Wëllkomm zréck an der Poterkëscht!

Haut lauschtere mir zwou Persounen no, déi iwwer hir berufflech a privat Pläng fir d'Zukunft schwätzen.

Vill Spaass beim Nolauschteren!

---

Transkript:

Kelly: Moie Gilles! An, wéi leeft et mat dengem Engleschcours?

Gilles: Salut! Ma gutt, merci! Ech gi jo dräimol d’Woch an de Cours an hu scho vill Saache geléiert. Et ass awer zimmlech intensiv an ech muss vill doheem léieren. Mee ech wëll onbedéngt an engem Joer fléissend Englesch schwätzen, fir meng Aarbechtskolleege besser ze verstoen.

Kelly: Jo, eng Sprooch léieren ass net esou einfach. Du hues jo awer e konkreet Zil an dat ass gutt fir d’Motivatioun. Et ass bestëmmt och e Virdeel fir deng berufflech Karriär. Vläicht wëlls de jo eemol am Ausland schaffen! Ech wëll mech elo och e bësse weiderbilde fir meng Aarbecht.

Gilles: Dat ass ëmmer eng gutt Iddi! A wat fir eng Richtung dann?

Kelly: Ech schaffen elo schonn dräi Joer a menger Entreprise an ech hätt gär méi Responsabilitéit. Dofir muss ech awer nach e puer Saache léieren. Ech hu virun e puer Deeg um Internet eng interessant Formatioun am Beräich Project Management gesinn. Déi gesäit interessant aus.

Gilles: Ma da mell dech do un! Do léiers de bestëmmt vill Saachen.

Kelly: Jo, dat sécher. Ech muss just kucken, ob ech genuch Zäit dofir hunn. Ech hunn nämlech och nach e perséinlecht Zil - mäi Frënd an ech wëllen eis Enn des Jores bestueden.

Gilles: Wow, Gléckwonsch! Da sidd dir bestëmmt schonn déck amgaang ze plangen.

Kelly: Jo, et gëtt immens vill z’organiséieren, well dem Giuseppe seng Famill jo an Italie wunnt.

Gilles: Dat gleewen ech. Et ass ni einfach, eng Hochzäit z’organiséieren, mee et gëtt bestëmmt e wonnerbaren Dag.

Kelly: Dat sinn ech mer sécher. Du wäerts deemnächst natierlech och eng Invitatioun geschéckt kréien!

Gilles: O, da sinn ech awer elo gespaant!

Wëllkomm zréck an der Poterkëscht!

Haut lauschtere mir zwou Persounen no, déi eppes iwwer hir Fräizäitaktivitéiten erzielen.

Vill Spaass beim Nolauschteren!

---

Transkript:

Dialog Hobby: Chouer 

Alex: Zoé, du bass dach an engem Chouer. Ech wëll nees méi sangen a sichen hei zu Lëtzebuerg e Chouer. Ech hu schonn Erfarung, well ech zu Budapest siwe Joer an enger Chorale war.  

Zoé: Jo, ech sinn an der Chorale Florale zu Ierpeldeng. Ech sinn immens frou do! 
Mir hu Sängerinnen a Sänger vun all Alter, vun ongeféier 16 Joer bis ca. Enn 70. Et ass kee professionelle Chouer, mee jiddereen ass immens engagéiert. 

Alex: Flott! A wat sangt dir do? 

Zoé: Vun allem. Mir sange gär klassesch Chouermusek, mee heiansdo och méi modern Stécker. 

Alex: Ass den Dirigent léif? 

Zoé: Mir hunn eng Dirigentin! D’Emilie ass immens léif a kompetent! Hatt ass Gesangsproff am Conservatoire an der Stad. 

Alex: Cool! Wéini prouft dir? 

Zoé: Donneschdes owes vun 19.30 bis 21.30 an engem Sall an der Musekschoul zu Ierpeldeng. Zwee Mol d’Joer maache mir och Proufweekender a bereeden eis op eis Concerte vir.  

Alex: Dat kléngt wierklech flott! Kann ech schonn den nächsten Donneschdeg laanschtkommen? 

Zoé: Gär! Et feelen eis nach Männerstëmmen...! 

Dialog Hobby: Fitness

Speakerin: Wëllkomm an der Poterkëscht. Mir hunn haut de Fränk virum Mikro.

