Í Víðsjá í dag verður meðal annars farið í heimsókn til Helga Þorgils Friðjónssonar myndlistarmanns en hann er að setja upp sýningu í Ganginum, heimagalleríi sínu sem á sér nú orðið 40 ára sögu. Á afmælissýningu sem hann opnar á morgun eiga verk fjölmargir þeirra erlendu listamanna sem hafa sýnt hjá Helga í gegnum tíðina. Rithöfundarnir Andri Snær Magnason og Sigurbjörg Þrastardóttir koma í heimsókn og ræða um sköpunarverk sín á tímum Kórónaveirunnar. Farið verður í stutta heimsókn til Parísar, að gefnu tilefni. Og Hermann Stefánsson rithöfundur hefur flutt pistla í Víðsjá á tímum kófs, hann lítur í dag um öxl og skoðar nýliðinn tíma.

Umsjón: Guðni Tómasson og Eiríkur Guðmundsson

Í Víðsjá í dag verður meðal annars rætt við Benedikt Hjartarson bókmenntafræðing sem þýtt hefur skáldsöguna Minnisblöð Malte Laurids Brigge eftir Rainer Maria Rilke. Bókin kom fyrst út árið 1910 og var eina skáldsaga Rilkes, sem var eitt af fremstu ljóðskáldum Evrópu á 20. öld. Benedikt segir frá þessari merku bók og þessu merka skáldi í Víðsjá í dag en þýðing hans kemur út í Lærdómsritaröð Hins íslenska bókmenntafélags í næsta mánuði. Einnig verður slegið á þráðinn til Seyðisfjarðar en í Skaftfelli er Bjargey Ólafsdóttir að sýna verk sín þessa dagana. Ljósmyndasýningu sína kallar Bjargey Tíru en hún fer í framhaldinu einnig á Neskaupsstað. Björn Þór Vilhjálmsson fjallar um My Dark Vanessa eftir Kate Elizabeth Russell sem út kom í síðasta mánuði og hefur þegar vakið mikla athygli fyrir umfjöllun sína um kynferðisofbeldi og margflókna stöðu fórnarlambsins. Og Maístjarnan, ljóðabókaverðlaun Rithöfundasambands Íslands og Landsbókasafn Íslands - Háskólabókasafns, verða afhent í dag, hlustendur Víðsjár heyra í nýjum verðlaunahafa í þættinum í dag.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars rætt við Viðar Hreinsson bókmenntafræðing sem tók á dögunum við styrk úr sjóði sem ætlað er að styðja þverfaglegar rannsóknir á ritmenningu íslenskra miðalda. Styrkinn fær Viðar til að vinna að verkefni sem nefnist Náttúrur og fornar frásagnir: Um náttúru- og umhverfissýn íslenskra miðaldasagna, en þar hyggst Viðar fjalla um umhverfi og náttúrusýn í íslenskri sagnalist frá landnámi til siðaskipta, beita nýjum straumum umhverfishugvísinda á fornar íslenskar bókmenntir í því skyni að styrkja skilning á náttúruskyni, náttúrusýn og náttúrunytjum í sögulegu samhengi. Rætt verður við Viðar í þætti dagsins. Einnig verður hugað að nýútkominni bók sem heitir Ljáðu mér vængi og hefur að geyma minningarbrot úr lífi Páls Pampichlers Pálssonar, trompetleikara, hljómsveitarstjóra og tónskálds. Rætt verður við Sigurð Yngva Snorrason einn af höfundum bókarinnar um Pál og ævi og störf hans í íslensku tónlistarlífi. Og bók vikunnar á Rás eitt að þessu sinni er Það sem ég tala um þegar ég tala um hlaup eftir japanska rithöfundinn Haruki Murakami. Bók sem er í senn ferðabók og minningabók og hverfist um fimm mánaða æfingaplan fyrir maraþonhlaupið í New York. Hlustendur heyra í þýðanda bókarinnar, Kristjáni Hrafni Guðmundssyni, í Víðsjá í dag.

Umsjón: Guðni Tómasson og Eiríkur Guðmundsson

Í Víðsjá í dag verður þess meðal annars minnst að á mánudag voru fjörutíu ár síðan breski tónlistarmaðurinn Ian Curtis andaðist. Curtis var forsöngvari í hljómsveitinni Joy Division, sem sendi aðeins frá sér tvær hljóðversplötur á sínum ferli, en hafði eigi að síður gríðarleg áhrif. Seinni plata sveitarinnar, Closer, kom út sléttum tveimur mánuðum eftir andlát Curtis og er af mörgum talin ein merkasta platan sem gerð var á mörkum pönks og nýbylgju. Gestur Víðsjár í dag verður Hilmar Örn Hilmarsson tónlistarmaður. Hermann Stefánsson rithöfundur fjallar um ritið Tónlist liðinna alda eftir Árna Heimi Ingólfsson og finnur frekari upplýsingar um þjóðlagið Vera mátt góður sem Hermann fjallað um í þættinum fyrir fáeinum vikum, en Egill Ólafsson og Sólrún Edda Benedikz Hermannsdóttir flytja tveggja radda útgáfu lagsins í nýrri upptöku. Borðspilið Matador kemur við sögu í þættinum og Þórdís Gísladóttir rithöfundur fjallar um bókina „Ord, bild, liv“ sem fjallar um ævi og verk múmínálfahöfundsrins Tove Jansson.

