Am Kader vun Esch2022 hunn d'Fotografe Patrick Galbats an Nicolas Leblanc plus d'Autorin Aurélie Darbouret wärend gemeinsame Kënschtlerresidenzen am Minett wéi och am Pays Haut Val d'Alzette no konkrete Spueren an Tracë vum Wandel gesicht, se dokumentéiert a kënschtleresch iwwersat. D'Mënschen aus de fréieren Industrieregioune si jo am gaangen, sech eng nei Zukunft als Déngschtleeschtungsgesellschaften opzebauen. Tëschent dem 10. an dem 23. Februar kann een an der Escher Galerie Schlassgoart déi bildlech an textlech Resultater vum Kënschtlertrio gesinn an och lauschteren. De Patrick Galbats nennt se poetesch, och wa si allen dräi duerchaus eng journalistesch Vergaangenheet hunn.