MANNLEGI ÞÁTTURINN MIÐVIKUDAGUR 8.MAÍ 2019

UMSJÓN: GUÐRÚN GUNNARSDÓTTIR OG GUNNAR HANSSON

Mánudaginn 29.apríl fékk forseti Íslands, Guðni Th Jóhannesson, afhendan fyrsta K-lykilinn í landssöfnun Kiwanishreyfingarinnar, sem hófst formlega 1.maí. Landsöfnunin er, eins og í fyrra, til styrkar BUGL og Píeta. Hingað komu þær Helga Jörgensdóttir, hjúkunardeildarstjóri á göngudeild BUGL og Soffía Erla Einarsdóttir Verkefnastjóri göngudeild BUGL og sögðu okkur frá þessari söfnun og hvernig hún gagnast Barna- og unglingageðdeild, BUGL, og frá því sem er efst á baugi í starfseminni.

Nú er að fara í gang vitundarvakning um Ljósið,endurhæfingu fyrir krabbameinsgreinda og búið er að gera myndband þar sem ljósberar og aðstandendur segja frá reynslunni í kringum krabbameinið og hvernig Ljósið hjálpaði þeim. Aðstandendur Ljóssins vilja með þessu gefa dýpri skilning á starfinu sem þar fer fram.

Árangur af endurlífgunum hér á landi er mjög góður. Hjörtur Oddsson, hjartalæknir og formaður Endurlífgunarráðs segir að það megi að einhverju leyti þakka því að um 60 þúsund Íslendingar hafi farið á endurlífgunarnámskeið á liðnum fimm árum. Um 140 endurlífganir eru hér á landi utan sjúkrahúsa á hverju ári Bergljót Baldursdóttir ræddi við hann á Heilsuvaktinni.

Við fengum í dag að kynnast ungri konu úr Keflavík sem fór ekki í framhaldsskóla heldur beint á sjóinn, vann svo í frystihúsi og lífið tók svo við eins og gengur og gerist. Eftir fæðingarorlof með þriðja barninu ákvað hún að halda áfram námi. Hún fór í gegnum VIRK og nú er hún að klára svokallaðan Háskólagrunn hjá HR, sem er leið að háskólanámi fyrir þá sem ekki eru með stúdentspróf. Hún heitir Hlíf Ásgeirsdóttir og hún kom í þáttinn ásamt Málfríði Þórarinsdóttur forstöðumanni Háskólagrunnsins.

Lögfræðingurinn Sveinn Guðmundsson heldur úti netsíðunni Jural.is með grínsögum af lögfræðingum og við ákváðum að heimsækja Svein á lögfræðingastofuna og spjalla við hann yfir kaffibolla, um starfið,stéttina og grínið. Sveinn segir að það sé af nógu að taka af lögfræðingagríni og lét nokkrar fljóta með í viðtali í þættinum í dag.

Í dag heyrðum við seinni hluti viðtals Kristínar Einarsdóttur, okkar konu á Ströndum, við Jósep Blöndal lækni. Jósep hefur á sínum læknisferli í Stykkishólmi komið þúsundum Íslendinga til hjálpar sem átt hafa við bakvandamál að stríða. Jósep er frábær sögumaður og hann hélt áfram að segja skemmtilegar sögur í þættinum í dag.

UMSJÓN: GUÐRÚN GUNNARSDÓTTIR OG GUNNAR HANSSON

Skömmin er flókin tilfinning. Í jafnvægi hjálpar hún okkur að tengjast öðrum og gæta virðingar í samskiptum. Þegar hún fer út böndunum brotnar sjálfsmyndin, okkur finnst við einskis virði og langar mest til að fara í felur. Guðbrandur Árni Ísberg, sálfræðingur og sérfræðingur í klínískri meðferð skrifaði bókina Skömmin sem var að koma út, var gestur okkar í dag.

