rið 1969 kynnti blaðamaðurinn Hunter S. Thompson framboð sitt til bæjarfógeta í Aspen, Colorado undir yfirskriftinni Viðundursaflið - Freak Power. Ætlun framboðsins var að hrista upp í stjórnmálaumhverfi borgarinnar og snúa öllu á hvolf. Fjallað verður um þennan undarlega pólitíska gjörning í Lestinni í dag. Á laugardag, 18. maí, voru fjörutíu ár frá útkomu hljómplötunnar Lodger með breska tónlistarmanninum David Bowie. Platan var sú þriðja í Berlínar-trílógíunni svokölluðu og á henni blandar Bowie saman áhrifum frá ólíkum heimshornum. Platan þótt á sínum tíma ekki eins góð og næstu tvær plötur Bowie's á undan, meistaraverkin Low og Heroes, en hefur í seinni tíð notið sannmælis. Í Lestinni í dag verður fjallað um Lodger, gestur þáttarins verður Sindri Freysson rithöfundur. Og Halldór Armand Ásgeirsson rithöfundur flytur pistil í Lestinni á þriðjudegi og fjallar í dag um það sem gerist þegar umheimurinn er ekki til.

Hljómsveitin The National hefur verið ein af athyglisverðustu rokkhljómsveitum síðustu 20 ára eða svo. Sveitin hefur sent frá sér átta plötur og fjórar þeirra voru á lista sem breska tónlistartímaritið NME birti yfir 500 bestu plötur sögunnar. Sú nýjasta í röðinni, I Am Easy to Find, kom út nú fyrir helgi og þykir af mörgum sú metnaðarfyllsta og tilraunakenndasta hingað til. Rætt verður um nýju plötuna við Margréti Helgu Erlingsdóttur, bókmenntafræðing og blaðamann Vísis, og Atla Fannar Bjarkason, fjölmiðlamann og fréttaskýranda í Vikunni með Gísla Marteini. Söngvakeppni evrópskra sjónvarsstöðva fór fram eins og allir vita í Tel Aviv í Ísrael um helgina. Í Lestinni í dag verður fjallað um frammistöðu Hatara og sitthvað fleira sem tengist þátttöku þeirra í keppninni, gestir þáttarins verða þeir Sölvi Blöndal tónlistarmaður, útgefandi og hagfræðingur og Jónatan Garðarsson, sem þekkir keppnina og sögu hennar betur en flestir aðrir. Og sænsku þættirnir Quicksand fjalla á óvæginn hátt um málefni eins og byssuofbeldi, stéttskiptingu og málefni innflytjenda en eru á sama tíma spennandi réttardrama sem heldur áhorfendum við efnið. Áslaug Torfadóttir fjallar um þættina í Lestinni í dag.

Afleggjarinn er færanleg vinnustofa, heimili og sýningarrými myndlistarmannsins Viktors Péturs Hannessonar. Listamaðurinn leggur brátt í ferðalag um landið á umræddum húsbíl, en í honum hyggst hann vinna grasagrafík, þ.e.a.s. listaverk úr íslenskri flóru. Viktor tekur sér far með Lestinni í dag. Í pistli sínum í dag rifjar Tómas Ævar Ólafsson upp vinsælt græjuæði sem gekk yfir heiminn í byrjun aldar. Á markað kom svokallað kviðbelti sem sendi rafstuð í magann og gerði notanda kleift að byggja upp vöðvamassa án þess að fara í líkamsrækt og erfiða. The Wild Pear Tree er nýjasta kvikmynd tyrkneska leikstjórans Nuri Bilge Ceylan. Kvikmyndin fjallar um ungan mann, Sinan, sem snýr aftur til heimabæjar síns eftir háskólanám en hann elur með sér draum um að verða rithöfundur. The Wild Pear Tree er húmorísk og draumkennd kvikmynd sem dansar sérkennilegan dans á mærum töfraraunsæis og sósíalrealisma og má lýsa sem bókmenntalegri kvikmynd. Marta Sigríður Pétursdóttir segir frá í Lestinni í dag. Og Davíð Roach Gunnarsson rýnir í framgöngu Hatara í Tel Aviv.

Tilhugalífið hefur breyst töluvert á síðustu árum en stefnumótasmáforritið Tinder spilar stóran þátt í þeirri þróun. Fyrirbærið verður skoðað nánar í þættinum í dag. Heimildarmaður Lestarinnar verður Fanney Svansdóttir en hún skrifaði nýverið meistararitgerð í menningarfræði um framsetningu sjálfsins á Tinder. Atli Bollason fjallar í dag að gefnu tilefni um Hatara og Söngvakeppni evrópskra sjónvarpsstöðva og hugað verður að nýrri kvikmynd. Sagt verður frá athyglisverðri tónlistarhátíð sem haldin verður á Borðeyri við Hrútafjörð, af öllum stöðum, í sumar. Hátíðin nefnist HÁTÍÐNI og það er listasamlagið og útgáfufélagið POST - DREIFING sem stendur að henni, þar koma fram fjölmargar hljómsveitir og tónlistarmenn sem eru að hasla sér völl á íslensku tónlistarsenunni um þessar mundir. Gestur þáttarins verður Bjarni Daníel Þorvaldsson tónlistarmaður og einn af forsprökkum POST - DREIFINGAR, og raunar meðlimur í einni af skemmtilegustu hljómsveit landsins um þessar mundir.

