Lestin

Efni Lestarinnar: McQueen nefnist ný heimildarmynd um breska listamanninn Alexander McQueen. Myndin er sýnd á hátíðinni FFF - Fashion Film Festival sem fer fram í Bíó Paradís dagana 20.-24. nóvember. Að gefnu tilefni verður fjallað um líf og list McQueens í þætti dagsins. Viðmælendur verða Álfrún Pálmadóttir og Ása Bríet Brattaberg, umsjónarkonur Fashion Film Festival. Og í þættinum í dag verður einnig haldið áfram að fá fólk til mæla með bókum sem tala inn í okkar samtíma, með einum eða öðrum hætti, mæla með bókum sem við eigum að lesa hér og nú. Í dag er röðin komin að Guðrúnu Nordal, forstöðumanni Stofnunar Árna Magnússonar í íslenskum fræðum. Og bresku sjónvarpsþættirnir Bodyguard hafa verið mikið á milli tannana á fólki undanfarið enda þykja þeir einhverjir þeir mest spennandi sem komið hafa fram lengi. Áslaug Torfadóttir fjallar um þættina í Lestinni í dag.

Umsjón: Anna Gyða Sigurgísladóttir og Eiríkur Guðmundsson

Í Lestinni í dag verður meðal annars rætt við Barða Jóhannsson tónlistarmann sem fagnar um þessar mundir afmæli þriggja platna með hljómsveitinni Bang Gang. Af því tilefni verður efnt til boðs í Rokksafni Íslands í Hljómahöll í Reykjanesbæ á morgun. Þar verður nýtt myndband Bang Gang frumsýnt, hljómsveitin Bang Gang tekur nokkur af bestu lögum sveitarinnar, auk þess sem Rokksafni Íslands verður formlega afhend stytta af Barða sem upprunalega var framleidd og sýnd í Triennale sem er hönnunarsafn í Milano á Ítalíu. Styttan er komin til landsins og kemur til með að standa í Rokksafni Íslands. Barði verður gestur Lestarinnar í dag. Kári Valtýsson, lögmaður, sendi frá sér sína fyrstu skáldsögu á dögunum. Sagan nefnist Hefnd og fjallar um Íslending sem gerist byssubófi í villta vestrinu í Bandaríkjunum um miðja nítjándu öld. Kári verður gestur Lestarinnar í dag. Marta Sigríður Pétursdóttir fjallar í dag um kvikmyndirnar Blindspotting og The Girl in the Spider's Web. Og hugað verður að merkilegri plötu: Wu-Tang Clan er rapp-stórveldi, hip hop-heimsálfa, fatalína, íkonógrafía, lífstíll, fagurfræði og söguheimur út af fyrir sig. En allt hófst það með plötu sem kom út fyrir aldarfjórðungi síðan, Enter The Wu Tang (36 chambers). Davíð Roach Gunnarsson spilar Wu Tang Clan í hljóðkerfi lestarinnar í dag og hækkar svo um munar.

Umsjón: Anna Gyða Sigurgísladóttir og Eiríkur Guðmundsson

Efni Lestarinnar í dag: Jóel Pálsson saxófónleikari gefur á morgun út plötuna Dagar koma en hún inniheldur lög sem samin voru við ljóð nokkurra íslenskra samtímaskálda. Jóel heldur ásamt fríðu föruneyti útgáfutónleika í Norræna húsinu á morgun, og hann verður gestur Lestarinnar í dag. Fyrr í vikunni var rætt í Lestinni við liðskonur rappsveitarinnar CYBER, þær Sölku Vals og Jóhönnu Rakel, um nýja plötu sveitarinnar. Fleira var rætt sem ekki komst fyrir í þeim þætti. Og í dag heyra hlustendur brot úr spjallinu; rætt var um skáldaðar persónur og sjálf, væntingar og Instagram-kúltúr samtímans. Karl Ólafur Hallbjörnsson fjallar í heimspekipistli í dag um verufræðilega skilgreiningu listaverka, áru þeirra og fjöldaframleiðslu. Og hlustendur kynnast bandaríska myndlistarhópnum og hljómsveitinni The Residents, og forsprakka hennar, tónlistarmanninum Hardy Fox.

