Et ass engem deemools, viru bal 18 Joer, den 31. Oktober 2002 schonn ënner d'Haut gaangen, wéi d'Nouvelle koum, datt dee beléifte Lëtzebuerger Acteur René Pütz am Alter vun nëmmen 62 Joer gestuerwen wier. Mam Pütze Ren huet d'Lëtzebuerger Theaterzeen deemools ee vu senge populäerste Vertrieder verluer, ee Schauspiller a Mënsch, deen an allen Ecke vum Land bekannt war. Sief et als Schnëssert an der Revue, sief et als een Deel vum Duo Püzafaba, sief et als Stëmm vum Juppi, hien huet et ëmmer nees fäerdeg bruecht grouss a kleng un d'Laachen ze bréngen. Bal 20 Joer huet de René Pütz a sengem Hausensembel, dem Lëtzebuerger Theater, zesumme mam Fons Kontz d'Fiedem op an hannert der Bün gezunn. Haut hätt de Pütze Ren, wéi hie genannt gouf, 80 Joer kritt, een Dag fir un hien ze denken. E Portrait vum René Pütz mam Jean Claude Majerus.