Sölvi Björn Sigurðsson rithöfundur tók við íslensku bókmenntaverðlaununum á Bessastöðum í gær, fyrir skáldsögu sína, Seltu: Apókrýfu úr ævi landlæknis. Rætt verður við Sölva um þetta verk í Víðsjá í dag. Björn Þór Vilhjálmsson bókmenntagagnrýnandi fjallar í dag um bókina Brot: Konur sem þorðu eftir Dóru S. Bjarnason en þar segir af lífshlaupi þriggja kynslóða kvenna sem voru, hver á sinn hátt, frumkvöðlar í baráttu kvenna fyrir frelsi og jafnrétti. Og Auður Jónsdóttir rithöfundur heldur áfram að ávarpa framtíðina í upphaf nýs áratugar, og spyrja: Hvað nú? Í pistlaröð sem hún nefnir Bréf til sonar. Fyrirsögn pistilsins í dag er: Að kunna að lesa veruleikann - ,,Upplýsingamengun er jafn raunveruleg og öll önnur mengun í heiminum," skrifar Auður syni sínum til að undirbúa hann fyrir framtíðina. Þetta er fjórði og síðasti pistill Auðar.

Gestir Víðsjár í dag eru tónlistarfólkið Eyjólfur Eyjólfsson og Steinunn Arnbjörg Stefánsdóttir en þau mynda, ásamt Björk Níelsdóttur, tónlistarhópinn Gadus Morhua sem heldur tónleika í kvöld í Salnum í Kópavogi þar sem boðið verður upp á baðstofubarrokk. Íslensku bókmenntaverðlaunin verða afhent á Bessastöðum í kvöld. Í Víðsjá í dag verður spáð í spilin með bókmenntagagnrýnendunum Gauta Kristmannssyni og Kolbrúnu Bergþórsdóttur. Bók vikunnar á Rás 1 að þessu sinni er Glæpur við fæðingu en í henni segir suður-afríski uppistandarinn og sjónvarsþáttastjórnandinn Trevor Noah frá uppvexti sínum í Suður-Afríku á tímum aðskilnaðarstefnunnar. Hlustendur heyra í þýðanda bókarinnar, Helgu Soffíu Einarsdóttur, í þætti dagsins. Og Gauti Kristmannsson fjallar um skáldsöguna Hnitmiðuð kínversk-ensk orðabók fyrir elskendur eftir ítalska rithöfundinn Xiaolu Guo en bókin kom út hjá forlaginu Angústúru fyrir jólin, í íslenskri þýðingu Ingunnar Snædal.

Í Víðsjá í dag er meðal annars hugað að Myrkum músíkdögum sem hefjast um helgina. Gunnar Karel Másson, listrænn stjórnandi hátíðarinnar, kemur í heimsókn en hún verður sett á laugardag og stendur í viku með tónleikahaldi víða um borgina. Myrkir músíkdagar eiga 40 ára afmæli í ár en hátíðin var fyrst haldin árið 1980. Tveir meðlimir úr polka-hljómsveitunum Geirfuglunum og Skárr'en ekkert koma í heimsókn, en hljómsveitirnar halda polkaball í Iðnó annað kvöld í tilefni af bóndadegi. Snæbjörn Brynjarsdóttir fjallar í dag um verkið Dansandi ljóð sem sýnt er í Þjóðleikhúskjallaranum um þessar mundir en um er að ræða leikgerð sem Edda Þórarinsdóttir byggir á ljóðatextum eftir Gerði Kristnýju, úr bókunum Ísfrétt, Launkofa, Höggstað og Ströndum. Að sýningunni stendur hópurinn Leikhúslistakonur 50+. Og Gunnar Þorri Pétursson flytur þriðja pistil sinn í pistlaröðinni Varsjá þar sem hann fer austur á bóginn og horfir aftur í tímann. Yfirskrift pistilsins í dag er ,,Dimmraddaður bogi" og fjallar um rússneska skáldið Osip Mandelshtam.

