Víðsjá

Í Víðsjá í dag verður meðal annars rætt við Árna Bergmann í tilefni af því að á þessu ári eru 200 ár liðin frá fæðingu rússneska rithöfundarins Fjodors Dostojevskís. Víðsjá heimsækir einnig Listasafn Árnesinga til að skoða og ræða sýninguna Troika, en þar sýna verk sín þessa dagana þeir Kristján Steingrímur, Pétur Magnússon og Tumi Magnússon. Kristján segir frá sýningunni í þætti dagsins. Og þessa vikuna er skrautlegi fjöllistamaðurinn Ivor Cutler í brennidepli í tónlistarhorninu Heyrandi nær, en Ivor var fæddur fyrir tæpri öld síðan í Glasgow og varð óvænt uppáhald bresku blómabarnanna og fangaði eyru þvert yfir kynslóðabilin.

Í Víðsjá í dag verður Ragnar Kjartansson myndlistarmaður heimsóttur á vinnustofuna en sýning hans Sumarnótt (Death Is Elsewhere) verður opnuð í Listasafni Íslands á morgun. Skáldið Didda heldur áfram að tala um listina að þrífast. Í dag flytur hún sinn fjórða og síðasta pistil að sinni, við sögu hjá henni í dag kemur annað skáld, Ólöf Sigurðardóttir frá Hlöðum. Víðsjá heimsækir einnig í dag Auði Lóu Guðnadóttur myndlistarkonu í Hafnarhúsi Listasafns Reykjavíkur en í D-sal safnsins stendur nú yfir sýning hennar JÁ/NEI sem Auður Lóa ætlar að segja áhugasömum gestum safnsins frá í kvöld. Og bólusetningar koma við sögu að gefnu tilefni í Víðsjá í dag.

Í Víðsjá í dag verður meðal annars hugað að sýningunni Fallandi trjám liggur margt á hjarta í Kling og Bang galleríi og rætt við sýningarstjórann Helenu Aðalsteinsdóttur og tvo listamenn sem eiga verk á sýningunni, Þóreyju Björk Halldórsdóttur og Elínu Margot. Gauti Kristmannsson bókmenntagagnrýnandi Víðsjár fjallar í dag um skáldsöguna Nickel-strákarnir eftir bandaríska rithöfundinn Colson Whitehead, en sagan kom nýlega út í íslenskri þýðingu Árna Óskarssonar. Og Víðsjá hittir líka hagmæltan tónlistarmann, Þórarinn Má Baldursson víóluleikara, og ræðir við hann um nýja bók sem kemur út í dag og heitir einfaldlega Vísur og kvæði.

Í Víðsjá í dag verður meðal annars rætt við Hörð Áskelsson um tónlistarlíf í Hallgrímskirkju en Hörður lætur nú af störfum sem organisti og kantor við kirkjuna eftir tæplega fjörutíu ára starf. Einnig verður sagt frá nýrri plötu með ensku tónlistarkonunni Marianne Faithfull, platan nefnist She Walks in Beauty, þar flytur Faithful ellefu ljóð eftir rómantísk skáld 19. aldar en plötuna vann hún með ástralska tónlistarmanninum Warren Ellis sem þekktastur er fyrir samstarf sitt við Nick Cave. Arnljótur Sigurðsson heldur áfram í tónlistarhorninu Heyrandi nær að skoða tónlistarlegar rætur rafbræðingstónlistar Miles Davis, en í pistli dagsins tekur hann fyrir tónlistarkonuna Betty Davis og skoðar þau mótandi tónlistarlegu áhrif sem hún hafði á sinn þáverandi, Miles Davis. Og Snæbjörn Brynjarsson leikhúsgagnrýnandi Víðsjár fjallar í dag um leikritið Haukur og Lilja eftir Elísabetu Jökulsdóttur sem frumsýnt var í Ásmundarsal í síðustu viku.

Í Víðsjá í dag verður meðal annars slegið á þráðinn til Oslóar þar sem Már Jónsson sagnfræðingur og prófessor við Háskóla Íslands verður tekinn tali um íslensk handrit víða um heim, en Már hefur á síðustu dögum fjallað um samskipti Íslands og Danmerkur og handritamálið, í opinberri umræðu. Nýkjörinn formaður Nýlistasafnsins, Sunna Ástþórsdóttir, verður tekin tali en aðalfundur Nýlistasafnsins var haldinn í gærkvöld. Einnig verður í Víðsjá í dag talað að gefnu tilefni um frasann ,,að koma okkur á kortið", þar sem eldgos á Time Square og fleira kemur við sögu. Og Halldór Armand Ásgeirsson rithöfundur heldur áfram að tala um mótsagnir í sögu og samtíð. Í dag er Halldór með hugann við klassískt leikverk, Antígónu, eftir Forn-gríska skáldið Sófókles.

Í Víðsjá í dag verður greint frá því hvaða höfundar hljóta Barnabókaverðlaun Reykjavíkurborgar, en verðlaunin voru afhent í þremur flokkum bóka fyrir börn og ungmenni í Höfða í dag. Rætt verður við höfundinn sem fékk verðlaunin fyrir bestu frumsömdu bókina á liðnu ári. Víðsjá heimsækir líka Harbinger sýningarrýmið við Freyjugötu í Reykjavík og ræðir þar við þær Bergþóru Snæbjörnsdóttur, Dögg Mósesdóttur og Rakel McMahon um sýningu þeirra Waiting Room. Og bók vikunnar hér á Rás eitt að þessu sinni er skáldsagan Hið stutta bréf og hin langa kveðja eftir austuríska Nóbelsverðlaunahöfundinn Peter Handke en bókin kom nýlega út í íslenskri þýðingu Árna Óskarssonar. Hlustendur heyra í Árna í Víðsjá í dag og þeir heyra líka stutt brot úr verkinu.

