Moien, hei ass de Joël vu BEE SECURE. Haut schwätze mir iwwert Computerspiller. Deen een oder dat anert freet sech lo sécher, wat dat da mat sécherem Ëmgang mam Internet ze dinn huet. An et stëmmt: Nach laang net all Spill kann een online spillen. Mä ëmmer méi Spiller sinn net nëmmen online, mä och an der Cloud.

Sou ginn et Spiller, wou de Contenu just nach gestreamt gëtt. Et muss een selwer keng gutt Grafikkaart am Computer hunn, et brauch een just eng séier Internetverbindung. Dat ass allerdéngs nach zimlech rar. Online-Spiller späichere vill Donnéeën online, zum Beispill ären Usernumm an är Highscore. An da ginn et zanter e puer Joer vill Online-Shops, déi komplett an der Cloud funktionéieren. Ee bekanntent Beispill ass „Steam“ vun der Firma Valve.

Allerdéngs huet den Cloud Gaming-Modell och e puer Nodeeler fir eis als Konsumenten. Wann dir een Spill kaaft, gehéiert et dacks guer net iech, mä dir kaaft just eng Lizenz, fir et dierfen ze spillen. De Nodeel dobäi ass, datt een een alt Spill net méi ka verkafen, sou wéi dat mat enger CD oder DVD gaangen ass. Dir sidd och dovunner ofhängeg, datt den Cloud-Ubidder weiderhin existéiert an net op ee mol seng Dieren zou mécht. Et ginn awer och Shops, déi op d'Cloud an op Kopéierschutz verzichten, zum Beispill den humble bundle store oder gog.com.

Vill Cloud Gaming-Spiller probéieren duerch verschidden Extrae méi Suen ze maachen. Sou kann een sech zum Beispill Spill-Gold oder eng nei Rüstung fir säi Charakter mat richtege Sue kafen. Dat ka séier deier ginn: Sou hat e Papp net schlecht gestaunt, wéi säi Jong an engem Futtball-Spill 5000 Dollar ausginn hat, well hien sech zousätzlech Futtballspiller fir säin Team kaaft hat, ouni datt de Papp eppes dovunner wosst.

Et ass dowéinst wichteg, datt een ëmmer no engem Passwuert gefrot gëtt, iert een sou Extrae keeft. Sou kennen Eltre verhënneren, datt hir Kanner onerlaabt Suen an engem Spill ausginn. Dacks ass de Konto vum Online-Shop direkt mat dem Konto oder der Kreditkaart verbonnen. Dat ass zwar praktesch, mä biergt och enorm Risiken. Sou kéint een Hacker sech op är Käschte mat néie Spiller andecken. Dofir gëllt: den Konto fir den Online-Shop, zum Beispill Steam, muss een séchert Passwuert hunn. Wann et méiglech ass, benotzt 2-Facteuren-Login. Dobäi musst dir nieft ärem Code z.B. een PIN aginn, deen op enger App op ärem Handy ugewise gëtt.

Ween d'Risiken an d'Gefore vu Cloud Gaming kennt an sech deementspriechend verhält, kann dann och ouni schlecht Gewëssen an déi sëlleche Phantasiewelte vun de Computerspiller antauchen.

Weider Informatiounen zu dem Thema fannt dir am Clever Cloud Dossier op bee-secure.lu

Moien, hei ass de Joël vu BEE SECURE. Haut schwätze mir, passend zum Vältesdag, iwwert Léift. Déi spillt sech hautdesdaags dacks am Internet of. Dat ass am Prinzip näischt schlechtes – eis Elteren hätte sécher och léiwer per Messenger matenee geschriwwe wéi all puer Minutte Mënzen an eng Telefonskabinn ze geheien, mä deemools war dat eben nach net méiglech. Sou hunn mir haut e puer Optioune méi, fir mat eise Léifsten ze kommunizéieren.

Ee Phänomen ass den sougenannte Sexting. De Begrëff setzt sech aus texting an Sex zesummen, an et geet ëm den Austausch vun intime Messagen oder Fotoen. Dat ass un sech kee Problem, mä et kann awer zu engem ginn. Grad Fotoen oder Videoe verbreeden sech enorm séier am Internet, wann se bis mol doranner sinn.

