Víðsjá

Í Víðsjá í dag verður meðal annars rætt við Þorstein Vilhjálmsson, doktorsnema í sagnfræði, sem birti á dögunum í Lestrarklefanum grein sem fjallar um ævi og höfundarverk þýska rithöfundarins Thomasar Mann og beinir þar ekki síst sjónum að Mann sem hinsegin höfundi, greinin ber yfirskriftina ,,Ástir og örlög hins ógurlega herra Z." Einnig verður rætt við Áslaugu Agnarsdóttur þýðanda um rússneska rithöfundinn Sergei Dovlatov en nú er komin út þýðing á smásaganasafni hans, Ferðatöskunni, frá árinu 1986. Og Arnljótur Sigurðssonar skoðar í tónlistarhorninu Heyrandi nær hina umdeildu rafbræðingsplötu Miles Davis, On The Corner, frá árinu 1972, Sly And The Family Stone og Karlheinz Stockhausen bregður fyrir að gefnu tilefni í umfjöllun Arnljóts í dag.

Í Víðsjá í dag ræðir Kristín Eiríksdóttir rithöfundur um höfundarrétt og fleira í tengslum við umræðu sem fram hefur farið undanfarna daga um líkindi milli sjónvarpsþáttaraðarinnar Systrabönd í leikstjórn Silju Hauksdóttur, sem sýnd er í Sjónvarpi Símans, og leikrits Kristínar, Hystory, sem leikhópurinn Sokkabandið frumsýndi í Borgarleikhúsinu árið 2015. Kristín hefur ekki tjáð sig opinberlega um þetta mál hingað til en hún gerir það í Víðsjá í dag. Víðsjá hugar einnig í dag að miðlun á einu mesta menningardjásni þjóðarinnar, Konungsbók Eddukvæða, þegar listakonan Steiney Skúladóttir og Eva María Jónsdóttir verkefnastjóri hjá Stofnun Árna Magnússonar, verða teknar tali. Þær segja frá verkefni sem snýst um að miðla efni Konungsbókar Eddukvæða til nýrra kynslóða. Verkefnið er hluti af hátíðahöldum í tilefni þess að á miðvikudag í næstu viku verða fimmtíu ár liðin frá því að danska varðskipið Vædderen kom með Konungsbók og Flateyjarbók til Reykjavíkur og handritin komu heim. Í dag er alþjóðlegur dagur listarinnar, sem að þessu sinni er tileinkaður myndlistinni. Að því tilefni flytur Haraldur Jónsson myndlistarmaður ávarp í Víðsjá í dag. Og Halldór Armand Ásgeirsson rithöfundur heldur áfram að tala um mótsagnir í sögu og samtíð. Í dag fjallar Halldór um The Great Reset, stóru endurræsinguna, og eftirplágusamfélagið.

Í Víðsjá í dag verður meðal annars rætt við Hrafnkel Lárusson um nýja doktorsritgerð hans í sagnfræði, Lýðræði í mótun. Félagastarf, fjölmiðlun og þátttaka almennings 1874-1915. Rannsókn sína varði Hrafnkell við Háskóla Íslands á mánudag. Í Víðsjá í dag verður einnig rifjuð upp að gefnu tilefni skáldsaga sem kom út fyrir um það bil 100 árum. Þetta er skáldsagan Sælir eru einfaldir eftir Gunnar Gunnarsson, sem kom út á dönsku síðla árs 1920, og fjallar um sjö daga í lífi nokkurra vina, á tímum drepsóttar, spænsku veikinnar í Reykjavík, og Kötlugoss, hvorki meira né minna. Þetta var þriðja og síðasta skáldsagan í röð svokallaðra kreppusagna sem Gunnar skrifaði á öðrum áratug síðustu aldar, þar sem hann glímdi við tilvistarlegar spurningar í skugga fyrri heimstyrjaldarinnar. Bókin varð mjög vinsæl og hefur staðist tímans tönn, hún var þýdd mjög fljótlega á þýsku, og síðan á ensku, norrænt meistaraverk, sögðu gagnrýnendur meðal annars. Í Víðsjá í dag verður fjallað um skáldsöguna Sælir eru einfaldir, og rætt við Jón Yngva Jóhannsson bókmenntafræðing og ævisagnaritara Gunnars Gunnarssonar. Og á dögunum var frá því greint að í júlí kæmi út áður óútgefin hljómplata með bandaríska tónlistarmanninum Prince, sem andaðist í apríl árið 2016, aðeins 57 ára að aldri. Platan nefnist Welcome 2 America, og var tekin upp að vorlagi árið 2010. Við segjum frá plötunni í þætti dagsins.

