RTL - Carte Blanche

« Nicaragua : ass dat an Afrika ? » Des Fro ass mir tratsächlech eng Keier gestalt ginn ! Nicaragua ass dat gréisste Land vu Mëttelamerika, trotzdeem nach ëmmer e klengt Land wann en déi aner Länner vum amerikanesche Kontinent kuckt. Et ass och dat äermste Land vun Amerika no Haiti. En schéint Land vu Vulkanen, Séien, Karibik- a Pazifikküst, mee kee Pëtrol, keng rare Mineralien, net vill Gold. Et ass och eent vun de 7 Partnerlänner vun der lëtzebuergescher Kooperatiounen. Et héiert en net vill vu Nicaragua an de Medien, obwuel do zanter Abrëll lescht Joer eng richteg lass ass.

Nicaragua gëtt zanter 2006 vum Daniel Ortega presidéiert. Hee war en vun de Responsabele vun der Sandistischer Revolutioun an den 80er. An den 90er haten d'Sandinisten hier Emprise op de Pouvoir verluer an déi riets Regierungen neoliberal Politiken agefouert. Vu 2006 un huet den Ortega déi neoliberal Politike weidergefouert an sech an seng ganz Famill op der Muecht installéiert, souwuel politesch wéi ekonomesch. Duerch e puer Assistenzprogrammen huet en d'Extremaarmut e bëssen erofbruecht, mee am grousse Ganzen huet virun allem seng Famill a seng Frënn an net d'Vollek vum wirtschaftleche Wuesstem profitéiert.

Am Abrëll, no engem schlecht genéierte Brand an enger Naturreserve an no der Baisse vun de Prestatioune fir d'Pensionären, si Léit an d'Strooss gaangen. Den 18. and 19. Abrëll si Manifestatioune vu Studente brutal vun der Police ënnerdréckt ginn. Doropshi goufen et déi éischt Doudeger. Ënnert hinnen en 16 järege Bouf den de Studente Waasser brénge wollt. Duerch déi éischt Doudeger goufen et Barrikaden, Manifestatiounen a méi Brutalitéit vun der Police.
 
Lo, no 9 Méint ass laut dem Ortega a senger Fra, déi och Vizepresidentin ass, nees alles normal. Kéng Barrikade méi, keng Manifestatioune méi ausser déi déi si selwer organiséieren. Dofir awer 325 Doudeger an iwwer 2000 Blesséierter, 550 politesch Prisonéier, 300 entloosse Gesondheetspersonal, op mannst 144 Studente déi vun der nationaler Uni (UNAN) erausgeheit goufen, an zougemate Medien an ONGen. Lëtzebuergesch Ministeren hunn am Juli d'Mënscherechtsviolatioune condamnéiert an déi bilateral Hëllef agefruer, mee wéi gëtt et weider ? D'lëtzebuergesch ONGen ënnerstëtzen weiderhin an ëmsou méi déi vulnerabelst Populatiounen an d'Zivilgesellschaft am Nicaragua an am Exil.

An Däitschland géif et vläit zum "Unwort" vum Joer gewielt ginn - Renouveau.
Dat wat sech lo all Faarwen op de Fändel schreiwen fir aus den Déiften vun de Prozenter an de Sëtz an der Chamber eraus ze kommen.
Nei Gesiichter, frësch Iddien mussen hir, d'Parteizentralen sollen gelëft an entstëbst ginn. "Geet et domat duer"? De Roy Grotz ass de Moien skeptesch a sengem Commentaire.

Ginn d'Grenzgänger steierlech benodeelegt am Verglach mat den Awunner?
Dëst Gefill ass legitim oder op mannst verständlech, well d'Reform 2018 as fir d’Grenzgänger manner gut wéi de System an deene Jore virdrun. No der Senkung vum Steiersatz ass den Nett vum Loun fir die meeschten méi héisch. Mä an engem zweete Schrëtt huet Regierung eng spezifesch Mesure fir d’Grenzgänger geholl fir se vis-à-vis vun den Awunner gläich ze behandelen. Par rapport zu der Besteierung ass et fair, mä et huet negativ Auswierkungen op d‘Grenzgänger.