Í Víðsjá í dag verður hugað að sýningunni Haukur og Lilja, tveggja manna leikverki eftir Elísabetu Jökulsdóttur sem frumsýnt verður á fimmtudagskvöld í Ásmundarsal við Freyjugötu. Gauti Kristmannsson bókmenntagagnrýnandi Víðsjár fjallar í dag um skáldsöguna Dyrnar eftir ungverska rithöfundinn Mögdu Szabó sem kom út í íslenskri þýðingu Guðrúnar Hannesdóttur á síðasta ári. Guðrún hlaut íslensku þýðingaverðlaunin fyrir verkið fyrr á þessu ári. Einnig verður í Víðsjá í dag fjallað um skáldsöguna Nickel-strákarnir eftir bandaríska rithöfundinn Colson Whitehead en hún kemur út á næstu dögum í íslenskri þýðingu Árna Óskarssonar. Whitehead fékk Pulitzer-verðlaunin á síðasta ári fyrir þetta verk sem byggt er á sögu raunverulegs skóla sem var starfræktur í Florida í rúma öld og mótaði líf þúsunda barna. Og í sjónrýni-pistli dagsins fer Ólöf Gerður Sigfúsdóttir á sýningu spænsk-íslenska listamannatvíeykisins Libiu Castro og Ólafs Ólafssonar ?Töfrafundur ? áratug síðar?, sem nú stendur yfir í Hafnarborg, menningar- og listamiðstöð Hafnarfjarðar. Sýningin fjallar um stjórnarskrármálið svokallaða, og hreyfir við áhorfandanum á afar áhrifaríkan hátt með því að færa flókin pólitísk álitamál yfir á hið listræna svið og út til almennings.

Í Víðsjá í dag verður meðal annars rætt við Barða Jóhannsson tónlistarmann en í síðustu viku kom út plata sem hefur að geyma tónlist sem Barði samdi við kvikmyndina Agony eftir ítalska kvikmyndaleikstjórann Michele Civetta. Einnig verður fjallað um nýútkomna bók um Kúbudeiluna og þýsku messó-sópransöngkonunnar Christu Ludwig minnst, en hún lést nú á dögunum á tíræðisaldri. Snæbjörn Brynjarsson leiklistargagnrýnandi Víðsjár fjallar í dag um leikritið Nashyrningana eftir fransk-rúmenska leikskáldið Eugéne Ionesco sem frumsýnt var í Þjóðleikhúsinu í síðustu viku. Og óslípaði tónlistardemanturinn There's a Riot Going on með bandarísku hljómsveitinni Sly and the Family Stone verður í brennidepli í tónlistarhorninu Heyrandi nær, en á þessu ári eru fimmtíu ár liðin frá útgáfu þessarar tímamótaplötu.

Í Víðsjá í dag verður meðal annars rætt við tónskáldið Gunnar Andréas Kristinsson um nýja plötu með verkum hans sem heitir Moonbow og kemur út hjá útgáfufyrirtækinu Sono Luminus á föstudag. Litið verður við í Hjarta Reykjavíkur en þar var opnuð um helgina sýningin Með tveimur fingrum þar sem sjá má myndljóð eftir rithöfundinn Óskar Árna Óskarssonar. Didda Jónsdóttir skáld heldur áfram að tala um listina að þrífast. Og gripið verður niður í fréttaauka frá 1. apríl 1971 þegar samningar náðust loks í handritadeilu Íslands og Danmerkur en í dag er þess minnst að fimmtíu ár eru liðin síðan handritin komu heim, Konungsbók Eddukvæða og Flateyjarbók.

Í Víðsjá í dag verður meðal annars hugað að starfi við björgun minja úr Tækniminjasafni Seyðisfjarðar eftir að aurskriður féllu á Seyðisfjörð í desember, en í hádeginu í dag var haldinn hádegisfyrirlestur um það starf í Þjóðminjasafni Íslands. Þar töluðu Zuhaitz Akizu forstöðumaður Tækniminjasafnsins á Seyðisfirði og Ágústa Kristófersdóttir framkvæmdastjóri safneignar Þjóðminjasafnsins, en þau verða tekin tali í þætti dagsins. Einnig verður í Víðsjá í dag rætt við Ásgeir Jónsson Seðlabankastjóra að gefnu tilefni um Benedikt Gröndal Sveinbjörnsson, bókasöfnun og sitthvað fleira. Á föstudag kom út plata sem heitir McCartney III: Imagined, en hún hefur að geyma endurgerðir ýmissa tónlistarmanna á lögum af plötunni McCartney III sem Paul McCartney sendi frá sér skömmu fyrir jól á síðasta ári. Á meðal tónlistarmanna sem leggja í púkkið má nefna Beck, St. Vincent, Blood Orange, Damon Albarn, Ed O'Brien úr Radiohead, og 3D úr Massive Attack. Hlustendur heyra tóndæmi í Víðsjá í dag. Og Gauti Kristmannsson bókmenntagagnrýnandi Víðsjár fjallar í dag um skáldsöguna Um endalok einsemdarinnar eftir svissnesk-þýska rithöfundinn Benedict Wells en sagan kom nýlega út í íslenskri þýðingu Elísu Bjargar Þorsteinsdóttur.