Kompas Gemeente

Marius Malan het die reeks vir ons voortgesit en met ons gesels oor moenie net 'n skaap wees nie. Ons almal het stories oor hoe die laaste ses maande van ons lewe gelyk het. Die vraag wat ons gevra het is: het jy Jesus in hierdie tyd gesien. Het jy Sy waarheid oor jou lewe gespreek, of het die vyand se leuens die beste van jou gekry? Jesus het alreeds die oorwinning behaal, selfs in die Covid 19-seisoen, en daardie oorwinning is vir jou beskikbaar.

Marius Malan het die reeks vir ons voortgesit en met ons gesels oor skaap in wolfsklere. Deur ons lewens teenoor ander oop te maak, en in gemeenskap te leef kan baie keer morsig, of selfs gevaarlik wees. Nogtans moet ons ons roeping in 'n wolwe-wêreld deur opregtheid en waaksaamheid uitleef

Nou is die tyd vir gemeenskap. Gedurende die afgelope maande was mense baie afgesonder en ingeperk weens die wêreldwye pandemie. Dit het veroorsaak dat mense moedeloos en naderhand hopeloos begin voel het. Dit is hoekom ons beleef het dat die Here die nuwe reeks op ons harte gedruk het. Nou is dit tyd vir gemeenskap. Daar is werklik krag in Christelike gemeenskap en ons hoop dat elke persoon met hierdie reeks die waarde van gemeenskap sal beleef en hoe dit in die tyd wat voorlê moet lyk. Marius Malan het die reeks vir ons afgeskop en met ons gesels oor skaapskuiling. Ons as mense is geskep vir gemeenskap maar wat is die doel van dit? Kerk en Christelike Gemeenskap is soos 'n skaapskuiling en dit beskerm jou en ander en juis daarom moet ons seker maak ons is deel van dit.

Darius van der Schyf het die reeks vir ons afgesluit en met ons gesels oor: Om met 'n oop hand te leef. Wanneer ons vir die koninkryk
van God leef en daarin betrokke is, moet ons alles in ons lewe vir Hom beskikbaar
stel. God verdien elke gedeelte van ons lewe. Dalk vra jy: Maar wat is daar nog wat
ek moontlik kan gee? Om tot hierdie besef te kom moet ons onsself eerder afvra:
Maar wat het ek in my hand? God kan al my aardse besittings en goed gebruik om
wonderwerke te doen. Lewe jy met 'n oop hand?

Darius van der Schyf het die reeks vir ons voortgesit en met ons gesels oor: om deur die
Gees te leef. Wanneer ons vir die koninkryk van God leef, moet ons seker
maak die Heilige Gees is ons bron van krag. Wanneer ons uit die Gees tap
kan ons weet dit is 'n bron wat geen einde het nie, want God word nooit moeg
nie en hou nooit op nie.

Marius Malan het die reeks vir ons voortgesit en
met ons gesels oor: Wat is onder jou? Wanneer ons God in ons harte ontvang, kom
gee Hy aan elkeen van Sy kinders geestelike gawes wat gebruik moet word om Sy
koninkryk te bou en te bevoordeel. Daarom is dit so belangrik dat ons, ons gawes sal
ontdek en uitleef.

Die wêreld het 'n perspektief oor hoe sukses lyk en hoe jy die kruin van die lewe bereik. Wanneer dit egter by die koninkryk van God kom, lyk daardie prentjie anders, want as kinders van God leef ons vir die koninkryk en lyk dit vir die wêreld of ons eintlik af en nie op in die lewe beweeg nie. Ware sukses in die lewe lê nie in die wêreld se perspektief oor sukses nie, maar eerder daarin om vir die koninkryk van God te leef. Af is dus die nuwe op. Darius van der Schyf het die reeks vir ons afgeskop en met ons gesels oor: Watter rigting kies jy? Daar is twee tipe mense op aarde: die wat leef vir die tydelike wêreld en die wat leef vir die ewige koninkryk van God. God begeer dat ons, onsself sal beywer vir die koninkryk en die wil van God. Dit is waar ware sukses lê.

Wat kan ek glo oor of mense kan verander? Verandering is iets wat almal ongemaklik maak en nie altyd lekker is om te beleef nie. Die wêreld verander deurgaans, maar die groot vraag wat ons onsself moet afvra is: Is ek en jy besig om te verander om meer soos Jesus te wees? Is ons besig om te groei en vorentoe te beweeg met ons lewe, of het ons begin stagneer?

Wat kan ek glo oor of my verhouding met God gesond is? Ons, as Christene, kan so maklik vasgevang raak met godsdiens. God se hart is nie dat ons ons met godsdiens moet besig hou nie. Hy nooi ons uit om eerder in 'n persoonlike verhouding met Hom te leef.