Lestin

Lestin

Download on the App Store

All Lestin episodes

  • Lydia Tár, Fókus sigra Músíktilraunir, 100gecs
    Sigurhljómsveit Músíktilrauna í ár kemur frá Hornafirði og Selfossi. Hljómsveitin Fókus var stofnuð síðasta haust og er skipuð Hornfirðingunum Amylee Trindade, Alexöndru Hernandez, Önnu Láru Grétarsdóttur, Pia Wrede, skiptinema frá Þýskalandi og Selfyssingnum Arnbjörg Ýr Sigurðardóttir. Til að hljómsveitin geti æft þurfa þær iðulega að taka langar strætóferðir, 6-7 klukkustundalangar, til að komast á milli Selfoss og Hafnar.
    Kvikmyndin Tár hefur vakið töluverða athygli, enda viðfangsefni myndarinnar mikið til umræðu í samfélaginu eftir vitundarvakninguna #MeToo. Hljómsveitarstjóri sinfóníuhljómsveitar, Lydia Tár, verður uppvís að kynferðisofbeldi, misnotar valdastöðu sína og brýtur á ungum og efnilegum tónlistarkonum. Höfundur og leikstjóri myndarinnar er Todd Field og aðalleikonan, Cate Blanchett, er sannfærandi Maestra. Við ræðum kvikmyndina og hliðstæður hennar í klassíska tónlistarheiminum við manneskjur sem þekkja til, tónlistarkonurnar Unu Sveinbjarnardóttur og Þórdísi Gerði Jónsdóttur.
    Bandaríski dúettinn 100gecs hefur vakið athygli undanfarin ár fyrir brjálæðislega blöndu sína af fjölmörgum ólíkum tónlistarstefnum í yfirgengilegan hyper-pop hrærigraut. Fyrsta platan þeirra hét 1000 gecs og nýja platan bætir við enn öðru núlli, tíu þúsund gecs. Davíð Roach segir frá tíu þúsund gecs.
    57 min
  • Vídjóleigan kvödd
    Lestin í dag er tileinkuð vídjóleigum. Nú um mánaðarmót lokar Aðalvídjóleigan á Klapparstíg og þar með lýkur 45 ára sögu vídjóleigunnar á Íslandi. Við heyrum í fastagestum, eigendum og fyrrum starfsfólki vídjóleiga í tilraun til þess að kortleggja söguna og heiðra minningu vídjóleigunnar, sem var í senn menningarstofnun, félagsmiðstöð og kvikmyndaskóli.
    55 min
  • Vinsældir skáks, Eþíópsk píanó-nunna, sérstæðan
    Reykjavíkurskákmótið hófst í Hörpu í dag klukkan þrjú. Við veltum fyrir okkur vinsældum skáks og ræðum við ungan stórmeistara í skák. Vignir Vatnar Stefánsson er 16. stórmeistari Íslands í skák, og er þar með kominn á launaskrá hjá ríkinu, nýorðinn tvítugur.
    Eþíópíska nunnan Emahoy Tsegué-Maryam Guèbrou var orðin 99 ára gömul þegar hún lést á dögunum. Hún var menntuð í klassískri tónlist en snerist svo til trúar seinna á ævinni. Við kynnum okkur líf þessarar áhugaverðu konu.
    Haukur Már Helgason er nýr pistlahöfundur í Lestinni. Hann mun koma til með að fjalla um tækniþróun, ekki endilega tækniframfarir. Fyrsti pistill Hauks fjallar um sérstæðuna og lögmál Moore's.
    55 min
  • Fullorðinsballett, bullandi spjallmenni, nýtt frá Fever Ray
    Við pælum í ástæðum þess að gervigreindar spjallmenni á borð við ChatGPT skálda nýjar staðreyndir ef þær vita ekki þær réttu. Við ræðum við Stefán Ólafsson, lektor í HR, um bullandi spjallmenni.
    Davíð Roach Gunnarsson fjallar um nýjustu plötuna frá sænska tónlistarkvárnum Fever Ray, Radical Romantics.
