Við kynntum okkur Qigong fræðunum í dag. Það er eflaust mörgum í fersku minni hversu mikill talsmaður Qigongfræðanna Gunnar Eyjólfsson leikari var og frú Vigdís Finnbogadóttir, fyrrverandi forseti Íslands, hefur stundað þessar æfingar í áratugi. Þorvaldur Ingi Jónsson, einn helsti kennari Qigong hér á landi, segir að æfingarnar hjálpi okkur að vera jákvæðari og glaðari. Þorvaldur kom í þáttinn í dag og við spurðum hann meðal annars um það hvort það væri einfalt að stunda Qigong.

Við fengum í dag nýjan vinkil frá Guðjóni Helga Ólafssyni, skúffuskáldi og þjóðfræðiáhugamanni úr Flóanum. Vinkill dagsins fjallar um kartöflur í blíðu og stríðu.

Og svo var það lesandi vikunnar, í þetta sinn var það Ragnar Jónasson rithöfundur, lögfræðingur og bankastarfsmaður. Hann hefur verið fastagestur á metsölulistum frá því hann gaf út sína fyrstu glæpasögu árið 2009. Síðan hafa bækur hans verið þýddar á 27 tungumál, gefnar út í 40 löndum og selst í næstum tveimur milljónum eintaka. Við fengum hann samt í dag til að segja okkur hvað hann sjálfur er að sjálfur og hvaða bækur og höfundar hafa haft mest áhrif á hann í gegnum tíðina.

Tónlist í þættinum í dag:

Það jafnast ekkert á við jazz / Stuðmenn (Jakob Frímann og Valgeir Guðjónsson)

Lífið yrði dans / HLH flokkurinn (erl. lag - Þórhallur Sigurðsson)

Stakir jakar á reki / Hljómsveit Ingimars Eydal (Finnur Eydal)

UMSJÓN: GUÐRÚN GUNNARSDÓTTIR OG GUNNAR HANSSON

Föstudagsgestur Mannlega þáttarins í þetta sinn var Karl Ágúst Úlfsson. Það sem hann hefur áorkað á u.þ.b. 40 árum á sínum ferli er ansi magnað, hvort sem er sem leikari, leikstjóri, leikskáld, þýðandi og rithöfundur. Það var auðvitað Spaugstofan, tæplega fimm hundruð þættir á næstum þrjátíu árum, svo eru það öll leikverkin, þýðingarnar, bækurnar, við hefðum getað eytt þættinum í að telja upp allt sem hann hefur gert, en það var miklu skemmtilegra að fá hann sjálfan til að stikla á stóru með okkur. Við fórum með honum aftur í tímann og svo á handahlaupum í gegnum lífið til dagsins í dag. Og svo forvitnuðumst við líka um nýja verkið hans, Fíflið, sem er sýnt í Tjarnarbíói, en hann bæði skrifar og leikur í því.

Sigurlaug Margrét kom svo til okkar í matarspjallið í dag. Hún er nýkomin frá London, þar sem hún meðal annars var óvart í jarðaför Elísabetar drottningar. Það var því breskt þema með konunglegu ívafi í matarspjalli dagsins.

Tónlist í þættinum í dag:

Hvítu mávar / Helena Eyjólfsdóttir (Walter Lange og Björn Bragi Magnússon)

Lalala / Hildur Vala Einarsdóttir (Svavar Knútur Kristinsson og Karl Ágúst Úlfsson)

Mér er ekkert heilagt / Karl Ágúst og Eyvindur Karlsson (Eyvindur Karlsson og Karl Ágúst Úlfsson)

UMSJÓN: GUÐRÚN GUNNARSDÓTTIR OG GUNNAR HANSSON

Við fengum Grímu Kristjánsdóttur í viðtal til að segja okkur frá leiksýningunni Hið stórfenglega ævintýri um missi þar sem hún gerir upp missi tveggja mjög nákominna fjölskyldumeðlima með, eða þrátt fyrir, þáttöku trúðsins Jójó. Í sýningunni á Gríma sem sagt samtal um þessa erfiðu reynslu við bestu vinkonu sína, Jójó, sem hún leikur. Gríma útskýrði þetta betur fyrir okkur í þættinum í dag.

Kjartan Ragnarsson og Einar Már Guðmundsson komu svo til okkar og sögðu okkur frá því hvað er á fjölunum í Landnámssetrinu í Borgarnesi í vetur. Einar sagði okkur frá sýningu hans um Jörund hundadagakonung sem verður frumsýnd á laugardaginn og Kjartan fór með okkur yfir restina af leikárinu.