Fränk: Moien. Merci fir d'Invitatioun!

Speakerin: Méchs du gär Sport?

Fränk:  Jo! Ganz gär. Zënter zwee Joer, maachen ech reegelméisseg Fitness.

Speakerin: Flott. Gees du zesumme mat anere Leit a Coursen?

Fränk:  Nee. Ech trainéieren eleng mat engem Trainer. Ech maache gär Sport an enger Ekipp, mee Fitness maachen ech gär eleng. Den Trainer ka sech da just op mech konzentréieren an den Training adaptéieren.

Speakerin: Ech verstinn. Wéi oft gees du dann?

Fränk:  Ech hu leider net vill Zäit. Ech ka just zwee Mol d'Woch goen.

Speakerin: Trainéiers du moies oder owes?

Fränk:  Méindes fänkt mäin Training um 14:30 Auer nomëttes un. An donneschdes fänken ech um 9:00 Auer moies un.

Speakerin: Wéi laang dauert dann eng Seance?

Fränk: Mäin Training ass ganz intensiv. No 45 Minutten ass de Programm mat mengem Trainer fäerdeg. Déi lescht Véierel Stonn maachen ech dann eleng nach e bësse Cardio Training.

Speakerin: Wat méchs du da genau, mat dengem Trainer.

Fränk: Ech maache ganz oft Kraafttraining. Dat heescht Muskulatioun, mat Gewiichter. Heiansdo trainéiere mir de Réck, heiansdo d'Been, heiansdo d'Äerm asw. 1-2 Mol de Mount, maache mir e Cardiotraining, wou mir lafen, sprangen oder boxen.

Speakerin: Dat ass bestëmmt flott, mee awer och ustrengend. 

Fränk: Definitiv. Ech hu ganz dacks Muskelkater. Mee ech maachen et gär. Dat ass gutt fir meng Gesondheet.

Speakerin: Wat méchs du dann net gär um Training?

Fränk: Ech lafen net gär um Training. Ech ka jo och eleng de Weekend jogge goen. Um Training schaffen ech gär mat de Maschinnen. Dat kann ech net doheem maachen.

Speakerin: Merci, fir deng Zäit! Äddi an nach vill Gléck!

Fränk: Villmools Merci. Dat ass léif. Äddi.

Wëllkomm zréck an der Poterkëscht.

Haut hu mir e speziellen Episod: Mir trainéieren zesummen d'Aussprooch (Prononciatioun) vun de Vokaler.

Vill Spaass beim Nolauschteren!

---

Transkript:

Am Lëtzebuergeschen hu mir dës Vokaler: i, u, e, o, a.

Dozou gehéieren och d'Ëmlauter mat Treema: a mat Treema: ä, e mat Treema: ë, o mat Treema: ö, u mat Treema: ü.

Elo trainéiere mir d'Aussprooch zesummen. Ech soen d'Lauter fir d'éischt an dir schwätzt haart no: i, u, e, o, a, ä, ë, ö, ü.

Heiansdo schwätze mir d'Vokaler laang aus:  

[i:] wéi bei siwen an heiansdo kuerz:  [i] wéi bei siwwenzéng.

siwen – siwwenzéng.

laang: [u:] wéi bei Tut – kuerz: [u] wéi bei Buch 

Tut – Buch 

laang: [e:] wéi bei Meter – kuerz: [e] wéi bei Méck

Meter – Méck

laang: [o:] wéi bei Fro – kuerz: [o] wéi bei Posch 

Fro – Posch 

laang: [a:] wéi bei Dag – kuerz: [ɑ] wéi bei Ball

Dag – Ball

laang: [ɛ:] wéi bei lämen – kuerz: [æ] wéi bei Äddi

lämen – Äddi

Den “ë” existéiert net als laange Vokal. Mir prononcéieren e just kuerz: [ə] wéi bei Fësch

Fësch.

laang: [ø:] wéi bei Fön – kuerz: [ø] wéi bei Ökolog

Fön – Ökolog

laang: [y:] wéi bei Süden – kuerz: [y] wéi bei Küst

Süden – Küst

Wëllkomm zréck an der Poterkëscht!

