Raftónlistarmaðurinn Andi gaf nýlega út sína aðra breiðskífu, Allt í einu. Tónlistin er melódísk raftónlist sem vísar í íslenska dægurtónlist níunda áratugarins jafnt sem ítaló-diskó - og hefur því verið kölluð íslandó-diskó. Andi tekur sér far með Lestinni í dag.

Við veltum líka fyrir okkur lýsingu, ljósabúnaði og mikilvægi þess að vera vel upp lýstur.

Harkaleg og tilgangslaus heimssýn þýska heimspekingins Friedrich Nietzsche er enn að plaga okkur í dag og sérstaklega unga karlmenn á tilvistarlegu mótþróaskeiði. Hættulegur misskilningur á þessari heimspeki getur átt sér stað sem dregur lesendur ofan í svað tómhyggjunnar. Tómas Ævar Ólafsson skoðar hugmyndir Nietzches um tómhyggjuna og ofurmennið í Lestinni í dag.

Og Halldór Armand Ásgeirsson rifhöfundur flytur pistil í Lestinni á þriðjudegi.

Umsjón: Kristján Guðjónsson og Eiríkur Guðmundsson

Breski raftónlistarmaðurinn Aphex Twin gaf á föstudag út EP-plötuna Collapse. Það sætir ævinlega tíðindum þegar plata kemur frá þessum einstaka listamanni, sem margir telja einhvern frumlegasta raftónlistarmann samtímans. Lestin rýnir í plötuna í dag og gestur þáttarins verður Sigtryggur Ari Jóhannsson, blaðamaður, ljósmyndari og tónlistarmaður.

Tilkoma borgarsamfélagsins hefur gjörbreytt allri tilveru mannsins á undanförnum öldum. Lestin brunar inn í stórborgina með Hólmfríði Garðarsdóttttur ritstjóra nýjasta tölublaðs Ritsins - tímarits Hugvísindasviðs, en að þessu sinni er þema ritsins ógnir og undur borgarsamfélagsins.

Við heyrum líka um hvernig æ fleiri ungmenni nenna ekki út úr húsi í Bandaríkjunum og markaðinn sem er að spretta upp í kringum þessi letidýr, það sem kallað er í nýlegri blaðagrein "hagkerfi hinna heimakæru."

Áslaug Torfadóttir rýnir í sjónvarp eins og ævinlega í Lestinni á mánudögum, í dag fjallar hún um sjónvarpsþáttaröðina Happy.

Lestin leggur af stað laust eftir klukkan fimm og það er hraðlest í dag! Við sögu koma meðal annars: Theresa Himmer og Johannes Kepler, Paul McCartney og nýja platan hans, Halldór Armand Ásgeirsson og ný auglýsing frá Nike, María Guðmundsdóttir, konur og tölvuleikir, Kate Bush og textarnir, Heimir Bjarnason og rapparinn Mac Miller, Marta Sigríður Pétursdóttir og Lof mér að falla, Gauti Kristmannsson og George Monbiot, Snorri Páll Jónsson Úlfhildarson og Guðmundar - og Geirfinnsmálið, og fjárlögin.

Umsjón: Kristján Guðjónsson og Eiríkur Guðmundsson

Það ríkir mikil eftirvænting fyrir fyrstu breiðskífu drungarafsveitarinnar Ayia. Fyrsta myndband sveitarinnar við lagið Sparkle kom út í vikunni og í kvöld stígur sveitin á stokk í Iðnó og mun leika plötuna í heild sinni. Í Lestinni í dag verður rætt við einn meðlim þessarar huldusveitar.

Rætt verður við Magnús Sigurðsson rithöfund sem sendi nýlega frá sér bókina Að lesa ský en hún hefur að geyma safn ljóða frá Bandaríkjum Norður-Ameríku sem Magnús hefur þýtt.

Lestin minnist einnig rapparans Mac Miller sem lést í síðustu viku, aðeins 26 ára gamall. Heimir Björnsson, framhaldsskólakennari og rappari, tekur sér far með Lestinni og rifjar upp stuttan en farsælan feril tónlistarmannsins.