Svo forvitnuðumst við um ferðagufubað og gufugusu, en Hafdís Hrund Gísladóttir kom í þáttinn. Hún rekur fargufu í hjólhýsi og sagði okkur líka frá Gufunesi sánafest 2022, þar sem þaulreyndir gusmeistarar koma til landsins. Þeir hafa mikla reynslu og hafa meðal annars keppt í heimsmeistarakeppnum í faginu.

Tónlist í þættinum í dag:

Vonarströnd / Íkorni (Stefán Örn Gunnlaugsson)

What will love do to you / Laufey (Laufey Lín Bing Jónsdóttir og Stewart Spencer)

Fyrsta ástin / Björgvin Halldórsson og Ragnhildur Gísladóttir (Jóhann Helgason og Jón Sigurðsson)

Mary don?t you weep / The Swan Silvertones

UMSJÓN: GUÐRÚN GUNNARSDÓTTIR OG GUNNAR HANSSON

Í dag verður haldið árlegt málþing um krabbameinsrannsóknir á vegum Krabbameinsfélagsins undir yfirskriftinni Enn liggur leiðin fram á við. Álfheiður Haraldsdóttir, sérfræðingur hjá Rannsókna- og skráningarsetri félagsins, sem verður með erindi á málþinginu, kom í þáttinn í dag og sagði okkur frá efni þess, en erindið heitir Brjóstakrabbamein á Íslandi 2000-2020. Þar fjallar hún um samanburð á gæðum skimunar og meinafræðilegum forspárþáttum. Og með Álfheiði kom Halla Þorvaldsdóttir, framkvæmdastjóri Krabbameinsfélagsins, en hún sagði okkur betur frá málþinginu í heild.

Lifum betur er yfirskrift Umhverfis og Heilsumálþings sem fer fram 7.-9. okt. Við fengum Guðbjörgu Gissurardótturr og Hrefnu Guðmundsdóttur í þáttinn í dag, en þær munu flytja erindi við þetta tækifæri. Það fjallar um hamingjuna, hvort hægt sé að mæla hana og hvað það er sem gerir okkur hamingjusöm.

Í síðustu viku fengum við fyrirspurn frá hlustanda af hverju það kemur stundum vond lykt úr niðurföllum, jafnvel í nýjum húsum, og hvað sé hægt að gera við því. Við fengum Böðvar Inga Guðbjartsson, pípulagningameistara, til að aðstoða okkur við að svara því í þættinum.

Tónlist í þættinum í dag:

Ég vil bara beat músík / Ríó Tríó (Mason, Dixon og Ómar Ragnarsson)

Myndin af þér / Vilhjálmur Vilhjálmsson (Bob Russel og Iðunn Steinsdóttir)

Þrek og tár / Erla Þorsteinsdóttir og Haukur Morthens (Otto Lindblad og Guðmundur Guðmundsson)

UMSJÓN: GUÐRÚN GUNNARSDÓTTIR OG GUNNAR HANSSON

Nú er liðið rúmt eitt og hálft ár síðan Guðmundur Felix Grétarsson fékk grædda á sig nýja handleggi, í aðgerð sem þykir marka tímamót í læknavísindum. Við heyrðum í Guðmundi í þættinum í dag og könnuðum stöðuna og forvitnuðumst um það hvernig gengur hjá honum í endurhæfingunni, sem er talsvert meiri en við kannski áttum okkur á. Guðmundur var í hádegishléi frá endurhæfingu í Lyon í Frakklandi þegar við náðum í hann.

Við erum búin að kynna okkur á síðustu vikum hvað verður á fjölunum í leikhúsunum í vetur og í dag ætlar Erna Ómarsdóttir, listdansstjóri Íslenska dansflokksins, að kom til okkar og sagði okkur frá því hvað veturinn ber í skauti sér hjá dansflokknum sem á hálfrar aldar afmæli í vetur.

Við fengum svo Elínu Björk Jónasdóttur veðurfræðing í mannlegt veðurspjall í dag. Hún er uppfull af fróðleik um veðrið og í dag fræddi hún okkur um fellibyli sem eru mjög áhugaverð fyrirbrigði en geta auðvitað valdið gríðarlegri eyðileggingu.

Tónlist í þættinum í dag:

Síðasti móhítóinn / Sigurður Guðmundsson og Memfismafían (Bragi Valdimar Skúlason)

Þá kemur þú / Nýdönsk (Björn Jörundur Friðbjörnsson )

Út í veður og vind / Stuðmenn (Egill Ólafsson og Valgeir Guðjónsson)

Veður / Halli Reynis (Haraldur Reynisson)

UMSJÓN: GUÐRÚN GUNNARSDÓTTIR OG GUNNAR HANSSON

Við fengum nýjan vinkil frá Guðjóni Helga Ólafssyni í dag, en það kallar hann pistla sína hér í þættinum. Í vinkli dagsins fjallaði Guðjón Helgi um réttlætingu og afneitun.