Haut héiere mir en Dialog tëscht dem Laurent an dem Anne, déi iwwer hir lescht Vakanz schwätzen (Niveau A2.2).

Vill Spaass beim Nolauschteren!

---

Transkript:

Anne: Hallo Laurent, wéi war deng Vakanz? Du waars dach mat denge Kanner ënnerwee, oder?

Laurent: Jo! Mir si fir zwou Woche mam Auto an Holland op d’Küst gefuer. Et war wierklech flott, an d’Kanner hate vill Spaass op der Plage.

Anne: Dat kléngt jo super! A wéi war d’Wieder?

Laurent: Zimmlech gutt. Et huet zwar e puer Deeg gereent, mee allgemeng hate mir Chance mam Wieder.

Anne: A sou. Wat hutt dir dann alles gemaach?

Laurent: Mir si vill mam Vëlo gefuer a mäin eelsten ass mam Draach geflunn. Wéi et gereent huet, si mir an eng Schwämm gefuer an d’Kanner ware begeeschtert!

Anne: Cool! An owes?

Laurent: An Holland ginn et vill Restaurante mat Spillplazen. Do kënnen d’Kanner dobausse spillen an d’Elteren hunn eng kleng Paus a kënnen och e bësse matenee schwätzen. An du, waars du och fort?

Anne: Jo, ech war fir e verlängerte Weekend op Berlin. 

Laurent: A, mat Frënn?

Anne: Nee, ech war eleng. Meng bescht Frëndin huet kee Congé kritt.

Laurent: O, schued. Mee et war bestëmmt awer flott! Zu Berlin kann ee jo vill maachen.

Anne: Genee! Ech war a vill Muséeën an ech hu vill kulturell an historesch Plaze besicht. 

Laurent: Dann hues de bestëmmt och vill Fotoe gemaach!

Anne: Jo, ech hunn esouguer een Owend eng Visite guidée mat engem Fotograf gemaach. Do hunn ech geléiert, wéi een am beschte Fotoe vun enger Stad mam Handy mécht.

Laurent: Wow, dat kléngt wierklech interessant. Déi muss de mir dann eng Kéier weisen! Bass de mam Fliger geflunn?

Anne: Nee, ech hunn den Zuch geholl. Dat war méi bëlleg an et ass och méi nohalteg. Ech si just eng Kéier zu Köln ëmgeklomm.

Laurent: Hat däin Zuch da keng Verspéidung?

Anne: Nee, et huet glécklecherweis alles geklappt. Ech hat Chance! Komm, ech weisen dir emol e puer Fotoen.

Wëllkomm zréck an der Poterkëscht!

Haut héiere mir zwou Weebeschreiwungen. Fir d'éischt lauschtere mir en Dialog am Hotel, an duerno héiere mir eng Weebeschreiwung am INLL (Niveau A2.1).

Vill Spaass beim Nolauschteren!

---

Transkript:

Check-in am Hotel

Cliente: Gudde Mëtteg! Ech hunn eng Reservatioun op den Numm Hoffmann.

Receptionnist: Gudde Mëtteg, Madamm Hoffmann! Wëllkomm am Hotel Schéi Vue. Kann ech Är Carte d’identité gesinn, wannechgelift?

Cliente: Jo, kee Problem, hei ass de.

Receptionnist: Merci! Ok. Ech gesinn, dir hutt en Eenzelzëmmer fir zwou Nuechte reservéiert. Ass dat richteg?

Cliente: Jo. 

Receptionnist: Perfekt. Äert Zëmmer ass och scho prett. De Kaffi gëtt moies vu siwe bis zéng Auer an eisem Restaurant zerwéiert.

Cliente: Wou ass de Restaurant, wannechgelift?

Receptionnist: Dir gitt hei no lénks duerch d’Bar an dann déi éischt Dier no riets.

Cliente: Merci. Gëtt et och e Fitness?

Receptionnist: Jo, deen ass am Sous-soul am Wellnessberäich. Fir dohin ze komme gitt dir hei d’Trap erof oder dir huelt de Lift. De Fitness ass vu moies siwe bis owes zéng Auer op.

Cliente: A flott, et gëtt och e Wellness!

Receptionnist: Jo, dee kascht awer 15€ Supplement pro Dag. 