Umsjón: Guðni Tómasson og Eiríkur Guðmundsson

Í Víðsjá í dag verður þess meðal annars minnst að á föstudag, þann 15. maí síðastliðinn, voru 200 ár liðin frá fæðingu skáldsins Gríms Thomsens. Gestur þáttarins af því tilefni verður Kristján Jóhann Jónsson bókmenntafræðingur. Sunna Ástþórsdóttir fjallar um heimildarmyndina „Eins og málverk eftir Eggert Pétursson“ sem fjallar eins og nafnið gefur til kynna um listmálarann Eggert Pétursson og verk hans. Viðsnúin listaverk koma við sögu í þættinum í dag að gefnu tilefni. Og bók vikunnar á Rás 1 að þessu sinni er skáldsagan Það sem að baki býr eftir danska rithöfundinn Merete Pryds Helle en sagan kom út í íslenskri þýðingu Magneu J. Matthíasdóttur árið 2018. Magnea segir frá verkinu í Víðsjá í dag.

Umsjón: Guðni Tómasson og Eiríkur Guðmundsson

Í Víðsjá í dag heyra hlustendur meðal annars af nýrri sjónvarpsþáttaröð sem hefur göngu sína á RÚV á sunnudag og nefnist Músíkmolar. Þar munu Víkingur Heiðar Ólafsson og Halla Oddný Magnúsdóttir leiða áhorfendur í tali og tónum um töfraheima sígildrar tónlistar. Einnig verður fjallað verður um vatn, dásemdir þess og heilun en einnig um vandræði í Paradís þar sem væntanleg hljómplata kemur við sögu. Hermann Stefánsson rithöfundur skoðar í þættinum tvær kvikmyndir, brasilísku heimildamyndina Lýðræðið sundlar (The Edge of Democracy) og mexíkönsku kvikmyndina Hið fullkomna einræði (The Perfect Dictatorship) á Netflix. Hann veltir fyrir sér stjórnarfari í Rómönsku Ameríku fyrr og nú og samspili fjölmiðla og stjórnvalda. Og í Víðsjá í dag verður einnig rifjuð upp minning um hest sem uppi var fyrir ríflega 100 árum.

Umsjón: Guðni Tómasson og Eiríkur Guðmundsson

Í Víðsjá dagsins verður sagt frá bókinni Gamlar konur detta út um glugga en hún hefur að geyma örsögur eftir rússneska rithöfundinn Danííl Kharms. Kharms fæddist í Pétursborg árið 1905 og er í seinni tíð talinn einn fremsti höfundur absúrdbókmennta í hinum vestræna heimi. Það eru þau Áslaug Agnarsdóttir og Óskar Árni Óskarsson sem þýða sögurnar, og þau verða gestir Víðsjár í dag. Þórdís Gísladóttir segir frá bókinni Mayhem: A Mamoir eftir Sigrid Rausing sem segir frá því hvernig það var að alast upp í einni af tuttugu ríkustu fjölskyldum heims sem byggði auð sinn á Tetra Pak drykkjarfernu-framleiðslu. Björn Þór Vilhjálmsson fjallar um nýútkomna ævisögu Susan Sontag eftir Benjamin Moser. Auk þess verður rifjuð verður upp 80 ára gömul ræða úr breska þinginu sem lengi verður vitnað til í sögubókum.

Í Víðsjá í dag verður meðal annars rætt við Ólaf Pál Jónsson heimspeking sem hefur sent frá sér bók sem nefnist Annáll um líf í annasömum heimi en hún hefur að geyma hugleiðingar um stöðu okkar í samtímanum, auk ljóða og vatnslitamynda. Einnig verður farið í heimsókn í Harbinger sýningarrýmið við Freyjugötu og rætt við myndlistarkonuna Geirþrúði Finnbogadóttur Hjörvar sem þar opnaði sýningu um síðustu helgi sem hún kallar Retail eða Smásölu. María Kristjánsdóttir leikhúsrýnir þáttarins fjallar í dag um svissneska leikhúslistamanninn Milo Rau sem vakið hefur mikla athygli á undanförnum misserum og meðal annars verið kallaður einn mikilvægasti og áhrifamesti leikhúsmaður í Evrópu samtímans. Og bók vikunnar að þessu sinni er skáldsagan Ástir eftir spænska rithöfundinn Javier Marías sem kom fyrst út á Spáni árið 2011 en í íslenskri þýðingu Sigrúnar Ástríðar Eiríksdóttur árið 2012. Bókin var meðal annars valin bók ársins 2011 af gagnrýnendum spænska blaðsins El País. Hlustendur heyra í Sigrúnu í þætti dagsins.

Umsjón: Guðni Tómasson og Eiríkur Guðmundsson

Víðsjá í dag er að mestu leyti tileinkuð þýsku hljómsveitinni Kraftwerk en annar stofnenda hennar, Florian Schneider, andaðist í síðustu viku, 73ja ára að aldri. Hljómsveitin var stofnuð í Düsseldorf árið 1970, hún var frumkvöðull á sviði raftónlistar og er án ef ein áhrifamesta hljómsveit allra tíma. Á árunum 1974-1981 sendi hljómsveitin frá sér plötur sem höfðu áhrif á tónlistarfólk í fjölmörgum greinum, syntapoppi, hipphoppi, teknói, ambíent-tónlist og nýbylgju, svo nokkuð sé nefnt. Hermann Stefánsson rithöfundur veltir í pistli dagsins fyrir sér þversögnum lýðræðis. Einnig verður greint frá tilnefningum til Maístjörnunnar, ljóðabókaverðlauna Rithöfundasambands Íslands og Landsbókasafns Íslands - Háskólasafns, en tilkynnt verður í Gunnarshúsi í dag hvaða bækur eru tilnefndar fyrir árið 2019, verðlaunin verða síðan afhent í fjórða sinn síðar í mánuðinum. Og hlustendur heyra að venju ljóð fyrir þjóð.

Umsjón: Guðni Tómasson og Eiríkur Guðmundsson