Leikhúslistakonur 50+ frumsýna í samstarfi við Þjóðleikhúsið leiksýninguna Dansandi ljóð í leikhúskjallaranum á laugardaginn. Þar er sögð ævisaga konu frá fæðingu til fullorðinsára. Átta leikkonur túlka líf hennar, ástir og örlög í ljóðum, dansi og tónlist. Við fengum tvær þeirra, þær Eddu Þórarinsdóttur sem leikstýrir verkinu og Helgu Björnsson, leikmyndahönnuð, til að segja okkur aðeins frá sýningunni í dag.

Gunnar Karel Másson tónskáld var lesandi vikunnar hjá okkur en 17.maí mun hann frumsýna Iður , sem er nýtt íslenskt tónleikhúsverk byggt á sönnum atburðum um Mark Kennedy, lögreglumann og fjölskylduföður. Við heyrðum meira af því og við spurðum hann um hvaða bækur hafa haft áhrif á hann í gegnum tíðina.

UMSJÓN: GUÐRÚN GUNNARSDÓTTIR OG GUNNAR HANSSON

Föstudagsgesturinn okkar er önnum kafinn framkvæmdastjóri sem sér fram á afskaplega viðburðaríka helgi. Þetta er Hrönn Svansdóttir framkvæmdastjóri og annar eiganda Crossfit Reykjavík en í dag hefst alþjóðlegt mót í Laugardalshöllinni; Reykjavík Crossfit Championship sem er ein þeirra keppna sem geta tryggt þáttökurétt á heimsleikunum.

Við flytjum ykkur líka nýjustu fréttir af Böggvisbrauði. Á forsíðu héraðsfréttablaðsins Norðurslóðar sem gefið er út í Dalvíkurbyggð má lesa frétt um nýja brauðgerð - Böggvisbrauð sem ætlar að selja nýbakað súrdeigsbrauð til áskrifenda. Fyrstu brauðin verða afhent í dag og við heyrum í brauðgerðarmeistarnum Mathiasi Spoerrey.

Mat­reiðslu­meist­ar­inn Gunnar Karl Gíslason, er einn stofnenda og eigenda veitingastaðarins Dill sem var fyrstur íslenskra veitingastaða sem fékk Michelin stjörnu, hann hefur verið yfir­kokk­ur á veitingastaðnum Agern í New York undanfarin ár, en sá staður hlaut einmitt Michelin stjörnu á meðan hann var þar. Nú er hann fluttur aftur til Íslands og tekinn aftur við Dill, en hann verður gestur hjá okkur í matarspjalli dagsins. Þar munum við spjalla um þessar eftirsóknarverðu en torfengnu stjörnur og svo segir hann okkur frá íslenskum villtum jurtum sem góðar eru í matargerð til dæmis arfa og kerfil.

UMSJÓN: GUNNAR HANSSON OG MARGRÉT BLÖNDAL

Þau sem til þekkja segja að hláturjóga sé miklu magnaðra hjálpartæki í baráttunni við kvíða og depurð en kannski mætti ætla. Ásta Valdimarsdóttir hláturjógakennari og hláturambassador var gestur þáttarins í dag. Hún útskýrði þetta fyrirbæri sem hláturjóga er og sagði frá alþjóðlega hláturjógadeginum sem er á sunnudaginn.

Við fengum tvær ungar listakonur í heimsókn, útskriftarnema úr Listaháskólanum, þær Írisi Indriðadóttur nemanda í vöruhönnun, en hún skoðar tyggigúmmíið frá öllum hliðum í verkefninu „Í tygjum við tyggjó“. Tyggjó inniheldur rúmlega 30.000 mismunandi efni og uppistaða þess eru plastefni. Og svo er það Jóhanna Rakel en hennar lokaverkefni kallast „ Ungir fjárfestar“ og er gjörningur sem á að varpa ljósi á söluvæðingu samtímans. Hún mun setja upp sölubás á sýningunni og bjóða fólki að kaupa hlut til að styrkja starfsemi Ungra fjárfesta. Þær Íris og Jóhanna komu í þáttinn og fræddu okkur um tyggigúmmí og söluvæðingu, en útskriftarsýning myndlistardeildar og hönnunar- og arkitektúrdeildar Listaháskóla Íslands opnar á laugardaginn á Kjarvalsstöðum.