Við hringdum í Sigurlaugu Margréti Jónasdóttur, en hún er stödd í London þessa stundina og hefur verið yfir helgina. Við fengum hana til að lýsa því fyrir okkur hvernig stemningin hefur verið í borginni í aðdraganda jarðafarar Elísabetar drottningar og svo sagði hún okkur auðvitað frá jarðaförinni sjálfri og hvernig þetta kom henni fyrir sjónir á staðnum.

Lesandi vikunnar í þetta sinn var svo Bergþóra Snæbjörnsdóttir rithöfundur og ljóðskáld. Bergþóra hefur gefið út ljóðabækur, textasafn og skáldsögu. Hún er með BA-gráðu í sálfræði og hefur komið að vinnu við kvikmyndahandrit, heimildarmyndagerð, bókaútgáfu og sinnt verkefnastjórnun á sviði lista og menningar. En í dag sagði hún okkur frá því hvaða bækur hún hefur verið að lesa undanfarið og hvaða bækur og höfundar hafa haft mest áhrif á hana í gegnum tíðina.

Tónlist í þættinum í dag:

Leika við / Snorri Helgason (Snorri Helgason)

Paper doll / Mills Brothers (Johnny Black)

Blackbird / The Beatles (Lennon & McCartney)

You can Call Me Al / Paul Simon (Paul Simon)

UMSJÓN: GUÐRÚN GUNNARSDÓTTIR OG GUNNAR HANSSON

Föstudagsgesturinn í þetta sinn var Nanna Kristín Magnúsdóttir, leikkona, handritshöfundur, leikstjóri og textahöfundur. Hún hefur auðvitað leikið í fjölda verkefna í leikhúsi, sjónvarpi og í kvikmyndum. Eftir að hún kláraði nám í handritsgerð skrifaði hún og lék aðalhlutverkið í sjónvarpsþáttaröðinni Pabbahelgar og skrifaði ásamt öðrum þættina um Stellu Blómkvist og í dag verður frumsýnd kvikmyndin Abbababb! í leikstjórn Nönnu Kristínar, sem hún skrifar einnig handritið að. Við rifjuðum upp með henni æskuna og uppvöxtinn og fórum svo á handahlaupum í gegnum lífið til dagsins í dag og auðvitað ræddum nýju kvikmyndina Abbababb!

Sigurlaug Margrét kom svo aldeilis ekki tómhent í matarpspjallið í dag. Við rifjuðum upp og smökkuðum með henni fiskibollur í dós, bæði í bleikri sósu og karrýsósu. Svo rifjuðum við líka mat sem er nostalgískur fyrir okkur.

Tónlist í þættinum í dag:

Ingileif / Snorri Helgason (Snorri Helgason)

Svart hvíta meðalmennskukrútt / Salka Sól Eyfeld (Þorvaldur Bjarni Þorvaldsson og Nanna Kristín Magnúsdóttir)

Tulsa Queen / Emmylou Harris (Emmylou Harris og Rodney Crowell)

UMSJÓN: GUÐRÚN GUNNARSDÓTTIR OG GUNNAR HANSSON

Við fengum sérfræðing í þáttinn í dag, Margrét Sigfúsdóttir, fyrrverandi skólastýra Hússtjórnarskólans, en hún stýrði skólanum í u.þ.b. aldarfjórðung. Margrét kenndi þar m.a. ræstingu, matreiðslu, næringarfræði og vörufræði. Við komum aldeilis ekki að tómum kofanum hjá Margréti hvað varðar flest sem snýr að heimilinu og heimilishaldi. Hlustendur hafa sent inn fjölda spurninga og Margrét gerði sitt besta til að komast í gegnum þær allar. Spurningarnar snéru til dæmis að þrifum á þvottavélum og uppþvottavélum, lykt úr niðurföllum, innkaupum fyrir heimilið, þrif á ofnum, edik, klósettþrif og miklu fleira.

Tónlist í þættinum í dag:

Hvítu mávar / Helena Eyjólfsdóttir (Björn Bragi Magnússon og Walter Lange)

Veldu stjörnu / Ellen Kristjánsdóttir og John Grant (Ellen Kristjánsd og Bragi Valdimar Skúlason)

UMSJÓN: GUÐRÚN GUNNARSDÓTTIR OG GUNNAR HANSSON

Raddir, samtök um vandaðan upplestur og framsögn standa fyrir málþinginu Stóra upplestrarkeppnin - Á tímamótum. Það mun fara fram annan mánudag í hátíðarsal Háskóla Íslands. Upplestrarkeppnin er sem sagt á tímamótum því að sveitarfélög landsins hafa tekið við framkvæmd verkefnisins, en við fengum Ingibjörgu Einarsdóttur, formann Radda, sem séð hafa um verkefnið hingað til, eða í 26 ár, til þess að koma í þáttinn og segja okkur frá sögu þess og hvernig það hefur þróast fram að þessum tímamótum.

