Kompas Gemeente

Ons as gelowiges staan altyd die gevaar om in godsdiens te verval. Ons God nooi ons uit om aan tafel te kom sit, om in verhouding met Hom te leef. By die tafel besef ons ons is deel van God se familie en ons kan by Jesus leer. Sit jy aan Tafel saam Jesus?

In die wêreld daarbuite is daar baie hartseer, angs, stres, trauma en
teleurstellings. Elke persoon se situasie en omstandighede verskil, maar almal
beleef een of ander tyd nood in hulle lewe. As mens, gaan soek ons baie keer
hulp, raad en leiding by die wêreld en word baie keer net nog verder
teleurgestel. In Sondag se preek, verduidelik Marius Malan vir ons dat ons heel
eerstens ons gesig na God toe moet draai en ons toevlug by Sy tempel moet
gaan soek. Wat is jou reaksie in ‘n tyd van nood?

In hierdie reeks praat ons oor die konsep “Tempel”. Tempel in die sin van kerk, God en die gemeenskap van gelowiges.. Marius Malan gebruik die tema van “Toeskouer” in hierdie eerste preek van die reeks en verduidelik die drie tipes gelowiges wat ons in die kerk kry. Die vraag word gevra: Is jou verhouding met God, die kerk en gemeenskap, koud, warm of louwarm? Hoe handhaaf jy, jou verhouding met die kerk, God en die gemeenskap van gelowiges? Wat vra God van jou rakende betrokkenheid by die kerk, of kerk in die breë?

Waarnatoe het God jou al gestuur waar jy nie wil wees nie en wat was jou reaksie gewees? Was jy gehoorsaam of het jy dit geignoreer en wat was die resultate daarvan? Marius Malan het Sondag gepreek dat jy nie moet vaskyk teen dit wat jy nou sien nie en dat jy God moet vetrou dat Hy jou pad vir jou voorberei het en die uitkomste ken. Weet ook dat God se pad om by die plek uit te kom waar Hy wil hê jy moet wees baie beter is as wat jy ooit kan indink. Moenie vaskyk teen wat mense vir jou sê of doen nie, soek die waarheid by God. God stuur jou... God vra jou... God wys jou. Jy het die keuse hoe jy gaan reageer.

Jy leef dalk tans met dinge wat vir jou, jou geliefdes, jou naastes of vir jou verhouding met Jesus destruktief is. Jesus kom en gee jou vandag ‘n geleentheid om hierdie dinge na vore te bring. Wat lig Jesus vandag vir jou uit? Lê dit voor Sy voete neer en beleef hoe Hy jou kan genees.

Marius Malan het die reeks vir ons voortgesit en met ons gesels oor: Antwoorde wat ek nie verwag het nie. Jesus antwoord baie keer 'n vraag met 'n teenvraag. Dit kan soms frustrerend wees, maar die rede daarvoor is om groei by jou uit te lok, jou met 'n keuse te laat en jou geleentheid te bied om Hom te leer ken vir wie Hy is.

Het jy al gewonder hoe 'n gesprek met Jesus sou lyk? Waaroor julle sou gesels? Die vrae wat jy Hom dalk sou vra, die antwoorde wat Hy sou gee? In ons nuwe reeks, In gesprek met Jesus, kyk ons in die Skrif na 'n paar gesprekke wat Jesus met mense gehad het, die impak daarvan en hoe dit op jou en my van toepassing is. Marius Malan het die reeks vir ons afgeskop en met ons gesels oor 'n gesprek wat jy nie verwag het nie. Soms word ons onkant gevang soos in hierdie boodskap waar Jesus ‘n onverwagte gesprek met 'n vrou gehad het. Hierdie storie het vir ons baie geleer oor wanneer Jesus onverwags met ons gesels.

Marius Malan het die reeks vir voortgesit en met ons gesels oor: Monumente. Monumente word gewoonlik opgerig om ons te herinner aan die verlede, asook ons geskiedenis. Dit is ook belangrik dat ons vir ons geestelike monumente sal oprig. Dit help ons om te onthou wie God is, om te erken wie Hy in ons lewe is en om vir ons hoop te gee.

Tyd is so ‘n kosbare besitting maar terselfdertyd nie iets wat jy kan vashou nie. Dit gaan ook net so vinnig verby, veral met die lewenstempo waarteen ons deesdae lewe. Met tyd wat so vinnig verbygaan, is dit soms maklik om te vergeet. Ons vergeet baie keer van die verlede, ons vergeet wat God vir ons gedoen het, waardeur Hy ons al gedra het en die oorwinnings wat Hy vir ons behaal het. Met hierdie reeks wil ons onsself weer herinner en laat onthou, dat soos wat God ons in die verlede gedra het, Hy ons ook in die toekoms sal dra. Marius Malan het die reeks vir ons afgeskop en met ons gesels oor: Terug na die toekoms. Ons het gereflekteer op hoe goed God vir ons as gemeente was en dat ons nie ons fokus daarop moet verloor nie. Die twee Bybelstories help ons om onsself prakties te herinner dat God altyd vir ons sal voorsien en dat ons dit nooit moet vergeet nie.