Déi wichtegst Reegel ass: Däin Kierper gehéiert dir an keen huet d'Recht, dech dozou ze zwéngen oder ze drängen, méi dovunner ze weise wéi s du wëlls. Du bass – egal op verléift, verlobt, bestuet oder just befrënnt – zu näischt verflicht. Ëmgedréint gelt natierlech dat selwecht: Du hues net d'Recht, op Biller vun enger aner Persoun ze verlaangen. An scho guer net, déi online weider ze verbreeden. Wann een dech dozou drängt, dech plakeg ze weisen, kanns du eng Plainte bei der Police maachen, fir dech an potentiell anerer ze schützen.

Wann et trotzdem sollt passéieren, datt plakeg Fotoe vun dir am Internet opgetaucht sinn, ass dat nach kee Weltënnergang. Als éischt solls du déi Persoun kontaktéieren an hir soen, datt se déi Fotoe läsche soll. Wann se dat net mécht, mécht se sech strofbar. Dann ass et wichteg, datt s du dir eng Vertrauenspersoun sichs, mat där s du iwwert dat Thema schwätze kanns. Du kanns dech och un d'BEE SECURE Helpline oder un de KannerJugendTelefon wennen.

Wichteg ass dann, datt s du erausfënns, wou däi Bild iwwerall opdaucht. Da kanns du de Bedreiwer vun deene Site mellen, datt si däi Bild sollen erofhuelen. Si mussen dem nokommen, soss kanns du d'Police aschalten. Du kanns dech och un d' BEE SECURE Stopline wennen, wann s du manner wéi 18 Joer hues. Och wann s du d'Bild fräiwëlleg gemaach hues, ass dat an dem Fall virum Gesetz Kannerpornografie.

Ween ganz sécher well goen, datt ni intim Fotoe vun him am Internet landen, dee sollt am beschte guer keng maachen an och keng op sengem Handy gespäichert loossen, déi zum Beispill alkoholiséiert gepost kéinte ginn.

An deene meeschte Fäll sinn d'Affer vun „geleakten“ Fotoe jonk Meedercher. Dofir nach emol een Appell un d'Jongen a Männer: Stellt keng Fotoe vun äre Frëndinnen oder Ex-Frëndinnen an den Internet. Et ass engersäits illegal an et wéist anersäits, datt dir een enorm schlechte Charakter hutt.

Weider Informatiounen zu dem Thema fannt dir am Sexting-Dossier op bee-secure.lu

Moien, hei ass de Joël vu BEE SECURE. Haut schwätze mir iwwert den Safer Internet Day. Deen ass schon muer Dënsden, den 9. Februar 2016. Den Safer Internet Day ass een weltwäiten Aktiounsdag steet dëst Joer ënnert dem Motto „Play your part for a better internet“, also: Spill deng Roll fir een besseren Internet! Et soll also op Positivbeispiller vu gudde Communities opmierksam gemaach ginn an illegalen oder geféierleche Contenu gemellt ginn.

D'Zieler vum Safer Internet Day sinn, d'Bewosstsinn fir d'Thema „sécher Internetnotzung“ ze förderen an Kanner, Jugendlechen, Elteren an Pädagoge mat Informatiounen an prakteschen Tuyauen ze ënnerstëtzen. Ausserdeem sollen déi verschidden Akteure wéi Institutiounen oder Firmen op nationalem an internationalen Niveau zesummen eng weltwäit Campagne duerchféieren. Um Safer Internet Day sollen dann och d'Medien an Ëffentlechkeet speziell op d'Thema „sécher Internetnotzung“ sensibiliséiert ginn.

Matmaache ka jiddereen – egal op Privatpersounen, Firmen, Schoulen, Jugendhaiser oder aner Organisatiounen. Zu Lëtzebuerg ass och eng ganz Rëtsch un Aktioune geplangt. De Safer Internet Day start mat enger Pressekonferenz vu BEE SECURE, wou den Joresbericht 2015, een neien pädagogesche Leitfuedem fir d'Grondschoul an déi nei Poustere fir d'BEE SECURE Helpline an Stopline virgestallt ginn. De ganzen Dag iwwer wäerte ronn eng 100 Kanner aus Maisons Relais aus dem ganze Land un enger Rallye deelhuelen, wou si iwwert sécher Internetnotzung informéiert ginn.

