ព្រឹត្តិការណ៍​កម្ពុជា​ប្រចាំថ្ងៃ

ថ្មីៗនេះ គេហទំព័របណ្ដាញសង្គមមួយចំនួនបានបង្ហោះវីដេអូមួយបង្ហាញឡានសារ៉ែនពាក់ស្លាកខេមរភូមិន្ទបើកផ្លូវឱ្យអ្នករកស៊ីអនឡាញម្នាក់ចូលរួមកម្មវិធីផ្ទាល់ខ្លួន។ វីដេអូមួយនេះត្រូវបានមហាជនចោទសួរថា ហេតុអ្វីយកឡានសារ៉ែនរបស់រដ្ឋ ឬស្ថានប័នជាតិទៅប្រើក្នុងគោលដៅផ្ទាល់ខ្លួនយ៉ាងដូច្នេះ។ ចំណែកក្រសួងការពារជាតិ និងកងរាជអាវុធហត្ថលើផ្ទៃប្រទេសបានបញ្ជាក់ពីការពិនិត្យ និងចាត់វិធានការលើករណីមួយនេះ។ ហេតុអ្វីបន្តមានការយកឡានសារ៉ែនទៅបម្រើប្រយោជន៍ឯកជន ហើយទង្វើនេះអាចជះផលវិបាកអ្វីខ្លះ?

លោក លិម គិមយ៉ា អតីតតំណាងរាស្ត្រនៃអតីតគណបក្សសង្គ្រោះជាតិត្រូវបានខ្មាន់កាំភ្លើងបាញ់សម្លាប់កាលពីថ្ងៃទី០៧ ខែមករា ឆ្នាំ២០២៥ នៅទីក្រុងបាងកក​ប្រទេសថៃ។ មួយថ្ងៃក្រោយមក ខ្មាន់កាំភ្លើងជាជនជាតិថៃត្រូវបានអាជ្ញាធរខ្មែរចាប់ខ្លួន​ បន្ទាប់ពីបានរត់គេចខ្លួនចូលខេត្តបាត់ដំបង​ប្រទេសកម្ពុជា។ ចំណែកជនសង្ស័យទី២ ត្រូវបានសមត្ថកិច្ចថៃកំណត់អត្តសញ្ញាណថាជាជនជាតិខ្មែរ ដែលពាក់ព័ន្ធនឹងឃាតកម្មលោក លិម គិមយ៉ា។ ហេតុការណ៍បាញ់ប្រហារនេះបានក្លាយជាប្រធានបទដ៏ក្តៅគគុកសម្រាប់បក្សប្រឆាំងថៃក្នុងការដាក់សម្ពាធលើរដ្ឋាភិបាលថៃ។ តើសំណុំរឿងមួយនេះអាចប៉ះពាល់ដល់ទំនាក់ទំនងកម្ពុជា-ថៃ​ ដែរ ឬទេ?

លោក លិម គិមយ៉ា អតីត​តំណាង​រាស្ត្រ​គណ​បក្ស​ប្រឆាំង​នៅ​កម្ពុជា​ត្រូវ​បាន​ខ្មាន់​កាំ​ភ្លើង​បាញ់​សម្លាប់​នាម៉ោង​៥ ល្ងាច ​ថ្ងៃ​ទី​៧ ខែ​មករា ឆ្នាំ​២០២៥​ ក្នុង​ទី​ក្រុង​បាង​កក ​ប្រទេស​ថៃ​។ ​ឃាតកម្ម​នេះ​ត្រូវ​បាន​បណ្តាញ​សារ​ព័ត៌​មាន​អន្តរ​ជាតិ​នានា និង​អ្នក​នយោបាយ​មួយ​ចំនួន​របស់​កម្ពុជា​ចាត់​ទុក​មាន​ជាប់​ពាក់​ព័ន្ធ​នឹង​រឿង​នយោ​បាយ​។ ​ឃាត​កម្ម​លើ ​លោក លិម គឹមយ៉ា ​ដែល​ជា​ពលរដ្ឋ​ខ្មែរ​មាន​សញ្ជាតិ​បារាំង​នៅ​លើ​ទឹក​ដី​ថៃ​ពេល​នេះ​ត្រូវ​បាន​អ្នក​តាម​ដាន​នយោបាយ​ព្រមាន​ថា ​រដ្ឋាភិ​បាល​ថៃ​នឹង​ធ្វើ​អត្តឃាត​នយោបាយ ​និង​សេដ្ឋ​កិច្ច​ខ្លួន​ឯង បើ​ថៃ​មិន​វែក​មុខ​រក​អ្នក​នៅ​ពី​ក្រោយ​ឃាត​កម្ម​នោះ​ទេ​។

