Sigríður Elva Vilhjálmsdóttir fjölmiðlakona, hefur starfað í sjónvarpi, útvarpi og nú skrifar hún meðal annars um bíla í Morgunblaðið. Hún segist vera forfallinn tækja- og adrenalínsjúklingur með flugbakteríu á lokastigi. Með tilliti til þess er hún komin nú í draumastöðu þar sem hún hefur tækifæri til að prófa allar týpur af bílum og rýna í kosti þeirra og galla. Ég rak til dæmis augun í grein hennar um nýjan rafmagnsbíl frá Mercedes Benz. Sigríður Elva kom í þátinn í bíladelluspjall um nýjustu rafbílana og sagði okkur aðeins frá fisflugi.

Í Reykjavíkurmaraþoninu er hægt, eins og reyndar undanfarin ár, að hlaupa og safna fé fyrir góðan málstað. Anna Sigrún Baldursdóttir ætlar að hlaupa til styrktar Gleym-mér-ei Styrktarfélag, en það félag er með þann tilgang að halda utan um styrktarsjóð sem notaður er til að styrkja ýmis verkefni í tengslum við missi barns á meðgöngu og í/eftir fæðingu. Anna Sigrún kom í þáttinn og sagði sína sögu, en hún missti barn við fæðingu árið 1995.

Golfsumarið er í fullum gangi, golfvellir landsins koma einstaklega vel undan vetri og golkylfum er sveiflað af kappi um allt land með það markmið að koma litlu hvítu kúlunni ofan í þar til gerðar holur. Brynjar Eldon Geirsson, framkvæmdastjóri Golfsambands Íslands kom í þáttinn og fór yfir stöðuna í golfi á Íslandi.

UMSJÓN GUNNAR HANSSON

Guðmundur Haraldsson leikari og leiðsögumaður gerði áhugaverðar tilraunir á sjálfum sér fyrir um það bil 5 árum. Hann fastaði meðal annars, fyrst í 8 daga og svo í 40 daga og tók svo mislöng tímabil í að prófa ýmiskonar matarræði, t.d. paleomataræðið. Við Guðrún fengum hann þá reglulega í viðtal í Síðdegisútvarpið á Rás 2 til að fá að fylgjast með hvernig gekk og hvaða áhrif þetta væri að hafa á hann. Guðmundur kom í þáttinn í dag og við fengumum hann til að segja okkur frá þessu ferli, hvað hann lærði af því og hver staðan er í dag.

Ýmis forvitnileg verkefni hafa náð að líta dagsins ljós og fengið byr undir báða vængi með hjálp frá Karolina fund. Eitt slíkt er í vinnslu þar, kvikmyndaðir tónleikar þar sem íslensk þjóðlög verða flutt á 6 mögnuðum stöðum. Staðirnir eru; Tjarnargígur í Lakagígum, Akranesviti, Lýsistankur í Djúpavík, Stefánshellir í Hallmundarhrauni, Botnstjörn í Ásbyrgi og Emelíuklappir í Grímsey. Segjum betur frá þessu hér á eftir. Við hringdum í Önnu Jónsdóttur, óperusöngkonu, í þættinum í dag.

Erfið tengsl milli barns og foreldra þess getur haft alvarlegar afleiðingar fyrir þroska barnsins. Þekking til að bregðast við slíku ætti að vera til á heilsugæslustöðvum, segir Vilborg Guðnadóttir, geðhjúkrunar- og fjölskyldufræðingur á Barna- og unglingageðdeildinni BUGL. Hún vill að brugðist sé fyrr við börnum með tengslavanda og um leið verði hægt að fækka erfiðustu tilfellunum. Bergljót Baldursdóttir ræddi við hana á Heilsuvaktinni í dag.

UMSJÓN GUÐRÚN GUNNARSDÓTTIR OG GUNNAR HANSSON

Flestir kannast við að vera stundum uppiskroppa með hugmyndir um kvöldmat. Hvað er í matinn í kvöld er jú algeng spurning á heimilum, en hún Ingibjörg Sólrún Ágústsdóttir ákvað að leysa þetta með því að hafa þemavikur á sínu heimili og elda mat frá einhverju Evrópulandi í heila viku. Hún byrjaði í febrúar og ákvað að taka þetta í stafrófsröð og byrjaði á að elda mat frá Andorra og setti uppskriftir og myndir inná Instagram og smátt og smátt fjölgaði fylgjendum. Þetta uppátæki hennar stendur ennþá yfir því, eins og hún segir sjálf, eru fjölmörg lönd eftir. Við hittum Ingibjörgu og fengum að vita meira um þetta.