Um Radio ARA leeft zwëschen 3 a 4 eng Radiosendung vun der Medienklass aus dem Lycée Michel Rodange zum Thema. Am Hackerspace „Level 2“ zu Bouneweg gëtt et um halwer 7 owes den „Digital Privacy Salon“, een oppent Treffe mat Experten aus dem IT-Beräich, wou jidderee léiere kann, seng Privatsphäre mat technesche Mëttelen ze schützen. Ausserdeem bedeelegen sech ganz vill Maisons Relais mat spezielle Safer Internet-Aktivitéiten um Safer Internet Day.

Dir kennt awer och selwer aktiv ginn! An dat, an deem s dir Kollegen an Famill op den Safer Internet Day opmierksam maacht. Dat geet iwwert den Service „Thunderclap“, deen zu engem bestëmmten Zäitpunkt automatesch fir iech op twitter oder facebook post an sou eng gemeinsam Well vun Tweets an Posts lassléisst. D'Hashtags fir muer sinn #SID2016, #iplaymypart #playyourpart

Zu gudder Lëscht kënnt dir BEE SECURE och op facebook an twitter liken respektiv followen. A ween ëmmer nach net genuch vum Thema Sécher Internetnotzung huet, ka muer de ganzen Dag BEE SECURE-Podcasts am Archiv op podcast.bee-secure.lu lauschteren. Weider Informatiounen zum Thema an de ganze Programm fannt dir op bee-secure.lu/sid

Moien, hei ass de Joël vu BEE SECURE. Haut schwätze mir iwwert Ransomware, also Software, déi iech wëll erpressen. Aktuell ass zu Lëtzebuerg grad eng ganz Well vun sou Schuedprogrammer ënnerwee.

Ransomware kritt een meeschtens per Email oder iwwert een Link. Op alle Fall muss een een Programm opmaachen. Dee verschlësselt dann äre ganze Computer an verlaangt no engem Geldbetrag, fir d'Entschlësselung. De soll een per Bitcoin, enger elektronescher Währung, déi anonym Transaktiounen erlaabt, bezuelt ginn. Bis dat net geschitt ass, sinn är Donnéeën an äre Computer net ze benotzen. Ween den Disk einfach läscht, verléiert domadder natierlech säi ganzt digitalt Liewen.

Wéi kann een sech viru Ransomware schützen? Als éischt gëllt et ëmmer gutt opzepassen, wat een uklickt an wat fir eng Dateien een opmécht. Och wann d'Email vun engem Bekannte kënnt, kann den Attachment Malware sinn. Emailadressen kënne gefaked sinn oder den Bekannte selwer Affer vu Ransomware gi sinn. An dem Fall ass et besser, emol méi nozefroe wéi eng obskur Datei opzemaachen an dann erpresst ze ginn.

Wichteg ass et, ëmmer direkt Updates ze maachen. Ransomware notzt gäre Schwaachstellen am Betriebsystem aus, dofir sinn Updates, déi dës Feeler behiewen, enorm wichteg fir de Schutz vun ären Donnéeën. Ausserdeem sollt dir reegelméisseg Backups op eng extern Festplack maachen, déi net ëmmer um Computer hänkt. De schlëmmste Verloscht läit nämlech dacks doranner, datt all är perséinlech Donnéeë wéi Fotoen, Dokumenter, Videoen, asw. verluer sinn.

Dacks kritt een seng Donnéeën och dann net zeréck, wann een den Erpresser nogëtt an d'Sue bezuelt. Leider ginn et fir vill Ransomware och keng Léisungen, fir de System erëm zeréckzestellen. Wann dir mierkt, datt dir evtl. grad Ransomware opgemaach huet, trennt den Computer direkt vum Netz, och vum WLAN an probéiert en nei ze starten. Wann en bis verschlësselt ass, ass et am beschten, eng Plainte bei der Police ze maachen. Dir kënnt iech och op der BEE SECURE Helpline ënnert der Nummer 8002 1234 mellen, fir Hëllef ze kréien.