Í Víðsjá í dag verður meðal annars fjallað um grein sem rithöfundurinn Salman Rushdie birti á dögunum í tilefni af 40 ára afmæli skáldsögunnar Miðnæturbörn, sem kom út árið 1981 og gerði Rushdie heimsfrægan á einu augabragði. Í greininni fjallar Rushdie um tilurð skáldsögunnar, aðferðir og aðföng og sömuleiðis um breyttan veruleika á Indlandi. Kaffihúsið Mokka verður heimsótt og þar rætt við Þórdísi Claessen um sýningu hennar þar sem heitir Djöfulgangur og heiðríkja. Og Gauti Kristmannsson bókmenntagagnrýnandi Víðsjár fjallar í dag um skáldsöguna Hið stutta bréf og hin langa kveðja eftir austurríska Nóbelsverðlaunahöfundinn Peter Handke en bókin kom á dögunum út í íslenskri þýðingu Árna Óskarssonar.

Í Víðsjá í dag verður galleríið Berg Contemporary heimsótt en þar hefur verið sett upp sýning á verkum Sigurðar Guðjónssonar myndlistarmanns. Sigurður verður tekin tali í þættinum. Ólöf Gerður Sigfúsdóttir leggur leið sína á hafnarbakkann og heimsækir sýningu Huldu Rósar Guðnadóttur, WERK ? Labor Move, sem nú stendur yfir í A-sal Hafnarhússins. Þótt sýningin láti ekki mikið yfir sér við fyrstu sýn, vekur hún upp áleitnar og áríðandi spurningar um flókin samfélagsleg málefni, eins og stéttskiptingu, alþjóðahagkerfið og sitthvað fleira, á sýningarstað sem hefði ekki getað verið meira viðeigandi. Endurskipulagning kemur einnig við sögu í Víðsjá í dag. Og tónlistarhornið Heyrandi nær verður á sínum stað í Víðsjá á mánudegi. Að þessu sinni tekur Arnljótur Sigurðsson fyrir stikkprufur af raftónlist frá meginlandinu, við sögu hjá honum í dag kemur meðal annars kæruleysi í Kölnarborg og hárbeitt ádeila suður á Spáni.

Í Víðsjá í dag ætlum við meðal annars að ræða við Guðberg Bergsson rithöfund og Birnu Bjarnadóttur bókmenntafræðing og útgefanda um ljóðabók Guðbergs, Stíga, sem kom á dögunum út í spænskri þýðingu eftir Rafael García Perez. Ljóðabókin Stígar kom fyrst út árið 2001 og var þriðja ljóðabók Guðbergs. Spænska þýðingin kemur út í tvímála útgáfu hjá útgáfufyrirtæki sem nefnist Hin Kindin. Við ætlum líka í Víðsjá í dag að slá á þráðinn til Kaupmannahafnar og ræða við Steinar Guðjónsson gítarleikara í Kaupmannahöfn um nýja plötu tríósins Pogo Problem. Og Didda Jónsdóttir skáld talar öðru sinni í Víðsjá á fimmtudegi um listina að þrífast.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars rætt við Óttarr Proppé, verslunarstjóra Bóksölu stúdenta, um japanska rithöfundinn Haruki Murakami en í gær kom út á ensku hans nýjasta bók, sagnasafnið First Person Singular sem hefur að geyma átta sögur eftir þennan virta og vinsæla höfund. Óttarr Proppé hefur lengi verið dyggur lesandi verka Murakamis, og hann svarar meðal annars spurningunni: Hvers konar höfundur er Harurki Murakami? í Víðsjá í dag. Einnig verður í þættinum fjallað um bandaríska listmálarann Helen Frankenthaler, sem var ein af abstrakt-expressionistunum svokölluðu í listalífi Bandaríkjanna um miðja síðustu öld, en ný ævisaga er komin út um hana. Og Ólafur Teitur Guðnason segir að gefnu tilefni frá því hvernig textar og lög Megasar hafa komið við sögu í lífi hans, bæði í gleði og sorg, en Megas á einmitt afmæli í dag.

