Fir et nach eemol an d’Gediechtnes ze ruffen: déi Filminstallatioun, déi am Moment am Arsenale zu Venedeg op der Konschtbiennale Lëtzebuerg representéiert, weist eng Strull Kaka, meeschterhaft mat Schauspillerei a Spezialeffekter op den Ecran gezaubert, op där hirer Spur, ähem, den Zuschauer duerch d’Gefill vun der Schimmt a verschiddene Situatioune geféiert gëtt. Dozou gehéieren och Geräischer, déi den Haaptpersonnage mat sech ronderëm dréit: Flatulenzen, Gespruddels a verschiddene Konsistenzen, Loftblosen an Eruptiounen.

Fir nach eemol den Aperçu vum Wierk ze kréien, lauschtert an eiser Mediathéik den Interview mat der Kënschtlerin Aline Bouvy. Hei soll et ëm den Toun, ganz am Spezielle, goen. De Pierre Dozin, Partner am Tounstudio Sonic Shelter zu Bréissel a reegelméissege Kollaborateur vun der Aline Bouvy, hat zu Venedeg dem Marc Clement erkläert, wéi hien un d’Aarbecht fir de Film erugaangen ass.