ព្រឹត្តិការណ៍​កម្ពុជា​ប្រចាំថ្ងៃ

ប្រមុខ​រដ្ឋាភិបាល​កម្ពុជា​ លោក ហ៊ុន ម៉ាណែតនឹង​ទៅបំពេញទស្សនកិច្ចនៅប្រទេសបារាំង​នៅសប្តាហ៍ក្រោយ​នេះ​តាម​ការអញ្ជើញ​របស់ប្រធានាធិបតីបារាំង អេម៉ានុយអែល ម៉ាក្រុង។ ទស្សនកិច្ចជាលើកទី១​ក្នុង​តំណែង​ជានាយករដ្ឋមន្ត្រីកម្ពុជា​ទៅកាន់ប្រទេសជាសហប្រធាន​នៃកិច្ចព្រម​ព្រៀង​ក្រុង​ប៉ារីសនេះ ត្រូវបាន​អ្នក​តាមដាននយោបាយខ្លះយល់ថា ជាទស្សនកិច្ចជាប្រពៃណី​ក្រោយ​ពេល​មាន​នាយក​រដ្ឋមន្ត្រីថ្មី។ លើសពីទស្សនកិច្ចជាប្រពៃណី អ្នក​វិភាគ​ខ្លះ​យល់ថា ទស្សនកិច្ចនេះអាចមានភ្ជាប់​នឹងការ​រំឭកឡើងវិញរបស់ប្រទេសបារាំង​ឲ្យកម្ពុជាដើរតាម​គន្លង​ប្រជាធិបតេយ្យ។

នៅថ្ងៃអាទិត្យ ទី៧ មករា ប្រធានគណបក្សប្រជាជនកម្ពុជាលោក ហ៊ុន សែនបានប្រកាសឲ្យដឹងពីការប្តេជ្ញាចិត្តជាថ្មីរបស់គណបក្សប្រជាជនកម្ពុជាក្នុងការកម្ចាត់ចលនានយោបាយជ្រុលនិយមឲ្យអស់ពីកម្ពុជា។ ការលើកឡើងរបស់ប្រមុខមេដឹកនាំគណបក្សកាន់អំណាចធ្វើឡើងនៅក្នុងឱកាសដែលគណបក្សប្រជាជនកម្ពុជាបានរៀបចំមទ្ទិញខួបលើកទី៤៥ឆ្នាំ ៧មករា នៃការរំដោះប្រទេសកម្ពុជាចេញពីរបបប្រល័យពូជសាសន៍ខ្មែរក្រហម។ សម្រាប់លោក ហ៊ុន សែន គណបក្សប្រជាជនកម្ពុជានឹងនៅបន្តប្តេជ្ញាការពារសន្តិភាព អធិបតយ្យភាព និងបូរណភាពទឹកដីកម្ពុជា។

ស្របពេលដែលវិស័យអចលនទ្រព្យ និងដីធ្លីបន្តជាប់គាំង ក្រសួងសេដ្ឋកិច្ចនិងហិរញ្ញវត្ថុបានចេញមុខអន្តរាគមន៍ជាថ្មីដោយបន្តលើកលែងពន្ធលើវិស័យនេះមួយឆ្នាំទៀត។ នៅក្នុងសេចក្ដីជូនដំណឹងចុះថ្ងៃទី៤ខែមករា ក្រសួងសេដ្ឋកិច្ចនិងហិរញ្ញវត្ថុបានប្រកាសថា ប្រភេទពន្ធដែលត្រូវបានលើកលែងរួមមាន ពន្ធប្រថាប់ត្រាលើការផ្ទេរកម្មសិទ្ធិឬសិទ្ធិកាន់កាប់អចលនទ្រព្យ ពន្ធលើចំណេញមូលធន ពន្ធលើអចលទ្រព្យ និងពន្ធលើដីធ្លីមិនបានប្រើប្រាស់។ អ្នកជំនួញ និងអ្នកជំនាញអចលនទ្រព្យស្វាគមន៍ចំពោះការអនុគ្រោះនេះ។ ចំណែកអ្នកសេដ្ឋកិច្ចនិងអ្នកនយោបាយបង្ហាញអារម្មណ៍មិនសូវពេញចិត្តដោយពួកគេយល់ថា កិច្ចអន្តរាគមន៍នេះមិនចំគោលដៅ។

កង្វះធនធានទឹកគឺជាឧបសគ្គដ៏ចម្បងសម្រាប់ការអភិវឌ្ឍន៍ជនបទដែលមានប្រជាជនខ្មែរភាគច្រើនជាកសិករ។ ជាការកត់សម្គាល់ ប្រជាកសិករនៅតាមតំបន់ខ្លះ តែងជួបបញ្ហាខ្វះទឹកសម្រាប់ធ្វើកសិកម្មនៅរាល់រដូវប្រាំងម្តងៗ។ ជាក់ស្តែង នៅខេត្តពោតិ៍សាត់ ប្រជាកសិករត្រូវបានអាជ្ញាធរប្រាប់នៅថ្ងៃទី៣មករា ឱ្យផ្អាកការងារបង្កបង្កើនផលស្រូវរដូវប្រាំងលើកទី២ ខណៈដែលតម្លៃស្រូវហក់ឡើងខ្ពស់មិនធ្លាប់មាននៅកម្ពុជា។ បើតាមរដ្ឋបាលខេត្តពោធិ៍សាត់ ការផ្អាកនេះគឺដោយសារប្រជាករសិករបង្កើនផលស្រូវលើសផែនការ និងថាបើប្រជាកសិករនៅតែបន្តបង្កើនផលស្រូវរដូវប្រាំងនេះទៀត ប្រជាកសិករនឹងជួបប្រទះបញ្ហាខ្វះទឹកប្រើប្រាស់ប្រចាំថ្ងៃ ខ្វះទឹកសម្រាប់សត្វពាហនៈ និងខាតបង់ថវិកាជាក់ជាមិនខាន។ ហេតុអ្វីបានជាកម្ពុជានៅតែជួបបញ្ហាខ្វះទឹកធ្វើកសិកម្មរាល់រដូវប្រាំង?

