Evolutioun an d‘21. Joërhonnert
Carte blanche vum Laurent Schley op RTL-Radio
18.02.2019

D’läscht Woch war den 12. Februar, deen Dag also op deem den Charles Darwin 210 Joer gefeiert hätt. Säi bekannteste Buch, „On the origin of species“, kritt dëst Joer 160 Joer. An deem Buch gouf d’Evolutioun erklärt, wéi aus einfachem Liewen konnt komplext Liewen entstoen; eng Erklärung, déi mir haut als Evolutiounstheorie kennen. Puer Gedanken dozou vum Dr. Laurent Schley, Biolog a President vun der Allianz vun Humanisten, Atheisten an Agnostiker, kuerz AHA, a sénger Carte blanche mam Titel „Evolutioun an d’21. Joërhonnert“.

Wat sinn d’Haaptaspekter vun der Evolutioun? Während der Bildung vun de Keimzellen - beim Mënsch wieren dat d’Eezelle bei der Fra an d’Spermatozoidë beim Mann - kënnt et am Ierwmaterial ADN zu zoufällege Verännerungen. Duerch dës sougenannte Mutatiounen kënnt et bei enger Art zu enger héiger geneetëschter Vielfalt beim Nowues. Op dës Vielfalt wierkt dann d’natierlech Selektioun, een net-zoufällege Prozess, bei deem éischter déi Individuen iwwerliewen, di am beschten un di jeweileg Liewensbedingungen ugepasst sinn, an sou kënnen hiert Ierwmaterial un di nächst Generatioun wiederginn. Iwwert zegdausende Generatioune veränneren sech sou Aarten an et entstinn neier.

Well de Mënsch Deel, wann och nëmmen e ganz winzegen, vun där joermilliardelaanger Entwécklung ass, hu sech divers Reliounsvertrieder vun Ufank un géint dem Darwin säi Buch gewiert an acceptéiere bis haut d’Evolutioun als Prozess respektiv d’Evolutiounstheorie als Erklärung fir dee Prozess net. Meeschtens gëtt dann d’Evolutioun fälschlécherweis als reng zoufällege Prozess duergestallt, an deen net-zoufällegen Aspekt vun der natierlecher Selektioun gëtt bewosst op der Säit gelooss. Bei der läschter mir bekannter wëssenschaftlecher Etude, wou Lëtzebuerg mat abezu war, aus dem Joer 2006, hunn nach ëmmer ee Véierel vun de Lëtzebuerger uginn, d’Evolutioun net als wëssenschaftéche Fakt unzegesinn. Dramatesch eigentlech.
 
Och haut nach gëtt et an Europa regelméisseg Versich, d’Opklärung iwwert d’Evolutioun ze verhënneren. Während ech dës Zeile schreiwen, hunn ech eng News gelies, laut där an enger englescher Grondschoul d’Opféierung vun engem Schüler-Musical iwwert den Charles Darwin ofgesot gouf, well sech eng Handvoll reliéis Elteren géint déi Opféierung gewiert haten.



D’Gesellschaft däerf sech vu sou Leit net erpresse loossen a muss onbedéngt mat nach méi Opklärung, Wëssensvermëttlung a Wëssenschaft géigesteieren. Och an der Grondschoul zu Lëtzebuerg sollt dofir am Éveil aux sciences systematesch iwwert d’Thema Evolutioun an d’Evolutiounstheorie geschwat ginn. Kannergerecht Léiermaterial, wéi z.B. dat op www.evokids.de, ass schonn disponibel. Wat gëtt et méi Schéines wéi als Mënschen, a firwat net schonn als Kanner ze verstoen, wou mir tatsächlech hierkommen, als Deel vun engem joermilliardelaange Prozess, deen zu där wonnerbarer Diversitéit vun Déieren, Planzen an aneren Organismen gefouert huet, dee mir haut nach op eisem Planéit hunn a vun där mir een Element sinn.


Allianz vun Humanisten, Atheisten an Agnostiker Lëtzebuerg a.s.b.l. (AHA), www.aha.lu

Mitglied International Humanist and Ethical Union (IHEU)
Mitglied European Humanist Federation (EHF)
Mitglied Alliance for a Secular Europe
Mitglied Cercle de Coopération des Associations laïques (CCAL)

"Jo, och haut gëtt nach gelies." Dës vläicht iwwerraschend, sécher awer berouegend Erkenntnis hat de Luc Marteling, wéi en elo eemol owes mat e puer Kolleegen iessen goung ...