Nach eng Kéier: Net fir all Ransomware gëtt et eng Léisung, déi iech är Donnéeën zeréck bréngt, ëmsou méi wichteg sinn regelméisseg Backups. Weider Informatiounen zu dem Thema fannt dir op bee-secure.lu an op CIRCL.lu

Zum Schluss wëll ech iech awer och nach eng Kéier op den Safer Internet Day opmierksam maachen. Deen ass dëst Joer den 9. Februar an steet ënner dem Motto „Play your part for a better Internet“. Op der ganzer Welt wäerte vill verschidden Aktiounen an Evenementer stattfannen. BEE SECURE koordinéiert déi Evenementer fir Lëtzebuerg. Geplant sinn zum Beispill eng Rallye, een Workshop am Jugendhaus zu Diddeleng oder eng Radiossendung am Kader vun Graffiti, de Jugendsendungen um Radio ARA. Wann dir also selwer eng Aktioun zum sécheren Internet plangt, an ärer Schoul, ärem Veräin, Jugendhaus oder Firma, da melt iech op bee-secure.lu/sid – do ginn är Aktiounen dann och verëffentlecht! De Recht vun iech notéiert sech den 9. Februar 2016 als Safer Internet Day an de Kalenner oder bedeelegt sech duerch een Post oder Tweet un der Aktioun!

Moien, hei ass de Joël vu BEE SECURE. Haut schwätze mir iwwert een Thema, bei dem dem engem oder aneren eng Luucht wäert opgoen. Eng Täscheluucht ass eng praktesch Erfindung, zum Beispill wann een dobaussen am Däischteren eppes muss sichen oder wann de Stroum ausfält an een d'Sécherungskëscht ënnersiche muss.

Mä sou eng Täscheluucht hëlt Platz ewech, je no Modell brauch se almoudesch Batterien, déi ëmmer genee dann eidel sinn, wann een se bräicht. Lo hunn mir awer bal alleguerten een Smartphone an der Täsch, déi meeschtens eng hell Luucht hunn, déi beim Fotograféieren als Blëtz déngt. Am Fong ass dat jo eng agebauten Täscheluucht.

Fir déi Luucht gëtt et meeschtens awer kee Knäppchen, mä et brauch een eng Funktioun an der Software, fir se un an auszeschalten. Ween Android 5.1 oder iOS 9 huet, muss sech keng Gedanke méi maachen: d'Täscheluuchtenfunktioun ass am Betriebssystem integréiert. Mä ween awer méi al Software op sengem Handy lafen huet, muss sech eng App roflueden, fir d'Täscheluucht benotzen ze kennen.

An hei gëtt et elo kritesch: Eng ganz Rëtsch vun Apps, déi am Fong soss näischt maache solle wéi eng Luucht un an aus schalten, froen no Berechtegungen. Sou géif d'Täscheluucht-App zum Beispill gären är Kontakter wëssen, äre Standuert mëttels Geolocatioun erausfannen, är SMSen liese kënnen, an sou weider. Déi Apps stinn am Verdacht, datt se är Donnéeë klauen an iech sou ausspionéieren.

Et ass also wichteg, virum Installéiere vun enger App genee ze kucken, wat fir Berechtegungen déi App wëll an sech ze iwwerleeën, ob se déi och wierklech brauch. Eng Täscheluucht muss net telefonéiere kënnen. Eng gutt Method ass och, sech d'Bewäertunge vun aneren User kritesch duerchzeliesen. Op bee-secure.lu fannt dir een Artikel mat Tipps an Tricks zu Berechtegungen, déi Apps ufroen.

