Áform eru uppi um sérstök samfélags svín sem lausn í sorphirðumálum á Borgarfirði eystra og hafa vakið nokkra athygli síðustu daga. Fyrirhugað er að festa kaup á svínum og fela þeim að éta lífrænt sorp sem til fellur á Borgarfirði en það hefur fram að þessu verið urðað ásamt öðru heimilissorpi. Helgi Hlynur Ásgrímsson sem fer fyrir verkefninu á Borgarfirði segir það ekki hafa verið talið fýsilegt að keyra lífrænu sorpi langar vegalengdir með tilheyrandi vistspori. Við hringdum í Helga Hlyn í þættinum.

Auður Guðjohnsen hefur síðastliðin tvö ár unnið við að semja ný sönglög fyrir börn á aldrinum 6 til 10 ára og eru þau nú komin út í Söngbók, Tónlistin er þín. Lögin urðu til samhliða meistaraprófsverkefni Auðar frá liskennsludeild Listaháskóla Íslands. Megináherslan er söngur barna og þáttur hans í samfélagi þeirra. Við höfum fjallað áður í þættinum um mikilvægi söngs í sambandi við máltöku barna, en Auður var hjá okkur í þættinum í dag.

Leikfélag Hólmavíkur er eitt þeirra leikfélaga á landsbyggðinni sem enn setur upp eina eða fleiri sýningar á hverju ári til mikillar gleði fyrir gesti og greinilegt er að gleðin er ekki síður við völd innan leikhópsins. Agnes Jónsdóttir er ritari leikfélagsins en hún hefur verið viðloðandi starfið frá því hún var barn að alast upp á Hólmavík. Kristín Einarsdóttir, okkar kona á Ströndum, hitti Agnesi þegar hún var nýkomin heim úr leikferð með leikritið um hina óskammfeilnu Nönnu systur.

Umsjón: Gunnar Hansson

UMSJÓN: GUÐRÚN GUNNARSDÓTTIR OG GUNNAR HANSSON

María Björk Guðmundsdóttir byrjaði að vinna á Íþróttadeild RÚV árið 2000, sem skrifta. Hún fór svo og menntaði sig í sjónvarps- og kvikmyndagerð í Viborg í Danmörku og útskrifaðist þaðan 2009. Nú er hún útsendingarstjóri, dagskrárgerðarkona og framleiðandi á íþróttadeild RÚV, hún er nýkomin af námskeiði á vegum HBS broadcast academy, þar lærði hún meðal annars að það eru til margar leiðir til þess að miðla sögu íþróttaleiks í beinni útsendingu. María Björk kom í þáttinn í dag og við forvitnuðumst um hennar starf.

Á þessum árstíma liggja flestir námsmenn yfir skólabókunum og taka mikilvæg próf, en því miður glíma sumir við prófkvíða sem getur verið afar hamlandi en sem betur fer hægt er að vinna gegn honum með aðstoð fagmanna, eins og td sálfræðinga. Einkenni prófkvíða geta bæði verið líkamleg og hugræn og við ræddum við Jóhönnu Kristínu Jónsdóttur sálfræðing um þetta í þættinum í ga.

Og lesandi vikunnar er Ragnhildur Gísladóttir tónlistarmaður, Ragga Gísla hún sagði okkur frá bókunum sem hún heldur uppá og hefur lesið og hvað liggur á náttborðinu.

MANNLEGI ÞÁTTURINN FÖSTUDAGUR 16.MAÍ 2019

UMSJÓN: GUÐRÚN GUNNARSDÓTTIR OG MARGRÉT BLÖNDAL

Pálmi Gunnarsson tónlistarmaður var á dögunum valinn bæjarlistamaður Akureyrar og hann verður föstudagsgesturinn okkar á þessum ágæta degi. Við ræðum auðvitað þýðingu þess að fá svona viðurkenningu og svo er ekki alveg útlokað að við fáum hann til að ræða pínulítið um júróvisjón því það eru margir sem vilja meina að við höfum ekki verið svona spennt fyrir úrslitakvöldinu í 33 ár!

Í Matarspjallinu heyrum við að sjálfsögðu í Sigurlaugu Margréti Jónasdóttur sem er nýkomin úr vettvangsferð/rannsóknarleiðangri til Parísar, hvar hún kannaði þarlenda veitingahúsamenningu og hún komst meðal annars að því að þjónar í París geta verið mjög tilfinningaríkir og það getur verið varhugavert að panta það sem maðurinn á næsta borði er að borða.

Og við sláum líka á þráðinn til Jóhannesar Hauks leikara sem á að tilkynna stigagjöfina frá Íslandi í Eurovisionkeppninni annað kvöld !

