasson og Tómas Ævar Ólafsson.

Í Víðsjá í dag verður rætt við skáldið og myndlistarmanninn Evu Schram um sýninguna Orta III í Galleríinu Ramskram á Njálsgötu. Hugað verður að verkum Guðmundu Andrésdóttur listmálara en sýning á verkum hennar, Hrynjandi, var opnuð í Hafnarborg um síðustu helgi. Gauti Kristmannsson, bókmenntagagnrýnandi Víðsjár, segir hlustendum frá bókinni Wake, Siren: Ovid Resung eftir Ninu MacLaughlin en þar er á ferðinni feminísk enduryrking á Ummyndunum rómverska skáldsins Ovids og Ólöf Gerður Sigfúsdóttir rýnir í sjónrýnipistli sínum í yfirlitssýningu á verkum hönnuðarins Kristínar Þorkelsdóttur, sem nú stendur yfir í Hönnunarsafni Íslands

Umsjón: Guðni Tómasson og Tómas Ævar Ólafsson.

Í Víðsjá dagsins verður rætt við tónskáldið Þórð Magnússon um tónverk hans við ljóðið Gunnarshólma eftir Jónas Hallgrímsson sem nú kemur út í hljóðriti. Arnljótur Sigurðsson tekur fyrir lagið Tom's Diner með Suzanne Vega í tónlistarhorninu Heyrandi nær. Víðsjá hugar einnig að tónlistarmanninum Bob Dylan, en hann varð áttræður þann 24. maí síðastliðin og í kjölfar þess stórafmælisins rifjaði Þórdís Gísladóttir, rithöfundur, upp um tíu ára grein eftir sænska tónlistarblaðamanninn Hönnu Fahl þar sem hún setur fram fyrirbærið Dylanmenn. Hlustendur heyra einnig af nýrri Pulitzer verðlaunabók, The Nightwatchmen eftir Louise Erdrich, en verðlaunin voru afhent á föstudag.

Umsjón: Guðni Tómasson og Tómas Ævar Ólafsson.

Í Víðsjá dagsins verður haldið í Hafnarhús Listasafns Reykjavíkur en þar verður opnuð í kvöld samsýningin Iðavöllur - Íslensk myndlist á 21. öld. Þuríður Jónsdóttir tónskáld segir frá nýjum fiðlukonserti sínum sem Una Sveinbjarnardóttir leikur einleik í á tónleikum Sinfóníuhljómsveitar Íslands í kvöld. Einnig verður rætt við myndlistarmanninn Siggu Björg Sigurðardóttir sem opnaði sýninguna Stanslaus titringur í Borgarbókasafninu í Gerðubergi síðastliðinn laugardag. Á sýningunni má sjá verk úr nýrri seríu af teikningum Siggu Bjargar stækkuð á veggi andyrisins en einnig hreyfimyndverkið Fimm óp - óður til óttans og Edvards Munch. Og loks flytur Halldór Armand Ásgeirsson hlustendum pistil sinn þar sem hann fjallar um frasann: Ekki er hægt að útiloka ...

Umsjón Guðni Tómasson og Tómas Ævar Ólafsson

Víðsjá 9. Júní 2021

Víðsjá hugar í dag að Maístjörnunni, ljóðaverðlaunum sem Landsbókasafn Íslands og Rithöfundasambandið standa að. Verðlaunin voru afhent í gær við hátíðlega athöfn í Þjóðarbókhlöðu. Í Víðsjá dagsins verður rætt við verðlaunahafann Höllu Þorlaugu Óskarsdóttur og hlustendur heyra einnig ávarp sem hún flutti við afhendinguna. Einnig verður haldið í Hamraborgina á Kópavogi en þar hóf starfsemi í yfirgefinni bensínstöð nýtt gallerí um síðustu helgi. Galleríið heitir Y og í Víðsjá dagsins verður rætt við Sigurð Atla Sigurðsson einn af aðstandendum gallerísins og Unu Björg Magnúsdóttur sem er fyrst allra til að sína verk sín í þessu óvenjulega galleríi. Gígja Hólmgeirsdóttir heimsækir einnig Sigurhæðir, hús skáldsins Matthíasar Jochumssonar á Akureyri, sem nú hefur gengið í gegnum endurbætur og ræðir þar við Kristínu Þóru Kjartansdóttur frá Flóru menningarhúsi sem nýlega gekk frá leigusamningi við Akureyrarbæ til næstu fjögurra ára.

Umsjón: Guðni Tómasson og Tómas Ævar Ólafsson.