Jógasetrið stendur fyrir sumarnámskeiði fyrir börn sem vilja læra leiklist, jóga og að tengjast öðru fólki. Þær Álfrún Örnólfsdóttir og María Dalberg sem kenna á námskeiðinu segja námskeið á svona nótum nauðsynleg fyrir börn sem þurfa að finna leiðir út úr tölvunum í sumar. María kom í þáttinn í dag.

Sigurbjörg Halldóra Halldórsdóttir er nemandi í 9. bekk í Grunnskólanum á Drangsnesi og eini unglingurinn á staðnum. Hún syngur í kirkjukórnum, stundar skíði og unir hag sínum vel. Kristín Einarsdóttir, okkar kona á Ströndum, hitti Sigurbjörg í skólanum sem er jafnframt kapella sveitarfélagsins Kaldrananeshrepps.

UMSJÓN GUÐRÚN GUNNARSDÓTTIR OG GUNNAR HANSSON

Föstudagsgestur Mannlega þáttarins í þetta sinn var leikarinn Baltasar Breki Samper. Hann hefur leikið í leikhúsi, sjónvarpsþáttum og kvikmyndum eftir að hann útskrifaðist úr Listaháskólanum árið 2015. En það eru færri sem vita að hann hefur líka staðið á bakvið myndavélina, hann er sem sagt yfirleitt öðru hvoru megin við myndavélina. Baltasar Breki hefur einnig fengið tækifæri í erlendum verkefnum eftir að hann vakti athygli fyrir góða frammistöðu í Ófærð, nú síðast lék hann í glænýrri þáttaröð um Chernobyl slysið sem vakið hefur mikla athygli um allan heim. Við fengum hann til að segja okkur frá því hvar hann er fæddur og uppalinn, frá skólagöngunni og ferðalaginu í gegnum lífið til dagsins í dag.

Sigurlaug Margrét var í þættinum í allan dag og auðvitað var því matarspjallið á sínum stað. Í dag hringdum við í Jóhannes geir Sigurgeirsson, veitingamann á Lamb-inn á Öngulsstöðum og svo ræddum við um lautarferðir, körfur með rauðum og hvítum köflóttum dúkum og hvað er sniðugt að hafa með í körfunni og sitthvað fleira.

UMSJÓN GUNNAR HANSSON OG SIGURLAUG MARGRÉT JÓNASDÓTTIR

Þann 7. ágúst næstkomandi hefst ný þáttaröð af sjónvarpsþáttunum Með okkar augum og er þetta sú níunda í röðinni. Þættirnir eru virkilega fjölbreyttir og skemmtilegir þar sem áhorfendur fá innsýn inn í líf fatlaðra og eins og nafnið segir til um, fá að sjá heiminn með þeirra augum. Mannlegi þátturinn hitti hópinn á Hótel Holti þar sem þau voru við upptökur og við ræddum við Andra Frey og Katrínu Guðrúnu, sem hafa verið með frá upphafi, Ásgeiri Tómasi sem hefur verið í þættinum í þrjú ár og svo kynntumst líka glænýjum meðlimum hópsins, þeim Magnúsi Orra og Elvu Björgu.

Jón Knútur Ásmundsson og Esther Ösp Gunnarsdóttir á Reyðarfirði standa að nýju hlaðvarpi sem þau kalla Heimsenda. Þau settu fyrsta þáttinn af Heimsenda í loftið í byrjun apríl, en nú eru þeir orðnir fjórir talsins. Flestir viðmælendur Heimsenda eru austfirskir og efnistökin eru fjölbreytt. Esther hefur verið dyggur hlustandi alls kyns hlaðvarpa á síðustu árum og hefur reynslu af dagskrárgerð fyrir útvarp. Þausegja að nafnið á hlaðvarpinu, Heimsendi sé af augljósum ástæðum, þau búi á hjara veraldar og heimurinn sé á heljarþröm. Við hringdum í Esther í þættinum í dag.

Splunkunýr Ratleikur fyrir alla fjölskylduna verður að veruleika næsta laugardag, þvert á Menningarhúsin í Kópavogi. Ólöf Breiðfjörð verkefnastjóri barnamenningar í Menningarhúsum Kópavogs hefur gengið með þessa hugmynd í maganum í nokkur ár og nú er ratleikurinn komin út á prenti á

íslensku, ensku og pólsku. Ólöf kynnti sér fjölbreytta leiki á söfnum erlendis og sótti námskeið í gerð ratleikja í Bretlandi og styrkur úr Safnasjóði hjálpaði til að

hrinda þessu í framkvæmd. Við hittum Ólöfu í Kópavoginum.