Í Víðsjá í dag verður meðal annars rætt við Björk Þorgrímsdóttur ljóðskáld sem í gær hlaut Ljóðstaf Jóns úr Vör fyrir ljóðið Augasteinn. Björk segir frá og les ljóðið fyrir hlustendur í þætti dagsins. Snæbjörn Brynjarsson leikhúsgagrýnandi þáttarins fjallar um sviðslistaverkið Eyður sem leikhópurinn Marmarabörn frumsýndi í Þjóðleikhúsinu á dögunum. Auður Jónsdóttir rithöfundur heldur áfram að ávarpa framtíðina í upphaf nýs áratugar, og spyrja: Hvað nú? Í pistlaröð sem hún nefnir Bréf til sonar. Fyrirsögn pistilsins í dag er: Þegar börnin fá pennann, Auður ræðir í pistlinum við son sinn og ólétta stjúpdóttur um framtíðina. Og í Víðsjá í dag verða einnig skoðaðar nokkrar plötur sem enginn vildi þegar forvitnilegir kassar úti á gangi í Útvarpshúsinu verða skoðaðir með aðstoð góðs fólks.

Umsjón: Guðni Tómasson og Eiríkur Guðmundsson

Í Víðsjá í dag verður þess meðal annars minnst að í gær, 20. janúar, voru hundrað ár liðin frá fæðingu ítalska kvikmyndaleikstjórans Federicos Fellinis. Hann fæddist í borginni Rimini við strönd Adríahafsins þann 20. janúar árið 1920 og átti eftir að verða einn af áhrifmesti og virtasti kvikmyndaleikstjóri 20. aldar. Ferill hans spannaði ríflega hálfa öld, hann var einn af þeim allra stærstu, kvikmyndahöfundur, kvikmyndaskáld, og fékk Óskarsverðlaun fimm sinnum. Gestur Víðsjár í dag verður Ólafur Gíslason listfræðingur sem þekkir vel til verka Fellinis. Einnig verður Brynja Sveinsdóttir tekin tali en hún er sýningarstjóri á samsýningunni Afrit í Gerðarsafn í Kópavogi. Á sýningunni eiga verk sjö íslenskir listamenn sem allir nýta ljósmyndina í verkum sínum. María Kristjánsdóttir fjallar í dag um leikritið Helgi Þór rofnar eftir Tyrfing Tyrfingsson sem frumsýnt var í Borgarleikhúsinu fyrir helgi. Björn Þór Vihjálmsson bókmenntagagnrýnandi fjallar um bókina Óstýriláta mamma mín ... og ég eftir Sæunni Kjartansdóttur sálgreini, en í bókinni fjallar Sæunn um samband sitt við móður sína, Ástu Bjarnadóttur, sem fór alla tíð eigin leiðir í sínu lífi. Og bók vikunnar á Rás 1 að þessu sinni er sagnasafnið Vetrargulrætur eftir Rögnu Sigurðardóttur. Hlustendur heyra í Rögnu í Víðsjá dagsins og hún les úr bókinni.

Umsjón: Guðni Tómasson og Eiríkur Guðmundsson

Flannan-eyjur eru örlítill eyjaklasi sem tilheyrir Ytri-Suðureyjum í Skotlandi - varla meira en sker og hólmar sem rísa upp úr Norður-Atlantshafi. Þar eru engir mannabústaðir og engin mannvirki að finna fyrir utan það að á einni eyjunni, þeirri stærstu, stendur viti. Í þessum vita gerðist dularfullur atburður í desembermánuði árið 1900. Í miklu illviðri slökknaði á vitanum og þrír vitaverðir hurfu sportlaust. Hrifsaði sjórinn mennina til sín - eða gerðist eitthvað ennþá verra á þessum afskekkta stað?

