Í Víðsjá í dag verður haldið í Hafnarborg þar sem rætt verður við tónskáldin Þráinn Hjálmarsson og Davíð Brynjar Franzson um sýninguna Borgarhljóðvist í formi ensks listigarðs. Hugað verður að sviðslistaverkinu Kartölfur sem sem sviðslistahópurinn CGFC færir nú aftur á svið í Borgarleikhúsinu en verkið rannsakar þætti í sögu kartöfluræktunar á Íslandi og er hluti af verkefninu Umbúðalaust sem Borgarleikhúsið stendur fyrir. Jafnframt verður hugað að bók vikunnar sem að þessu sinni er Sumarbókin eftir Tove Jansson.

Umsjón: Guðni Tómasson og Halla Harðardóttir.

Í Víðsjá í dag verður rætt við Lindu Vilhjálmsdóttur ljóðskáld sem sendir nú frá sér nýja ljóðabók sem hún kallar Kyrralífsmyndir og er ort undir sterkum áhrifum af nýliðnum vetri. Farið verður í heimsókn á Safnasafnið á Svalbarðseyri við Eyjafjörð en í ár stendur safnið á tímamótum. Safnið var stofnað árið 1995 af Níelsi Hafstein og Magnhildi Sigurðardóttur og fagnar því 25 ára afmæli á þessu ári. Í þættinum verður rætt við Níels Hafstein. Páll Haukur Björnsson, stjórnarmeðlimur Myndstefs, kemur einnig í heimsókn í Víðsjá og ræðir um réttarstöðu myndlistarmanns gagnvart verki sínu eftir að það hefur verið selt.

Umsjón: Halla Þórlaug Óskarsdóttir og Guðni Tómasson

Í Víðsjá í dag verður meðal annars hugað að sýningunni Tíðaranda í Listasafni Árnesinga í Hveragerði og rætt við Skúla Gunnlaugsson listaverkasafnara sem á verkin á sýningunni. Tónskáldið Guðmundur Steinn Gunnarsson segir frá nýrri útgáfu sinni á verkinu Sinfonia þar sem tónlistarhópurinn Fengjastrútur leikur samnefnt verk Guðmundar. Ármann Jakobsson heldur áfram að segja hlustendum frá þemum í Bernnu-Njálssögu en sagan er nú kvöldsaga Rásar 1.

Sigrún Árnadóttir hlaut norræn þýðingaverðlaun Letterstedtska sjóðsins á dögunum. Sigrún kynnti landsmenn meðal annars fyrir hinum ástsæla Einari Áskeli. Víðsjá heimsækir Sigrúnu á heimili hennar í tilefni verðlaunanna.

Sunna Ástþórsdóttir flytur hlustendum myndlistarpistil og veltir þar fyrir sér útskriftasýningum Listaháskóla Íslands og myndlistarnámi almennt. Einnig verður rætt við Sólveigu Thoroddsen söngkonu og hörpuleikara sem nýlega sendi frá sér hljómplötu þar sem hún syngur lög á einum sjö tungumálum og leikur undir á tvenns konar Hörpu og finnska hljóðfærið kantele.

Björn Þór Vilhjálmsson segir hlustendum frá lestri sínum á bókinni Apropos of nothing, nýlegri sjálfsævisögu Woodys Allen.

Ármann Jakobsson segir hlustendum Víðsjár í dag frá ákveðnum þemum úr Brennu-Njálssögu, sem hann er að lesa þessa dagana sem kvöldsögu hér á Rás 1, þemað sem Ármann ræðir í dag er Íslenski hrúturinn. Víðsjá heimsækir líka neðstu hæð Ketilhússins í Listagilinu á Akureyri en þar hefur listahópurinn Kaktus nú vinnustofur og sýningarrými. Hlustendur heyra í Freyju Reynisdóttur og Karólínu Baldvinsdóttur, meðlimum Kaktús hópsins, og í Önnu Gunnarsdóttur sýningarstjóra samsýningarinnar Hverfandi landslag á Listasafnínu á Akureyri. Sigurður Gylfi Magnússon sagnfræðingur verður tekinn tali um nýjustu bók hans sem fjallar um tilfinningalíf Magnúsar HJ Magnússonar sem er fyrirmyndin að Ólafi Kárasyni ljósvíkingi í Heimsljósi Halldórs Laxness. Hallargarðurinn í Reykjavík verður jafnframt heimsóttur en þar opnar Sigríður Soffía Níelsdóttir sýninguna Eldblóm á morgun, 17. júní.

