Í Víðsjá í dag verður meðal annars rætt við Brynhildi Guðjónsdóttir en á laugardag verður frumsýnt í Borgarleikhúsinu leikritið Vanja frændi eftir rússneska rithöfundinn Anton Tsjekhov, í leikstjórn Brynhildar. Einnig verður hugað að Listþingi Bandalags íslenskra listamanna sem haldið verður í Hörpu á laugardag. Yfirskrift þingsins er Tungutak listarinnar og tungutakið um listina. Þar munu starfandi listamenn taka til máls og ræða stöðu listarinnar í íslensku samfélagi. Gestur Víðsjár í dag verður Erling Jóhannesson, forseti Bandalags íslenskra listamanna. Á fimmtudögum í janúar ætlar Gunnar Þorri Pétursson að flytja pistla í Víðsjá þar sem hann fer aftur á bak í tíma og austur á bóginn. Gunnar Þorri er fræðimaður og þýðandi úr rússnesku, pistlaröðina kallar hann „Varsjá“ og í þessum fyrsta pistli er hann með hugann við áðurnefndan Anton Tsjekhov og vináttu hans við rússneska málarann Ísak Levítan. Og Gauti Kristmannsson, bókmenntagagnrýnandi Víðsjár, fjallar í dag um bókina Jakobínu: sögu skálds og konu, eftir Sigríði Kristínu Þorgrímsdóttur, en bókin fjallar um rithöfundinn Jakobínu Sigurðardóttur.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars að gefnu tilefni hugað að menningararfi Írans með Ragnheiði Gyðu Jónsdóttur. Einnig verður horft til framtíðar í upphafi nýs áratugar en Auður Jónsdóttir rithöfundur mun í dag og næstu miðvikudaga glíma við spurninguna: Hvað nú? Og flytja pistla undir yfirskriftinni: Bréf til sonar. María Kristjánsdóttir leiklistargagnrýnandi fjallar í dag um Engilinn, verk sem frumsýnt var í Þjóðleikhúsinu á dögunum, en hér er á ferðinni leiksýning sem byggð er á verkum eftir Þorvald Þorsteinsson rithöfund og myndlistarmann, í leikstjórn Finns Arnars Arnarssonar. Og rithöfundarnir Albert Camus frá Frakklandi og Peter Handke frá Austurríki koma lítillega við sögu, að gefnu tilefni.

Umsjón: Guðni Tómasson og Eiríkur Guðmundsson.

Síðastliðinn laugardag, 4. janúar, voru 60 ár liðin síðan franski rithöfundurinn og heimspekingurinn Albert Camus fórst í bílslysi, skammt frá París. Camus var 47 ára gamall, þremur árum fyrr hafði hann fengið Nóbelsverðlaun í bókmenntum, aðeins 43ja ára gamall. Camus var einhver áhrifamesti rithöfundur Frakka á öldinni sem leið, þekktur fyrir skáldsögur á borð við Útlendinginn, Pláguna og Fallið, auk þess sem hann skrifaði margar áhrifamiklar ritgerðir. Rætt verður við Guðmund Brynjólfsson, rithöfund og djákna, um Albert Camus af þessu tilefni í Víðsjá í dag. Snæbjörn Brynjarsson leiklistarrýnir þáttarins fjallar í dag um leikritið Meistarann og Margarítu sem Þjóðleikhúsið frumsýndi um jól, en verkið, sem er í leikstjórn Hilmars Jónssonar, byggir á samnefndri skáldsögu eftir rússneska rithöfundinn Mikhail Búlgakov. Bók vikunnar að þessu sinni er skáldsagan Villueyjar eftir Ragnhildi Hólmgeirsdóttur. Rætt verður við Ragnhildi í Víðsjá í dag og hún les brot úr verkinu. Einnig verður í þætti dagsins fjallað að gefnu tilefni um kraftinn í útgáfu á sígildri tónlist á heimsvísu.

Umsjón: Guðni Tómasson og Eiríkur Guðmundsson.

Vorkvöld eitt árið 1943 voru nokkrir táningspiltar á flækingi um skóg í nágrenni borgarinnar Birmingham í Bretlandi, í leit að fugslhreiðrum. En í stað hreiðra fundu þeir beinagrind ungrar konu, sem var falin inni í holum álmi í útjaðri skógarins. Nokkru síðar birtust svo torkennilegt veggjakrot í bæjum í nágrenni skógarins og ljóst einhver vissi meira um líkið í álminum en hann lét uppi. Rannsókn lögreglu stóð í áratugi, og komu þar við sögu nornir, njósnarar og kabarettsöngvarar.

