Víðsjá

Í Víðsjá í dag verður meðal annars fjallað um sýninguna ÓraVídd sem nú stendur yfir á Kjarvalsstöðum, en um er að ræða yfirlitssýningu á verkum Sigurðar Árna Sigurðssonar, Sigurður verður tekinn tali í Víðsjá í dag. Tilkynnt var fyrir helgi um úthlutanir úr Rannsóknasjóði, Rannís. Um er að ræða stærstu úthlutun sjóðsins frá upphafi en alls bárust 402 gildar umsóknir í Rannsóknasjóð og voru 82 þeirra styrktar eða rúmlega 20% umsókna. Á meðal þeirra sem hljóta nýdoktorsstyrk að þessu sinni er Hjalti Snær Ægisson bókmenntafræðingur en Hjalti fær styrkinn fyrir verkefni sem nefnist Bessastaðaþýðingarnar, rætt verður við Hjalta í Víðsjá í dag. Og í tónlistarhorninu Heyrandi nær lætur Arnljótur Sigurðsson hugann reika um áráttuna fyrir rími og stuðlum, en rímið og stuðlana notar manneskjan sér bæði til gagns og gamans, nær og fjær.

Umsjón: Guðni Tómasson og Eiríkur Guðmundsson

Í Víðsjá í dag verður meðal annars fjallað um Útskriftarsýningu Ljósmyndaskólans sem opnuð verður í Ljósmyndsafni Reykjavíkur um helgina. Þar sýna þrettán nemendur verk sín og takast á við ólík málefni út frá ólíkum forsendum, mismunandi nálgun, listrænni sýn og fagurfræði. Rætt verður við sýningarstjórann, Katrínu Elvarsdóttur, í Víðsjá í dag. Einnig verður farið í heimsókn í Nýlistasafnið í Marshall-húsinu og sýningin Veit efnið af andanum? skoðuð, en hún verður opnuð í safninu á laugardag. Þar eiga verk Ragnheiður Gestsdóttir, Sigrún Hrólfsdóttir og Sindri Leifsson. Gréta Sigríður Einarsdóttir fjallar um smásögur, kántrítónlist og ánægjuna sem felst í því að skipta um skoðun. Og Kristrún Heimisdóttir lögfræðingur fjallar í Víðsjá á fimmtudögum um nýbyrjað ár, 2021, Kristrún spáir í strauma, stefnur, og hneigðir á hinum ýmsu sviðum mannlífsins. Í dag talar Kristrún um popúlisma, og spyr meðal annars hvaðan hann kom og hvernig fer hann með lýðræðið og þjóðfélögin.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars fjallað um 33ja metra löng kvensköp í almenningsgarði sem hafa valdið blóðheitum umræðum í Brasilíu og víðar. Listakonan á bak við verkið vildi varpa ljósi á þann ójöfnuð og þau vandræði sem kynferði getur skapað en bjóst alls ekki við að það kveikti jafn hatursfulla orðræðu og raun hefur borið vitni. Torfi Tulinus les kvöldsöguna, Egils sögu, fyrir hlustendur Rásar 1 þessa dagana, hann hóf lesturinn á föstudag. Víðsjá fylgist grannt með og ræðir af þessu tilefni við Torfa um Egils sögu út frá ýmsum vinklum. Í dag svarar Torfi spurningunni: Hvað vitum við um Egils sögu? Hugað verður meðal annars að handritum og ritunartíma. Í myndlistarpistli dagsins fjallar Ólöf Gerður Sigfúsdóttir um tvær yfirlitssýningar sem nú standa yfir í Listasafninu á Akureyri, sýningar sem eru afar ólíkar en vekja upp áhugaverðar spurningar um listina og samspil hennar við hversdagsleikann annars vegar og opinber söfn hins vegar. Þetta eru sýningarnar Kristín Th - málverk og ljósmyndir, þar sem gefur að líta verk eftir Kristínu Katrínu Þórðardóttur Thoroddsen, og Lengi skal manninn reyna, sem er umfangsmikil yfirlitssýning um ævi­fer­il lista­manns­ins Þor­vald­ar Þor­steins­son­ar sem lést árið 2013. Einnig verður sagt frá fornfrægum nautnagarði sem fundist hefur við fornleifauppgröft suður í Rómaborg.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars rætt við Agnesi Wild leikstjóra og leikkonu en leikhópurinn Miðnætti frumsýnir í Kassa Þjóðleikhússins um helgina nýja brúðusýningu sem nefnist Geim-mér-ei. Hugað verður að sýningu í Ludwig safninu í Köln en alvarleg staða varðandi falsanir í safneigninni kom upp í undirbúningi sýningarinnar. Snæbjörn Brynjarsson fjallar um tónleikhúsverkið Fuglabjargið sem sýnt er í Borgarleikhúsinu. Og Gauti Kristmannsson bókmenntagagnrýnandi Víðsjár fjallar í dag um skáldsöguna Örvæntingu eftir Vladimir Nabokov en verkið kom nýlega út í íslenskri þýðingu Árna Óskarssonar.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars hugað að herstöðinni Fort Belvoir í Virginíuríki Bandaríkjanna. Þar eru margar stofnanir bandríska landhersins til húsa en þar er líka að finna umdeilt safn listaverka sem á uppruna sinn í Evrópu um miðja 20. öld. Arnljótur Sigurðsson fjallar í tónlistarhorninu Heyrandi nær um hina furðulegu kólumbísku hljómsveit Meridian Brothers og stiklar á stóru í sögu kúmbíunnar, tónlistarstefnu sem sennilega hefur aldrei verið vinsælli en í dag, með nýjum kynslóðum sem hafa tekið hana upp á arma sína og víkka út og þenja. Einnig verður í Víðsjá í dag rætt við Kára Stefánsson, forstjóra Íslenskrar erfðagreiningar, um bókmenntaáhuga hans.