Zum Schluss wëll ech iech awer och nach eng Kéier op den Safer Internet Day opmierksam maachen. Deen ass dëst Joer den 9. Februar an steet ënner dem Motto „Play your part for a better Internet“. Op der ganzer Welt wäerte vill verschidden Aktiounen an Evenementer stattfannen. BEE SECURE koordinéiert déi Evenementer fir Lëtzebuerg. Geplant sinn zum Beispill eng Rallye, een Workshop am Jugendhaus zu Diddeleng oder eng Radiossendung am Kader vun Graffiti, de Jugendsendungen um Radio ARA. Wann dir also selwer eng Aktioun zum sécheren Internet plangt, an ärer Schoul, ärem Veräin, Jugendhaus oder Firma, da melt iech op bee-secure.lu De Recht vun iech notéiert sech einfach den 9. Februar 2016 als Safer Internet Day an de Kalenner!

Moien, hei ass de Joël vu BEE SECURE. Haut wëll ech mat iech iwwert Flüchtlinge schwätzen. Oder éischter doriwwer, wat iwwert Flüchtlinge geschwat gëtt.

Dir wësst sécherlech alleguerten, datt zanter dem Summer vill Leit, virun allem aus Syrien an Afghanistan ënnerwee sinn, fir Asyl an Schutz an Europa unzefroen. An wann dir op de sozialen Netzwierker ënnerwee sidd, dann hutt dir sécher gesinn, datt vill Leit een Problem domadder hunn an Gerüchter verbreeden. Ech hat iech an enger viereschter Episod schonns gezielt, wéi een sou Gerüchter entarne kann. Allerdéngs ass dat net ëmmer einfach an et brauch virun allem vill Zäit.

Dofir gëtt et elo eng Initativ, déi Gerüchter, Virurdeeler an Hate-Speech, also Haasbotschaften, mat Fakten entarnen wëll. Linking Luxembourg heescht des Initativ, déi och vun BEE SECURE an dem Service National de la Jeunesse ënnersetzt gëtt. Linking Lëtzebuerg wëll Ängscht an Virurdeeler ofbauen, mä awer och engagéierte Leit eng Méiglechkeet ginn, fir op Haaskommentaren ze äntwerten.

Dofir gëtt et en groussen Dossier mat Froen an Äntwerten zu Flüchtlingen an kuerz Info-Videoen, wou déi wichtegst Fakten erklärt ginn. Och d'Méiglechkeet, fir selwer Froen eranzeschécken, besteet. Mä et ginn awer och Memes mam „Ren Renert“, engem Comic-Fuuss, déi een an Diskussiounen asetze kann, fir gewieft op Hasskommentaren oder Gerüchter ze äntwerten.

Dir fannt d'Initative linking luxembourg um Internet op linkinluxembourg.lu oder op facebook, wou d'Initative och einfach ënnert „Linking Luxembourg“ ze fannen ass. An de kommenden Woche wäert dann och nach Contenu zu den Themen „Frontalieren“ an „Sproochen“ op de Site kommen. Et lount sech also, ëfters do laanscht ze luussen.

Zum Schluss wëll ech iech awer och nach op den Safer Internet Day opmierksam maachen. Deen ass dëst Joer den 9. Februar an steet ënner dem Motto „Play your part for a better Internet“. Op der ganzer Welt wäerte vill verschidden Aktiounen an Evenementer stattfannen. BEE SECURE koordinéiert déi Evenementer fir Lëtzebuerg. Wann dir also selwer eng Aktioun zum sécheren Internet plangt, an ärer Schoul, ärem Veräin, Jugendhaus oder Firma, da melt iech op bee-secure.lu De Recht vun iech notéiert sech einfach den 9. Februar 2016 als Safer Internet Day an de Kalenner!

Moien, hei ass de Joël vu BEE SECURE. Haut wëll ech mat iech iwwert äre néie Smartphone schwätzen. Wahrscheinlech louch esou een Apparat bei net wéinege vun iech ënnert dem Beemchen. Och wann dir ären Handy scho bësse méi laang hutt, sou stellt sech dann ëmmer d'Fro, wéi sécher déi Donnéeë sinn, déi op ärem Gerät gespäichert sinn. Dofir maache mir haut den Sécherheetscheck fir Android-Smartphones. Déi meescht Tipps gëllen awer och fir d'Geräter vun Apple.