ថ្មីៗនេះ និងក្រោយពីមានគ្រោះថ្នាក់ចរាចរណ៍មួយនៅតាមបណ្តោយផ្លូវ ៦០ ម៉ែត្រក្នុងរាជធានីភ្នំពេញកាលពីរំលងអធ្រាត្រឈានចូលថ្ងៃទី ៦ មករា ឆ្នាំ២០២៥ ដែលបានបណ្តាលឲ្យបុរសម្នាក់ជាតារារ៉េបឈ្មោះ ដាវីត ឫទ្ធិរុទ្រ ហៅ RUTH KO បាត់បង់ជីវិតភា្លមៗមក ពលរដ្ឋមួយចំនួនបានជជែកវែកញែករកមូលហេតុ។ អ្នកខ្លះយល់ថា គ្រោះថ្នាក់ចរាចរណ៍នោះកើតមានមកពីតាមបណ្តោយផ្លូវ៦០ ម៉ែត្រគ្មានរបាំងខណ្ឌចែកទ្រូងផ្លូវ គ្មានផ្លាកសញ្ញាចរាចរណ៍ច្បាស់លាស់ ហើយគំនូស ស នៅកណ្តាលផ្លូវក៏រលុបសឹងទាំងស្រុង។ តើផ្លូវថ្នល់ដែលគ្មានរបាំងខណ្ឌចែកទ្រូងផ្លូវ ឬមានគំនូសមិនច្បាស់ជាមូលហេតុនៃគ្រោះថ្នាក់ចរាចរណ៍?

កាល​ពី​ថ្ងៃ​ទី​០៣ ​មករា ឆ្នាំ​២០២៥ អគ្គ​ទេសា​ភិបាល​ធនា​គារ​ជាតិ​កម្ពុជា​បាន​ពិភាក្សា​ជា​មួយ​រដ្ឋ​មន្ត្រី​ក្រសួង​រៀប​ចំ​ដែន​ដី រួម​ទាំង​អ្នក​ធ្វើការ​ក្នុង​វិស័យ​អចលន​ទ្រព្យ និង​ស្ថាប័ន​ហិរញ្ញ​វត្ថុ​ដើម្បី​សម្រប​សម្រួល​ឱ្យ​អតិថិ​ជន​ដែល​ទិញ​ផ្ទះ​ដោយ​បង់​រំលស់​ជា​មួយ​ម្ចាស់​បុរី​ផ្ទាល់​អាច​ផ្ទេរ​បំណុល​របស់​ខ្លួន​ទៅ​បង់​ជា​មួយ​ធនាគារ​ ឬ​មីក្រូហិរញ្ញ​វត្ថុ​ដែល​មាន​អត្រា​ការ​ប្រាក់​ទាប​ជាង​។​ តើ​យន្ត​ការ​ថ្មី​នេះ​មាន​ផល​ប្រយោជន៍​អ្វីខ្លះ​ដល់​ភាគី​ពាក់​ព័ន្ធ និង​ថា​តើ​វិធាន​ការ​មួយ​នេះ​អាច​បញ្ចៀស​បាន​ពី​ការ​រឹប​អូស​យក​ផ្ទះ​ដោយ​ម្ចាស់​បុរី ឬទេ ​ក្នុង​ករណី​កូន​បំណុល​មិន​មាន​លទ្ធភាព​បង់​រំលស់​ទាន់​ពេល​?

នាយករដ្ឋមន្ត្រីថៃ នាពេលថ្មីៗនេះ បានប្រកាសជាសាធារណៈអំពីទ្រព្យសម្បត្តិរបស់ខ្លួន ដែលមានតម្លៃរហូតដល់ជាង៤០០លានដុល្លារ។​ ការណ៍នេះទាញចំណាប់អារម្មណ៍ដល់អ្នកតាមដានបញ្ហាសង្គមនិងនយោបាយនៅកម្ពុជា ដោយពួកគេ យល់ថា ប្រមុខរដ្ឋាភិបាលកម្ពុជាគួរយកគំរូតាមមេដឹកនាំថៃ ដែលហ៊ានប្រកាសទ្រព្យសម្បត្តិរបស់ខ្លួនជាសាធារណៈ។ បើតាមក្រុមអ្នកតាមដានសង្គម ការប្រកាស​ទ្រព្យសម្បត្តិដោយ​បើក​ចំហរនេះ ដើម្បីបង្ហាញនូវតម្លាភាពដល់ប្រជាពលដ្ឋ។