Umsjón: Anna Gyða Sigurgísladóttir og Eiríkur Guðmundsson

Efni Lestarinnar í dag: ,,Miklu valdi fylgir mikil ábyrgð,'' segir köngulóamaðurinn, en ofurhetjan er meðal fjölmargra hugarsmíða myndasöguhöfundarins Stans Lee. Lee lést í gær, 95 ára að aldri. Hans verður minnst í Lestinni í dag. Heimildarmaður er Hugleikur Dagsson, teiknimyndahöfundur með meiru. Einnig verður í Lestinni í dag rætt við kvikmyndaleikstjórann Grím Hákonarson um heimildamyndina Litlu Moskvu sem frumsýnd verður á morgun en hún fjallar um Neskaupstað og það hvernig bærinn hefur breyst í tímans rás, frá því að sósíalistar réðu ríkjum í bænum og til dagsins í dag. Sósíalistar komust til valda í bænum árið 1946 og stýrðu bænum í 52 ár, í myndinni er sú saga rakin og skoðuð frá ólíkum sjónarhornum. Í pistli sínum í dag skoðar Tómas Ævar Ólafsson plötuna African Rhythms frá 8. áratug síðustu aldar en á plötunni fléttast saman straumar úr mörgum áttum, allt frá sagnfræðilegri endurskoðun til skáldaðra handanheima í geimnum. Og Halldór Armand Ásgeirsson rithöfundur flytur pistil í Lestinni á þriðjudegi.

Umsjón: Anna Gyða Sigurgísladóttir og Eiríkur Guðmundsson

Efni Lestarinnar í dag: Rappsveitin CYBER gaf út nýverið út nýja breiðskífu. Platan nefnist Bizness og er fjórða útgefna efni sveitarinnar. Platan verður skoðuð nánar í þætti dagsins, rætt verður við tvær liðskonur bandsins, þær Sölku Vals og Jóhönnu Rakel. Í þættinum verður einnig haldið áfram að fá fólk til mæla með bókum sem tala inn í okkar samtíma, með einum eða öðrum hætti, mæla með bókum sem við eigum að lesa hér og nú. Í dag er röðin komin að Andra Snæ Magnasyni, rithöfundi. Fólk er oft tilbúið til þess að leggja ýmislegt á sig til þess að bjarga hjónabandinu. Bresku sjónvarpsþættirnir Wanderlust fjalla um hjónin Joy og Alan sem leita nýstárlegra leiða til þess að finna neistann á ný. Áslaug Torfadóttir fjallar um Wanderlust í Lestinni í dag. Og tónlistarhátíðin Iceland Airwaves var haldin um helgina, en henni lauk á laugardag. Spurt verður í þættinum, hvernig tókst til að þessu sinni.

Umsjón: Anna Gyða Sigurgísladóttir og Eiríkur Guðmundsson

Efni Lestarinnar í dag: Þann 22. nóvember næstkomandi verða 50 ár liðin frá útgáfu Hvíta Albúmsins með Bítlunum. Á morgun kemur út viðhafnarútgáfa sem hefur að geyma endurhljóðblandanir og fjölmargar upptökur frá gerð plötunnar sem ekki hafa heyrst áður. Platan hefur löngum þótt endurspegla með dularfullum hætti tíðaranda hins viðburðaríka árs, 1968, og nú er skrifað um það að hún tali líka með beinum hætti inn í okkar samtíma, árið 2018. Í Lestinni í dag verður fjallað um Hvíta albúmið, gestur þáttarins verður Einar Már Guðmundsson, rithöfundur. Serbneskir menningardagar verða haldnir í Bíó Paradís um helgina. Þetta er í annað sinn sem hátíðin er haldin hér á landi og er hún nú tileinkuð serbneskri kvikmyndagerð. Svetlana Markovic, fræðir hlustendur nánar um hátíðina, Serbnesku menningarmiðstöðina á Íslandi, sem og serbneska kvikmyndagerð, í þætti dagsins. Og hugað verður að tónlistarhátíðinni Iceland Airwaves sem hófst í gær, Davíð Roach Gunnarsson gefur skýrslu.

Umsjón: Anna Gyða Sigurgísladóttir og Eiríkur Guðmundsson

Í Lestinni í dag verður meðal annars fjallað um samtímann og sambandsleysið sem honum fylgir. Spurt verður: Hvers vegna sköpum við list? Marta Sigríður Pétursdóttir kvikmyndagagnrýnandi fjallar um kvikmyndirnar Bohemian Rapsody, sem fjallar um bresku hljómsveitina Queen, og kvikmyndina Cold War eftir pólska leikstjórann Pawel Pawlikowski. Og Karl Ólafur Hallbjörnsson flytur pistil um hugtakatvennd heildar og hluta í samhengi pólitískrar orðræðu.