Umsjón: Guðni Tómasson og Halla Þórlaug Magnúsdóttir.

Í Víðsjá verður á flakki í dag um listagilið á Akureyri en fjöldi nýrra sýninga opnaði í Listasafninu á Akureyri um síðustu helgi. Safnið verður í heimsótt í Víðsjá í dag, rætt við safnstjórann, Hlyn Hallsson og fleiri aðstandendur sýninga þar á bæ. Ármann Jakobsson prófessor í íslenskum bókmenntum fyrri alda les kvöldsögu Rásar 1 Brennu-Njálssögu á næstu vikum, en fyrsti lestur verður á dagskrá Rásar 1 annað kvöld. Að því tilefni verður rætt við Ármann í Víðsjá í dag og á næstu vikum um helstu þemu sögunnar, áhrifamátt og mikilvægi. Margrét Elísabet Ólafsdóttir, lektor við Háskólann á Akureyri, verður einnig tekin tali um Nýjar birtingarmyndir listarinnar, sýningu sem opnuð verður um helgina á vefsvæði tímaritsins Artzine.

Umsjón: Guðni Tómasson og Halla Þórlaug Óskarsdóttir

Í Víðsjá dagsins verður meðal annars rætt við Guðmund Thoroddsen myndlistarmann sem sýnir ný málverk sín í Hverfisgalleríi þessa dagana á sýningu sem hann kallar Hundaholt, hundahæðir. Hlustendur heyra einnig af verkefninu Þjóðleik sem Þjóðleikhúsið stendur fyrir en Björn Ingi Hilmarsson segir frá nýjum áherslum í því starfi. Einnig er líklegt að hinn síbreytilegi Barbapabbi og hið eðla hljóðfæri fagottið komi við sögu í Víðsjá dagsins.

Umsjón: Guðni Tómasson og Halla Þórlaug Óskarsdóttir.

Í Víðsjá í dag verður m.a. litið við á sýningunni „Saga Íslands: 1. Hluti - Leir og Postulín“ sem opnuð var sýningarrýminu Open að Grandagarði um síðustu helgi, en undanfarin 40 ár hefur fyrirtækið Leir og Postulín prentað lógó, ljósmyndir og slagorð á bolla fyrir fyrirtæki, bæjarfélög, félagasamtök og einstaklinga. Nú lánar fyrirtækið ríflega 600 bolla á sýninguna, sem saman skrá eins konar tímalínu óritskoðaðrar sögu Íslands síðustu 40 ára. Sýningin samanstendur af þessum 600 bollum og auk þess hefur Open boðið 20 listamönnum, samtökum, hönnuðum, sviðslistamönnum, rithöfundum og sagnfræðingum til að bæta nýjum bollum við safnið. Víðsjá kannar málið.

Sigurður Halldórsson sellóleikari verður gestur þáttarins en í Skálholti fara fram á laugardag minningartónleikar um hollenska fiðluleikarann Jaap Schröder sem úr árabil lék á tónlistarhátíðinni í Skálholti og hafði mikil áhrif á íslenskt tónlistarfólk sem aðhyllist upprunamiðaðan flutning á tónlist fyrri alda.

Björn Þór Vilhjálmsson fjallar um sagnfræðiritið og bókmenntalega stórsmellinn Sapiens - Mannkynssaga í stuttu máli eftir Youval Noah Harari, en bókin kom út í íslenskri þýðingu í haust.

Umsjón: Halla Þórlaug Óskarsdóttir og Guðni Tómasson