Guðmund­ar- og Geirfinns­málið kemur við sögu í þættinum dag, mál sem heltók íslenskt samfélag á áttunda áratugnum og hafa áhrif þess verið mikil, og birtingarmyndur verið mýmargar í íslenskri menningu. Í fjórum pistlum í septembermánuði fjallar Snorri Páll Jónsson Úlfhildarson um þetta alræmdasta sakamál Íslandssögunnar í skáldskap - og sem skáldskap.

Og gamall ítalskur baráttusöngur, í nýjum búningi, hljómar í Lestinni í dag.

Nú á dögunum kom út skáldsagan Skotheld eftir Birgittu Björgu Guðmarsdóttir. Bókin er sú fyrsta sem kemur út hjá nýstofnuðu bókaforlagi Kallíópa, en yfirlýst markmið útgáfunnar er að hjálpa ungum rithöfundum að koma verkum sínum út. Stofnandi forlagsins, hin 20 ára gamla Tanja Rasmussen, tekur sér far með Lestinni í dag. Rætt verður við Gauta Kristmannsson, prófessor í þýðingafræðum við Háskóla Íslands um grein eftir breska rithöfundinn og aktívistann George Monbiot, sem birtist á vef breska blaðsins The Guardian í síðustu viku, þar sem hann fjallar um það hvað við getum gert til að bjarga jörðinni. Karl Ólafur Hallbjörnsson fjallar í dag um hugtök skuldar og skyldu í ljósi skrifa þýska heimspekingsins Friedrichs Nietzsches. Og í Lestinni í dag verður líka fjallað um samfélög sem líða undir lok og heimum sem sundrast.

Umsjón: Kristján Guðjónsson og Eiríkur Guðmundsson

Skortur á fjölbreytni hefur lengi verið vandamál í tölvuleikjum. Stelpur skortir fyrirmyndir í bransanum, of fáir tölvuleikir höfða til kvenna og umhverfið er jafnvel kvenfjandsamlegt. Þessu öllu vill María Guðmundsdóttir breyta. María, sem er stofnandi tölvuleikjafyrirtækisins Parity, tekur sér far með Lestinni í dag.

Kvikmyndin Cool as Ice frá 1990 var tilraun Hollywood til að græða á rapparanum Vanilla Ice en hún er almennt talin ein versta mynd allra tíma. Hún er þó orðin að költ-klassík í dag og nú stendur til að endurútgefa myndina í lúxusútgáfu.

Í þættinum í dag verður fjallað um sjarmerandi lélegar kvikmyndir og stjörnuhrap Vanilluíssins alræmda. Einnig verður sagt frá Gullegginu, frumkvöðlakeppni sem ætluð er ungu fólki en verkefnið er nú að fara af stað í tólfta sinn, Melkorka Sigríður Magnúsdóttir verkefnisstjóri verður gestur Lestarinnar í dag. Textar ensku tónlistarkonunnar Kate Bush koma við sögu að gefnu tilefni.

Og Halldór Armand Ásgeirsson rithöfundur flytur að venju pistil í Lestinni á þriðjudegi, og fjallar í dag um það þegar réttlætið setur upp gerviaugu, og nýja auglýsingu fyrir strigaskó.

Umsjón: Kristján Guðjónsson og Eiríkur Guðmundsson

Lestin svífur út fyrir gufuhvolfið í dag, og alla leið til tunglsins. Þar verður á vegi hennar myndlistarkonan Theresa Himmer sem segir frá forvitinilegri bók sem nefnist Somninum og er eftir þýska stjörnufræðinginn Johannes Kepler. Sagan, sem nefnist Draumurinn á íslensku, er mögulega ein fyrsta hreinræktaða vísindaskáldsagan en var skrifuð árið 1608. Sagan gerist á Íslandi, í Danmörku og á tunglinu og hefur Theresa notað hana sem innblástur fyrir ný ljósmynda- og myndlistarverk sem hún sýnir um þessar mundir í Hverfisgallerí.