Í Víðsjá í dag verður meðal annars rætt við Stefán Jónsson leikstjóra en á morgun verður frumsýnt í Borgarleikhúsinu nýtt íslenskt leikrit eftir Tyrfing Tyrfingsson, verk sem nefnist Helgi Þór Rofnar. Þetta er fimmta leikritið eftir Tyrfing, sem vakið hefur mikla athygli á undanförnum árum, sem frumsýnt er í Borgarleikhúsinu. Hlustendur heyra líka hljóðið í Kristínu Ýri Jónsdóttur, Sólveigu Vöku Eyþórsdóttur, Flemming Viðari Valmundssyni og Gunnar Kristni Óskarssyni en þau eru öll ungir tónlistarmenn og leika einleik með Sinfóníuhljómsveit Íslands á tónleikum með ungum einleikurum sem fram fara í Hörpu í kvöld. Og Gunnar Þorri Pétursson flytur pistla í Víðsjá á fimmtudögum í janúar þar sem hann fer aftur á bak í tíma og austur á bóginn. Pistlaröðina kallar Gunnar „Varsjá“, fyrir viku fjallaði hann um rithöfundinn Anton Tsjékhov og vináttu hans við rússneska málarann Ísak Levítan. En í dag er Gunnar með hugann við Arnór Hannibalsson og dularfulla þýðingu sem hann gerði á verki eftir heimspeking og huldumann í sovésku samfélagi.

Umsjón: Guðni Tómasson og Eiríkur Guðmundsson

Í Víðsjá í dag verður meðal annars rætt við ljósmyndarann Valdimar Thorlacius en hann opnar sýningu á verkum sínum á morgun í Ljósmyndasafni Reykjavíkur. Auður Jónsdóttir rithöfundur heldur áfram að hugsa um framtíðina í upphafi nýs áratugar, í pistlaröð sem hófst í þættinum fyrir viku og ber yfirskriftina Bréf til sonar. Í dag fjallar Auður um íslenskuna og framtíðina. María Kristjánsdóttir fjallar í dag um leikritið Vanja frænda eftir rússneska rithöfundinn Anton Tsjékhov sem frumsýnt var í Borgarleikhúsinu um helgina. Og Gauti Kristmannsson bókmenntagagnrýnandi rýnir í bókina Maðurinn sem Ísland elskaði eftir Árna Snævarr en hún fjallar um franska náttúruvísindamanninn Paul Gaimard sem ferðaðist um Ísland á árunum 1835 og 1836.

Umsjón: Guðni Tómasson og Eiríkur Guðmundsson

Í Víðsjá í dag verður meðal annars rætt við tvo meðlimi í sviðslistahópnum Marmarabörnum, sem frumsýnir á stóra sviði Þjóðleikhússins á morgun sviðslistaverkið Eyður. Björn Þór Vilhjálmsson rýnir í sögu Friðriks Þórs Friðrikssonar kvikmyndaleikstjóra sem Einar Kárason hefur skráð, bók sem nefnist Með sigg á sálinni og kom út fyrir síðustu jól. Í henni segir Einar frá viðburðaríkri ævi Friðriks, allt frá bíódögum og sveitasögum bernskunnar til Óskarsverðlaunatilnefningar og kynna leikstjórans af stórstjörnum af ýmsu tagi. Snæbjörn Brynjarsson fjallar um sýninguna Teenage Songbook of Love and Sex eftir Ásrúnu Magnúsdóttur og Alexander Roberts sem er á fjölunum í Tjarnarbíói. Og bók vikunnar á Rás 1 að þessu sinni er Aðferðir til að lifa af eftir Guðrúnu Evu Mínervudóttur, þetta er nýjasta skáldsaga Guðrúnar Evu sem tók á dögunum við viðurkenningu Rithöfundasjóðs Ríkisútvarpsins. Hlustendur heyra í Guðrúnu í þættinum í dag.

Umsjón: Guðni Tómasson og Eiríkur Guðmundsson.

Árið 1925 lagði breski landkönnuðurinn Percy Fawcett af stað inn í Amazon-regnskóginn í Brasilíu í leit að rústum höfuðborgar horfinnar siðmenningar, sem hann kallaði týndu borgina Zetu. Þessarar borgar er einungis getið í einu gulnuðu handriti frá átjándu öld, en Fawcett var handviss um að hana væri að finna einhverstaðar djúpt inni í regnskógarþykkninu - og varð heltekinn af þeirri tilhugsun um að sjá borgina með eigin augum.