Fimmtudagur 16.maí 2019

Umsjón Margrét Blöndal og Guðrún Gunnarsdóttir

1)Sirrý Arnars segir frá nýrri bók "Þegar kona brotnar-leiðin út í lífið á ný"

2)Fríða María Harðardóttir og Kristín Dís Ólafsdóttir segja frá meistaraverkefnum sínum í LHÍ-Hjartað í miðjunni Vinnusmiðja fyrir mæður og börn sem sótt hafa um alþjóðlega vernd og Essið: Ræktun jákvæðrar sjálfsmyndar á umrótatímum Áhrif dagbókarskrifa á unglingsstelpur í hópastarfi í félagsmiðstöð.

3)Sigurður Viktor Úlfarsson Í dag fer fram sérstök ráðstefna sem ber yfirskriftina Alls konar störf fyrir alls konar fólk og þar verður fjallað um atvinnumál fólks með skerta starfsgetu.

MANNLEGI ÞÁTTURINN MIÐVIKUDAGUR 15.MAÍ 2019

UMSJÓN: GUÐRÚN GUNNARSDÓTTIR OG GUNNAR HANSSON

Hússtjórnarskólinn var með opið hús síðustu helgi þar sem starfsemi skólans var kynnt og gestir gátu skoðað sýningu á handavinnu nemenda auk þess sem boðið var upp á kaffi, súkkulaði og meðlæti. En eins og segir á heimasíðu skólans er stefna hans að kenna nemendum hefðbundna matargerð sem nýtist þeim í daglegu lífi sem og að kynna þeim gamlar matreiðsluaðferðir og matarhefð. Auk þess eiga nemendur að geta nýtt sér og aukið þekkingu sína við saum, prjón, hekl og vefnað og búið til flíkur og aðra nytsamlega hluti sér og öðrum til ánægju og gleði. Við fengum í spjall þær Margréti Dórótheu Sigfúsdóttur, skólameistara ásamt tveimur nemendum.

Póstkortið frá Spáni er á dagskrá að þessu sinni og með því fáum við fréttir af jafnréttirsbaráttunni á Spáni og í framhaldi af því sagði Magnús R Einarsson frá því gríðarlega vændi sem er stundað á Spáni, því langmesta í Evrópu. Hann sagði líka aðeins frá áhyggjum spánverja vegna landsbyggðarflóttans og pínu pons frá væntanlegri söngvakeppni.

Björn Thoroddsen er að vinna að nýrri plötu og til þess þarf hann að fara reglulega til Nashville en í dag er hann með annan fótinn þar vegna tengsla við stór nöfn í tónlistarlífinu sem hann er farin að spila reglulega með á tónlistarhátíðinum víða um heim. Loksins,eins og hann segir sjálfur, er hann farin að leika við stóru strákana á þessu sviði.

Margir þjást af ítrekuðu kvefi á hverju sumri áður en þeir átta sig á því að um frjókornaofnæmi er að ræða. Frjókornaofnæmi er eitt algengasta ofnæmið sem kemur fram í nefi og augum. Ástæðan er ofnæmi fyrir grasi, birki eða súrum þ.e. frjókornum frá gróðri. Við fengum Björn Árdal ofnæmislækni til okkar í dag og fræddumst meira um ofnæmi og eitthvað sem færri þekkja, eða afnæmingu.

Ásta Þórisdóttir lauk nýverið meistaranámi í hönnun frá Listaháskóla Íslands, lokaverkefnið samanstóð af veggteppi, úlpu og færanlegu eldhúsi, en upphafið má rekja til þess þegar Ásta var að losa kartöflugarðinn sinn við svokallað illgresi. Kristín Einarsdóttir, okkar kona á Ströndum, ræddi við Ástu í Strandapistli dagsins.

Það hefur verið í nógu að snúast hjá fararstjóra íslenska Eurovisionhópsins í Ísrael, Felixi Bergssyni. Hatari stígur á svið í kvöld og í kvöld ræðst það hvort við komumst áfram í úrslitakeppnina á laugardaginn. Margir virðast á þeim buxunum og við vonum það svo sannarlega, alltaf skemmtilegra að komast í úrslit. Það vill svo til að einn af áhugasömustu Eurovisionaðdáendum landsins er góður vinur Felixar, Gunnar Helgason. Þeir Gunni og Felix sumsé voru Eurovision gestir Mannlega þáttarins í dag.

UMSJÓN: GUÐRÚN GUNNARSDÓTTIR OG GUNNAR HANSSON

Þorkatla Elín Sigurðardóttir meistaranemi í sálfræði við HR rannsakar leiðir til að nota hlutun orða til að auðvelda lestur hjá lesblindum. Þetta er áframhald rannsókna á BSc verkefni þar sem hún ásamt þremur nemur í tölvunarfræði vinna að hugbúnaði sem tekur við texta og hlutar hann niður samkvæmt ákveðnum reglum og það eru vísbendingar eru um að þetta auðveldi lestur. Þorkatla kom í þáttinn í dag og sagði frá þessu.