    Í gær var dagur listdansskólanna, og fyrrum og núverandi dansnemendur minntu á mikilvægi þess að á Íslandi væri metnaðarfull danskennsla. Í byrjun mars tilkynnti Listdansskóli Íslands að öllu starfsfólki skólans hefði verið sagt upp og framtíð skólans í óvissu. Við ætlum í tíma í fullorðinsballett og ræða ballett og allt það góða og slæma sem honum fylgir við fyrrum og núverandi dansnemendur.
    55 min
  • Missögn á ferilskrá Eddu Falak, Lana Del Rey, barnaheimili í Naíróbí
    Við sökkvum okkur ofan í sagnaheim bandarísku tónlistarkonunnar Lönu Del Rey en nú fyrir helgi kom út níunda breiðskífa hennar, sem ber hinn langa titil Did you know there is a tunnel under ocean blvd. Karítas Mörtu Bjarkadóttir forpantaði plötuna og hefur legið yfir þessari nýjustu plötu Lönu.
    Kristlín Dís er á ferðalagi í Kenýa þessa dagana. Hún leit inn á barnaheimili í Nairobi og ræddi við forstöðukonuna, rúmlega þrítuga íslenska konu, Önnu Þóru Baldursdóttur.
    Anna Marsibil Clausen fyrrum lestarstjóri hefur áður fjallað um svokallaða persónulega fjölmiðlun í hlaðvörpum hér í þættinum, til að mynda þegar Sölvi Tryggvason brást við ásökunum um ofbeldi með því að taka viðtal við sjálfan sig í hlaðvarpsþætti sínum. Anna Marsý flytur okkur pistil um nýjustu vendingar í máli Eddu Falak. Anna Marsý talar um hvernig hin persónulega fjölmiðlun Eddu - þar sem persóna hennar er vörumerkið - gerir óskaddaðan trúverðugleika hennar enn mikilvægari.
    1 hr
  • Opnun, Stockfish, Volaða land, Ylfa Þöll growl-ar
    Systurnar Magga og Ragga setjast um borð í Lestina og segja frá væntanlegum sjónvarpsþáttum um íslenska samtímalist, sem verða sýndir í Ríkisjónvarpinu. Þættirnir heita Opnun og er önnur þáttarröð, sú fyrsta fór í loftið árið 2017, með öðrum þáttastjórnendum. Að þessu sinni eru það systurnar sem hafa umsjón með Opnun en þær hafa haldið úti veftímaritinu Hús og Hillbilly um nokkura ára skeið. Hús og Hillbilly hefur tekið á sig margar ólíkar myndir, sem veftímarit, hlaðvarp og blaðadálkur hjá Heimildinni. Stefna systranna er að fjalla um íslenska samtímalist útfrá sjónarhorni sveitalubbans, þ.e.a.s. á alþýðlegan hátt, þess vegna nafnið: Hús og Hillbilly.
    Kolbeinn Rastrick fór í bíó á Volaða land, nýja íslenska/danska kvikmynd í leikstjórn Hlyns Pálmasonar, hann rýnir í verkið. Og það er meira bíó í Lestinni, við stökkvum niður í Bíó Paradís og ræðum við Ragnar Bragason um Stockfish kvikmyndahátíð sem hefst í dag.
    Ein af þeim sem var tilnefnd sem besti söngvari á íslensku tónlistarverðlaununum var Ylfa Þöll Ólafsdóttir, söngkona harðkjarnapönksveitarinnar Dead Herring. Við ræðum við Ylfu um growl, rymjandi öskur og þungarokkssöng.
    55 min
  • Tónlistarsamstarf á tímum tiktok, áhrif Kiljunnar, Eistnaflugi aflýst
    Þær fréttir bárust í dag að tónlistarhátíðinni Eistnaflug verður aflýst í ár, sorgarfréttir fyrir þungarokkssamfélagið á Íslandi. Í tilkynningu sem birtist á facebook síðu hátíðarinnar í dag segir ?Þó að faraldrinum sé lokið, þá hefur COVID ennþá áhrif á framtíð okkar. Við reyndum allt sem við gátum en það dugði ekki til því miður. Ástæðurnar er nokkrar og flestar bein eða óbein afleiðing af COVID.?