Kann ee sech en extra gesonderten Statut fir d‘Grenzgänger an der Groussregioun virstellen?
Net op Basis vun der europäescher Regelung an et wier en Accord t ëscht de 27 Etats membren néideg, wat utopisch as. Bilateral Accorden tëschent de betraffene Länner wier méi realistesch awer ass an der Praxis och komplizéiert. Wat wier den Intérêt vu Paräis, Berlin oder Bréissel zum Beispill fir e System ze ënnerstëtzen, an deem d’Fransousen, d'Belsch an déi Däitsch vun doheem schaffen an d’ganzt Joer am Lëtzebuerger Gesondheetssystem sinn, wat vill manner deier ass? E gewësse Mangel un Akommes fir déi franséisch, belsch an däitsch Regierung. Vun doheem schaffen ass dofir eng Léisung fir maximal eng Kéier pro Woch. D'Europäesch Unioun ass entwéckelt gi fir d'Bewegung vu Leit, Wueren a Kapital ze erliichteren, awer mir gesinn d'Limitte schon op de Steieren an dat wäert net kurzfristeg änneren.

Kéint Letzebuerg doduerch manner attraktiv ginn?
Lëtzebuerg huet an dene leschte Joren e puer Plazen verluer wat d'Kompetitivitéit ubelaangt ënner anerem wéinst de Präiser von de Wunnengen an dem Verkéier. Mir wëssen awer, wéi wichteg d'Attraktivitéit vun Talenter fir d'Wirtschaft ass, a besonnesch fir verschiddenen IT-Sekteuren. D‘Besteierung ass e Stimulant an et ass méiglech d'Attraktivitéit duerch verschidden Mechanismen ze vergréisseren. Mir kënnen nëmmen hoffen, datt d'Besteierung vun den Leit an den Verkéier am Agenda vun der neier Regierung steht. Et ass essentiell fir e klengt Land wéi Lëtzebuerg op der internationaler Szen attraktiv ze bleiwen. All Firmen kennen Mataarbechter, déi décidéiert hunn net méi zu Lëtzebuerg ze schaffen. D'Grënn sinn och multifaktoriel, awer oft soen d’Leit, datt déi dräi Stonne vum alldeegleche Wee den Ënnerscheed vum Loun net wäert sinn.

Ass eng Ierw-Monarchie fir eis nach zäitgeméiss? Mir stellen d’Fro dozou kaum nach. Schlëmm genug, mengt de Paul Kremer a senger Carte Blanche.

Ass eng Ierw-Monarchie fir eis nach zäitgeméiss? Mir stellen d’Fro dozou kaum nach. Schlëmm genug, mengt de Paul Kremer a senger Carte Blanche.

Grossherzogins Geburtsdag
Grossherzogins Geburtsdag war op dësem Datum, wéi ech nach e Bouf war. Mir stongen eis do brav d’Been an de Bauch am Rousegärtchen, fir an der Keelt vum Wanter dem Fakelzug an der Neier Avenue nozekuken. Wann et gutt gong, hate mer e klenge rout-wäiss-bloe Fendelchen fir ze wénken.
D’Zeiten hu geännert; den Haff ass bliwwen, och wann aus dem Grossherzog e Grand-Duc gouf, sëcher fir d’lëtzebuergescht héich ze halen. – Dach grad sou wéi deemols gëtt um Haff oder, méi dichtech: un der Staatsform bis elo an trotz der frësch opgebotzter Verfassung den Haff net a Fro gestallt, och wann Iervmonarchie am Widdersproch mam 1. Paragraf vun den Helleche Mënscherechter steet; stellt iech mol fir: eng Fra, e Mann oder en Zougewanderten mat lëtzebuerger Pass dierft net Bréifdréier, Schoulmeeschter oder Autobuschauffeur ginn. Fir Staatschef awer si mer all discriminéiert a kee wackelt mam Ouer dogéint.
Wuel gëtt dann de Staatschef gär schlau als “Dier-Opmécher” duergestallt, wa mir eis am déiwsten Ausland wëlle verkafen, wou se zanter Joren a Joerzéngte kee Monarch méi als Iervherrscher hunn nach wëllen kréien.
Well wann eppes stëmmt, dann dat: e roude Léiw op blowäissem Feld zanter dem groussen Hari, dem  “Arrigho alto” – huet den Alighieri Dante dee genannt – dorop stolz ze sinn, kënne nëmme mier – wann de Stefan Berne mat sengem Gielchen dat och wëlt.
E klengt Vollek, daat 3, 4, 5 Sprooche lallt – soe béis monophon Auslänner – daat sech mat engem tripel A brétze kann, daat si mir a vläicht brauche mer daat, nämlech e schnäidege Grossherzog, dee seng diskret Hand iwwer eis hält, wann Deen do uewen mol kurz näipt. A mir vergiessen meng Grouss-Monnien, déi virun 100 Joer d’Republik häi ausgeruff hunn.