Cliente: Jo, dat ass an der Rei. Gutt, da ginn ech elo op mäin Zëmmer.

Receptionnist: Hei ass är Zëmmerkaart. Dir hutt d’Zëmmer 527, dat ass um fënnefte Stack. Dofir huelt Dir am beschten hei de Lift. Wann dir dann uewen erausklammt, gitt dir no riets de Gank erof an Äert Zëmmer ass op der lénkser Säit.

Cliente: Gutt, Villmools Merci!

Receptionnist: Gär! Awar.

Weebeschreiwung am INLL

Apprentant: Moien! Ech hunn eng Fro, wgl. Mäi Cours fänkt haut un an ech weess net, wou mäi Sall ass. Kënnt dir mir hëllefen, wgl.?

Sekretariat: Jo, natierlech. Wat fir e Sall sicht dir dann?

Apprenant: De Sall 237. 

Sekretariat: O jo, deen ass net einfach ze fannen. Also fir d’éischt gitt Dir hei déi grouss Trap erop bis op den zweete Stack. Da gitt dir no lénks de Gank erof, an dann nach eng Kéier no lénks. De Sall 237 ass déi drëtt Dier op der rietser Säit. 

Apprenant: O jee, ech hoffen ech fannen dat. Ech wëll mir awer och nach virum Cours e Kaffi siche goen. Gëtt et hei am INL eng Cafeteria?

Sekretariat: Jo, déi ass ganz einfach vun hei aus ze fannen. Dir gitt elo hei um Rez-de-chaussé no lénks an dann d’Trap erof op de -1, an da riichtaus. Da sidd dir an der Kantin! 

Apprenant: Super! Da ginn ech nach séier viru mengem Cours laanscht. Merci!

Sekretariat: Gär geschitt! An iwwregens, dir kënnt am Keller och einfach de Lift op den zweete Stack huelen. Dir musst awer da fir d’éischt iwwert de Gank bis op déi aner Säit vum Gebai goen. 

Apprenant: An der Rei, Merci!

Wëllkomm zréck an der Poterkëscht!

Haut lauschtere mir fir d’éischt dem Aicha no. Hatt erzielt eis eppes iwwer sech. Duerno héiere mir en Dialog tëscht zwou Persounen, déi sech kenneléieren an e Rendez-vous ausmaachen.

Vill Spaass beim Nolauschteren!

---

Transkript:

Monolog

Moien!  
Mäin Numm ass Aicha Ismaali. Ech kommen aus Tunesien, vu Monastir. Ech schwätzen Arabesch, Franséisch an e bëssen Englesch. Zënter dräi Méint léieren ech dräi Mol d’Woch, vun 10.10 bis 11.50, am INLL Lëtzebuergesch. 
Ech si bestuet an hunn zwee Kanner, zwee Meedercher. Mäi Mann ass och Tuneesier. Hien ass Kach an engem Restaurant um Knuedler an der Stad. 

Dialog

Tom: Moien! Ech sinn den Tom. Wéi heeschs du?

Lisa: Salut Tom! Ech sinn d’Lisa. Et freet mech, dech kennenzeléieren!

Tom: Et freet mech och! Studéiers du och hei?

Lisa: Jo, ech studéiere Psychologie. An du?

Tom: Ech studéieren Informatik. Vu wou kënns du, Lisa?

Lisa: Ech kommen aus der Belsch, vun Arel. An du, vu wou kënns du?

Tom: Ech kommen aus England, vu Manchester. 

Lisa: Dat ass awer wäit!

Tom: Dat stëmmt. Mee et ass flott, nei Leit kennenzeléieren. Wunns du scho laang zu Lëtzebuerg?

Lisa: Ech wunnen net zu Lëtzebuerg. Ech wunnen zu Arel. Ech kommen all Dag mam Zuch op d’Uni. An du?

Tom: A sou! Ech wunnen eréischt zënter dräi Méint hei zu Lëtzebuerg. Et ass nach alles ganz nei fir mech.

Lisa: Ech gleewen! Wann s de wëlls, kann ech dir e puer flott Plazen hei an der Géigend weisen.

Tom: Dat wier flott, Lisa! Komm, mir maachen dat!

Lisa: Super! Wéini hues du Zäit?

Tom: Wéi wier et e Samschdeg um 14 Auer?

