Zanter 2006 vergëtt de Verband vun de Lëtzebuerger Bicherediteuren de Lëtzebuerger Buchpräis. Zanter zwee Joer gëllen nei Reegelen. Elo koum d'Longlist eraus an de Ian De Toffoli, President vun der Federatioun, informéiert am Gespréich mam Valerija Berdi iwwer den Oflaf vum Lëtzebuerger Buchpräis.

Eng éischter roueg Kinoswoch mat véier Filmer, an deene bal nëmmen exklusiv Fraen am Mëttelpunkt vun de Geschichte stinn. D'Martine Reuter mam Iwwerbléck.

Virun engem Joer huet de Luxembourg Learning Center um Campus Belval seng Dieren opgemaach. Eng Unibibliothéik, déi awer all Mënsch hir Servicer ubitt. Vu Bicher ausléinen, bis de ganzen Dag an dësem architektonesch aussergewéinleche Gebai Zeitunge liesen oder Recherche maachen - d'Offer ass grouss. Gëtt se och genotzt? D'Valerija Berdi huet mat der Directrice vum LLC, der Marie-Pierre Pausch iwwer dat éischt Joer geschwat.

De Bezéiungsdrama, mam Schauspillerduo Laia Costa a Josh O'Connor, ass den Debutfilm vun der britescher Realisatrice Harry Wootliff. De Michel Delage an den Tom Dockal haten an eiser Emissioun Grousse Kino iwwer dee Film geschwat.

De Weekend koum d'Nouvelle, dat den Easy Rider Peter Fonda am Alter vun 79 Joer gestuerwen ass. Grond genuch fir den Tom Dockal, fir e puer Wierder iwwer dee Mann ze verléieren, dee born to be wild war.

Zu Blackpool an England leeft zanter 23 Joer de Rebellion Festival. All Joer am August kommen d'Punks an d'Skins hei zesumme fir véier Deeg laang op Concerten ze goen. Véier Deeg Musek, 12 Stonnen de Dag, eng Erausfuerderung fir eng Zeen, déi an d'Jore komm ass. De Guy Helminger ass do och ronderëm gesprongen an huet eng Musekszeen erlieft, déi nawell al ginn ass, mee nach ëmmer Pogo danzt, wann déi grouss Idoler d'Bühn stiermen. Wien hätt geduecht, dat Punk esou harmonesch kann explodéieren.

"Remix Culture" ass de Motto vun de Projeten, déi Bierger, Veräiner, Gemengen an Institutioune fir Esch 2022 kënnen areechen. Am Februar gouf dësen Appel à projets vun de Responsabele publizéiert. Am Fong geholl war d'Clôture den 31. Juli, mee elo huet d'Equipe ronderëm d'Directrice Générale vun Esch 2022 decidéiert, dësen Delai ze verlängeren. Wisou dat geschitt ass, wéi et weidergeet, huet d'Nancy Braun der Valerija Berdi verroden. En Extrait vum Gespréich, dat den 19. August kuerz no zéng Auer gesent gëtt, kann een awer elo scho lauschteren.

Déi puer Deeg vum 15. bis den 18. August 1969 hu Museksgeschicht geschriwwen, et waren d'Deeg vum legendäre Woodstock-Festival. 500.000 Mënschen hate sech op enger Wiss vun engem Bauerenhaff zu Bethel am US-Bundestaat New York getraff fir mat musikalesche Gréisste wéi Jimi Hendrix, Janis Joplin, Joe Cocker, The Gratefull Dead, Canned Heat oder The Who eng gelleg Houmass fir Léift a Fridden a mat deem wat dozou gehéiert huet, ze zelebréieren. Bis haut gëllt dës Marihuana-geluede Manifestatioun als Héichpunkt vum Hippie-Mouvement, den Ausdrock vum Liewensgefill vun enger ganzer Generatioun. Detailer Jean Claude Majerus.

No e puer éischter méi more Woche kënnt elo nees e bëssche Beweegung an d'Kinosprogrammatioun. Ee vun de Kinoshighlighte vum Joer leeft un: "Once upon a time... in Hollywood" vum Quentin Tarantino ass zwar kee Film fir jiddwereen, mee fir all Cinephil e Must.

De Quentin Tarantino huet mat sengem néngte Film ee ganz perséinlechen Hommage un den Hollywood vun 1969 realiséiert. De Michel Delage war e kucken.