MANNLEGI ÞÁTTURINN ÞRIÐJUDAGUR 23.APRÍL 2019

UMSJÓN: GUÐRÚN GUNNARSDÓTTIR OG MARGRÉT BLÖNDAL

Undanfarnar vikur hafa verið annasamar hjá Ragnhildi Jónsdóttur myndlistarkonu - sem kannski er betra að titla sem álfakonu eða jafnvel bara álfkonu. Ragnhildur er nýkomin heim af kvikmyndahátíð í San Francisco þar sem hún tók á móti Golden Gate verðlaunum fyrir bestu heimildarmyndina. Mynd sem heitir the Seer and the unseen sem mætti kannski þýða sem Sjáandinn og hið óséða. Ragnhildur kemur til okkar eftir nokkrar mínútur og segir okkur frekar frá myndinni, ævintýralegu ferðalagi til Bandaríkjanna og ef til vill fáeinar fréttir af stöðu mála í hulduheimum.

Rækjuvinnslan Hólmadrangur á Hólmavík er ein fullkomnasta rækjuvinnsla á

landinu. Sigurbjörn Úlfarson er nýtekinn við framkvæmdastjórastöðu þar

og þótt nokkrir erfiðleikar hafi verið í rekstrinum lítur Sigurbjörn

framtíðina björtum augum. KE hitti Sigurbjörn og ræddi við hann um

verksmiðjuna og fékk að fylgjast með vinnslunni

Erla Skúladóttir leikkona og kvikmyndagerðarkona hefur búið í New York í 30 ár og haslað sér völl þar sem og hér á landi, í kvikmyndagerðinni og hún er einnig ein af handritshöfundum að nýrri sjónvarpsþáttaröð sem fer í loftið í haust. Mannlegi þátturinn hitti Erlu á kaffihúsi á Manhattan í New York og spurði út í verkefnin og einnig útí lífið í stórborginni.

MANNLEGI ÞÁTTURINN MIÐVIKUDAGUR 17.APRÍL 2019

UMSJÓN: GUÐRÚN GUNNARSDÓTTIR OG GUNNAR HANSSON

Hrönn Sveinsdóttir skrifaði opið bréf til Svandísar Svavarsdóttur í síðustu viku þar sem hún rekur sína upplifun af tregðu í kerfinu til að koma ellefu ára dóttur hennar, sem er með einhverfu, til aðstoðar og að nú sé svo komið að hún fái hvergi skólavist hér á landi. Hrönn kemur í þáttinn í dag og við ætlum að fræðast um sögu þeirra og hver staðan er í dag.

Við fáum póstkort frá Spáni frá Magnús R. Einarssyni í dag. Í þessu póstkorti segir hann frá dymbilvikunni á Spáni, sem markar upphaf ferðamannatímans. Og í kjölfar ferðamannanna fylgja sölumenn, músíkantar, myndlistamenn og akróbatar. Hann segir ennfremur frá þingkosningum sem eru framundan á Spáni í lok mánaðarins og deilum Mexikóa og Spánverja um atburði sem áttu sér stað fyrir fimm hundruð árum.

Á þessum síðasta virka degi fyrir páska tökum við hinn almenna borgara, fólkið á götunni, vegfarandann sígilda...tali og við spyrjum einfaldlega: Hvað ætlar þú að gera yfir páskana ?

Þór­hildur Sunna Ævars­dótt­ir, þing­maður Pírata og for­maður laga- og mann­rétt­inda­nefndar Evr­ópu­ráðs­þings­ins. Í síðustu viku samþykkti Evr­ópu­ráðs­þingið þings­á­lyktun og til­mæli til aðilda­ríkja Evr­ópu­ráðs­ins um raun­veru­legar trú­verð­ugar aðgerðir til þess að berj­ast gegn kyn­ferð­is­legri mis­munun kvenna í stjórnmálum í Evr­ópu. „Það er póli­tík í því að konur þurfi ekki að lifa við að vera beittar kyn­ferð­is­legu áreiti og jafn­vel kyn­ferð­is­legu ofbeldi við störf sín í póli­tík,“ segir Þórhildur Sunna, en hún kom í heimsókn í dag.

Hafþór Óskarsson er fæddur og uppalinn á Drangsnesi en eftir nám í sálfræði, þjóðfræði og ferðamálafræði hóf hann störf hjá fyrirtækinu Pink Iceland og stofnaði síðar ásamt öðrum systurfyrirtæki þess Propose Iceland. Hafþór kom í heimsókn á Drangsnes og sagði Kristínu Einarsdóttur frá forvitnilegri starfsemi þessara fyritækja.