Och wann den Smartphone nach ganz nei ass, an e puer Woche wäert en voll mat Fotoen, Kontakter, Notizen, Videoen an aneren Donnéeë sinn. Dat ass kee Feeler. Et geet just dorëms, dës Donnéeë gutt virdrun ze schützen, an déi falsch Hänn ze gelaangen.

Den éischte wichtege Punkt ass den Zougrëff op ären Handy. Eng éischt Mesure ass den SIM Lock. Dee verhënnert, datt ären Handy sech ouni de PIN an d'Netz era wielt. Dacks ass de SIM Lock schonns agestallt – wann net, sollt dir en op alle Fall aktivéieren. Déi zweet Mesure ass de Screen Lock, deen den Zougrëff op ären Handy sperrt. Hei ginn et verschidde Méiglechkeeten, déi ënnerschiddlech sécher sinn. Den Handy mam Fangerofdrock oder dem eegene Gesiicht ze entspären ass eng flott technesch Spilleréi, mä richteg sécher sinn just een PIN oder een Passwuert. Et gëtt och d'Méiglechkeet, eng Zäit anzestellen, no där den Handy sech automatesch spärt, wann en net benotzt gëtt. Och dës Funktioun sollt dir benotzen.

Den zweete wichtege Punkt ass d'Verschlësselung vun ärem Smartphone. Iert dir den Handy verschlësselt, sollt en opgeluede sinn an um Stroum hänken. D'Verschlësselung kann e puer Stonnen daueren. Dat sollt Iech awer net dovunner ofschrécken, dëse wichtege Schratt ze maachen.

Als drëtte Punkt sollt een d'WLAN-, Bluetooth- an GPS-Funktiounen ofschalten. Et geet duer, dës Funktiounen dann anzeschalten, wann een se braucht. Dat spuer net nëmmen Donnéeën, mä och Akku.

De véierte wichtege Punkt sinn Software-Updates. Am beschten ass et, Updates automatesch ze installéieren. Sou kënnen sech keng Sécherheetslücken onbemierkt opmaachen. Och Updates fir den Betriebssystem sollt een ëmmer sou séier wéi méiglech installéieren.

Wéider Informatiounen zu dësem Thema fannt dir op bee-secure.lu – an den alen Episoden vun eisem Podcast fannt dir och Tipps fir Apps, mat deenen een sécher kommunizéiere kann.

Moien, hei ass de Joël vu BEE SECURE. Haut kucke mir zesummen op 2015. Wéi all Joers huet een d'Gefill, d'Zäit wier séier vergaangen, dofir ass et sécher eng gutt Iddi, d' BEE SECURE-Joer nach eng Kéier Revue passéieren ze loossen. Am éischte BEE SECURE vun 2015 huet d'Anne eis iwwert seng gutt Virsätz fir dat néit Joer erzielt an eis Apps gewisen, déi engem dobäi hëllefe kënnen, sou gutt Virsätz och anzehalen an den „inneren Schweinehund“ an de Grëff ze kréien. Och iwwert de Phänomen vum „Phubbing“, also op den Handy amplaz de Frënn a Frëndinnen an d'Gesicht ze kucken hunn mir am Januar 2015 geschwat. Am Ufank vum Joer ass och ëmmer den wichtegsten Dag vum Joer fir BEE SECURE, den Safer Internet Day. Dee wäert 2016 den 9. Februar sinn. Dat kennt dir iech also schonns an den néie Kalenner fir d'nächst Joer notéieren.

Am Februar ass awer och Vältesdag, an dozou passend huet eis d'Anne iwwert d'Do's and Dont's beim Online-Dating opgekläert. Sou si mir gewuer ginn, wéi een sech viru Fake-Profiler schütze kann. Wenn dat noliese wëll, fënnt den E-Dating-Dossier um Site vu BEE SECURE.

Een aneren Dossier, dee vläit lo och fir vill vun iech wichteg gëtt, déi um Enn vum Joer nach een néie Smartphone kréien, ass den Smartphone-Dossier. Et ass nämlech relativ einfach, vu vermeintlecht gratis Apps oder SMS-Servicer ofgezockt ze ginn. Do kann een leider zimlech séier vill Sue verléieren.