Marta Sigríður Pétursdóttir, kvikmyndagagnrýnandi, rýnir síðan í nýja íslenska mynd, Lof mér að falla, eftir Baldvin Z, sem var frumsýnd um helgina.

Ævintýri bresku yfirstéttarinnar hafa sjaldan verið vinsælla sjónvarpsefni en síðustu ár, með þáttum eins og Downton Abbey og The Crown. Nýjasta innleggið er míní-serían Patrick Melrose. Áslaug Torfadóttir kynnti sér málið og segir frá í þættinum í dag.

Og fjallað verður í Lestinni í dag um hljómplötuna Egypt Station með Paul McCartney sem kom út á föstudag og hefur nú þegar hlotið frábæra dóma.

Hraðlestin leggur af stað laust eftir klukkan fimm, föstudaginn 7. september. Á meðal farþega eru Þóra Tómasdóttir, Jófríður Ákadóttir, Egill Bjarnason, Selma Guðmundsóttir, Þráinn Hauksson, Snorri Páll Jónsson Úlfhildarson, Halldór Armand Ásgeirsson, Ragnar Fjalar Lárusson, og fleiri.

Á morgun verður frumsýnd í Bíó Paradís norsk kvikmynd byggð á fjöldamorðunum í Útey þann 22. júlí 2011. Þetta er þó ekki eina leikna kvikmyndin um atburðina sem kemur út um þessar mundir, því breski leikstjórinn Paul Greengrass, frumsýnir mynd um fjöldamorðin á kvikmyndahátíðinni í Feneyjum sem stendur nú yfir. Þóra Tómasdóttir, blaðamaður, tekur sér far með Lestinni í dag og ræðir um viðbrögð við þessum eldfimu kvikmyndum í norsku samfélagi.

End­urupp­taka í Guðmund­ar- og Geirfinns­málinu verður tek­in fyr­ir í Hæsta­rétti í næstu viku. Málin heltóku íslenskt samfélag á áttunda áratugnum og hafa áhrif þess verið mikil og birtingarmyndur verið mýmargar í íslenskri menningu. Í fjórum pistlum í septembermánuði fjallar Snorri Páll Jónsson Úlfhildarson um þetta alræmdasta sakamál Íslandssögunnar í skáldskap, og sem skáldskap.

Rætt verður við tónlistarkonuna Jófríði Ákadóttur en hún kemur fram ásamt strengjasveit í Iðnó í kvöld í tilefni af útkomu EP-plötunnar, White Sun Live, Part I: Strings. Og

Magnús Örn Sigurðsson flytur pistil í Lestinni í dag í tilefni af Loftslagsgöngunni sem fram fer í Reykjavík á laugardag.

Umsjón: Kristján Guðjónsson og Eiríkur Guðmundsson

Á undanförnum árum hefur Ragnar Fjalar Lárusson vakið athygli fyrir líflega, litríka og listilega hönnun sína á plötuumslögum. Plötuumslög sem hann gerði fyrir Ojba Rasta vöktu mikla lukku og nú er það hönnun sem hann vann fyrir nýja plötu Teits Magnússonar, Orna, sem gleður auga tónlistarunnenda. Í þættinum í dag verður rætt við Ragnar Fjalar um hvað það er sem einkennir gott plötuumslag.

Borgarstjórn Reykjavíkur samþykkti í gær að fela umhverfis- og skipulagssviði að útfæra Laugaveg og Bankastræti sem göngugötur allt árið, ásamt götum í Kvosinni sem koma til greina sem göngugötur.

Í Lestinni í dag verður af þessu tilefni fjallað um götur og almenningsrými, og rætt við Þráinn Hauksson, landslagsarkitekt. Karl Ólafur Hallbjörnsson fjallar um vofu dauðans í hinu daglega lífi í ljósi rannsókna félagssálfræðinnar og Áslaug Torfadóttir segir frá sjónvarpsþáttunum Castle Rock.

Umsjón: Kristján Guðjónsson og Eiríkur Guðmundsson