អ្នក​ជំនាញ អះ​អាង​ថា ការ​ធ្វើ​សមាធិ​ជា​រឿង​ចាំ​បាច់​សម្រាប់​ក្មេងៗ​នៅតាម​សាលារៀន​ ដើម្បី​ឲ្យពួកគេ​មាន​សតិ​អារម្មណ៍​ល្អ និង​រៀន​ពូកែ​។ បើ​តាម​អ្នក​ជំនាញ ការ​ធ្វើ​សមាធិ​ មិន​ត្រឹម​តែ​ជា​ទម្លាប់​តាម​សាសនា​ប៉ុណ្ណោះ ​តែ​ត្រូវ​បាន​ទទួល​ស្គាល់​ដោយ​ស្ថាប័ន​ស្រាវ​ជ្រាវ​អន្តរ​ជាតិ​ថា ការ​ធ្វើ​សមាធិ ពិត​ជា​ផ្តល់​អត្ថប្រ​យោជន៍​ច្រើន​​ដល់​សុខ​ភាព​ផ្លូវ​ចិត្ត​។​ ការ​បញ្ជាក់​នេះ​ធ្វើ​ឡើង បន្ទាប់​ពី លោក​បណ្ឌិត សុខ ទូច ប្រធាន​រាជ្យ​បណ្ឌិត​សភា​កម្ពុជា​ថ្លែង​ថា ​ក្មេងៗ និង​យុវជន​គួរ​តែ​ចំណាយ​ពេល​ខំ​ប្រឹង​ប្រែង​រៀន​សូត្រ​ជា​ជាង​នាំ​គ្នាទៅ​ធ្វើ​សមាធិ​រំងាប់​អារម្មណ៍​។​ សម្រាប់ លោកសុខ ទូច ការ​ធ្វើ​សមាធិ​សំខាន់​សម្រាប់​តែ​ក្មេង​ដើរ​ផ្លូវ​ខុស​ និង​ប្រើប្រាស់​គ្រឿងញៀន​ប៉ុណ្ណោះ​៕

ថ្មីៗនេះ គណបក្សប្រជាជនកម្ពុជាបានបញ្ជូនគណៈប្រតិភូគណបក្សចំនួន ៣០រូបទៅប្រទេសចិនដើម្បីសិក្សារៀនសូត្រ និងដកស្រង់បទពិសោធន៍ការងារគ្រប់គ្រងរដ្ឋ និងបក្ស រួមទាំងសិក្សាពីកិច្ចការអភិវឌ្ឍប្រទេសជាតិក្នុងការធ្វើទំនើបកម្មបែបចិន។ ការបញ្ជូនគណៈប្រតិភូគណបក្សទៅសិក្សានៅចិនត្រូវបានបក្សកាន់អំណាចពន្យល់ថា គឺដើម្បីជាមូលដ្ឋាននៃការបង្កើតកិច្ចសហប្រតិបត្តិការកសាងសហគមន៍វាសនារួមកម្ពុជា-ចិន។ នៅក្នុងការគ្រប់គ្រងរដ្ឋ និងបក្សនេះ តើកម្ពុជាអាចរៀនសូត្រអ្វីខ្លះពីចិនកុម្មុយនិស្ត ខណៈដែលកម្ពុជាជាប្រទេសប្រកាន់លទ្ធិប្រជាធិបតេយ្យ?

របាយការណ៍បឋមរបស់អាជ្ញាធរជាតិប្រយុទ្ធប្រឆាំងគ្រឿងញៀនបង្ហាញថា ក្នុងមួយឆ្នាំ២០២៤ កម្ពុជារឹបអូសបានគ្រឿងញៀនខុសច្បាប់ចំនួន ១៤,៧តោន និងក៏បានឃាត់ខ្លួនមនុស្សជាង ២ម៉ឺន៦ពាន់នាក់។ ចំនួននេះបានកើនឡើង ៣០,៥% បើធៀបនឹងរយៈពេលដូចគ្នាក្នុងឆ្នាំ២០២៣។ សម្រាប់អ្នកតាមដានសង្គម បញ្ហាគ្រឿងញៀននៅតែជាចំណោតក្នុងសង្គមកម្ពុជា ព្រោះវាបានបង្កផលប៉ះពាល់ជាច្រើនដល់ប្រជាពលរដ្ឋ ពិសេសយុវជន។ ក្នុងន័យនេះ អ្នកវិភាគសង្គមចង់ឲ្យរដ្ឋាភិបាលពង្រឹងការអនុវត្តច្បាប់ និងលុបបំបាត់អំពើពុករលួយដើម្បីទប់ស្កាត់បញ្ហាគ្រឿងញៀននេះឱ្យមានប្រសិទ្ធភាព។

គណបក្សនយោបាយក្រៅរដ្ឋាភិបាលបានកត់សម្គាល់ឃើញថា សិទ្ធិសេរីភាពផ្នែកនយោបាយរបស់ពលរដ្ឋមានការរឹតត្បិតខ្លាំងនៅប៉ុន្មានឆ្នាំកន្លងទៅនេះ។ ពួកគេបានលើកឡើងពីការរើសអើងនយោបាយ ឬការចាប់ឃុំអ្នកនយោបាយដែលហ៊ានរិះគន់សកម្មភាពរបស់រដ្ឋាភិបាល។ តែសម្រាប់ឆ្នាំថ្មី ២០២៥ គណបក្សក្រៅរដ្ឋាភិបាលចង់ឃើញរដ្ឋាភិបាលបើកលំហសិទ្ធិសេរីភាពផ្នែកនយោបាយជូនប្រជាពលរដ្ឋ និងរួបរួមផ្សះផ្សាដើម្បីផលប្រយោជន៍ជាតិជាធំ។