Kampf-Kandidatur bei der CSV: si siche sech e neie President an hunn de Choix tëschent zwee Kandidaten. En Ausbléck an e Réckbléck am Commentaire vum Nico Graf.

Zougang zu wëssenschaftleche Publikatioune fir jiddereen. Resultater vun der ëffentlecher Fuerschung sollte fir all Mënsch zougänglech sinn. Ma d’Realitéit ass anescht:  D’Editiounshaiser verspäre wëssenschaftlech Publikatiounen hannert deiere Paywalls a maachen domadder enorm Beneficer. De Marc Schiltz steet als President vu Science Europe un der Spëtzt vun enger Initiative, déi des Paywalls wëll ofschafen (https://www.coalition-s.org/why-plan-s/).

Zougang zu wëssenschaftleche Publikatioune fir jiddereen. Resultater vun der ëffentlecher Fuerschung sollte fir all Mënsch zougänglech sinn. Ma d’Realitéit ass anescht:  D’Editiounshaiser verspäre wëssenschaftlech Publikatiounen hannert deiere Paywalls a maachen domadder enorm Beneficer. De Marc Schiltz steet als President vu Science Europe un der Spëtzt vun enger Initiative, déi des Paywalls wëll ofschafen (https://www.coalition-s.org/why-plan-s/).

A sengem berühmte Roman „Le nom de la rose“ beschreiwt den Umberto Eco e Klouschter mat enger Bibliothéik, déi all wëssenschaftlech Studien enthält, wou awer bal kee Mënsch Zougang derzou kritt. Déi Geschicht spillt am Mëttelalter an ass natierlech erfond. Haut si mer am 21ten Jorhonnert an d’Réalitéit ass leider nët wäit vun däer Geschicht ewech.
Fuerscher a Wëssenschftler publizéiren hir Resultater – also dat nei geschaafend Wëssen – a Fachzäitschrëften. Mee fir Zougrëff op déi Schrëften ze kréie, muss een deier – ganz deier – bezuelen. An dat obwuel haut, mat der Digitaliséirung, déi Fachzéitschrëften gréisstendendeels nët méi op Pabeier gedréckt gin, mee um Internet publizéiert ginn – allerdéngs hannert deiere „Paywalls“. Eng Handvoll Maisons d’édition weltwäit hu sech hei eng quasi-Monopolstellung geschaaf an et geet ëm ganz vill Geld – 10 Milliarden Dollar pro Joer.
Deen eigentleche Skandal dobai ass, dass e Groussdeel vun der Fuerschung mat ëffentleche Gelder finanzéiert gouf. Steiergelder ginn iwwert d’Universitéiten an ëffentlech Fuerschung investéiert, mee d’Resultater dovu sinn herno nët fräi zougänglech. Aner Wëssenschaftler, de Grand Public, mee zum Beispill och Doktere, Patienten an Patientevereenegungen oder ONG’en mussen deier bezuelen fir Zougrëff ze kréien op déi neiste wëssenschaftlech Studien a Resultater, obwuel déi Fuerschung dach aus ëffentleche Mëttele finanzéiert gouf! A mannerbëmmettelte Régiounen wéi Afrika, Asien, mee och a Südosteuropa ass den Zougang zu wëssenschaftleche Studien onerschwénglech ginn.
Fir dat ze änneren hunn ech als President vun den Europäeschen Fuerschungsagencen dësen Hierscht, zesummen mat der Europäescher Kommissioun eng nei Initiativ lancéiert, de „Plan S“ (https://www.coalition-s.org/why-plan-s/). Hei geet ët drëms de System vun de wëssenschaftleche Publikatioune fundamental ze änneren. Andeems Fuerschungsagencen, zum Beispill den FNR, d’Wëssenschaftler derzou unhalen an Zukunft hir Resultater just nach am „Open Access“ – also fräi zougänglech ze verëffentlechen.
Et ass eng zimmlech drastech Ännerung. D’Maisons d’éditioun sin natierlech nët frou a maachen décke Lobbying dergéint. Och fir d’Wëssenschaftler bedeit dat eng Ëmstellung, wëll si villäicht nët méi an hiere Lieblingszäitschrëfte publizéire kënnen. Mee d’Fuerscher an d’Universitéite mussen hei och hir Verantwortung vis-à-vis vun der Gesellschaft iwwerhuelen!
Et dierf nët méi sinn dass déi ëffentlech Hand zweemol muss an d’Täsch gréifen. Eemol fir d’Fuerschung ze bezuelen, an nach eemol fir Zougang zu de Resultater ze kréien.
Wësse soll fréi zougänglech sinn!