Viktor Freyr Joensen er tuttugu og tveggja ára gamall Reykvíkingur sem glímt hefur við mikinn kvíða frá barnæsku. Hann lifði í stanslausum ótta við framtíðina, þar til fyrir einu ár. Eftir mikla sjálfsvinnu pantaði hann sér flugmiða aðra leiðina til Noregs þaðan sem hann ætlar að hjóla einn í kringum heiminn á rúmlega einu ári. Viktor Freyr leggur í hann á miðvikudaginn, en hann kom í þáttinn í dag og sagði sína sögu.

Og lesandi vikunnar var að þessu sinni rithöfundur, Íris Ösp Ingjaldsdóttir, sem var að senda frá sér sína fyrstu bók, Röskun. Íris útskrifaðist sem lögfræðingur árið 2002 en óhætt er að segja að mikil skáldagáfa hafi blundað í árganginum hennar, því Ragnar Jónasson glæpasagnahöfundur var með Írisi í bekk. Íris sagði frá fimm bókum sem hafa haft áhrif á hana í gegnum tíðina:

Bók 1 - Seiðskrattinn í Logatindi - Steve Jackson og Ian Livingstone

Bók 2 - Birkir + Anna, sönn ást - Vigdis Hjorth

Bók 3 - Eldvakinn - Stephen King

Bók 4 - Kvenspæjarastofa númer eitt - Alexander McCall Smith

Bók 5 - The First Fifteen Lives of Harry August - Claire North

UMSJÓN: GUÐRÚN GUNNARSDÓTTIR OG GUNNAR HANSSON

Föstudagsgesturinn okkar hefur sungið með hinum þekkta rússneska kvartett TEREM annað slagið undanfarin ár og núna á sunnudaginn munu þau halda tónleika í Hörpu. Þessir rússnesku tónlistarmenn eru heiðurslistamenn í Rússlandi og ferðast vítt og breitt um heiminn við tónleikahald. Diddú okkar, Sigrún Hjálmtýsdóttir var föstudagsgesturinn okkar í dag og hún sagði okkur nánar frá og rifjar upp æsku og unglingsárin eins og föstudagsgestirnir gera gjarnan.

Bolli Bollason prestur situr þessa dagana yfir ánum fyrir norðan og stendur þá aðallega næturvaktina. Hann var gestur Sigurlaugar Margrétar í matarspjallinu og sagði frá því hverskonar vaktir þetta eru og hvað er nú verið að borða til að halda sér vakandi. Bolli syngur fyrir ærnar en það er ekki sama hvað hann syngur, Rósin fellur vel í kramið en Hataralagið síður. Við slógum á þráðinn norður til Bolla.

UMSJÓN: GUÐRÚN GUNNARSDÓTTIR OG GUNNAR HANSSON

MANNLEGI ÞÁTTURINN FIMMTUDAGUR 9.MAÍ 2019

UMSJÓN: GUÐRÚN GUNNARSDÓTTIR OG GUNNAR HANSSON

Áhrif áfalla geta verið margþætt og geta þau haft í för með sér afleiðingar af ýmsu tagi. Ráðstefna um áföll og fíknisjúkdóma verður haldin í Hörpu. „Vandinn getur verið eitthvert djúpstætt áfall sem viðkomandi er að burðast með og hefur jafnvel burðast með alla ævi,“ segir Pétur Einarsson, skipuleggjandi rástefnunnar, en hann verður gestur okkar eftir nokkrar mínútur.

Menntunarsjóður Mæðrastyrksnefndar hefur ,frá því að hann var stofnaður árið 2012 , veitt yfir 200 styrki til um 150 efnalítilla kvenna og þar með gera þeim kleift að mennta sig. Við forvitnumst betur um sjóðinn hér á eftir og hvernig fjáröflunarátak til að efla hann fór af stað í gær með aðstoð Vigdísar Finnbogadóttur og Lilju Alfreðsdóttur.

Hvernig getum við lengt líftíma eigulegra og nauðsynlegra hluta sem eru á heimilinu? Á Umhverfishátíð í Norræna húsinu sem ætluð fyrir alla fjölskylduna, verður lögð áhersla á viðgerðarmenningu og aðferðir til að lengja líftímann á hlutum - allt frá reiðhjólum til buxna og brauðrista! Markmiðið er að vekja athygli á 12. sjálfbærnimarkmiði Sameinuðu þjóðanna, sem hvetur til ábyrgari framleiðslu og neyslu.