UMSJÓN GUÐRÚN GUNNARSDÓTTIR OG GUNNAR HANSSON

Guðrún Birna le Sage de Fontenay er GlóMotion heilræktarkennari, ropeyogakennari, markþjálfi, fimleikaþjálfari og tveggja barna móðir. Hún er að fara af stað með námskeið fyrir nýbakaða foreldra og ungbörn. Þar mun hún tvinna saman líkamlega og andlega uppbyggingu við fræðslu um virðingarríkt, vakandi uppeldi. Tímarnir eru líka hugsaðir sem tengslastund fyrir foreldra sem tengja við virðingarríkt, vakandi uppeldi og vilja tengjast öðrum foreldrum í sömu hugleiðingum. Guðrún Birna kom í þáttinn í dag.

Bókin 2052 - Svipmyndir úr framtíðinni er samansafn af smásögum eftir 25 höfunda, sem allar eiga það sameiginlegt að gerast á Íslandi árið 2052. Upphafsmaður bókarinnar og ritstjóri er Hjörtur Smárason. Hann segir að markmið bókarinnar að hvetja fólk til að velta því fyrir sér hvert Ísland er að stefna og hvaða afleiðingar ákvarðanir sem við tökum í dag geta haft eftir rúm 30 ár. Höfundarnir 25 eru fjölbreyttur hópur úr mörgum stéttum samfélagsins, listafólk, stjórnmálafólk, fræðifólk, tæknimenntað fólk, nemendur, fólk úr viðskiptalífinu og fleiri. Við hringdum í Hjört í þættinum og fengum að vita meira um þessa bók og framtíðina, en hann segist vera framtíðargrúskari og rekur eigið ráðgjafafyrirtæki í Kaupmannahöfn.

Við fengum póskort frá Spáni, frá Magnúsi R. Einarssyni í dag. Í því sagði hann frá strandlífinu í Alicante, sem er að verða liflegt. Hann sagði einnig frá hinu sérkennilega máli með Franco, fyrrum einræðisherra, en mikil deila hefur staðið hér í meira en ár hvað gera skuli við jarðneskar leifar hans. Magnús sagði líka frá því hvernig tekist hefur að draga úr loftmengun í Madrid, batnandi atvinnuhorfum og Netflix er búið að opna Casa Netflix rétt fyrir utan höfuðbogina og þar verður miðstöð allrar framleiðslu fyrirtækisins í Evrópu.

UMSJÓN GUÐRÚN GUNNARSDÓTTIR OG GUNNAR HANSSON

Prikið kaffihús í miðbænum á sér langa og litríka sögu. Í dag er rekið þar kaffihús á daginn en skemmtistaður á kvöldin og um helgar. Helgi Hafnar Gestsson mætir á Prikið á hverjum morgni fyrir vinnu, fær sér kaffibolla, situr á sama stað og fær sama bollann. Eftir vinnu kemur hann aftur og fær sér þá te. Þetta hefur hann gert í áratugi. Um helgar kemur hann í hádeginu og fær sér að borða. Hann spjallar við gesti, unga sem aldna, ferðamenn, pönkara og heimspekinga. Prikið opnaði fyrst árið 1951 sem vill svo skemmtilega til að er einmitt fæðingarár Helga. Mannlegi þátturinn brá sér í miðbæinn og hitti Helga og Magneu B. Valdimarsdóttur, sem er að gera heimildarmynd um Helga á Prikinu. Hvar hittum við þau...? Jú auðvitað á Prikinu.

Þann 30 maí sl var árshátíð grunnskóla Drangsness haldin með pompi og prakt. Aðalatriði kvöldsins var leikritið Sossa, leikgerðina unnu nemendur grunnskólans upp úr fjórleik Magneu frá Kleifum um sveitastelpuna Sossu. Eftir leiksýninguna hitti okkar kona, Kristín Einarsdóttir Mörtu Guðrúnu Jóhannesdóttur skólastjóra og Aðalbjörgu Óskarsdóttur kennara.