Við fengum póstkort frá Magnúsi R. Einarssyni á Spáni í dag og í þetta sinn fjallaði um það bil 95% póstkortsins um pólitík, enda nýafstaðnar þingkosningar þar í landi. Magnús kafaði í söguna og sagði frá Francotímanum sem hefur enn í dag djúp áhrif á spænska þjóðarsál og lék hlutverk í kosningabaráttunni. Hin fimm prósentin fjölluðu svo um sumar, sól og ódýrt fæði.

Júróvisjón nálgast óðfluga og á morgun leggur íslenski hópurinn af stað til Ísrael - við tókum stöðuna í lok þáttar. Er allt klárt? Er búið að pakka? Er okkur enn spáð 6. sæti af veðbönkum? Felix Bergsson er fararstjóri hópsins og það kemur í hans hlut að sjá til þess að allt fari vel. Felix kom í þáttinn í dag.

UMSJÓN: GUNNAR HANSSON OG MARGRÉT BLÖNDAL

Helgi Pétursson, eða Helgi Pé í Ríó tríó eins og flestir þekkja hann, sagði bæjabb bæ bæ bæ bæ fyrir tveimur árum og flutti til Danmerkur ásamt eiginkonu sinni, Birnu Pálsdóttur. Árin áður en þau fluttu vakti Helgi athygli fyrir baráttu sína með Gráa hernum - samtökum eldri borgara. Við hringdum í Helga í þættinum og heyrðum hvernig þeim líkar lífið í Danmörku og hvernig honum líst á heimahagana á Íslandi þegar hann lítur yfir hafið.

Öll höfum við þörf fyrir að fá hrós. Það er fátt sem gleður meira, gefur meiri orku og gerir fólk ánægð­ara en hrós sem er sett fram af ein­lægni. Ingrid Kuhlman er með meistaragráðu í jákvæðri sálfræði og hún heldur út síðunni Hrós dagsins. Ingrid kom í þáttinn og gaf okkur fimm ráð til að fara jákvæð inn í sumarið.

Jósep Blöndal læknir er af mörgum kunnur vegna læknisstarfa sinna í Stykkishólmi. Þangað hafa líklega hundruðir Íslendinga lagt leið sína vegna bakvandamála og margir fengið bót sinna meina. Jósep hóf sinn læknisferil á Ströndum og kann margar sögur af veru sinni þar, enda er Jósep frábær sögumaður og hér er eiginlega um framhaldssögu að ræða því seinni hluti viðtalsins verður fluttur í næstu viku. Það var Kristín Einarsdóttir, okkar kona á Ströndum, tók viðtalið við Jósep.

UMSJÓN: GUÐRÚN GUNNARSDÓTTIR OG GUNNAR HANSSON

Það er stórt og óafturkræft áfall þegar foreldri barns fellur frá og hefur mikil áhrif á líf þess. Í dag fer fram málþingið „Hvað verður um mig“, um rétt barna, stöðu þeirra og þarfir við fráfall foreldris. Á málþinginu fjalla fyrirlesarar um málið frá ýmsum hliðum, en í fyrsta sinn hafa verið teknar saman tölur hjá Hagstofunni um fjölda barna sem lenda í þessari stöðu á ári hverju á Íslandi. Kynntar verða rannsóknir um upplifun barna eftir fráfall foreldris. Við fengum Heiðrúnu Jensdóttur formann Arnarins minningarsjóðs og Svavar Knút Kristinsson tónlistarmann, en hann missti föður sinn í snjóflóðinu á Flateyri árið 1995.

