Manneskjan býr yfir þeim eiginleika að geta ímyndað og séð fyrir sér allt það sem mögulega gæti gerst í framtíðinni, hún getur skapað mögulegar framtíðir. Á undanförnum árum hafa slíkar framtíðarpælingar verið áberandi í skáldskap og poppmenningu. Oftar en ekki er það svartsýnin sem ræður för og sá framtíðarheimur sem við sjáum fyrir okkur er ógnvekjandi og hryllilegur. Slík dystópísk framtíðarsýn einkennir meðal annars tvær nýjar seríur sjónvarpsþáttanna Black Mirror og Handmaid's Tale sem komu út í byrjun júní. Í Lestinni í dag veltum við því fyrir okkur af hverju við erum sérstaklega móttækileg fyrir dystópíum í dag með Eyju Margréti Brynjarsdóttur, heimspekingi.

Í kvöld mætast FH og Dusty í úrslitum Lenovo deildarinnar í tölvuleiknum League of Legends. Lið FH er raunar eiginlega nýtt af nálinni en það hét áður Frozty og var sjálfstætt starfandi. Ákvörðun FH að taka svokallaðar rafíþróttir upp á arma sína er umdeild enda er hreinlega umdeilt hvort tölvuleikir geti eða eigi að taljast sem íþróttir yfirhöfuð. Hallsteinn Arnarsson verkefnastjóri hjá FH eSports segir nálgun félagsins á fyrirbærið þó eiga augljósa rót í íþróttum. Rætt verður við Hallstein og Counterstrike leikmanninn Gísla Geir Gíslason í Lestinni í dag.

Í pistli sínum í dag fjallar Karl Ólafur Hallbjörnsson um minnið og lægstu mörk vitundarinnar.

Black Eyed Peas, Robert Plant, Pusha T og Patti Smith voru meðal þeirra sem komu fram á Secret Solstice tónlistarhátíðinni sem fór fram í Laugardalnum um helgina. Davíð Roach Gunnarsson var útsendari Lestarinnar á hátíðinni og flytur pistil um upplifun sína.

Við kynnum okkur hina vaxandi grein kvikmyndaferðamennsku á Íslandi, en á undanförnum árum hafa æ fleiri kvikmyndir og sjónvarpsþættir notast við íslenska náttúru sem sviðsmynd. Rætt verður við Lindu Katrínu Elvarsdóttur sem skrifað hefur lokaritgerð í ferðamálafræði um markaðssetningu, væntingar og upplifun ferðamanna í kvikmyndaferðamennsku á Íslandi.

Þann 14. júní síðastliðinn gaf breska skáldið og tónlistarkonan Kate Tempest frá sér plötuna The Book of Traps and Lessons. Tómas Ævar Ólafsson hlustaði á plötuna og segir frá henni í Lestinni í dag.

Halldór Armand Ásgeirsson flytur okkur pistil um rándýran náttslopp sem varpar ljósi á hina duldu gæsku hversdagsins.

Umsjón: KG og AMC

Við leitum uppi ferðadagbækur sem komið hefur verið fyrir á bekkjum í almenningsrýminu í Reykjavík

Önnur plata svartmálmsrokksveitarinnar Misþyrmingar, Algleymi kom út í lok maí. Misþyrming hefur á undanförnum árum orðið ein þekktasta íslenska þungarokksveitin á hinum alþjóðlega vettvangi. Þetta er svartmálmur, blakkmetall, eins og hann gerist bestur. Hávær og harður, ómstrýður og groddalegur. En líka á köflum melódískur. Platan hefur hlotið góðar viðtökur og komst meðal annars á Billboard-metsölulistann í Bandaríkjunum yfir mest seldu erlendu plöturnar í byrjun júní. Við ræðum við forsprakka sveitarinnar í Lestinni í dag.

Djöflar og englar koma svo við sögu í sjónvarpspistli dagsins. En Áslaug Torfadóttir fjallar um sjónvarpsþættina Good Omen, en nýlega var gerð sjónvarpsþáttaröð byggð á samnefndri bók, guðfræðilegri grínfantasíu, eftir þá Terry Pratchett og Neil Gaiman.