Og Karl Ólafur Hallbjörnsson fjallar í pistli sínum í dag um vitundarvakningu og loftslagsbreytingar.

Í Lestinni í dag er meðal annars fjallað um Cornucopia-tónleikaröð Bjarkar Guðmundsdóttur sem nú stendur yfir í menningarmiðstöðinni The Shed í New York. Hér er á ferðinni mikið sjónarspil sem vakið hefur mikla athygli, sjálf hefur Björk kallað viðburðinn stafrænt leikhús. Fyrstu tónleikarnir fóru fram fyrir viku en þeir síðustu verða 1. júní. Útsendari Lestarinnar, Freyr Eyjólfsson, var í The Shed á mánudagskvöld, og gefur skýrslu í Lestinni í dag. Í þriðju útgáfa veftímaritsins Flóru er að finna 11 greinar, um brennandi og áleitin málefni, allt frá höfuðklútanotkun yfir í núvitund á tímum loftslagsröskunnar. Er hægt að aðskilja list frá listamanni? heitir ein grein útgáfunnar. Þar skrifar Steinunn Ólína Hafliðadóttir um mörk listaverka og listamanna og veltir því fyrir sér hvort hægt sé að njóta listar án tenginga við bakgrunn og athafnir listamannsins sjálfs. Rætt verður við Steinunni í Lestinni í dag. Og Halldór Armand Ásgeirsson rithöfundur flytur pistil í Lestinni á þriðjudegi og fjallar um like-takkann.

Hnallþóran er yfirskrift sýningar sem nýlega var opnuð í galleríinu Midpunkt í Kópavogi. Þar vinna þær Sigurrós Guðbjörg Björnsdóttir og Berglind Erna Tryggvadóttir með hina íslensku hnallþóru, sem stundum er kölluð stríðsterta, sem listhlut og reyna að finna henni nýtt hlutverk í síbreytilegu landslagi íslenskrar matarmenningar. Lestin heimsækir Midpunkt í dag og rætt verður við Sigurrós um hina sjónrænu þjóðargersemi, hnallþóruna, í þætti dagsins. Fjörutíu ár verða í júní líðin síðan platan Unknown Pleasures, Óþekktar nautnir, með hljómsveitinni Joy Division kom út. Ian Curtis og félagar áttu aðeins örfá starfsár en náðu þó að hafa mikil áhrif á síðpönkið í Bretlandi og líklega um heim allan. Rýnt verður í merkilega plötu með merkilegri hljómsveit í Lestinni í dag. Rapparinn Mælginn er einn sá gamalreyndasti í reykvísku senunni en hann hefur gefið út tónlist seinustu 17 árin. Hann hefur vakið verðskuldaða athygli í borginni seinustu ár eftir að hafa stigið oft á stokk með hljómsveit sinni Mælginn Big Band. Þórður Ingi Jónsson ræðir í þættinum í dag við Mælginn um rappið, feril hans og hvernig upplifun það var að brjóta ísinn fyrir rappsenuna í Reykjavík, áður en hún varð “kúl“, innan gæsalappa, eitursvöl. Og Áslaug Torfadóttir fjallar í dag um bandarísku sjónvarpsþættina I Am the Night sem veita skemmtilega innsýn í neonlitað lífið í Los Angeles í Bandaríkjunum á sjöunda áratugnum, þótt farið sé ansi frjálslega með fullyrðinguna ,,byggt á sannri sögu."

Síðasta föstudag kom út fjórða breiðskífu bandarísku indísveitarinnar Vampire Weekend, Father of the Bride, sem er jafnframt þeirra fyrsta í sex ár. Platan er leitandi, bæði inn á við í sálarlíf söngvarans Ezra Koenig, en líka út á við í tónlist annarra heimsálfa, og er með allra bestu plötum sem komið hafa út í ár. Davíð Roach Gunnarsson hellir sér ofan hyldjúpan hljóðheim Föðurs Brúðarinnar í Lestinni í dag. Met Gala, viðburðurinn sem er gjarnan kallaður Óskar tískuheimsins, átti sér stað síðasta mánudag. Þemað var að þessu sinni Camp. Í þættinum í dag verður fjallað um viðburðinn og að gefnu tilefni rifjuð upp ritgerð bandarísku fræðikonunnar Susan Sontag um költ hugtakið Camp. Og á dögunum var tilkynnt að ein áhrifamesta raftónlistar-hljómsveit í heimi, þýska hljómsveitin Tangerine Dream, myndi halda tónleika í Gamla-bíói í september. Hljómsveitin var stofnuð árið 1967, hefur sent frá sér ríflega hundrað hljómplötur, samið tónlist við fjölda kvikmynda og tölvuleikja og sjö sinnum verið tilnefnd til Grammy-verðlauna. Fjallað verður um Tangerine Dream í Lestinni í dag, gestir þáttarins verða Ingvar Víkingsson grafískur hönnuður og Árni Matthíasson blaðamaður.