Elín Björk Jónasdóttir veðurfræðingur kom til okkar í mannlegt veðurspjall í dag. Þar talaði hún til dæmis um viðvörunarkerfið, gulu, appelsínugulu og rauðu viðvaranirnar.

Við fengum svo póstkort frá Magnúsi R. Einarssyni í dag. Magnús er búinn að vera á faraldsfæti undanfarnar vikur og segir okkur af ferðum sinum í þessu póstkorti, en hann byrjar á því að tala um vatnið í Leifsstöð. Þar kostar lítrinn af drykkjarvatni átta hundruð krónur sem honum finnst vera úr öllu hófi og kemur þess vegna með ókeypis hugmynd fyrir Leifsstöð sem myndi bæta ímynd hennar sem og Íslands. Hann segir ennfremur frá kynnum sínum af Budapest og litlu borginni Orange í Suður Frakklandi þar sem hann er staddur einmitt núna.

Tónlist í þættinum í dag:

Þjóðvegurinn / Elín Eyþórsdóttir og Pétur Ben (Magnús Eiríksson)

Good Vibrations / Beach Boys (Brian Wilson og Mike Love)

Veðurglöggur / Spilverk þjóðanna (Spilverk þjóðanna)

Islands in the Stream / Kenny Rogers & Dolly Parton (R.Gibb, B.Gibb & M.Gibb)

UMSJÓN: GUÐRÚN GUNNARSDÓTTIR OG GUNNAR HANSSON

Mamma, mamma, börn og bíll. Hinsegin fjölskyldur í fjölmiðlum 2010-2021 er nafnið á fyrirlestri sem fram fer á fimmtudaginn og er hluti af hádegisfyrirlestraröð RIKK, Rannsóknarstofnunar í jafnréttisfræðum við HÍ. Það er ekki nýtt að hinsegin fólk stofni fjölskyldu og ali upp börn en leið þess að fjölskyldumyndun hefur verið misgreið eftir tímabilum og samfélagsháttum. Í fyrirlestrinum er fjallað um rannsókn sem stendur yfir á birtingamyndum hinsegin fjölskyldna í prentmiðlum á Íslandi á árunum 2010-2021. Íris Ellenberger, sagnfræðingur og dósent við mennta- og vísindasvið Háskóla Íslands, flytur fyrirlesturinn ásamt Auði Magndís Auðardóttur, lektor í uppeldis- og menntunarfræði. Íris kom í þáttinn og sagði okkur meira frá þessu.

Stórsveit Reykjavíkur fagnar 30 ára afmæli með stórtónleikum í Eldborg 18. september og í tilefni af afmælinu býður Stórsveitin landsmönnum á ókeypis á tónleikana. Á þriggja áratuga ferli hefur Stórsveit Reykjavíkur haldið vel á þriðja hundrað tónleika og gefið út 10 geisladiska. Sveitin hefur lagt sig eftir fjölbreyttu verkefnavali, frumflutt mikið af nýrri íslenskri tónlist, leikið sögulega mikilvæga stórsveitatónlist, leikið fyrir börn og átt samstarf við fjölmarga aðila af sviði íslenskrar popptónlistar. Sveitin hefur margsinnis hlotið íslensku tónlistarverðlaunin. Sigurður Flosason kom í þáttinn í dag.

Marta Nordal leikhússtjóri Leikfélags Akureyrar kom svo til okkar og sagði frá því sem verður á fjölunum fyrir norðan í vetur og rifjaði upp skemmtilega sögu þegar hún stökk samdægurs inn í eitt af aðalhlutverkunum í söngleiknum Chicago í Borgarleikhúsinu árið 2004, en sá söngleikur er einmitt á dagskrá LA í vetur.

Tónlist í þættinum í dag:

Stella í orlofi / Diddú (Valgeir Guðjónsson)

Down South Camp Meeting / Manhattan Transfer (Irving Mills)

23 In the mood / Stórsveit Reykjavíkur (Glenn Miller, Andy Razaf og Joe Garland)

Razzle dazzle / Richard Gere (John Kander og Fred Ebb)

UMSJÓN: GUÐRÚN GUNNARSDÓTTIR OG GUNNAR HANSSON