De Méinde war den Internationalen Dag vun de Fraen a Meedercher an der Wëssenschaft, den Dënschden ass mam Darwin Day dem grousse Naturalist Charles Darwin säin 210. Gebuertsdag gefeiert ginn. Gëschter war den Dag vun alle Verléiften. Wéi passt dat alles beieneen? A senger Carte blanche erzielt de Patrick Michaely vun enger enttäuschter Léift...

De Méinde war den Internationalen Dag vun de Fraen a Meedercher an der Wëssenschaft, den Dënschden ass mam Darwin Day dem grousse Naturalist Charles Darwin säin 210. Gebuertsdag gefeiert ginn. Gëschter war den Dag vun alle Verléiften. Wéi passt dat alles beieneen? A senger Carte blanche erzielt de Patrick Michaely vun enger enttäuschter Léift...

2009 war Darwin-Joer. Weltwäit ass den 200. Gebuertsdag vun dësem groussen Naturalist gefeiert ginn. Mat vill Asaz a Kommunikatioun ass versicht ginn, dem Darwin säi Wierk dem Public méi no ze bréngen. Net just Schüler ware viséiert, mä och Decideuren aus Politik, Gesellschaft, Kultur an natierlech de Wëssenschafte selwer. “Méi evolutionär denken”, war deemools de Mot d’ordre.

Dobäi kënnt, datt d’Evolutiounstheorie op ville Plazen als e perfekt Beispill vun engem rationalen Denke presentéiert gouf – wat se iwwregens och ass. Hannert dee Fändel stellt ee sech natierlech gären. Wie wëll net als e fortschrëttlech denkende Mënsch considéréiert ginn, deen en plus nach rational handelt? Elo géif ee sech tatsächlech erwaarden, datt all dës an den Darwin verléiften Decideuren och d’Fuerschung hannert der Theorie mat Iwwerzeegung a Mëttelen ënnerstëtze géifen. A senger Evolutiounstheorie erkläert den Darwin nämlech fir d’éischt eemol dat komplizéiert Zesummespill vu Variatioun, Verierwung, Selektioun, Zäit an Upassung an domadder déi laang Geschicht vum Liewen op onsem Planéit. D’Theorie erkläert och, firwat an Zäite vu rapidem Klimawandel onzieleg Aarten op eemol fir ëmmer verschwannen. Wann et net déi onmëttelbar Zerstéierung vum Liewensraum ass, dann ass et, well se sech net méi mat Zäiten un déi verännert Bedingungen upasse kënnen. Ze fuersche gëtt et also vill.

Wéi steet et also 10 Joer nom Darwin-Joer ëm d’ëffentlech Ënnerstëtzung an Unerkennung vun Evolutiouns- a Biodiversitéitsfuerschung wéi se zum Beispill am Naturmusée hei zu Lëtzebuerg gemaach gëtt? Ma net immens! Esou eng Fuerschung ass opwenneg, si dauert laang a bréngt vun engem ekonomesche Point de vue par rapport zu den héich dotéierten High-Tech-Wëssenschafte seele vill an, ausser Wëssen an d’Gewëssheet, datt et ëm de Patrimoine naturel zu Lëtzebuerg net gutt bestallt ass. Insekten- a Vulle verschwannen och bei ons mat Vitesse grand V vun der Bühn vum Liewen.

Evolutiounsfuerschung huet an der Intelligent-Design-Welt vun der Techno Science, wou Industriedenken a Weltraum-Eruerwerungsgelüster predominéieren keng Plaz. Fir eent vun de räichste Länner vun der Welt ass dat en traurege Constat.

Wat huet dat elo mam Internationalen Dag vun de Fraen a Meedecher an de Wëssenschaften ze dinn? Ma wat soll ech dann elo engem jonke Meedche roden, dat mat vill Enthusiasmus un den Aktivitéite vum Naturmusée deelhëlt, kee mat vill Opwand a Geld finanzéierte Science Festival verpasst an deem säi gréisste Wonsch et ass, op de Spure vum Darwin ze wandelen, Fuerscherin ze ginn an d’Welt ze retten?
Vergiess et, maach léiwer en MBA a géi Satellite verkafen? D’ass wéi wann den Darwin de Kuerf kritt hätt. Enttäuschte Léift.