Connie Converse er bandarísk tónlistarkoma sem samdi hugljúfa, háðslega og afar persónulega tónlist fyrir miðbik síðustu aldar. Tónlist hennar leit þó ekki dagsins ljós fyrr en rúmum fimmtíu árum eftir upptökur. Er áhugi óx á lífi hennar og list kom í ljós að tónlistarkonan hafi látið sig hverfa árið 1974. Ekkert hefur til hennar spurst síðan. Við skoðum málið nánar hér í þætti dagsins. Eurovision á Þjóðminjasafninu, hvernig hljómar það ágætu hlustendur? Það er ekki fjarstæða heldur staðreynd, Þjóðminjasafnið kemur víða við, það safnar ekki aðeins gömlum munum, heldur líka siðum og hefðum, og horfir í þeim efnum til samtímans. Þjóðminjasafn Íslands leitar nú eftir aðstoð almennings við að safna upplýsingum um Eurovision hefðir. Ágúst Ó. Georgsson sérfræðingur þjóðháttasafns Þjóðminjasafnsins segir frá í Lestinni í dag.

Marta Sigríður Pétursdóttir fjallar í dag um bandrísku ofurhetjumyndina Avengers: Endgame eftir Anthony Russo og Joe Russo sem slegið hefur rækilega í gegn, en um er að ræða eina dýrustu kvikmynd sem nokkurn tímann hefur verið gerð. Og þýski heimspekingurinn Friedrich Nietzsche og kenning hans um eilífa endurtekningu hins sama er viðfangsefni Karls Ólafs Hallbjörnssonar í pistli dagsins.

Ingibjörg Þorbergs, tónskáld, söngkona og fyrrverandi dagskrárstjóri Ríkisútvarpsins andaðist í gær, hún var 91s árs að aldri, fædd í Reykjavík 25. október árið 1927. Ingibjörg var brautryðjandi í laga- og textasmíðum og var til dæmis fyrst allra íslenskra kvenna til að syngja eigið lag inn á hljómplötu. Ferill hennar var langur og glæsilegur og framlag hennar til íslensks tónlistarlífs verður seint ofmetið. Lestin minnist Ingibjargar í dag, gestir þáttarins verður tónlistarfólkið Sigríður Thorlacius og Bubbi Morthens. Samkvæmt dýratónvísindum eru það ekki aðeins manneskjur sem framleiða tónlist. Hvalir, fílar, apar, fuglar og skordýr eru líka fær um að senda frá sér margslungin tónverk. Í pistli sínum í dag veltir Tómas Ævar Ólafsson fyrir sér tónlist dýra og hinum hugmyndafræðilega múr sem sagður er liggja á milli manns og náttúru. Og Halldór Armand Ásgeirsson rithöfundur flytur að venju pistil í Lestinni á þriðjudegi, og verður á persónulegu nótunum, yfirskrift Halldórs í dag: Leyfðu því að gerast!

Tvær sólir í heimi nördamenningar röðuðust upp um helgina þegar Alþjóðlegi Stjörnustríðsdagurinn og ókeypis myndasögudagurinn lentu á sömu dagsetningunni, 4. maí. Í ofanálag höfðu þær sorgarfréttir borist úr Stjörnustríðsheiminum að einn úr upprunalegu leikarateyminu, Peter Mayhew, hefði fallið frá 74 ára gamall. Það var við því að búast að mikið yrði um að vera í verslunum Nexus og sú var raunin, Lestin kom þar við og hlustendur heyra meira af þeirri heimsókn í þætti dagsins.

Á föstudag kom út nýja plata með bandarísku hljómsveitinni Vampire Weekend, sem stofnuð var í New york árið 2006. Platan nefnist Father of the Bride, um er að ræða fjórðu plötu sveitarinnar, og hefur hún hlotið lofsamlega dóma. Breska kvikmyndin Babylon, eftir ítalska leikstjórann Franco Rosso er oft kölluð besta reggí-mynd allra tíma en myndin, sem frumsýnd var árið 1980, fjallar á félagslega raunsæjan hátt um líf innflytjenda frá Jamæka í Lundúnum á Thatcher-tímabilinu og tónlistarkúltúrinn sem þessir innflytjendur fluttu með sér. Myndin er nú loksins sýnd í bíó í Bandaríkjunum, tæpum 40 árum eftir að hún kom fyrst út en Babylon var á sínum tíma afar umdeild. Þórður Ingi Jónsson segir frá í þættinum í dag. Við hugum líka að tónleikum sem fram fara í New York í kvöld, mjög athyglisverðum, þetta er upphaf tónleikaraðar sem stendur yfir næstu fjórar vikurnar eða svo. Fara fram í splúnkunýrri menningarmiðstöð á Manhattan, miðstöð sem opnuð var fyrir mánuði eða svo.

Og gamanþættir um líf og störf múslima eru ekki á hverju strái en nýju, bandarísku sjónvarpsþættirnir Ramy benda til að hér sé um auðugan garð að gresja. Áslaug Torfadóttir fjallar um þættina í Lestinni í dag.