    Við ræðum Svan Má Snorrason, sem að hefur velt fyrir sér sjónvarpsþættinum Kiljan og áhrifum hans á íslenskt bókmenntalíf. Svanur skrifaði um þessi áhrif í lokaritgerð sinni í bókmenntafræði sem hann kynnti á hugvísindaþingi fyrr í mánuðinum.
    Við heyrum um samstarf tónlistarfólks sem varð til á mjög nútímalegan hátt. Jóhannes Ólafsson ræðir við Ellu McRobb og Ólaf Arnalds um samstarf sem varð til á Tiktok og skilaði sér í nýju lagi sem við heimsfrumflytjum í dag.
    55 min
  • Volaða land Hlyns Pálmasonar
    Lestarþáttur dagsins í dag verður helgaður kvikmyndinni Volaða land. Við ræðum við leikstjóra og handritshöfund myndarinnar, Hlyn Pálmason.
    Myndin er nú í kvikmyndahúsum hér landi næstum ári eftir að hún var frumsýnd á Cannes í maí í fyrra. Myndin sem öll er tekin upp á filmu segir sögu danska prestsins Lúkasar, sem fer í háskaför um hálendið undir lok 19. aldar. Ætlun hans er að reisa kirkju og mynda íbúa og náttúru Íslands. Það er hægt að lesa ýmislegt í myndina um samband nýlenduherra og hjálendu, manns og náttúru, um valdið sem felst í ljósmyndatækninni, því hvernig við horfum og skrásetjum. Við ræðum við Hlyn um allt þetta og meira í þætti dagsins.
    54 min
  • ChatGPT talar íslensku, ástin í Last of Us, lygar um Pompidou
    Uppvakningaþættirnir Last of Us hafa notið mikilla vinsælda undanfarna mánuði, þættir sem byggja á samnefndum tölvuleik sem gerist 20 árum eftir heimsslit verða vegna óhugnalegrar farsóttar sem breytir fólki í blóðþyrsta zombía. Jóhannes Ólafsson ræðir við Hildi Knútsdóttur, rithöfund, og Baldvin Albertsson, hjá Vitar games um ástina í Last of Us.
    Kristlín Dís Ingilínardóttir er stödd á ferðalagi og hún sendi okkur pistil frá gömlu heimaborg sinni, París. Hún segir okkur frá kynnum sínum af Pompidou safninu.
    Mun gervigreind bjarga íslenskunni? Í Grósku í dag fór fram kynningarfundurinn 'Framtíðin svarar á íslensku'. Lestin kíkti á svæðið og ræddi við Jóhönnu Vigdísi Guðmundsdóttur, framkvæmdarstjóra Almannaróms og Angelu Jiang, vörustjóra hjá OpenAi. Við fáum að heyra hvernig það kom til að íslenska varð annað tungumálið sem spjallmennið ChatGPT lærði, á eftir ensku.
    55 min
  • Upphafning á hinu siðspillta - White Lotus/Succession/Exit
    Lestin í dag verður tileinkuð hinum ofurríku, eina prósentinu, sem ferðast um á einkaþotum og snekkjum, borða á flottustu Michelin-veitingastöðunum, drekka fínustu vínin, eru rannsökuð af efnahagsbrotadeildum lögreglunnar? en komast alltaf undan. Við ætlum að skoða þrjá vinsæla og verðlaunaða sjónvarpsþætti sem eiga það allir sameiginlegt að fjalla um ævintýralega ríkt fólk, þættina White Lotus, um morð á lúxus-hóteli, Succession sem fjalla um fjölskyldu sem stýrir fjölmiðlaveldinu Waystar Royco og norsku þættina Exit, sem eru byggðir á frásögnum norskra manna úr fjármálalífinu.
    57 min