Den Donneschdeg nächst Woch spillt déi portugisesch Indie Rock Band am Gudde Wëllen, déi mat enger gewësser Stil-Villfalt iwwerzeegt an dach hir ganz eegen Touche huet.

The Lemon Lovers komme vu Porto an hu grad hir nei Plack "pretend that i care" fäerdeg, hir éischt zanter der Pandemie, an déi éischt, zanter déi zwee Grënnungsmemberen am professionelle Museksliewe Fouss gefaasst hunn. Am Virfeld hat de Marc Clement d'Geleeënheet mam Batteur Victor Butuc ze schwätzen, deen zesumme mam Gittarist a Sänger Joao Silva de Projet virun eelef Joer gegrënnt huet. Den Historique vun der neier Plack war do ee vun de ville Sujeten, déi de Victor Butuc abordéiert huet. An d'Inspiratioun koum vun enger interessanter Plaz - nämlech aus der Wüüst.