Fyrr í vikunni tilkynnti tæknirisinn Facebook að hann stefndi á útgáfu sinnar eigin rafmyntar á næsta ári. Libra nefnist þetta sýndarfé sem stofnandi Facebook Mark Zuckerberg segir að muni að valdefla almenning um allan heim. Um leið hafa komið fram háværar gagnrýnisraddir sem vara við þessar tilraun Facebook. Við ræðum við Gísla Kristjánsson, einn stofnanda rafeyrisfyrirtækisins Monerium, um sýndarfé og Libra.

Í gær komst fjallakrot í fréttir þar sem óprúttnir aðilar hafa krassað nöfn sín í Helgafell. Þykja þeir hafa unnið mikil umhverfisspjöll en verst þykir sumum að í kringum nöfnin má einnig finna fallíska fjöld typpamynda. Reðurtáknin eru víða og í Reykjavík er auðvitað heilt safn tileinkað typpum. En afhverju finnur fólk þessa þörf á að teikna þau? Lestin gáir til reðurs í dag.

Davíð Roach Gunnarsson segir frá tónleikum Bonobo og Kiasmos sem fóru fram í Iðnó á dögunum.

Áslaug Torfadóttir rýnir í sjónvarpsþættina Chernobyl, sem eru byggðir á frásögnum frá kjarnorkuslysinu í Tjernobyl í Úkraínu árið 1986.

Umsjón: KG og AMC

Við greiðum fyrir góða veðrið með blóði okkar. Lúsmýið ætlar að éta Íslendinga lifandi og því seljast flugnafælur, ofnæmispillur og sterakrem eins og heitar lummur víða um land, seljast jafnvel upp. Bitum flugnanna fylgir nefnilega kláði, óbærilegur, sársaukafullur kláði og hann er í ofanálag smitandi. Við fjöllum um félagslegan og líkamlegan kláða í lestinni í dag.

Karl Ólafur Hallbjörnsson fjallar um framtíð skáldskaparins, vísindi og fantasíu, í pistli sínum í dag.

Djúpvefurinn er sá hluti veraldarvefsins sem er óaðgengilegur almennum leitarvélum.

Þórður Ingi Jónsson hefur sökkt sér ofan í djúpvefinn að undanförnu. Í pistli sínum í dag heyrir hann í kerfisfræðingi og nafnlausum viðmælanda sem þekkir til verslunar með vímuefni á dökkvefnum - þeim hluta djúpvefsins sem falinn er almenningi.

Við beinum sjónum okkar að kynlífsatriðum í bíómyndum og skoðum nýlega grein eftir kvikmyndagagnrýnanda Washington Post þar sem hann spyr hvort kynlífssenur séu á undanhaldi í Hollywood.

Umsjón: Kristján Guðjónsson og Anna Marsibil Clausen

Í nýjum hlaðvarpsþáttum fjallar þýski blaðamaðurinn Phil Uwe Widiger um íslensku grasrótarsenuna í Reykjavík, og þá sérstaklega þann kima hennar sem byggir á svokallaðri D.I.Y. lífsspeki, gerðu-það-sjálfur. Phil tekur sér far með Lestinni og segir frá kortlagningu sinni á reykvísku jaðarrokksenunni.

Daria Andrews er hálf-íslensk, hálf-bandarísk, hálf svört, hálf hvít og talar hálffullkomna íslensku. Hún býr í limbó - tilheyrir aldrei fullkomlega, er aldrei alveg nóg.

Margir Íslendingar af blönduðum uppruna þekkja þá tilfinningu vel. Hún sprettur af öráreiti, hegðun eða athugasemdum sem oft eru settar fram í hugsunarleysi, fremur en illum hug gagnvart fólki sem sker sig úr meginstraumnum. Aftast í hugum flestra er nefnilega enn samnefnari milli þess að vera Íslendingur og að vera hvítur.

Daria skrifaði um þessa upplifun, að heyra hvergi til, í lokaverkefni sínu frá Stokkhólmsháskóla. Hún segir sögur úr limbóinu í Lestinni í dag.

Árið 1975 átti að rigna eldi og brennisteini yfir heimsbyggðina, hafið átti að breytast í blóð og að loks átti myrkrið gleypa jörðina - en hér erum við enn. Í pistli sínum í dag skoðar Tómas Ævar Ólafsson gamla heimsendaspá ónefnds trúfélags og veltir fyrir sér hvort heimsendir hafi í raun átt sér stað árið 1975.

Í pistli sínum í dag fjallar Halldór Armand Ásgeirsson um listina að hafa gaman.

Umsjón: Kristján Guðjónsson og Anna Marsibil Clausen.