Lisa: Perfekt! Treffe mer eis hei bei der Uni?

Tom: Jo, dat kléngt gutt. Ech freeë mech!

Persoun B: Ech mech och! Bis e Samschdeg, Tom!

Persoun A: Bis e Samschdeg, Lisa! 

Wëllkomm an der Poterkëscht!

Haut schwätze mir iwwer d’Theema Wunnengssich (A2.1). De Marc sicht eng nei Wunneng, an d’Sarah kann him villäicht hëllefen.

Vill Spaass beim Nolauschteren! 

---

Transkript:

Sara: Salut! An, wéi leeft et mat der Wunnengssich?

Marc: Hey! Pff, et ass wierklech net einfach. Ech hu schonn e puer Annoncë gekuckt, mee ech fannen einfach net dat Richtegt.

Sara: Dat ass awer blöd. Mee ech kann der vläicht hëllefen. E Kolleeg vu mer plënnert deemnächst, an ech mengen, seng Wunneng kéint eventuell passen.

Marc: Ou? Dat kléngt interessant! Hues du e puer Infoen iwwert d’Wunneng?

Sara: Jo. Se huet zwee Schlofzëmmer, eng grouss Kichen an e klengt Buedzëmmer. Se läit an engem rouegen Eck zu Märel an ass gutt mat den ëffentlechen Transportmëttel verbonnen. Se läit net wäit ewech vum Märeler Parc an et sinn och e puer Butteker an der Géigend. Just eng Parkplaz gëtt et mengen ech keng. 

Marc: Dat héiert sech jo scho mol gutt un. Eng Parkplaz brauch ech net, ech hu jo keen Auto. Weess de och, wéi héich de Loyer ass?

Sara: Ech mengen, de Loyer ass zimlech fair fir d’Lag an d’Gréisst vun der Wunneng. Ech denken, dat wier an dengem Budget.

Marc: Cool! Dat kléngt wierklech gutt. Kanns du mer dengem Kolleeg seng Nummer ginn?

Sara: Kloer, ech schécken der se direkt. Wann s de eng Fro hues, fro hien einfach. Et ass fir hien och bestëmmt méi einfach, wann hien dem Proprietär direkt en neie Locataire virstelle kann.

Marc: Definitiv. Ok, Merci! Ech melle mech da bei dengem Kolleeg a kucke mat him e Rendez-vous auszemaache fir d’Wunneng kucken ze goen.

Sara: Gär! A wann s de Hëllef beim Plënnere brauchs, mell dech roueg.

Wëllkomm an der Poterkëscht!

Haut lauschtere mir zwee Dialoger (Niveau A2.1) op ëffentleche Plazen. Fir d’éischt si mir am Restaurant an duerno op der Bank.

Vill Spaass beim Nolauschteren!

---

Transkript:

Am Restaurant

Client & Cliente: Gudden Owend!

Client: Kéinte mir d’Menüskaart kréien, wannechgelift?

Serveur: Gudden Owend! Jo, natierlech. Hei ass se.

Client: Merci. Wat kënnt Dir eis recommandéieren?

Serveur: Eis Pizzae si ganz beléift. Mir hunn awer och hausgemaachten Nuddelen. Oder hätt dir léiwer gär e Bifdeck?

Client: Nee, fir mech kee Fleesch, ech si Vegetarier. Dann huelen ech eng Pizza. Mat Oliven a Champignonen, wannechgelift.

Serveur: Eng Pizza mat Oliven a Champignonen… dat ass notéiert. A fir Iech, Madamm?

Cliente: Ech hätt gär eng Portioun Spaghetti Carbonara. Déi hat ech schonn e puer Mol hei, se ass wierklech exzellent, wéi an Italien!

Serveur: An eemol Spaghetti Carbonara… Gudde Choix! Hätt dir och gär eng kleng Zalot dobäi?
Cliente: Jo, gär! Mee ouni Nëss, wannechgelift, ech sinn dorop allergesch!

Serveur: Kee Problem, ech soen der Kiche Bescheed. A fir ze drénken?

Client: Fir mech e Spruddelwaasser, wannechgelift.

Serveur: E Spruddelwaasser… Kleng oder grouss?

Client: Grouss! Mir deelen eis eng Fläsch, oder?