Umsjón: Anna Gyða Sigurgísladóttir og Eiríkur Guðmundsson

Efni Lestarinnar í dag: Rögnvaldur Skúli Árnason hefur verið iðinn við olíumálun í um það bil áratug. Hann hefur haldið þónokkrar einkasýningar hérlendis og tekið þátt í ótal sýningum með öðrum listamönnum. Um helgina opnaði hann einkasýningu á narratívum landslagsverkum í Gallery Port á Laugaveginum. Verkin upphefja íslenska náttúru en þau varpa einnig fram spurningum um hvort landslag íslenskrar myndlistar hafi burði til að bera hin alvarlegri umfjöllunarefni okkar tíma. Rögnvaldur Skúli verður gestur Lestarinnar í dag. Og sterkar stelpur koma við sögu í þætti dagsins. Þær eru fordæmdar fyrir útlit sitt, eiga ekki foreldra og lifa í einstaklega regluföstum aðstæðum sem beita þær refsingum, en þrátt fyrir allt skín af þeim gleðin. Í pistli sínum í dag skoðar Tómas Ævar Ólafsson freknóttu og rauðhærðu stelpurnar sem skjóta svo oft upp kollinum í barnabókmenntum. Hrekkjavakan hefur sett svip á samtímann síðustu daga en það mætti þó segja að aðdáendur hryllingsmynda fagni þessari hátíð á hverjum degi. Íslenska hljómsveitin Malneirophrenia er undir miklum áhrifum frá tónlist úr frægum hrollvekjum en sveitin tekur sinn eigin snúning á kvikmyndatónlist. Meðlimir sveitarinnar ræða í dag við Þórð Inga Jónsson um þeirra uppáhalds-stef úr heimi hryllingsmyndanna. Og Halldór Armand Ásgeirsson rithöfundur flytur að venju pistil í Lestinni á þriðjdegi.

Umsjón: Anna Gyða Sigurgísladóttir og Eiríkur Guðmundsson

,,Núna þurfum við, á góðlátlegan hátt, að hætta að bera virðingu fyrir ákveðnum leiðum, ákveðnum hugsunum, hefðum, og huga að því sem við höfum þaggað niður'' segir Eva Rún Snorradóttir, sviðslistakona og ljóðskáld um karllæga skekkju og feðraveldið. Eva gaf nýverið út sína þriðju ljóðabók; Fræ sem frjóvga myrkrið. Við heimsóttum Evu eldsnemma í morgun, fengum að skyggnast inn í hugarheim hennar. Við ræddum meðal annars niðursoðna snáka, gamalgróna siði og hefðir, reiði, og margt margt fleira. Meira um það í þætti dagsins. Heimildaþættirnir Making a Murderer ullu miklum usla með fyrstu þáttaröð sinni þar sem fjallað var um gölluð réttarhöld yfir Steven Avery og Brendan Dassey. Nú hefur önnur þáttaröð þessarar seríu verið frumsýnd. En hefur hún einhverju við að bæta? Áslaug Torfadóttir skoðar málið í Lestinni í dag. Birna Bjarnadóttir bókmenntafræðingur mælir með bók sem hlustendur ættu að lesa hér og nú og fallegasta lag í heimi hljómar í hljóðkerfi Lestarinnar í dag.

Umsjón: Anna Gyða Sigurgísladóttir og Eiríkur Guðmundsson

Efni Lestarinnar: Tuttugasta Iceland Airwaves hátíðin verður gangsett í næstu viku, sú fyrsta síðan nýir rekstraraðilar tóku við festivalinu, og sú stærsta hingað til. Davíð Roach Gunnarsson stiklar á stóru í sögu hátíðarinnar og mælir með nokkrum listamönnum sem vert er að gefa gaum á Airwaves í Lestinni í dag. Raftæki endast skemur og skemur, við vitum öll hvers vegna, við heyrum í Lestinni í dag sögu af dyntóttum síma, sem er ekki ýkja gamall en samt farinn að bila. Við fjöllum um súrrealískan síma og endingartíma raftækja í þættinum í dag. Veturinn kemur við sögu. Og Eydís Blöndal ljóðskáld heldur áfram að fjalla um kvennastörf og hvetur í dag til breytinga.