* De Patrick Michaely ass vu Formatioun Biochemiker an am Naturmusée responsabel fir Ëffentlechkeetsaarbecht a Kommunikatioun.

Am Commentaire vun haut, op Vältesdag, geet et just am wäitste Sënn ëm Léift!
Den Eric Ewald befaasst sech doran nämlech mat sozialen Diskussiounen an eisen zwee groussen Nopeschlänner.

Wisou si souvill méi Jugendlecher, obschonn se schaffe ginn, hei zu Lëtzebuerg méi aarm wéi soss an der EU? A wien ass hei zu Lëtzebuerg besonnesch betraff?
Mir kënnen dat ännere, wa mer wëllen, seet de Robert Urbé vu Caritas Lëtzebuerg a senger Carte blanche.

Wisou si souvill méi Jugendlecher, obschonn se schaffe ginn, hei zu Lëtzebuerg méi aarm wéi soss an der EU? A wien ass hei zu Lëtzebuerg besonnesch betraff?
Mir kënnen dat ännere, wa mer wëllen, seet de Robert Urbé vu Caritas Lëtzebuerg a senger Carte blanche.

Viru ronn dräi Woche sinn eng Parti Leit hei am Land ferm erféiert. Eurostat hat public gemaach, dass mat 20% Lëtzebuerg no Rumänien deen zweethéchste Prozentsaz opweist, wat Jugendlecher tëscht 18 a 24 Joer ugeet, déi schaffe ginn a gläichzäiteg ënner dem Aarmutsrisiko leien. No vill Echo an de Medien huet dunn och den 31. Januar eng Aktualitéitsstonn am Parlament stattfont.
A wéi üblich hunn sech der rëm genuch fonnt, déi di Zuele wollte falsch maachen, relativéieren, a Fro stellen an: falsch interpretéiert hunn!
Et ass dobäi en Auszoch aus deenen Donnéeën, déi de 16. Oktober 2018 vum STATEC publizéiert goufen, an déi all Joer bei engen 10.000 Leit oder 4.000 Haushalter erhuewe ginn.
Do fanne mer dann, dass den allgemengen Aarmutsrisiko zu Lëtzebuerg an 10 Joer 10 mol méi séier geklommen ass wéi an der EU allgemeng.
A wann déi jong Leit ëmmer méi zäitlech beschränkt Aarbechtskontrakter kréien, a wa se, nach méi schlëmm, net nëmmen een, mee och souguer méi Stagen ouni bezuelt ze gi mussen absolvéieren, dann ass dat Resultat och dohier vläicht ze erklären.
Kanner ënner 18 Joer a Jonker vun 18-24 Joer ënnerleie bei eis dem Aarmutsrisiko zu 22,8 resp. 26,4%. Dat, well si an engem Haushalt wunnen, deem seng Memberen dem Aarmutsrisiko ënnerleien, also leschten Ends, well hier Elteren en ze niddregt Akommes hun.
Wat elo bei eis opfällt ass, datt déi Jugendlech d’Akommes vum Haushalt net verbesseren hëllefe kënnen, och wann si schaffe ginn. An dat läit eben drun, datt och hiere Verdéngscht ze niddreg ass.
Mir sollten also ophalen, sou Resultater mat falschen Argumenter wëllen ze diskreditéieren. Mir sollten eis vill méi d’Fro stellen, wat mer kënnen ënnerhuelen, fir deen Trend do mindestens opzehalen, am beschten nach ëmzekéieren: d’Stagiairen net mëssbrauchen a se bezuelen, manner zäitlech begrenzte Kontrakter verginn an deene Jonken (an net nëmmen deene Jonken!) en uerdentlecht Gehalt bezuelen.
Aarmut an Aarmutsrisiko si keng Fatalitéiten, wa mir wëllen eppes dergéint ënnerhuelen, da kënne mir dat och. Wëlle mir dat?

40 Joer ass et hir datt déi éischte Klimakonferenz zu Genève organiséiert gouf. Zanterhier ass gewosst datt de Mënsch mat responsabel fir de Klimawandel ass, deen eng Menace fir hie selwer, Déier an Natur duerstellt. Op beim Plastik oder dem Auto, ouni deen sou muncher een net kann...Iergendwann muss op d'Brems gedréckt ginn fir géint d'Klimakris unzekommen - dat mengt d'Claudia Kollwelter an engem Commentaire.