Í þessum fjórða þætti Hnotskurnar fjöllum við um vandræðin í bresku konungshöllinni en breskir fjölmiðlar hafa verið sérstaklega óvægnir í garð nýju hertogaynjunnar Meghan Markle. Þá segjum við einnig frá íslenskum nafnlausum áróðurssíðum á samfélagsmiðlinum Facebook og veltum upp áleitnum spurningum um hvort þeim takist ætlunarverk sitt.

Frístundamiðstöðin Tjörnin sem starfar í Miðborg, Hlíðum og Vesturbæ, hefur gefið út handbók fyrir foreldra um foreldrarölt. Í henni er fjallað um hvers vegna foreldrarölt skiptir svona miklu máli og settar fram tillögur að því hvernig foreldrar geta skipulagt sig. Þá eru í handbókinni upplýsingar um tengiliði. Foreldraröltið tengir saman foreldra, styrkir þau í hlutverkinu sínu og stuðlar að öruggara nærumhverfi fyrir börn og unglinga. Þær Andrea Marel og Eva Halldóra Guðmundsdóttir frá Frístundamiðstöðinni Tjörninni komu í þáttinn og sögðu frá.

Dáleiðslumeðferð er ekki viðurkennt meðferðarform hér á landi og er því ekki inní heilbrigðiskerfinu. Við ræddum við hjúkrunarfræðinginn Sigríði A Pálmadóttur sem hefur starfað við hjúkrun í 40 ár en síðasta eina og hálfa árið eingöngu sem dáleiðari.

Lesandi vikunnar var Ragnheiður Heiða Árnadóttir söng- og tónlistarkona. Hún sagði okkur hvaða bækur eru á náttborðinu hjá henni, hvað hún hefur verið að lesa undanfarið og hvaða bækur og höfundar hafa haft áhrif á hana í gegnum tíðina. Og svo sagði hún okkur frá nýjum geisladiski, Aðventa, sem hljómsveit hennar Mógil var að gefa út.

UMSJÓN GUÐRÚN GUNNARSDÓTTIR OG GUNNAR HANSSON

Föstudagsgestur Mannlega þáttarins í þetta sinn var Silja Hauksdóttir, kvikmyndaleikstjóri. En hún leikstýrir kvikmyndinni Agnes Joy, sem komin er í kvikmyndahús. Við spjölluðum við hana um æskuna og uppvöxtinn og ferðalagið í gegnum lífið til dagsins í dag og auðvitað um myndina Agnes Joy.

Sigurlaug Margrét var með sitt vikulega matarspjall í þættinum í dag. Í þetta sinn töluðum við um matarvenjur og matarsögu landsins okkar. En við brugðum okkur í Bíó Paradís í gær og sáum heimildamyndina Gósenlandið sem fjallar einmitt um matarsögu Íslands.

UMSJÓN GUÐRÚN GUNNARSDÓTTIR OG GUNNAR HANSSON

Það kæmi á óvart ef það þyrfti að segja einhverjum í dag að reykingar væru ekki góðar fyrir heilsu okkar, vægast sagt. En niðurstöður eru forvitnilegar úr nýlegri bandarískri langtíma rannsókn sem kannaði afleiðingar reykinga hjá 25 þúsund bandaríkjamönnum á aldrinum 17 til 93gja ára. Mannlegi þátturinn hitti Karl Andersen hjartalækni og fékk hann til að fara yfir niðurstöðurnar.

Við forvitnumst um nýtt verk í Borgarleikhúsinu á nýju sviði fyrir sviðshöfunda, Umbúðalaust sem er uppi á þriðju hæð í Borgarleikhúsinu, Hópurinn sem stendur að sýningunni samanstendur af tveimur sviðshöfundum, textílhönnuði og félagsfræðingi. Verkið sjálft heitir Kartöflur og er rannsóknarferðalag hópsins um kartöflur á íslandi, fólkið á bakvið þær og skoðanir þeirra. Í rannsóknarferðalaginu erum við búin að kafa í líf óþekkts kartöflubónda, Helgu Gísladóttur, sem var rangnefnd í sögubókunum árum saman, þrátt fyrir að hafa ræktað upp sitt eigið kartöfluyrki á miðri 20. öld, hina sívinsælu kartöflutegund Helguna. Þau Hallveig Kristín Eiríksdóttir og Birnir Jón Sigurðsson komu í þáttinn og sögðu frá.

Elísabet Indra Ragnarsdóttir vann í 14 ár í útvarpi, hér á Rás 1, hefur kennt í Listaháskólanum og nú hefur hún fært sig úr líklega einni minnstu tónlistar- og menningarstofnun á Íslandi, Mengi, yfir í líklega þá stærstu, Hörpu, þar sem hún er starfandi dagskrárstjóri tónlistar. Við forvitnuðumst um hennar starf og gríðarlega verðmæta fiðlu í þættinum.

UMSJÓN GUÐRÚN GUNNARSDÓTTIR OG GUNNAR HANSSON

MANNLEGI ÞÁTTURINN MIÐVIKUDAG 16.okt 2019

UMSJÓN GUÐRÚN GUNNARSDÓTTIR OG GUNNAR HANSSON

Í kvöld verður Heimspekikaffi í Gerðubergi þar sem Gunnar Hersveinn heimspekingur og Helga Arnardóttir félags- og heilsusálfræðingur ætla að ræða hamingju og andlega heilsu. Hvað þýðir það að vera við góða andlega heilsu? Hvernig má bæta andlega vellíðan og hamingjustundir? Hvaða lífsgildi er gott að styrkja til að finna jafnvægi á milli eirðarleysis og ofmetnaðar? Við fáum Helgu til okkar í spjall í þættinum í dag.