Námskeiðin „Stelpur geta allt“ eru fyrirbyggjandi sjálfstyrkingarnámskeið sem miða að því að styrkja þekkingu stelpna á hugtakinu sjálfsmynd ásamt því að leggja til leiðir sem þátttakendur geta notfært sér til þess að koma í veg fyrir neikvæða þróun á eigin sjálfsmynd. Kristín Tómasdóttir sér um þessi námskeið og kennir þau og byggir þau á bókunum sínum: Stelpur, Stelpur A-Ö, Stelpur geta allt og Stelpur - 10 skref að sterkari sjálfsmynd. Við töluðum við Kristínu í dag.

UMSJÓN: GUÐRÚN GUNNARSDÓTTIR OG GUNNAR HANSSON

Gunnhildur Una Jónsdóttir, þriggja barna einstæð móðir, var sett í raflostmeðferð við djúpu, óbærilegu þunglyndi. Meðferðin þótti takast vel en afleiðingarnar voru skelfilegar. Hún glataði minningum sínum, veruleikinn varð framandi og fortíðin ósamstæð og brotakennd. Gunnhildur Una sagði sögu sína í þættinum í dag, um það hvernig henni tókst að fóta sig á ný eftir áfallið, lýsir baráttunni við sjúkdóminn og leitinni að fortíðinni og sjálfri sér.

Þegar himinbirtan tekur að lýsa upp auðlindir jarðar og náttúru og fuglarnir leika undir með kvaki og krunki er tími „Fuglatónleika“ á næstu grösum. Tónskáldið Valgeir Guðjónsson myndar tón- og textabrú frá Eyrarbakka til Hveragerðis þar sem ljóðskáldið Jóhannes úr Kötlum hafði búsetu á fimmtu árlegu Fuglatónleikunum. Valgeir hefur gefið út þrjár plötur með lögum sínum við ljóð Jóhannesar, við ræddum um vorið, náttúruna og fugla við Valgeir í þættinum í dag.

Lesandi vikunnar í þetta sinn var Steinunn Jóhannesdóttir, rithöfundur og leikkona, en hún er ein sjö leikkvenna sem standa að flutningi Passíusálma Hallgríms Péturssonar í Hallgrímskirkju á föstudaginn langa. Við spurðum hana um hvaða bækur eru á náttborðinu hennar, hvað hún er að lesa þessa dagana og hvaða bækur og höfundar hafa haft áhrif á hana í gegnum tíðina.

UMSJÓN: GUÐRÚN GUNNARSDÓTTIR OG GUNNAR HANSSON

Föstudagsgestur Mannlega þáttarins í þetta sinn var leikkonan Halldóra Geirharðsdóttir. Undanfarið ár hefur verið viðburðarríkt hjá henni, þar sem kvikmyndin Kona fer í stríð, þar sem hún lék ekki bara eitt, heldur tvö aðalhlutverkin, gerði það gott víðs vegar um heiminn og gerir enn. Hún er svo að fara að frumsýna í kvöld leikritið Kæra Jelena í Borgarleikhúsinu, þar sem hún leikur einmitt kennslukonuna Jelenu. Halldóra sagði okkur frá því hvar hún er fædd og uppalin og hvernig leiðin lá yfir í leiklistina.

Sigurlaug Margrét Jónasdóttir, besti vinur bragðlaukanna, var hjá okkur með sitt vikulega matarspjall. Það líður að páskum því er tilvalið að tala um súkkulaði, hún fékk því Hafliða Ragnarsson bakarameistara til að fræða okkur um súkkulaði, það eru fáir sem vita meira um það.

UMSJÓN: GUÐRÚN GUNNARSDÓTTIR OG GUNNAR HANSSON

Í dag fá fulltrúar allra grunn- og leikskóla í Reykjavík afhenta 30.000 segla með áprentuðum upplýsingum um skjátíma barna og verður þeim dreift til allra leik- og grunnskólabarna í Reykjavík. Foreldrafélög í Breiðholti og skólastjórnendur hafa um árabil átt mjög gott samstarf um ýmis málefni og fyrir um þremur árum kom upp sú hugmynd að gera segul um skjátíma þar sem skjátímanotkun er stöðugt að aukast og foreldrar þurfa að kunna að umgangast þessa nýju tækni og vera börnunum fyrirmynd. Við fengum í heimsókn til okkar Birnu Sif Bjarnadóttur, skólastjóra Ölduselsskóla, Guðmund Magnús Daðason fyrir hönd foreldrafélaganna fimm í Breiðholti, Kjartan Helga Guðmundsson og Bríeti Glóð Pálmadóttur nemendur í Ölduselsskóla sem töluðu um hvaða áhrif það hefur að gera skólann símalausan.