Í Viðsjá í dag verður meðal annars hugað að sýningunni Eilíf endurkoma sem nú stendur yfir á Kjarvalsstöðum þar sem verk samtímalistamanna eru sett í samhengi við verk Kjarvals. Einnig verður í Víðsjá í dag rætt við Árna Óskarsson um nýja þýðingu hans á skáldsögunni hið stutta bréf og hin langa kveðja eftir austuríska Nóbelsverðlaunahöfundinn Peter Handke en bókin kom á dögunum út hjá bókaforlaginu Uglu. Gauti Kristmannsson bókmenntagagnrýnandi Víðsjár fjallar í dag um skáldsöguna Ef við værum á venjulegum stað eftir mexíkóska rithöfundinn Juan Pablo Villalobos sem komin er út í íslenskri þýðingu Jóns Halls Stefánssonar. Og í tónlistarhorni Víðsjár, Heyrandi nær, fer Arnljótur Sigurðsson með hlutstendur í ferðalag til Mongólíu og Marokkó og fjallar um netforritið radio.garden.

Í Víðsjá í dag verður meðal annars rætt við Vernarð Linnet um Jón Múla Árnason og áhrif hans á íslenska jazzmenningu en hundrað ár eins og kunnugt er liðin frá fæðingu Jóns í dag. Halldór Armand Ásgeirsson rithöfundur fjallar í þættinum í dag um krossfestinguna og mótsögnina í því þegar Guð hafnar sjálfum sér. Gréta Sigríður Einarsdóttir talar um menningarelítuna og hvers vegna hún er hrædd við myndlist. Grétu grunar að fleiri en hún glími við vanþekkingu á listasögu og séu af þeim sökum ragir við að taka þátt í umræðu um myndlist. Þá skapist vítahringur sem viðheldur mýtunni um menningarelítu. Og hlustendur heyra einnig brot úr páskaleikriti Útvarpsleikhússins sem flutt verður í fjórum hlutum um páska, hér er á ferðinni nýtt íslenskt útvarpsleikrit sem nefnist Vorar skuldir og er eftir leikhópinn Kriðpleir.

Í Víðsjá í dag verður meðal annars slegið á þráðinn norður á Akureyri þar sem Þórður Sævar Jónsson verður tekinn tali en hann sendi frá sér á dögunum nýja ljóðabók sem heitir Brunagaddur og innblásin er af snjóþyngslum í höfuðstað Norðurlands veturinn 2019-20. Ólöf Gerður Sigfúsdóttir fjallar í sjónlistapistli um sýninguna Skýjaborg í (lokuðu) Gerðarsafni þar sem fjórir íslenskir samtímalistamenn sýna verk sem tengjast Kópavogi. Listamennirnir eru Berglind Jóna Hlynsdóttir, Bjarki Bragason, Eirún Sigurðarsdóttir og Unnar Örn Auðarson, en sýningarstjórar eru þær Brynja Sveinsdóttir og Klara Þórhallsdóttir. Hallarekstur og gildismat koma við sögu að gefnu tilefni í Víðsjá í dag. Og hlustendur fá einnig að heyra brot úr fyrsta þætti þáttaraðarinnar Þó líði ár og öld sem verður á dagskrá Rásar 1 um páskana en þar segir söngvarinn Björgvin Halldórsson frá lífshlaupi sínu og tónlistarferli.