Umsjón: Guðni Tómasson og Eiríkur Guðmundsson

Í Víðsjá í dag verður meðal annars rætt við Árna Óskarsson sem hefur þýtt á íslensku skáldsöguna Örvæntingu eftir Vladimir Nabokov. Farið verður í heimsókn í BERG Contemporary - galleríið og rætt við Harald Jónsson myndlistarmann um sýningu hans, Ljósavél. Og Kristrún Heimisdóttir, lögfræðingur, flytur pistla í Víðsjá á fimmtudögum í janúar og spáir í hið nýbyrjaða ár 2021, strauma, stefnur, og hneigðir. Hún spyr í dag: Hvenær og hvernig tekst gera valdarán? Atburðirnir í Washington í gær kalla á sögulegan samanburð, yfirskriftin hjá Kristrúnu í þessum fyrsta pistli er Sigur lýðræðisins á valdaráni, hún spyr meðal annars í Víðsjá í dag: Hvað er valdarán?

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars rætt við Kristínu Loftsdóttur mannfræðing um forvitnilegt brjóstmyndasafn El Museo Canario á Kanaríeyjum. Kristín ritar grein um safnið í nýútkomnu Riti, sem er rafrænt tímarit Hugvísindastofnunar Háskóla Íslands. Farið verður í heimsókn í fornbókabúðina Bókina við Klapparstíg í Reykjavík og fræðst um það hvaða rit eru vinsælust á fornbókamarkaðnum í dag. Ný kvöldsaga hefst á Rás eitt á föstudag, Egils saga og það er Torfi Tulinius sem les. Torfi mun fylgja sögunni úr hlaði og ræða um hana í Víðsjá á næstu vikum. Í dag svarar hann spurningunni: Um hvað fjallar Egils saga? Og dularfull símhringing kemur einnig við sögu í Víðsjá í dag.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars rætt við Ingibjörgu Sigurðardóttur um bók hennar Sjálf í sviðsljósi sem fjallar um lífshlaup ömmu hennar og nöfnu, Ingibjargar Steinsdóttur leikkonu. Einnig verður spurt í þætti dagsins: Afhverju föllum við í stafi frammi fyrir ægifegurð náttúrunnar? Afhverju fyllumst við löngun til að deila myndum af glitskýjum? Í nýjasta riti Háskólaútgáfunnar, Vá, Ritgerðir um fagurfræði náttúrunnar, leitast fagurfræðingurinn Guðbjörg R. Jóhannesdóttir, við að svara þessum spurningum. Hvað er fegurð og hvað er landslag og hversvegna skiptir það máli að tala um reynslu okkar af jöklum, fossum og fegurð. Afhverju er mikilvægt að taka fegurð og tilfinningar til greina við ákvarðanatöku um landslag? Halla Harðardóttir ræðir við Guðbjörgu R. Jóhannesdóttur í Víðsjá í dag. Gauti Kristmannsson bókmenntagagnrýnandi Víðsjár rýnir í dag í skáldsöguna Victor Hugo var að deyja eftir franska rithöfundinn og blaðamanninn Judith Perrignon en bókin kom nýlega út hjá bókaforlaginu Uglu í íslenskri þýðingu Rutar Ingólfsdóttur. Þetta er heimildaskáldsaga sem fjallar eins og titillinn gefur til kynna um andlát franska rithöfundarins Victors Hugo sem andaðist í París í maímánuði árið 1885. Áður hafa komið út á íslensku eftir Judith Perrignon verkin Augu Lýru, sem hún skrifaði í samvinnu við Evu Joly, og kom út í íslenskri þýðingu Friðriks Rafnssonar árið 2012, og árið 2018 kom út í íslenskri þýðingu Rutar Ingólfsdóttur skáldsagan Þetta var bróðir minn sem fjallar um bræðurna Théo og Vincent van Gogh. Einnig verður í Víðsjá í dag hugað að listaverkum sem eru að færast í opin aðgang nú um áramót í lagaumhverfi Bandaríkjanna.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars rætt við Ara Eldjárn, uppistandara og handritshöfund, sem hlýtur Íslensku bjartsýnisverðlaunin fyrir árið 2020, Ari tók við verðlaununum á Bessastöðum um helgina. Rætt verður við Hannes Helgason og Jóhannes Birgi Pálmason, liðsmenn í sveitinni Dalalæðu, um nýja plötu sveitarinnar Dysjar. Einnig verður farið í tónlistarferðalag með Arnljóti Sigurðssyni undir yfirskriftinni Heyrandi nær, í dag mun Arnljótur rýna í sögu lagsins víðfræga Misirlou, en saga þess nær um það bil hundrað ár aftur í tímann og margt forvitnilegt sem kemur upp úr dúrnum við söguskoðunina.

Umsjón: Guðni Tómasson og Eiríkur Guðmundsson

Í Víðsjá í dag verður meðal annars rætt um bókaárið 2020. Spurt verður: Hvað stóð upp úr? Gestir þáttarins verða bókmenntagagnrýnendurnir Gauti Kristmannsson og Kolbrún Bergþórsdóttir. Halla Harðardóttir horfir að gefnu tilefni til himins og virðir fyrir sér glitrandi ský sem dansa á dimmum desemberhimni. Og Oddný Eir Ævarsdóttir rithöfundur ávarpar hlustendur Víðsjár undir skammdegissól.

Umsjón: Guðni Tómasson og Eiríkur Guðmundsson.