Am Abrëll huet d'Anne eis vu Banking-Trojaner gewarnt, déi nach ëmmer hiert Onwiesen dreiwen an eis awer och vu sengen Abenteuer op der Online-Konferenz re:publica erzielt. Och iwwert den Ënnerscheed zwësche legalen oder illegale Streaming-Déngschter huet hat eis opgekläert. Dunn, am Summer, huet d'Anne BEE SECURE verlooss an ech hunn seng Aufgab iwwerholl. Ech konnt iech direkt mat enger gudder Noriicht beglécken: dem Enn vum Roaming an Europa. Zur Erënnerung: den 15. Juni 2017 wäert et esouwäit sinn, bis dohinner musst dir am europäeschen Ausland ëmmer extra bezuelen, wann dir urufft, SMSen verschéckt oder Datendéngschter benotzt.

No der Vakanz hu mir een Backup gemaach, geléiert wéi een zesummen schaffe kann, wéi een sech a seng Kollege viru Fakes schütze kann an am Kader vun der Clever Cloud User-Kampagne hu mir geléiert, wat d'Cloud ass a wéi se funktionéiert.

Natierlech gouf et och nach vill aner Episode vum BEE SECURE Podcast, déi dir all op podcast.bee-secure.lu nolauschteren an noliesen kënnt. Dir fannt do och dacks interessant Links zu den Themen, iwwert déi ech hei schwätzen. All d'Dossiere vu BEE SECURE fannt dir op bee-secure.lu

Moien, hei ass de Joël vu BEE SECURE. Haut schwätzen ech iwwert een Thema, dat am Fong schonn an Vergiessenheet gerode war, elo awer zu néier Aktualitéit komm ass. Riets ass vun sougenannte Makro-Viren. Dat sinn keng riseg Krankheetserreger, mä Schuedprogrammer, mat deenen äre Computer zu Zombien an engem Botnetz oder dir erpresst kënnt ginn.

Mä kommt mir fänke vu vir un: Ee Makro, datt ass am Kontext vu Word oder Excel een klengt Stéck Programmcode, dat engem Aufgaben, déi ëmmer erëm ufalen, ofhuele kann. Fir vill User huet déi Funktioun awer keng Bedeitung. Duerch d'Méiglechkeet, Programmcode an engem Word-Dokument anzeschleissen, gouf d'Makro-Funktioun een Ziel vu Kriminellen. Déi hunn dann Trojaner oder Viren am Makro-Code verstoppt. Sou krut een dann eng Email mat engem Dokument geschéckt, an esoubal een dat opgemaach huet, ass de Makro-Code inklusiv Virus aktiv ginn. Allerdéngs ass d'Makro-Funktioun haut am Word an am Excel standardméisseg ausgeschalt. Domadder war een also der Meenung, et géif sech net méi lounen, fir trucéiert Word- oder Exceldateien per Mail ze verschécken.

Allerdéngs schéngen net nëmme verschidden Accessoiren aus den 90er Joer an Welt vun der Moud een Comeback ze hunn, mä eben och d'Makro-Viren. Haut muss den User d'Makro-Funktioun selbstänneg aktivéieren. Dat mécht een natierlech net bei engem obskure Mail. Dofir ginn d'Texter vun deene Mails ëmsou méi raffinéiert. Entweder et ginn Emailkonten gehackt an all d'Kontakter aus dem Adressbuch kréien eng Mail, sou datt een mengt, et hätt een vun enger bekannter Persoun een Fichier geschéckt kritt.

Vill Gaunere versichen och, hir Maile wéi eng Rechnung ausgesinn ze loossen. Den Text gesäit dann dacks esou aus, wéi wann een sech tommele misst, fir keng Mahnung ze kréien. Ween der Meenung ass, hie géif eppes wichteges verpassen, aktivéiert och séier emol een Makro.

Da kann et awer sinn, datt den eege Computer verschlësselt gëtt an een erpresst gëtt, fir datt en erëm entschlësselt gëtt oder datt den Computer sech an een Zombie verwandelt, dee vun de Gaunere ferngesteiert Spam-Maile verschéckt.

