"Exorzismus" heescht dat neit Wierk vum Pit Dahm. Dee 27 Joer jonke Lëtzebuerger Perkussionist huet et ufanks fir sech selwer komponéiert an et och fir säin eegene Studienofschloss zu Salzburg am Mäerz 2025 gespillt. Den Titel stoung scho laang fest, éier hien iwwerhaapt mat den Nouten ugefaangen huet. Elo gouf säi Wierk och fir d'ARD International Music Competition erausgesicht. Dat heescht, zu München am September 2026, wäerten d'Kandidatinnen an d’Kandidate vun deem Concours et als Imposé spillen.