Mynd: www.rsi.is

Víðsjá 8. júní 2021

Í Víðsjá dagsins verður fjallað um bókina Uppskriftabók fyrir Draumkafanir eftir Stefaníu Pálsdóttir, rithöfund. Bókinni, sem kom út í síðustu viku, er ætlað að kenna lesendum aðferðir til þess að vakna eða að verða meðvitaðir í draumi. Rætt verður við Stefaníu Pálsdóttir um Draumkafanir í Víðsjá dagsins. Gauti Kristmannsson, bókmenntagagnrýnandi Víðsjár, segir frá upplifun sinni af lestri sögulegu novellunnar Dagbókin eftir Önnu Stínu Gunnarsdóttur. Hlustendur heyra einnig af bókverkasafninu Bibliotec Nordica sem nú er til sýnis í Þjóðarbókhlöðunni og rætt verður við tvær af meðlimum bókverkakvennahópsins Arkanna, þær Svanborgu Matthíasdóttur og Helgu Pálínu Brynjólfsdóttur, um þáttöku í því verkefni. Víðsjá býður einnig upp á tónlist af nýútkomnu plötunni Black to the Future með bresku hljómsveitinni Sons of Kemet en þar er tónlistarstíllinn fjörleg en pólitísk samsuða jazz tónlistar, kalipsó og rapps.

Umsjón: Guðni Tómasson og Tóma Ævar Ólafsson.

Á laugardaginn opnuðu hvorki meira né minna en fjórar sýningar í Listasafni Árnesinga í Hveragerði. En það voru sýningarnar Róska, Iðustreymi, Yfirtaka og Hvítur. Í Víðsjá dagsins kíkjum við þangað í heimsókn og ræðum við sýningarstjóra og listamenn sem þar eiga verk. Í tónlistarhorninu Heyrandi nær þessa vikuna veltir Arnljótur Sigurðsson fyrir sér uppgötvunum á nýrri tónlist á tækniöld og segir aðeins frá sínum tónlistarlegu ódysseifsförum, með Japan í forgrunni. Ennfremur verður píanóleikaranum Mörtu Argerich send afmæliskveðja, en hún varð áttræð um helgina.

Umsjón: Guðni Tómasson og Tómas Ævar Ólafsson.

Mynd: Eitt af verkum Rósku í Listasafni Árnesinga.

Í Víðsjá dagsins verður meðal annars hugað að Alþjóðlegu Booker verðlaununum sem veitt voru í gær. Þar bar franski rithöfundurinn David Diop sigur úr býtum fyrir skáldsöguna At Night All Blood is Black. Verkið hefur almennt fengið góða gagnrýni en lesendur eru hins vegar ekki allir jafn ánægðir. Í Víðsjá dagsins verður verkið og viðtökur þess gaumgæfðar. Einnig verður farið í heimsókn í Gerðarsafn í Kópavogi þar sem sýningarstjórarnir Dagrún Aðalsteinsdóttir og Weixin Chong verða teknar tali en á sýningunni Hlutbundin þrá, sem opnuð verður í safninu á laugardag, eiga verk átta myndlistarmenn frá Íslandi og Singapúr. Anna Þorvaldsdóttir, tónskáld, verður líka tekin tali en verk hennar Catamorphosis verður flutt á forvitnilegum tónleikum Sinfóníuhljómsveitar Íslands í kvöld, sem einnig verða í beinni útsendingu á Rás 1. Greint verður frá handhöfum nýræktarstyrkja Miðstöðvar íslenskra bókmennta sem afhentir verða síðdegis og Kristín Eiríksdóttir, rithöfundur, flytur hlustendum jafnframt pistil þar sem hnífar verða á lofti.

Umsjón: Guðni Tómasson og Tómas Ævar Ólafsson.

Í Víðsjá í dag kl. 16:05 verður rætt við Sigmar Matthíasson bassaleikara um nýja plötu hans Meridian Metaphor sem kemur út á föstudag með nýjum tónsmíðum hans sem eru oftar en ekki undir áhrifum frá tónlist Balkanskagans. Hugað verður að Vorblóti ? sameiginlegri hátíð Tjarnarbíós og Reykjavík Dance Festival sem fram fer dagana 3.-.6. júní en Pétur Ármannsson, listrænn stjórnandi hátíðarinnar og Steinunn Ketilsdóttir, deildarforseti sviðslistadeildar Listaháskóla Íslands verða gestir Víðsjár. Ennfremur verður Lilja Dögg Tryggvadóttir tekin tali um Kakóseremóníur en árið 2019 rannsakaði hún fyrirbærið í ritgerð sem kallaðist Kakóserimóníur: Notkun kakós á 21. öldinni í heilunar og slökunar tilgangi.

Umsjón Guðn Tómasson og Tómas Ævar Ólafsson.

Víðsjá ræðir í dag við Ástu Fanneyju Sigurðardóttur um nýjustu bók hennar sem heitir Sería forma og kom út á dögunum hjá útgáfunni Þrjár hendur. Sýningarsalur Íslenskrar grafíkur í Hafnarhúsinu verður heimsóttur og rætt við Valgerði Hauksdóttur sem þar sýnir verk sín á sýningu sem hún kallar Síbreytileika. Hugað verður að forvitnilegu tónleikahaldi Kammersveitar Reykjavíkur í Hörpu í kvöld þar sem verk eftir Nino Rota og Thierry Escaich verða í forgrunni og loks segir Gauti Kristmannsson, bókmenntagagnrýnandi Víðsjár, hlustendum frá upplifun sinni af lestri skáldsögunnar Að telja upp í milljón eftir Önnu Hafþórsdóttur.

Umsjón: Guðni Tómasson og Tómas Ævar Ólafsson