Wéi kann een sech do virdru schützen? Als éischt ass et wichteg, de Virenscanner ëmmer aktuell ze halen. Da kann een verdächteg Dokumenter mat Open- oder LibreOffice opmaachen, well d'Makro-Viren meeschtens op Microsoft Office-Programmer ausgeluecht sinn. Am beschten ass et awer, just Dokumenter opzemaachen, déi een wierklech ugefrot huet oder am Zweifelsfall einfach nach eng Kéier bei där Persoun nozefroen, déi engem d'Mail geschéckt huet.

Weider Informatiounen zu dem Thema fannt dir wéi gewinnt op bee-secure.lu

Moien, hei ass de Joël vu BEE SECURE. Haut schwätze mir nach eng Kéier iwwert Cloud. Ech hat iech déi aktuell Campagne vu BEE SECURE, den Clever Cloud User, jo schonns virgestallt. Mä haut wëll ech da méi genee op een vun deene wichtegsten Themen an der Cloud agoen. Nämlech dem Deelen oder op englesch: Sharing.

Ee Cloud-Service erméiglecht eis, eis Dateien op engem Server ze späicheren an se esou zum Beispill op verschiddene Geräter ze synchroniséieren oder einfach Zougrëff drop ze hunn. Sou kann een zum Beispill vun der Schoul oder der Uni aus op een Dokument zougräifen, dat een am Fong just doheem gespäichert hat. Mä et ass och méiglech, déi Dateien dann och mat anere Leit ze deelen.

Héi ginn et verschidde Modeller: Entweder kann een een Dossier fräiginn, dat heescht déi aner Persoun kann d'Dateie just ukucken oder roflueden. Anerersäits gëtt et och d'Méiglechkeet, déi aner Persoun an een Dossier anzelueden. Déi kann da selwer Dateien an den Dossier eroplueden, se veränneren oder esouguer läschen. Déi Optioun ass praktesch, wann een zesummen un engem Projet schafft oder Fotoen aus enger gemeinsamer Vakanz austausche wëll. Et muss een awer oppassen, datt een bei wichtegen Dokumenter ëmmer eng lokal Kopie huet, déi net an der Cloud ass.

Dateie kënnen aus gedeelten Dossieren nämlech séier verschwannen, well eng Persoun se läscht. Dat muss net aus Muttwëll passéieren, mä de Schued ass dacks grouss. Verschidde Cloud-Systemer hunn zwar d'Méiglechkeet, eng geläschten Datei erëm zeréck ze kréien, mä dat geet och net ëmmer an dacks fehlt grad déi Datei, déi een gebraucht hätt. Dofir gëllt et nëmmen, lokal Backups ze maachen, mä och opzepassen, wat een läscht. Wann een een gedeelten Dossier net méi a senger Cloud brauch, gëtt et eng Optioun, fir en net méi ze abonnéieren. Sou ginn Donnée bei engem selwer geläscht, déi aner Leit kënnen awer weiderhin domadder schaffen.

Et ass insgesamt enorm wichteg, sech ze iwwerleeën, wat fir Donnéeën an d'Cloud sollen. Kee Cloud-Dengschtleeschter kann eng 100%eg Sécherheet garantéieren. Je no Ubidder kënnen är Donnéeën och manipuléiert, geläscht oder fir Reklammszwecker benotzt ginn. Et ass also wichteg, sech iwwert Notzungsbedengungen ze informéieren an Precautiounen fir de Schutz vun der Privatsphär ze huelen. Dozou gehéiert zum Beispill, datt een sougenannt EXIF-Metadonnée vu Fotoe läscht, iert een déi an d'Cloud gëtt.

Ee wichtegen Tipp da nach: All Dropbox huet een Dossier, deen „public“ heescht. Alles wat do dranner ass, ka vu jidderengem am Internet gekuckt ginn. Dat ka praktesch sinn, wann een séier e Bild mat der ganzer Welt deele wëll. Mä eben och enorm geféierlech, wann do privat Dateien dran sinn.

Wéider Informatiounen zu dem Thema fannt dir wéi gewinnt op bee-secure.lu