Í síðustu viku fjallaði Lestin um baráttu raunveruleikastjörnunnar Kim Kardashian í þágu fanga í Bandaríkjunum. Tilefnið var heimsókn hennar á dauðadeild Kaliforníu en í kjölfar hennar lýsti hún því yfir að hún teldi fangan sem hún heimsótti saklausan. En er hann það? Í dag, kafar lestin í sönnunargögnin með og á móti Kevin Cooper.

Davíð Roach Gunnarsson segir frá Primavera Sound tónlistarhátíðinni sem fór fram í Barcelona um síðustu helgi.

Marta Sigríður Pétursdóttir kvikmyndagagnrýni segir frá myndunum Beautiful Boy og Rocket Man.

Við hringjum norður til Hjalteyrar og fræðumst um nýja sýningu á kvikmyndum og myndbandsverkum í Verksmiðjunni þar í bæ. Sýning sem nefnist "Hvernig hefurðu það? og tekur nafn sitt og innblástur frá kvikmynd eftir franska framúrstefnuleikstjórann Jean-Luc Godard. Gústaf Geir Bollason, annar sýningarstjóra sýningarinnar, verður við símann.

Umsjón: KG og AMC

Í dag eru 20 ár frá því að önnur breiðskífa Sigur Rósar Ágætis Byrjun kom út. Plata sem var meðal annars valin besta plata Íslandssögunnar árið 2009. Í tilefni af afmælinu ræðum við um áhrif þessarar merkilegu plötu.

Ingi Vífill rekur líklega einu alvöru “skrif“stofuna á stórreykjavíkur svæðinu en hann kennir fólki að skrautskrifa á efri hæð Eiðistorgs. Ingi tekur að sér ýmis störf tengd þessari iðn en meðal annars hefur hann hjálpað fólki að hanna undirskriftir, og svo verða stundum veggir fyrir barðinu á honum enda stundar hann einnig caligraphiti. Við heinsækjum Inga á Eiðistorg í lestinni í dag.

Í pistli sínum í dag skoðar Tómas Ævar Ólafsson tónlistarbloggsíðuna Awesome Tapes from Africa, en þar má hlusta á ógrynnin öll af gömlum afrískum kasettum sem hafa verið færðar yfir á stafrænt form.

Karl Ólafur Hallbjörnsson flytur okkur heimspekilega vangaveltu um skynjun og hugmyndir þýska heimspekingsins. Immanuel Kant

Umsjón: Kristján Guðjónsson og Anna Marsibili Clausen

Áhangendur tyrkneska karlalandsliðslins í knattspyrnu eru ævareiðir og þeir eru ekki hræddir við að sýna það. Þeirra menn þurftu að bíða lengi á Keflavíkurflugvelli, það var ekki töluð tyrkneska á blaðamannafundi Íslenska liðsins og síðast en ekki síst gerðist íslenskur íþróttafréttamaður svo grófur að ota klósettbursta að fyrirliða liðsins. Nema, þetta var auðvitað ekki íslenskur íþróttafréttamaður. Og þetta var ekki klósettbursti. Hvað sem því liður hafa tyrkneskir netverjar tekið málið óstinnt upp eins og íslenskir íþróttafréttamenn hafa mátt finna fyrir. Við fjöllum um fótbolta og ofbeldi á netinu í Lestinni í dag.

Við ætlum líka að fjalla um popptónlist í þætti dagsins, fyrstu íslensku dægurtónlistina. Upphaf íslenskrar dægurtónlistar er hulið nokkurri þoku, en henni léttir ekki fyrr en í kringum 1930 þegar fyrstu lögin birtust á nótum og voru gefin út á hljómplötum. Fyrir þann tíma eru áþreifanlegar heimildir afskaplega óljósar. En hvernig hljómaði íslenskt popp fyrir hundrað árum. Til að greina einhverjar útlínur í þessari þoku tímans, til að svipast um eftir upphafi íslenskrar dægurtónlistarhefðar, fáum við til okkar Trausta Jónsson veðurfræðin og tónlistaráhugamann. hann hefur um árabil leitað að upphafi íslenkrar dægurtónlistar. En nú í vikunni stendur hann fyrir tónleikum þar sem hann gefur fólki innsýn í þessa leit.

Og í pistli sínum í dag fjallar Halldór Armand Ásgeirsson um listaverk sem eru bæði góð og slæm á sama tíma.