Í Víðsjá í dag hljóma raddir úr þáttum ársins 2019.

Umsjón: Guðni Tómasson og Eiríkur Guðmundsson.

Það er varla nokkur staður á jörðinni afskekktari og einangraðri en Amundsen-Scott-rannsóknarstöðin á Suðurskautslandinu. Yfir heimskautaveturinn er þar stöðugt myrkur, stöðugt hvassviðri og svo mikið frost að enginn flugvél getur lent þar. Þeir vísindamenn sem þar dvelja yfir vetrartímann búa í því algerri einangrun og kolniðamyrkri mánuðum saman, og eiga sér engrar undankomu auðið. Það var eina slíka eilífa vetrarnótt sem dularfullt dauðsfall átti sér stað í Amundsen-Scott-rannsóknarstöðinni.

Eitt dýrmætasta fornhandrit Gyðingdómsins, sem talið er vera eitt fullkomnasta eintak af hebresku biblíunni sem til er, Aleppó-handritið, er geymt við stranga öryggisgæslu í neðanjarðarhvelfingu á þjóðminjasafni Ísraelsríkis í Jerúsalem. Handritið er kallað Aleppó-handritið því í meira en sex hundruð ár geymdu Gyðingar í sýrlensku borginni Aleppó handritið eins og sjáaldur augna sinna.

Í síðustu Víðsjá fyrir jól og síðustu Víðsjá ársins 2019 - taka þeir Guðni Tómasson og Eiríkur Guðmundsson á móti góðum gestum í leiklistarhljóðstofu Ríkisúvarpsins. Rithöfundarnir Bergþóra Snæbjörnsdóttir, Kristín Ómarsdóttir, Melkorka Ólafsdóttir, Pétur Gunnarsson, Sjón og Þórdís Gísladóttir koma í heimsókn og lesa úr nýjum verkum sínum. Einnig verður haldið áfram að rýna í nýjar bækur, Gauti Kristmannsson fjallar í þættinum í dag um skáldsöguna Seltu (apókrýfu úr ævi landlæknis) eftir Sölva Björn Sigurðsson, en Sölvi er tilnefndur til íslensku bókmenntaverðlaunanna fyrir verkið.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars rætt við Magnús Sigurðsson rithöfund um bók sem hann sendi frá sér á dögunum og nefnist Íslensk lestrarbók, en hún hefur að geyma texta af ýmsu tagi, örsögur, smáprósa, dagbókarbrot og fótboltalýsingu í ljóðrænu formi, svo nokkuð sé nefnt. Björn Þór Vilhjálmsson bókmenntagagnrýnandi rýnir í ljóðabókina Til þeirra sem málið varðar eftir Einar Má Guðmundsson. Einnig verður rætt við Steinþór Birgisson kvikmyndagerðarmann og Sigurð Ingólfsson framleiðenda um nýja heimildarmynd um Magnús Pálsson myndlistarmann sem verður frumsýnd í Bíó Paradís um jólahátíðina og heitir Á skjön.

Umsjón: Guðni Tómasson og Eiríkur Guðmundsson.

Í Víðsjá í dag rýnir Gauti Kristmannsson í skáldsöguna Svanafólkið eftir Kristínu Ómarsdóttur. Flutt verður tónverkið Skrauthvörf, sem frumflutt var á Tónlistarhátíð Rásar 1 - Orðin hljóð - sem fram fór í Norðurljósasal Hörpu í lok nóvembermánaðar. Verkið er samstarfsverkefni Kjartans Holms og Jóhannesar Ólafssonar, Ingibjörg Fríða Helgadóttir og Strokkvartettinn Siggi flytja. María Kristjánsdóttir fjallar í dag um leikverkið Opening Ceremony, sem nýtt sviðslistafyrirtæki, Reykjavik Ensemble, frumsýndi í Tjarnarbíói í síðustu viku. Og bók vikunnar að þessu sinni er ljóðabókin Fræ sem frjóvga myrkrið eftir Evu Rún Snorradóttur en Eva hlaut Maístjörnuna, viðurkenningu Rithöfundasambands Íslands og Landsbókasafnsins, fyrir þessa bók fyrr á þessu ári. Hlustendur heyra í Evu í Víðsjá í dag.

Umsjón: Guðni Tómasson og Eiríkur Guðmundsson