សំណុំរឿងលោក កឹម សុខា ប្រធានអតីតគណបក្សសង្រ្គោះជាតិនឹងត្រូវបើកការជំនុំជម្រះនៅសាលាឧទ្ធរណ៍ នៅថ្ងៃទី៣០មករាឆ្នាំ២០២៤។ នៅចំពោះមុខសវនាការដែលជិតមកដល់នេះ លោក កឹម សុខា កំពុងប្រឈមនឹងបញ្ហាខ្វះមេធាវីការពារក្តីដោយសារតែបម្រាមនៃសាលក្រមសាលាដំបូងរាជធានីភ្នំពេញ មិនឲ្យលោក កឹម សុខា ជួបអ្នកណា ក្រៅតែពីក្រុមគ្រួសារ។ មេធាវីមួយរូបរបស់លោក កឹម សុខា គឺលោក អាង ឧត្តម បានបញ្ជាក់ថា លោកមិនដឹងត្រូវធ្វើយ៉ាងដូចម្តេចឡើយ ខណៈដែលលោកទើបតែជួបកូនក្តីបានតែ១ដង។ ជំនួប ១ដងនេះធ្វើឡើង ក្រោយពេលដែលសាលាដំបូង កាលពីថ្ងៃទី៣មីនាឆ្នាំ២០២៣ បានសម្រេចកាត់ទោសលោក កឹម សុខា ឲ្យជាប់ឃុំក្នុងផ្ទះ២៧ឆ្នាំ ដោយដកសិទ្ធិនយោបាយ និងមិនឲ្យប្រាស្រ័យជាមួយអ្នកណា ក្រៅពីសាច់ញាតិ។

ក្រុមអ្នកតស៊ូមតិកម្ពុជានៅព្រឹកថ្ងៃទី០២ ខែមករា ឆ្នាំ២០២៤ បានចេញសេចក្តីថ្លែងការណ៍មួយស្តីពីស្ថានភាពរបស់ពលរដ្ឋខ្មែរកម្ពុជាក្រោម។ សេចក្តីថ្លែងការណ៍បានស្នើឱ្យរដ្ឋាភិបាលកម្ពុជារម្លឹករដ្ឋាភិបាលវៀតណាមពីការគោរពសិទ្ធិផ្នែកជំនឿ និងសាសនារបស់ពលរដ្ឋខ្មែរកម្ពុជាក្រោម។ ការស្នើបែបនេះធ្វើឡើងបន្ទាប់ពីអាជ្ញាធរវៀតណាមបានរារាំងការជួបជុំរបស់ព្រះសង្ឃ និងពលរដ្ឋខ្មែរដែលគ្រោងចូលស្តាប់ការសម្តែងធម្មទេសនារបស់ព្រះតេជគុណ ជួន កក្តដា។ ករណីនេះត្រូវបានអ្នកវិភាគ និងក្រុមអ្នកតស៊ូមតិកម្ពុជាយល់ថា រដ្ឋាភិបាលកម្ពុជាមិនត្រូវនៅស្ងៀមដោយព្រងើយកន្តើយចំពោះការរំលោភសិទ្ធិមនុស្សផ្នែកសាសនារបស់ពលរដ្ឋខ្មែរក្រោមឡើយ។ តែយ៉ាងណា អ្នកនាំពាក្យគណបក្សប្រជាជនកម្ពុជាចាត់ទុកថា នេះជាកិច្ចការផ្ទៃក្នុងរបស់ប្រទេសដទៃដែលកម្ពុជាគ្មានសិទ្ធិក្នុងការជ្រៀតជ្រែកទេ។

រដ្ឋាភិបាលកំណត់យកថ្ងៃទី២៩ ខែធ្នូ ជារៀងរាល់ឆ្នាំដើម្បីប្រារព្ធទិវាសន្តិភាពនៅកម្ពុជា និងបានអនុញ្ញាតឲ្យឈប់សំរាកមួយ​ថ្ងៃ។ នៅក្នុងក្រសែភ្នែកអ្នកតាមដានសង្គម អ្នកប្រវត្តិសាស្ត្រ និងអ្នកនយោបាយជាដើម អ្នកខ្លះបង្ហាញការស្វាគមន៍ ខណៈអ្នកខ្លះទៀតយល់ថា មិនចាំបាច់ក្នុងការប្រារព្ធពិធីនេះឡើងទេព្រោះសន្តិភាពពិតប្រាកដមិនស្ដែងឡើងតាមរយៈការរៀបចំពិធីអបអរនោះទេ។ ផ្ទុយមកវិញពួកគេយល់ថា ថ្ងៃទី២៣តុលាស្ដីពីកិច្ចព្រមព្រៀងសន្តិភាពក្រុងប៉ារីសទៅវិញទេដែលរដ្ឋាភិបាលគួរសើរើយកវាមកប្រារព្ធនិងកំណត់ជាថ្ងៃឈប់សំរាក។