Við fáum póstkort frá Magnúsi R. Einarssyni á Spáni í dag. Í þessu póstkorti greinir meðal annars frá spænskunámi pistlahöfundarins sem hefur gengið misjafnlega hingað til en er að komast í góðan farveg og í framhaldinu veltir hann fyrir sér stöðu spænskunar á alþjóðavísu, en spænskan er næstmest talaða tungumál heims á eftir kínversku. Í lokin segir hann frá vaxandi áhyggjum manna vegna þess hve hlýnun andrúmsloftsins virðist vera hraðari við Miðjarðarhafið en annars staðar á hnettinum.

Á laugardaginn var haldin glímuhátíð á Ísafirði í tilefni af 100 ára afmæli knattspyrnufélagsins Harðar. Haldin voru þrjú mót og voru keppendur samtals 30 og keppt var um Vestfirðingabeltið í 15ánda sinn. VIð ræðum við formann Glímudeildar Harðar, Hákon Óli Sigurðsson.

Verkefnið Stígum saman í áttina að öflugra samfélagi hjá Þjónustumiðstöð Breiðholts fékk Evrópumerkið/European Language Label á Íslandi árið 2019. Verkefnið miðar að því að bæta íslenskukunnáttu kvenna af erlendum uppruna á vinnustöðum og bjóða upp á starfstengt íslenskunámskeið. Einnig að efla þekkingu þeirra og færni í starfi, fræða um réttindi og skyldur og vinna með sjálfstyrkingu og frumkvæði. Við fengum verkefnastjórana, þær Nicole Leigh Mosty og Guðlaugu Stellu Brynjólfsdóttur, til að segja okkur frekar frá verkefninu.

Þeir sem komið hafa norður í Ingólfsfjörð komast ekki hjá að sjá þar risavaxin hús sem eru reyndar að hruni komin, steyptirmosavaxnir veggir þar sem steypustyrktarjárnin standa allsstaðar út úr. Kristín Einarsdóttir, okkar kona á Ströndum, gekk um svæðið með Ásgeir Gunnari Jónssyni sem þekkir sögur þessara húsa betur en flestir aðrir.

Meiri vellíðan, einbeitingu og jafnvægi má fá með iðkun núvitundar, segir Bryndís Jóna Jónsdóttir núvitundarkennari og einn af stofnendum Núvitundarsetursins, hún kennir jákvæða sálfræði og núvitund við HÍ og hefur skrifað bækur og haldið fjölmörg námskeið. Það er einfaldara en við höldum að iðka núvitund. Bryndís var í þættinum í dag.

UMSJÓN GUÐRÚN GUNNARSDÓTTIR OG GUNNAR HANSSON

Í þessum þriðja þætti af Hnotskurn förum við yfir feril fimleikakonunnar stórkostlegu, Simone Biles, sem varð um helgina sú fimleikakona (og maður) sem hefur hlotið flesti verðlaun á heimsmeistaramóti frá upphafi. Við rýnum líka í vandræði fjárfestingafyrirtækisins GAMMA sem hafa verið áberandi í fréttum undanfarið.

Ingólfur Guðbrandsson var ekki aðeins stofnandi og söngstjóri Pólýfónkórsins heldur var hann jafnframt einn mesti frumkvöðull íslands á sviði ferðamála á sinni tíð og skipulagði ferðir fyrir Íslendinga vítt um heim í áratugi. Tónleikar til heiðurs honum verða haldnir i Iðnó á morgun í tilefni af því að áratugur er liðinn frá andláti hans og viðburðarríkrar æfi og frumkvöðlastarfs Ingólfs verdur minnst með því tungumáli sem mest er við hæfi á þessum tímamótum, tónlist.

Við fjölluðum í síðustu viku um forræðis- og umgengnismál sem erfitt er að leysa. Þetta eru flókin og viðkvæm mál þar sem til dæmis geta komið upp þær aðstæður að báðir foreldrar ásaka hvort annað um ofbeldi og barnið, eða börnin eru í miðju deilunnar. Við hittum Heiðu Björgu Pálmadóttur forstjóra Barnaverndarstofu og fræddumst um það hvernig kerfið tekst á við þessi mál.

Lesandi vikunnar í þetta sinn var Ásdís Thoroddsen kvikmyndaleikstjóri, en heimildamynd Gósenlandið í leikstjórn Ásdísar er frumsýnd á fimmtudaginn í Bíó Paradís, en hún fjallar um matarsögu Íslands. Við fengum að vita hvaða bækur eru á náttborðinu hjá henni, hvað hún hefur verið að lesa og hvaða bækur og höfundar hafa haft áhrif á hana í gegnum tíðina.

UMSJÓN GUÐRÚN GUNNARSDÓTTIR OG GUNNAR HANSSON

Föstudagsgestur Mannlega þáttarins í þetta sinn var söngkonan Ellen Kristjánsdóttir. Á morgun verða afmælis- og ferilstónleikar hennar í Háskólabíói og það er langur og farsæll ferill að baki. Með henni á sviðinu verður stór hópur af frábæru tónlistarfólki sem hefur fylgt henni í gegnum ferilinn. Við spjölluðum við hana um lífið og tilveruna, uppvaxtarárin og ferðalagið í gegnum lífið til dagsins í dag.

Sigurlaug Margrét Jónasdóttir, besti vinur bragðlaukanna, var með sitt vikulega matarspjall í þættinum í dag. Í þetta sinn sagði hún frá veitingastað í Kaupmannahöfn og það að fara á veitingastað sem einhver hefur sérstaklega mælt með. Oft standa þessir staðir undir væntingum, en það er óhjákvæmilegt að verða líka stundum fyrir vonbrigðum.

UMSJÓN GUÐRÚN GUNNARSDÓTTIR OG GUNNAR HANSSON