Cliente: Jo! Ech huelen awer och nach eng Kippchen als Aperitif, wannechgelift.

Serveur: E grousst Spruddelwaasser an eng Kippchen… Tipptopp! Ech bréngen Iech d’Gedrénks direkt.

Client & Cliente: Merci!

Op der Bank 

Client: Bonjour! Ech géif gär e Kont opmaachen. Sinn ech hei richteg?

Employée: Gudde Mëtteg! Jo, huelt iech Plaz, wannechgelift. Wësst Dir schonn, wat fir e Kont Dir gär opmaache géift?

Client: Jo, ech denken, e ganz normale Compte courant geet fir de Moment duer.

Employée: An der Rei. Dofir bräicht ech e puer Dokumenter. Hutt Dir Är Carte d’identité dobäi?

Client: Jo, ee Moment … Hei ass se.

Employée: Villmools Merci. Hutt dir och e Certificat de résidence?

Client: Jo, natierlech. Hei ass en.

Employée: Perfekt. Voilà, elo musse mer just nach e Formulaire ausfëllen. Wéi ass Ären Numm, wannechgelift?

Client: Mäin Numm ass Christian Marchetti.

Employée: Wéi schreift een Äre Familljennumm?

Client: M-A-R-C-H-E-T-T-I.

Employée: Merci. Da bräicht ech och nach eng Telefonsnummer.

Client: Meng Nummer ass 00 352 621 12 23 34.

Employée: Merci. Et dauert elo Moment, bis Äre Kont op ass. Dir kritt Är Bankomatskaart an Äre PIN-Code an e puer Deeg mat der Post heemgeschéckt. Braucht Dir och eng Kreditkaart?

Client: Nee, fir de Moment net. Mee eng Fro hunn ech nach: hunn ech och Accès op den Online-Banking?

Employée: Ech kann Iech dat fräischalten, wann Dir wëllt … Sou, et ass gemaach. Et kann awer e puer Deeg daueren, bis den Accès funktionéiert. Hutt Dir schonn en Token?

Client: Jo, an ech hunn och d’App.

Employée: Perfekt! Dir kënnt och d’Gratis-App vun eiser Bank eroflueden, da kënnt dir ëmmer an iwwerall ganz einfach Accès op Äre Kont hunn an och ënnerwee Viremente maachen.

Client: Dat ass praktesch, dat maachen ech. Merci fir Är Hëllef!

Employée: Service. Nach e schéinen Dag!

Client: Merci gläichfalls!

Wëllkomm am éischten Episod vun der Poterkëscht!

Haut léiert dir e puer nëtzlech Informatiounen, déi dir an ärem Lëtzebuergeschcours gebrauche kënnt.

Vill Spaass beim Nolauschteren!

---

Transkriptioun:

Hei e puer Sätz, wann d'Apprenantë mam Proff schwätzen:

-      Entschëllegt, ech hunn eng Fro.

-      Wéi seet een … op Lëtzebuergesch? 

-      Wat heescht... ?

-      Ech verstinn dat net.

-      Kënnt dir dat widderhuelen, wgl.?

-      Kann ech eng Kopie kréie wgl.?

-      Ech wëll d'Ecoute nach eng Kéier lauschteren wgl.

Hei e puer Sätz, wann d'Apprenantë mat anere Kolleegen an der Klass schwätzen:

-      Hues du e Blat fir mech?

-      Kanns du mir e Bic léine wgl.?

-      Kanns du mir hëllefen?

-      Merci!

-      Gär geschitt!

Hei e puer Sätz, wann de Proff mat den Apprenantë schwätzt:

-      Schwätzt zu zwee.

-      Schwätzt an der Grupp.

-      Schwätzt mat Ärem Noper oder mat Ärer Nopesch.

-      Liest den Text.

-      Liest zu zwee.

-      Lauschtert d'Ecoute.

-      Kombinéiert.

-      Schreift oder notéiert.

-      Kräizt un.

-      Ënnersträicht.

-      Huelt d'Buch op der Säit ...

-      Maacht d'Buch op.

-      Maacht d'Buch zou.

-      Stitt op wgl.

-      Sëtzt iech wgl.

-      Schafft zu zwee.

D'Poterkëscht kënnt geschwënn.