Matur hefur mikinn mátt. Á síðustu árum hefur rannsóknum á tengslum mataræðis og ADHD fleygt fram. Í kvöld verður haldinn fræðslufundur ADHD samtakanna, þar sem Dr. Bryndís Eva Birgisdóttir, næringarfræðingur og Dr. Bertrand Lauth, geðlæknir fjalla um rannsóknir á tengslum ADHD og mataræðis. Hrannar B. Arnarsson, framkvæmdastjóri ADHD samtakanna var í símanum og sagði frekar frá.

Ása Baldursdóttir kom til okkar í dag og sagði okkur frá nokkrum áhugaverðum hlaðvörpum. Í síðustu viku voru það svikahrappar og morð, en í þetta sinn sagði hún okkur frá áhugaverðum hlaðvörpum sem fjalla um sófasérfræðinga, hlaðvarp um föður umsjónarmannsins, sem skrifa erótískar bókmenntir, og að lokum hlaðvarp sem fjallar um þær glímur sem nýbakaðar mæður þurfa að takast á við.

UMSJÓN: GUÐRÚN GUNNARSDÓTTIR OG GUNNAR HANSSON

MANNLEGI ÞÁTTURINN MIÐVIKUDAGUR 10.APRÍL 2019

UMSJÓN: GUÐRÚN GUNNARSDÓTTIR OG GUNNAR HANSSON

Eva Bryndís Ágústsdóttir, 16 ára Hafnfirsk stúlka ætlar að ganga hringveginn um landið í sumar, og gott betur, til að safna áheitum fyrir Barnaspítala Hringsins. Með þessu vill hún sýna spítalanum og starfsfólki hans þakklæti, en bróðir hennar, Brynjar Óli, er hjartveikur og hefur þurft að stóla á þjónustu spítalans. Þau systkini, Eva Bryndís og Brynjar Óli koma í þáttinn í dag, en samkvæmt óvísindalegri könnun Mannlega þáttarins verður Eva Bryndís ekki bara yngsti Íslendingurinn, heldur líka fyrsta konan til að ganga hringveginn. Með þeim kom líka móðir þeirra, Berglind Sigurðardóttir.

Fólk sem haldið er félagsfælni hverfur frekar frá námi án þess að ljúka því, þénar minna en aðrir og missir af ýmsum tækifærum í lífinu. Góðu fréttirnar eru þær að hægt er að venja fólk af félagsfælni á stuttum tíma. Bergljót Baldursdóttir ræðir við Sóleyju Dröfn Davíðsdóttur, sálfræðing um félagsfælni og meðferð við henni á Heilsuvaktinni í dag.

VIð viljum líka sinna ábendingum frá hlustendum í Mannlega þættinum. Við fengum bréf frá hlustanda sem vildi endilega fá leiðbeiningar um hvernig flokka ætti ruslið og lét fylgja með að svo margir sem hún þekkti ættu í basli með þetta. Flestir vilji flokka en vita ekki hvernig því þetta virðist ruglingslegt og misjafnt milli sveitarfélaga. Á td að láta plast saman í poka með öðru rusli eða beint útí. Álið af jógúrt dollunni , gler krukkur , og svo baðvörurnar, hár í hárburstanum - sjampó brúsana og klósettrúlluna... Við fáum hana Rakel Garðarsdóttur til að leiðbeina okkur með þetta hér á eftir.

Við fengum Ragnheiði Sveinþórsdóttur í þáttinn, en hún er móðir níu ára drengs sem fæddist með skarð í gómi. Sjúkratryggingar Íslands hafa neitað greiðsluþáttöku vegna kostnaðar tannréttingameðferðar drengsins og ferðakostnaðar, en fjölskyldan býr í Vestmannaeyjum. Ragnheiður sagði sögu þeirra og hvar málið stendur í dag.

Saga háriðna á Íslandi er aldarspegill. Hún varpar ljósi á nútímavæðingu íslensks samfélags, innreið hreinlætis- og tískuvitundar og viðleitni smáþjóðar til að tilheyra alþjóðasamfélaginu. Þorgerður Þorvaldsdóttir og Bára Baldursdóttir fjalla um kynjaða menningu háriðnar á Íslandi í sérstöku erindi sem þær kalla „Að lækna heilaþreytu, krulla, klippa og raka - kynleg menning á rakara- og hárgreiðslustofum“ sem þær byggja á bók sinni Krullað og klippt, sem kom út á síðasta ári. Þær komu í þáttinn í dag.

Minkar eru af flestum taldir miklir skaðvaldar í náttúru Íslands og stafar t.d. fuglalífi hætta af hinu mikla drápseðli minksins. Kristín Einarsdóttir, okkar kona á Ströndum, hitti Guðbrand Sverrisson bónda á Bassastöðum sem hefur stundað minkaveiðar frá unglingsárum og hann heldur því fram að mun skemmtilegra sé að veiða mink en t.d. lax.

UMSJÓN: GUÐRÚN GUNNARSDÓTTIR OG GUNNAR HANSSON