Í Brúnagerði í Fnjóskadal, á milli Vaglaskógar og Illugastaða, búa hjónin Birna Kristín Friðriksdóttir og Guðbergur Egill Eyjólfsson. Þau hafa með dugnaði og elju komið upp skemmtilegum húsdýragarði sem þau nefna Daladýrð. Þarna gefur að líta öll helstu húsdýr eins og hesta, kindur, hund, geitur, grísi, kanínur og ýmsar tegundir af hænum. Þau reka líka veitingastað með áherslu á eigin landbúnaðarframleiðslu og Birna, sem er textílhönnuður, er með opna vinnustofu, þar sem hún vinnur að hönnun sinni og framleiðslu. Við hringdum í Guðberg í Brúnagerði dag.

UMSJÓN GUÐRÚN GUNNARSDÓTTIR OG GUNNAR HANSSON

Föstudagsgesturinn í þetta sinn var einn þekktasti kylfingur landsins, Úlfar Jónsson. Hann er sexfaldur Íslandsmeistari í golfi, hann varð fyrstur Íslendinga Norðurlandameistari í golfi, var landsliðsþjálfari, og var valinn kylfingur aldarinnar árið 2000 af íþróttafréttafólki. Við spurðum hann um upprunann og uppvöxtinn og ferðalagið í gegnum lífið til dagsins í dag. Og auðvitað var golf fyrirferðamikið í spjallinu.

Kirkjulistahátíð heldur áfram þessa helgi sem er lokahelgi hátíðarinnar. Það eru tónleikar og uppákomur í Hallgrímskirkju á hinum ýmsu tímum dagsins og td í dag kl.16 fer fram tónlistarspjall í Ásmundarsal, en þar rætt við verður við Benedikt Kristjánsson um kantötur Bach sem fluttar verða á tónleikum á laugardaginn og á mánudaginn. Benedikt er þessa dagana að sigra barokkheiminn og er búinn að ná ansi langt þrátt fyrir ungan aldur. Á morgun er á dagskrá Klais, klukkuspil og tölvur, tónlist eftir raftónskáld með nýjum hljómi, þ.e.a.s. MIDI-tölvubúnaður Klais orgelsins er nýttur og verk tónskáldanna leikin af tölvum. Meðal tónskálda sem eiga verk þarna, er Ragnhildur Gísladóttir. Við hringdum í Pétur Oddberg Heimisson í þættinum.

Sigurlaug Margrét, besti vinur bragðlaukanna, var hjá okkur í dag með sitt vikulega matarspjall. Hún hringdi í Harald Bóasson í Dalakofanum að Laugum á Þjóðvegi 1 og spurði hann til dæmis út í kótilettur í raspi, plokkisk og gamlar innréttingar, hannaðar af Sveini Kjarval, sem ekki hefur verið breytt frá byggingu hússins.

UMSJÓN GUÐRÚN GUNNARSDÓTTIR OG GUNNAR HANSSON

Hvað er fegurra eða friðsælla en töfrar íslenskrar sumarnætur? Einmitt þá er ómótstæðilegt að reima á sig gönguskóna og ganga inn í bjarta nóttina, segir Ólína Kjerúlf Þorvarðardóttir sem í sumar mun leiða kvöldgöngur á vit sumarnæturinnar þar sem fólk getur andað að sér gróðurmagni og orku og virt fyrir sér grös og steina. Um leið verða rifjaðar upp sagnir og fróðleikur um lífið í okkar fallega landi, eftir því sem við á. Ólína kom í þáttinn í dag.

Hugi Garðarsson, 21 árs, lagði af stað frá Krabbameinsfélaginu Skógarhlíð í gær kl.14 en hann ætlar að ganga hringinn í kringum landið til styrktar Krabbameinsfélaginu í sumar, til minningar um ömmu sína sem lést úr krabbameini árið 2014. Hugi gerir ráð fyrir að vera um 100 daga á leiðinni, heimsækja 70 sveitarfélög og ganga 3.000-3.500 kílómetra. Hugi mun ganga með hjólbörur hringinn og Í þeim geymir Hugi allt sem hann þarf til ferðalagsins, tjald, svefnoka, matarbirgðir, bækur og gítar sem hann spilar á daglega. Við slógum á þráðinn til Huga í þættinum.

Það er ekki föstudagur í dag, en við ræddum samt um það að fasta í þættinum. Kolbrún Björnsdóttir, grasalæknir fastar reglulega og losar út eiturefni í líkamanaum. Undanfarin ár hafa sífellt fleiri fastað á einn eða annan hátt. Kolbrún kom í þáttinn og gaf góð ráð og fræddi okkur um kosti þess að fasta.

UMSJÓN GUÐRÚN GUNNARSDÓTTIR OG GUNNAR HANSSON