Kærleiksdagar voru haldnir á Breiðdalsvík um helgina, en þeir voru fyrst haldnir fyrir rúmum 20 árum. Þar er lögð áhersla á óhefðbundnar meðferðir og kærleiksríka samveru. Hefð er til dæmis fyrir því að gestir byrji fyrsta kvöldið á að faðmast og knúsast. „Kærleiksdagarnir snúast um kærleiksrík samskipti og að við séum opnari,“ segir Vigdís Steinþórsdóttir, stjórnandi daganna, en hún kom í þáttinn í dag og sagði okkur frekar frá helginni.

Lesandi vikunnar í þetta sinn var söngvarinn Þór Breiðfjörð, en hann hefur sungið stærstu hlutverkin meðal annars í Vesalingunum og Jesus Christ Superstar, hér á landi, á West End í London og víðar. Við spurðum hann út í hvaða bækur eru á náttborðinu hjá honum, hvað hann er að lesa þessa dagana og hvaða bækur og höfundar hafa haft áhrif á hann í gegnum tíðina.

UMSJÓN: GUÐRÚN GUNNARSDÓTTIR OG GUNNAR HANSSON

Föstudagsgesturinn okkar er fæddur 18 febrúar 1959 og er rithöfundur og málari. Hann hefur búið í París og New York og flutti þaðan minnistæða pistla í dægurmálaútvarpi Rásar 2 á níunda áratugnum. Hann dvelur stundum útí Hrísey en býr annars í Reykjavík. Síðasta skáldsaga hans heitir Sextíu kíló af sólskini en hann hlaut einmitt Íslensku bókmenntaverðlaunin fyrir þá bók. Nú ættu hlustendur Mannlega þáttarins að átta sig á því um hvern ræðir, þetta er að sjálfsögðu Hallgrímur Helgason rithöfundur.

Undrabarnið Rolf Bæng er bjargvættur mannkyns - að eigin áliti. Hann fæddist fullskapaður, heiltenntur og altalandi, og hann heillar alla upp úr skónum. Leikritið Bæng! um téðan Rolf, eftir eitt þekktasta núlifandi leikskáld Þýskalands, Marius von Mayenburg, í leikstjórn Grétu Kristínar Ómarsdóttur, verður frumsýnt í Borgarleikhúsinu í kvöld. Gréta Kristín sagði frá leikritinu í þættinum.

UMSJÓN: GUÐRÚN GUNNARSDÓTTIR OG GUNNAR HANSSON

Á morgun er sumardagurinn fyrsti og því ber að fagna eins og ævinlega. Það er meira að segja spáð hlýindum - sem einhvern tímann hefði hún ekki endilega þótt vita á gott. En sumardagurinn fyrsti er líka yngismeyjadagur og fyrsti dagur hörpu samkvæmt gamla tímatalinu. Þessu ber auðvitað að fagna, enda aldrei nóg af tilefnum til að gera sér glaðan dag. En hvað er viðeigandi að gera á þessum tímamótum - við sláum á þráðinn til Jón Jónssonar þjóðfræðings og verkefnisstjóra Rannsóknaseturs Háskóla Íslands á Ströndum.

Og meira tengt sumarkomunni - Ólafur Ævarsson sérfræðingur í geðlækningum hefur lengi haft áhuga á áhrifum steitu á okkur, mannfólkið og hér eftir nokkrar mínútur ætlum við biðja hann um nokkur góð ráð svo við getum hoppað streitulaus.

Stór hluti þeirra sem nýta þjónustu atvinnulífstengla eftir starfsendurhæfingu hjá VIRK er ungt fólk með háskólamenntun. Atvinnulífstenglarnir aðstoða fólk, sem dottið hefur út af vinnumarkaði vegna veikinda og hafa ekki náð fullri starfsgetu, við að komast í starf að nýju Þeir fundu hundrað fimmtíu og sex manns störf á síðasta ári. Bergljót Baldursdóttir ræðir við Jónínu Waagfjörð, sviðstjóra þróunar atvinnutengingar hjá VIRK á Heilsuvaktinni í dag.

UMSJÓN: GUÐRÚN GUNNARSDÓTTIR OG MARGRÉT BLÖNDAL